1. Mase ipindo Jesus ase ilinggomi Jahowa susianni?

BANI borngin paima matei Jesus ipingkirhon ia do tantangan na laho masa bani ganup susianni. Halani holong uhurni bani sidea ipindo ia do ase ‘iramotkon Bapani susianni humbani sipangagou’. (Joh. 17:14, 15) Ibotoh Jesus do dobkonsi mulak holi ia hu surga, sai inunut Sibolis in do manlawan ganup halak na sihol mangkaholongi Jahowa. Ai ma na mambahen ganup hita porlu ilinggomi Jahowa.

2. Mase pos uhurta ibalosi Jahowa do tonggonta?

² Halani holong uhur ni Jahowa hubani Jesus, ibalosi Ia do tonggoni. Sonai ma homa hita, anggo marusaha hita mambahen malas uhur ni Jahowa, gabe holong ma uhur-Ni hubanta. Halani ai ibalosi janah ilinggomi Ia ma hita. Bapa na parholong do Jahowa ai. Jadi isarihon Ia do tongtong anak-Ni, halani anggo lang isarihon Ia gabe sambor ma holi goran-Ni.

3. Mase porlu hita ilinggomi Jahowa sonari on?

³ Tarlobih ma sonari on, porlu tumang do hita ilinggomi Jahowa. Mase? Dobkonsi idabuhkon Sibolis hun surga, “marah tumang” do ia. (Pangk. 12:12) Halani ai, marusaha ma ia mambahen ase iparburu halak i dunia on juakjuak ni Naibata. Iagan halak ai ma “songon na manggalang bani Naibata” do sidea ijai. (Joh. 16:2) Leganni ai, iparburu halak do hita halani lang ra mangihutkon hasomalan ni halak na mabuei. Hassi pe sonai lang pala mabiar hita. Mase? Bibel mangkatahon, “Hatengeran ni uhur do Tuhan in, pargogohan-Ni do nasiam anjaha ondingan-Ni dompak hajahaton.” (2 Tes. 3:3) Sonaha Jahowa manlinggomi hita? Ulas hita ma dua carani.

4. Domu bani Epesus 6:13-17, ase boi hita ilinggomi, aha do na ibere Jahowa hubanta?

⁴ Ibere Jahowa do hubanta baju porang ampa sinjata laho manlawan Sibolis. (Basa Epesus 6:13-17.) Dear tumang do ganup alat ai. Tapi maningon ipakei hita do ganupan ai ase boi hita ilinggomi. Sinjata aha ma na ibere hubanta? Ulas hita ma ai.

5. Aha do ikat pinggang hasintongan ai, janah mase maningon totap ipakei hita ai?

⁵ Gondit atap pe ikat pinggang hasintongan manggambarhon hasintongan na dong ibagas Bibel. Mase maningon totap ipakei hita ai? Halani “bapa ni ladung” do Sibolis ai. (Joh. 8:44) Humbani na hinan ronsi sonari, sai torus do ia marladung. Ia do homa “na pakahouhon haganup dunia on”! (Pangk. 12:9) Tapi halani ibotoh hita hasintongan ibagas Bibel, lang boi hita ioto-otoi Sibolis. Jadi sonaha carani hita mamakei ikat pinggang ai? Maningon tongtong ma iparlajari hita hasintongan pasal Jahowa. Maningon ibagas “tonduy ampa hasintongan” ma hita sanggah manombah Jahowa. Anjaha maningon jujur ma hita ibagas haganup pambahenan ampa parsahapta.​—Joh. 4:24; Ep. 4:25; Heb. 13:18.

6. Aha do baju bosi hapintoron ai, janah mase maningon ipakei hita ai?

⁶ Baju bosi hapintoron manggambarhon aturan ni Jahowa na pintor. Mase maningon ipakei hita baju bosi ai? Songon sahalak tentara hinan, maningon ipakei ia do baju bosini sanggah marporang laho manlinggomi jantungni atap tontonni humbani anak panah. Sonai ma homa aturan ni Jahowa boi manjaga uhurta ase ulang hita mangihutkon dunia on. (Pod. 4:23) Sasintongni maningon humbani gok ni uhur do hita mangkaholongi Jahowa ampa mangidangi-Si. (Mat. 22:36, 37) Tapi sihol do Sibolis ase hita mardua uhur. Marosuh do ia ase ihaholongi hita homa aha na dong i dunia on. (Jak. 4:4; 1 Joh. 2:15, 16) Janah anggo lang ra hita mangkorjahon ai, marusaha do Sibolis mangarsik-arsik hita ase ihorjahon hita aha na lang iharosuhkon Jahowa.

