1. Aha ma na ibotoh hita pasal Jahowa?

TONGTONG do Jahowa mangkaholongi juakjuak-Ni. Holong do homa uhur-Ni bani hapintoron. (Ps. 33:5) Jadi dong dua na boi mangapoh hita: (1) Pusok do uhur-Ni porini dong na mambahen na lang pintor bani juakjuak-Ni. (2) Marjanji do Ia lang paturuton-Ni masa ai ronsi sadokah ni dokahni. Uhumon-Ni do ganup halak na lang pintor. Bani seri na parlobei, * domma iulas hita anggo Titah na ibere Naibata marhitei si Musa patuduhkon holong-Ni bani halak Israel. Anjaha sihol do homa Ia mambahen na pintor tarlobih bani halak na galek. (5 Mus. 10:18) Humbani Titah ai, tangkas do taridah parduli tumang do Jahowa bani juakjuak-Ni.

2. Sungkun-sungkun aha ma na laho ibalosi hita?

² Tapi dobkonsi adong kuria Kristen bani tahun 33 M, Titah ni si Musa lang be idalankon. Hassi pe sonai, dong do ibere titah na baru bani halak Kristen. Janah maronjolan bani holong ampa hapintoron do titah ai. Bani artikel on iulas hita ma aha do titah ai. Dob ai balosi hita ma sungkun-sungkun on: Mase ihatahon titah ai maronjolan bani holong? Sonaha titah ai mangojur halak ase mangkorjahon na pintor? Janah sonaha halak na ibere tanggung jawab boi mandalankon titah ai?

3. Aha do “titah ni Kristus”, na dong isobut bani Galatia 6:2?

³ Basa Galatia 6:2. “Titah ni Kristus” do na idalankon  halak Kristen. Tapi, lang dong isuratkon Jesus daftar aturan hubani susianni. Tapi ibere ia do tugah-tugah, parentah, ampa prinsip na boi manogu-nogu sidea. Sasintongni aha pe na iajarhon Jesus isobut do ai “titah ni Kristus”. Ase lambin iarusi hita, ulas hita ma ai bani paragrap-paragrap na mangihut.

4-5. Marhitei aha do Jesus mangajar, janah nantigan?

⁴ Marhitei aha do Jesus mangajar? Jesus mangajari marhitei aha na ihatahon ampa siusihan na ibahen ia. Gok kuasa do hata ampa pambahenanni. Iajarhon do hasintongan pasal Naibata ampa tujuan ni hagoluhan on. Ipatugah do homa marhitei Harajaon ni Naibata salpu ma ganup sitaronon. (Luk. 24:19) Humbani pambahenanni, iajarhon do bani susianni aha na maningon ibahen sidea.​—Joh. 13:15.

⁵ Nantigan do Jesus mangajar? Ia mangajari sadokah pangidangionni i tanoh on. (Mat. 4:23) Anjaha dob ipapuho pe, tong do ia mangajar. Umpamani, ipataridah do dirini bani hira-hira 500 susianni, anjaha iparentahkon do sidea ase mambahen halak gabe susianni. (Mat. 28:19, 20; 1 Kor. 15:6) Dobkonsi mulak hu surga, ia ma na gabe kopala ni kuria. Hun surga pe tong do ia mambere tugah-tugah bani susianni. Umpamani bani tahun 96 M, iparentahkon Kristus do si Johannes ase mangojur janah mamodahi halak Kristen na iminaki.​—Kol. 1:18; Pangk. 1:1.

6-7. (a) Ija do pangajaran ni Jesus isuratkon? (b) Sonaha hita patuduhkon anggo hita unduk bani titah ni Kristus?

⁶ Ija do pangajaran ni Jesus isuratkon? Bani ompat injil, isuratkon do ganup na ihatahon ampa na ibahen Jesus. Leganni ai, ganup buku na dong ibagas Kitab-Kitab Yunani Kristen, boi mangurupi hita mangarusi “pingkiran ni Kristus”. Mase? Halani sidea na manuratkon buku ai itogu-togu tonduy na pansing janah sidea pe mangihutkon “pingkiran ni Kristus”.​—1 Kor. 2:16.