7. Sonaha hita boi mamakei baju bosi hapintoron?

⁷ Anggo idalankon hita aturan ni Jahowa dos do ai hita mamakei baju bosi hapintoron. (Ps. 97:10) Tapi ra do adong na mangahap borat tumang mandalankon aturan ni Jahowa. Pingkirhon ma dong sahalak tentara na mambuka baju bosini sanggah marporang ope ia halani nini uhurni borattu baju ai. Tontu gabe sambor do holi ujungni. Sonai ma holi na masa hubanta anggo lang ra be hita mandalankon aturan ni Jahowa. Tapi anggo holong uhurta Bani, lang borat iahap hita titah-Ni halani na manlinggomi hita do ai.​—1 Joh. 5:3.

8. Aha do artini mamakei sipatu ringgas ni uhur laho mangambilankon ambilan na madear?

⁸ Maningon ipakei hita do homa sipatu ringgas ni uhur laho mangambilankon ambilan na madear. Artini, maningon tongtong do ibaritahon hita ambilan na madear pasal Harajaon ni Naibata. Ai do na mambahen lambin toguh haporsayaonta. Tontu gabe ipatoguh ma hita sanggah mangidah hasomanta i sab dunia on na ringgas marbarita. Umpamani, marbarita do sidea sanggah i parhorjaan, i sikolah, i daerah bisnis, ampa hun rumah hu rumah. Marbarita do homa sidea sanggah marbalanja, hubani kaluargani, hasomanni, atap pe bani halak na itanda sidea. Tapi anggo mabiar hita janah lang be marbarita, usih ma ai songon tentara na mambuka sipatuni sanggah marporang. Gabe maborit ma naheini janah luha. Halani lang ra ia mandalankon parentah ni komandanni, gabe urah ma ia italuhon.

9. Mase maningon tongtong ipakei hita gantar haporsayaon?

⁹ Haporsayaonta hubani Jahowa ipausih do songon gantar atap pe perisai haporsayaon.  Porsaya do hita sai pasaudon ni Jahowa do ganup janji-Ni. Halani haporsayaonta ai, gabe ‘tarintopi hita ma haganup panah apuy ni parjahat in’. Mase maningon tongtong ipakei hita gantar ai? Ase hita lang ipakahou ajaran ni halak na murtad atap pe lang gabe mandolei sanggah dong na pabajan-bajankon hita. Anggo lang toguh haporsayaonta, gabe urah ma hita mangihutkon halak na mangkorjahon na salah. Tapi anggo toguh haporsayaonta, lang ra hita mangihutkon hasoman i sikolah atap pe i parhorjaan na mangarahkon hita mangkorjahon na salah. (1 Ptr. 3:15) Lang ra hita manjalo horja na manlanglangi hita mangidangi Jahowa age pe banggal gajini. (Heb. 13:5, 6) Gabe barani do hita totap mangidangi Jahowa hassi pe iparburu.​—1 Tes. 2:2.

10. Aha do tangkuluk bosi haluahon ai, janah mase maningon ipakei hita ai?

¹⁰ Tangkuluk bosi haluahon ai ma pangarapan na ibere Jahowa. Marjanji do Ia bereon-Ni do pasu-pasu anggo itangihon hita titah-Ni, janah paluahon-Ni do hita humbani hamatean. (1 Tes. 5:8; 1 Tim. 4:10; Tit. 1:1, 2) Tangkuluk bosi na ipakei tentara ai boi manlinggomi uluni sanggah marporang. Sonai homa pangarapanta boi manjaga pingkiranta. Aha do artini ai? Anggo tongtong irimangi hita pangarapan ai,  gabe lang mandolei hita age pe bahat sitarononta. Sonaha hita boi mamakei tangkuluk ai? Ibahen hita ma hamubahon ibagas pingkiranta ase sosok pakon harosuh ni Naibata. Umpamani ulang ma hita martenger ni uhur bani habayakon, tapi hubani Naibata ma.​—Ps. 26:2; 104:34; 1 Tim. 6:17.

11. Aha ma podang ni tonduy ai, janah mase maningon igunahon hita ai?

¹¹ Podang ni tonduy ai ma Hata ni Naibata na ibagas Bibel. Halani ibotoh hita hasintongan ibagas Bibel, ai ma na mangurupi hita lang be mangkorjahon na salah atap ipaoto-oto ajaran na palsu. (2 Kor. 10:4, 5; 2 Tim. 3:16, 17; Heb. 4:12) Halani ai, totap ma gunahon podang ai marhitei na marlajar Bibel janah mandalankon pelatihan na ibere organisasi. (2 Tim. 2:15) Domma iulas hita sinjata na ibere Naibata hubanta. Tapi dong ope na ibere Naibata laho manlinggomi hita. Aha ma ai?

12. Aha ope na ihaporluhon hita, janah mase?

¹² Ibotoh sahalak tentara do lang boi ia sahalaksi manlawan munsuh. Maningon iurupi tentara na legan do ia ase boi monang. Sonai homa hita lang boi hita monang anggo sahalakta dassa manlawan Sibolis. Porlu do homa hita iurupi na legan. Halani ai ma ibere Jahowa hubanta hasoman i sab dunia on laho mangurupi hita.​—1 Ptr. 2:17.

13. Domu bani Heber 10:24, 25, aha do gunani roh hu partumpuan?

¹³ Sada cara Jahowa mangurupi hita ai ma marhitei partumpuan. (Basa Heber 10:24, 25.) Ganup do hita ongga maretek ni uhur. Tapi, dob roh hita hu partumpuan gabe ipatoguh ma use uhurta. Sanggah itangar hita komentar ni sanina botou, gabe toguh ma haporsayaonta. Ambilan ampa pertunjukan na ibahen sidea boi mangurupi hita ase lambin ringgas mangidangi Jahowa. Leganni ai, boi do hita marsiojuran paima atap pe salosei acara partumpuan. (1 Tes. 5:14) Anjaha anggo marsiurupan hita ijai, lambin malas ma uhurta. (Lah. 20:35; Rom 1:11, 12) Marhitei acara partumpuan, ilatih do hita ase lambin pandei marbarita ampa mangajarhon Bibel. Umpamani, iulas hita do carani manggunahon publikasi na dong bani Alat laho Mangajarhon Bibel. Halani ai, dear ma persiapkon hita ganup na laho iulas i partumpuan. Sanggah martumpu, dear ma tangihon aha na iulas. Dob ai, dalankon ma aha na iparlajari hita. Anggo ibahen hita sonai, gabe “tentara ni Kristus Jesus na bujur” ma hita.​—2 Tim. 2:3.

14. Ise ope na boi mangurupi hita?

¹⁴ Dong homa marjuta-juta malekat na gogoh na boi mangurupi hita. Rimangi ma aha na ongga ibahen sada malekat. (Jes. 37:36) Dob ai, rimangi use aha na boi ibahen marjuta malekat. Tontu lang dong jolma atap pe malekat na jahat na boi manripaskon hita. (Panguh. 6:16) Anggo domma Jahowa na mangkasomani hita, age pe bahat munsuhta, lang boi sidea manaluhon hita. Anggo tongtong idingat hita ai, lang gabe mabiar hita age pe dong hasoman i sikolah, i parhorjaan, atap pe kaluarganta na marsogam ni uhur hubanta. Anggo totap idalankon ham harosuh ni Jahowa, ilinggomi Ia do ham.

15. Domu bani Jesaya 54:15, 17, mase lang dong na boi parontihon hita laho marbarita?

¹⁵ Sai totap do hita ihasogamkon halak i dunia on. Mase? Halani lang ra hita dihut marpolitik atap pe marporang. Leganni ai, ipatugah hita do homa pasal goran ni Naibata, janah pitah Harajaon-Ni dassa na boi parohkon hadameion, anjaha aturan ni Jahowa do na idalankon hita. Leganni ai, ipatugah hita do bani halak Sibolis do na manrajai dunia on janah ia do siparladung ampa sibunuh jolma.  (Joh. 8:44) Anjaha ihatahon hita do tongkin nari iripaskon ma haganup parjahat i dunia on. Hassi pe sonai lang boi Sibolis parontihon hita laho marbarita. Sai totap do hita boi mamuji Naibata lang soal aha na masa. Hassi pe gogoh Sibolis ai, lang boi ilanglangi ia hita laho pararatkon ambilan na madear hu sab dunia on. On boi ihorjahon hita halani ilinggomi Jahowa do hita.​—Basa Jesaya 54:15, 17.

16. Sonaha Jahowa paluahkon hita sadokah hamarsikon banggal?

¹⁶ Sadokah hamarsikon banggal, sai tongtong do ilinggomi Jahowa hita. Na parlobei, ilinggomi Ia do juakjuak-Ni sanggah ibahen Ia raja utara manripaskon Babilon na Bolon, ai ma ganup ugama palsu. (Pangk. 17:16-18; 18: 2, 4) Dob ai, ipaluah Ia do holi hita sanggah Ia manripaskon ganup parjahat i Harmagedon.​—Pangk. 7:9, 10; 16:14, 16.

17. Aha ma gunani anggo totap hita dohor bani Jahowa?

¹⁷ Anggo totap hita dohor bani Jahowa, lang boi iripaskon Sibolis hita. Tapi ia do holi na iripaskon Jahowa ronsi sadokah ni dokahni. (Rom 16:20) Halani ai, totap ma pakei baju porang ampa sinjata na ibere Jahowa. Urupi ma homa hasomanta ase monang manlawan Sibolis. Totap ma dalankon aturan ni Jahowa. Anggo ibahen nasiam sonai, pos ma uhurmu sai totap do ipargogohi janah ilinggomi Jahowa ham.​—Jes. 41:10.