⁷ Parlajaranni: Marguna tumang do titah ni Kristus ai ibagas hagoluhanta. Jadi, porlu do idalankon hita ai sanggah i rumah, i sikolah, ampa i kuria. Ase  ibotoh hita titah ai, basa janah rimangi ma Kitab-Kitab Yunani Kristen. Anggo unduk hita bani titah ai, tontu idalankon hita do tugah-tugah, parentah, ampa prinsip na iajarhon Jesus. Anggo sonai ibahen hita, dos do artini hita unduk bani Jahowa, Naibata na parholong in, halani Ia do harorohan ni ganup na iajarhon Jesus.​—Joh. 8:28.

8. Maronjolan hubani aha do titah ni Kristus?

⁸ Anggo toguh onjolan ni sada rumah, tontu gabe sonang ma halak na tading ibagas rumah ai. Sonai homa anggo toguh onjolan ni sada titah, tontu gabe sonang ma pangahap ni halak na mandalankon titah ai. Maronjolan hubani holong do titah ni Kristus, anjaha ai do onjolan na sidearan. Hunja do ibotoh hita ai?

9-10. Sonaha Jesus patuduhkon holong, janah sonaha hita mangusihisi?

⁹ Na parlobei, taridah do holong ni Jesus ibagas ganup pambahenanni. Halani holong gabe maidop ma uhurni bani na legan. Iajari do buei halak, ipamalum do na boritan, ibere do mangan halak na loheian, janah ipapuho do halak na matei. (Mat. 14:14; 15:32-38; Mrk. 6:34; Luk. 7:11-15) Hassi pe sibuk, sirsir do ia palobeihon haporluan ni halak marimbangkon dirini sandiri. Tapi, holong na sibanggalan na ipatuduh Jesus ai ma mambere hosahni laho mangkopkop jolma.​—Joh. 15:13.

¹⁰ Parlajaranni: Songon Jesus, palobei hita ma haporluan ni na legan marimbangkon dirinta sandiri. Marusaha ma hita patuduhkon idop ni uhur sanggah marbarita ampa mangajari halak. Anggo ibahen hita sonai, taridah ma na unduk do hita bani titah ni Kristus.

11-12. (a) Sonaha Jahowa patuduhkon holong-Ni hubanta? (b) Sonaha hita boi mangusihi holong ni Jahowa?

¹¹ Na paduahon, sanggah Jesus i tanoh on, ipatuduh ia do anggo Jahowa mangkaholongi juakjuak-Ni, anjaha isarihon Bapani do sidea. Jesus mangajarhon harga do susianni i lobei ni Bapani. (Mat. 10:31) Marosuh do Jahowa anggo dong na manadingkon hajahatonni janah mulak use gabe panombah-Ni. (Luk. 15:7, 10) Halani holong-Ni, ibere do Anak-Ni bahen tobusan bani buei jolma.​—Joh. 3:16.

¹² Parlajaranni: Sonaha hita boi mangusihi holong ni Jahowa? (Ep. 5:1, 2) Harga ma bahen hita ganup sanina botou. Anggo dong sidea na songon “biribiri na magou” janah mulak use hu kuria, sirsir ma hita manjalo sidea. (Ps. 119:176) Anggo dong na hurangan, sirsir ma hita mangurupi domu bani haporluan ni sidea. (1 Joh. 3:17) Anggo ihaholongi hita halak na legan, on patuduhkon hita unduk bani titah ni Kristus.

13-14. (a) Domu bani Johannes 13:34, 35, parentah aha do na ibere Jesus bani susianni, janah mase ai isobut titah na baru? (b) Sonaha hita boi mandalankon titah na baru ai?

¹³ Na patoluhon, iparentahkon Jesus do ase susianni marsihaholongan. (Basa Johannes 13:34, 35.) Isobut do ai titah na baru halani holong na ipatuduh ijon, lang sarupa pakon na isuruh bani Titah ni si Musa. Ijon maningon ihaholongi hita do hasomanta sahaporsayaon songon Jesus mangkaholongi hita. Halani ai maningon sirsir ma hita mambahen pengorbanan. * Maningon ihaholongi  hita ma sidea lobih humbani dirinta sandiri. Gari hosahta pe ra do ibere hita laho mangkopkop sidea, songon na ibahen Jesus hubanta.

¹⁴ Parlajaranni: Sonaha hita boi mandalankon titah na baru ai? Halani holong, sirsir do hita mambere hosahta laho mangkopkop sanina botou. Tapi humbani na otik pe boi do ipatuduh hita holong na sisonai. Umpamani, sirsir hita mangalop ampa manaruhkon sanina botou na dob matua hu partumpuan. Ra hita palobeihon haporluan ni sanina botou ase malas uhur ni sidea. Atap ra hita mambuat cuti laho mangurupi sanina botou na hona bencana. Anggo ibahen hita sonai, damei anjaha sonang ma pangahap ni ganup halak i kuria. On patuduhkon hita unduk bani titah ni Kristus.

15-17. (a) Sonaha Jesus patuduhkon hapintoron? (b) Sonaha hita mangusihi Jesus?

¹⁵ Hata “hapintoron” ibagas Bibel mangartihon mangkorjahon na pintor i lobei ni Naibata janah lang sitonggor jumbak. Jadi sonaha titah ni Kristus mangojur halak ase mangkorjahon na pintor?

¹⁶ Na parlobei, pardiateihon ma sonaha pambahenan ni Jesus patuduhkon hapintoronni. Ijia, somal do pambobai ni halak Jahudi mangapasi halak Jahudi na lang marsikolah i sikolah rabi. Anjaha layas do sidea bani naboru. Tapi anggo Jesus tongtong do mambahen na pintor janah lang manonggor jumbak bani na legan. Age pe lang halak Jahudi, tapi anggo porsaya do hu bani, ra do ia mangurupisi. (Mat. 8:5-10, 13) Marbarita do ia bani halak na bayak ampa na miskin. (Mat. 11:5; Luk. 19:2, 9) Lang ongga kasar ia dompak naboru. Tapi bujur janah hormat do ia bani naboru, tarmasuk bani halak na iapasi.​—Luk. 7:37-39, 44-50.

¹⁷ Parlajaranni: Songon Jesus, ulang ma hita manonggor jumbak. Sirsir ma hita marbarita bani ise pe na ra manangar lang soal aha ugamani, miskin atap bayak sidea. Nasiam sanina, hormat ma bani naboru. Anggo sonai ibahen hita, on patuduhkon hita unduk bani titah ni Kristus.

18-19. Aha do na iajarhon Jesus pasal hapintoron, janah aha ma parlajaranni hubanta?

¹⁸ Na paduahon, pardiateihon ma prinsip na iajarhon Jesus na mangurupi susianni ase mambahen na pintor bani halak. (Mat. 7:12) Ia mangajarhon, sonaha hita marosuh ibahen halak hubanta, sonai ma bahen hita bani sidea. Tontu marosuh do hita anggo pintor pambahenan ni halak hubanta. Halani ai, maningon pintor ma pambahenanta bani halak na legan, ase sonai homa ibahen sidea hubanta. Tapi sonaha porini lang sonai ibahen sidea? Songon na ihatahon Jesus, ‘pintoran ni Naibata do ganup na mandilo-Si arian pakon borngin’. (Luk. 18:6, 7) Jadi sada janji do na ipatugah Jesus ai. Hassi pe bahat sitarononta bani panorang parpudi on, ibotoh Jahowa do ai. Janah papintoron-Ni do holi ai bani panorang na topat.​—2 Tes. 1:6.

¹⁹ Parlajaranni: Anggo idalankon hita prinsip na iajarhon Jesus ai, tontu pintor ma pambahenanta bani halak. Anjaha porini marsitaronon hita halani lang pintor pambahenan ni halak hubanta, tarapoh do uhurta mambotoh ipapintor Jahowa do holi ganupan ai.

20-21. (a) Sonaha sidea na ibere tanggung jawab boi mandalankon titah ni Kristus? (b) Sonaha suami pakon bapa boi mangusihi holong ni Kristus?

²⁰ Sonaha sidea na ibere tanggung jawab boi mandalankon titah ni Kristus? Halani maronjolan bani holong do titah ai, maningon hormat janah ibagas holong ma sidea marparlahou. Dingat ma aha pe na ibahen nasiam, sihol do Kristus ase ihorjahon nasiam ai ibagas holong.

²¹ Ibagas kaluarga. Maningon ihaholongi suami ma istrini “songon pambahen ni Kristus bani kuria in”. (Ep. 5:25, 28, 29) Songon Jesus, maningon ipalobei suami ma na porlu bani istrini marimbangkon dirini sandiri. Anggo ibahen ia sonai, gabe hormat ma istrini hu bani. Tapi bani piga-piga sanina, ra do lang urah mambahen na sisonai halani ia ipagodang ibagas kaluarga na lang somal patuduhkon holong atap pe mambahen na pintor. Hassi pe sonai, anggo sihol do suami unduk bani titah ni Kristus, maningon ra ma ia mambahen hamubahon. Leganni ai sada bapa na parholong, tontu lang ra mambahen borit uhur ni niombahni, age marhitei parsahap atap pambahenan. (Ep. 4:31) Tapi ipatuduh ia do holongni bani niombahni ase damei pangahap ni sidea janah sonang. Hasilni, gabe ihaholongi niombahni ai ma ia janah porsaya hu bani.

22. Domu bani 1 Petrus 5:1-3, ise do simada “biribiri”, janah aha do na maningon ibahen sintua bani biribiri ai?

²² Ibagas kuria. Maningon idingat sintua ma sedo sidea simada “biribiri”. (Joh. 10:16; basa 1 Petrus 5:1-3.) Sanggah ihatahon “hulanan ni Naibata” ampa “hasoman na niondoskon”, on patuduhkon Jahowa do simada sanina botou. Sihol  do Jahowa ase ganup sintua mangkaholongi janah maridop ni uhur bani biribiri-Ni. (1 Tes. 2:7, 8) Anggo iparmahani sintua ganup sanina botou ibagas holong, gabe marosuh ma Jahowa mangidah sidea. Anjaha sanina botou pe gabe holong janah hormat ma bani sidea.

23-24. (a) Anggo dong na mambahen dousa, aha ma na porlu bahenon ni sintua? (b) Aha do na porlu itimbangi sintua sanggah mamareksa sada parkara?

²³ Anggo dong na mambahen dousa na banggal, aha do tugas ni sintua? Legan do tugas ni sintua sonari on pakon pangintuai i Israel hinan. Anggo pangintuai i Israel hinan, lang pitah mangurupi halak ase dohor bani Jahowa. Marusaha do homa sidea pasaloseihon ganup parsoalan, tarmasuk hajahaton ampa na leganni. Tapi anggo sonari, pitah parkara na markaitan hubani partonduyon dassa na iurus sintua. Anggo parkara hajahaton ampa na leganni, ibotoh sidea pamarentah do na itotapkon Jahowa laho mangurus ai. Tarmasuk ma ai manguhum atap pe pamasukkon na mambahen hajahaton ai hubagas penjara.​—Rom 13:1-4.

²⁴ Anggo dong na mambahen dousa, aha ma na porlu ibahen sintua? Sanggah mamareksa parkara ai, maningon iihutkon sintua-sintua do prinsip ni Bibel paima mambahen haputusan. Maningon idingat sidea ma maronjolan bani holong do titah ni Kristus ai. Halani holong, ipingkirhon sintua ma: Aha do na porlu ibahen sidea laho mangurupi ise pe i kuria na ongga gabe korban? Ai dong do panosalan ni parjahat ai? Ai boi do ia iurupi ase mardear use pakon Jahowa?

25. Aha ma na laho iulas hita bani artikel na mangihut?

²⁵ Tontu martarima kasih tumang do hita halani domma ibere banta titah ni Kristus. Anggo marusaha hita mandalankon ai, gabe dong ma hadameion ibagas kuria. Marmalas ni uhur ma ganupan halani marsihaholongan. Tapi sonari on, manggoluh ibagas dunia na gok “parjahat” do hita, janah “sai na lambin jahat” do sidea. (2 Tim. 3:13) Jadi maningon jaga ma hita. Sonaha halak Kristen boi patuduhkon hapintoron ni Jahowa sanggah dong na mambahen pelecehan seksual bani dakdanak? Ulas hita ma pasal ai bani artikel na mangihut.