1. Mase sipata lang ra halak marlajar?

SUNSAH do sonari on laho mansarihon hagoluhan siganup ari. Dong sanina botou na maningon dokah mulak halani bahat horjani. Dong homa na daoh rumahni hun parhorjaan. Leganni ai, dong homa na borat tumang horjani. Tontu ganupan ai mambahen loja tumang sidea. Halani ai, gabe lang dong be gogoh ni sidea laho marlajar.

2. Sadihari do panorang ibahen nasiam laho marlajar?

² Tapi maningon iparlajari hita do Bibel ampa publikasi. Ai do na mangurupi hita ase dohor bani Jahowa anjaha boi mandapot hagoluhan sadokah ni dokahni. (1 Tim. 4:15) Dong do sanina botou na marlajar bani sogod ni ari dobkonsi puho, halani pangahap ni sidea domma mulak gogohni. Leganni ai, dong homa na marlajar janah manrimangi isi ni Bibel bani borngin ni ari paima modom sidea.

3-4. Parubahan aha do na ibahen Pangurus Pusat, janah mase?

³ Tangkas ma, ponting tumang do pasirsirhon panorang laho marlajar. Tapi aha ma na maningon iparlajari hita? Ra do nini uhurmu, ‘Bahat tumang do na laho ibasa, lang tarbasa ahu ganupan ai.’ Dong do sanina botou na boi mambasa ganupan publikasi ampa manonton video na ipasirsir organisasi. Tapi lang ganupan boi mambahen na sisonai. Iarusi Pangurus Pusat do ai. Halani ai ma baru-baru on ihurangi ma bahan-bahan na laho iparlajari.

⁴ Umpamani, lang be iluarhon Buku Tahunan Saksi-Saksi Yehuwa halani domma bahat pangalaman na boi patoguhkon uhurta i jw.org^® ampa i JW Broadcasting^®. Majallah Menara Pengawal pakon Sadarlah! pe, iluarhon pitah tolu hali ibagas satahun. Parubahan ai ibahen sedo ase boi hita mangkorjahon na legan. Tapi, ganupan ai ibahen  ase boi hita mampardiateihon “na ija siporlunan”. (Pil. 1:10) Sonari ulas hita ma sonaha hita manontuhon na ija do na sipontingan iparlajari. Janah sonaha hita boi mandapot guna sanggah marlajar Bibel.

5-6. Aha do na maningon iparlajari hita?

⁵ Aha do na sipontingan iparlajari hita? Bani ganup ari, maningon iparlajari hita ma Bibel. Sonari bani pambasaan Bibel mingguan domma ihurangi bahatni ayat na laho ibasa. Tujuanni, ase hita lang pitah mambasa ayat-ayat ai, tapi ase boi hita mambahen riset janah marimbagaskon isini. Anggo sonai ibahen hita, lambin iarusi hita ma isi ni Bibel janah lambin dohor ma hita bani Jahowa.​—Ps. 19:15.

⁶ Aha ope na porlu iparlajari hita? Tontu marlajar do hita sanggah mambahen persiapan majallah Ambilan na Madear ampa buku Parlajaran Bibel Kuria. Porlu do homa iparlajari hita hatorangan na laho iulas bani partumpuan tengah pekan. Leganni ai, porlu do homa ibasa hita majallah Menara Pengawal pakon Sadarlah!

7. Mase lang pala maretek ni uhur hita anggo lang boi mambasa ampa manonton ganupan na ipasirsir i jw.org ampa i JW Broadcasting?

⁷ Tapi, ra do ihatahon ham, ‘Sonaha bani jw.org ampa JW Broadcasting? Bahat tumang hatorangan ampa video ijai!’ Tongon do ai. Usih do ai songon i Rumah Makan, bahat do ijai ipasirsir sipanganon. Porini mangan nasiam ijai, tontu lang ganupan sipanganon na dong ijai boi idai nasiam. Jadi pitah piga-piga sipanganon dassa na ipilih nasiam. Sonai ma homa, anggo lang boi ibasa ampa itonton nasiam ganupan publikasinta, ulang ma maretek ni uhur. Pilih ma na ija do na boi ibasa atap na itonton nasiam. Sonari ulas hita ma aha do na maningon bahenonta sanggah marlajar. Anjaha, sonaha ase parlajaran ai parrohkon guna hubanta.

8. Sonaha hita mambahen persiapan majallah Ambilan na Madear, janah aha do gunani ai bani nasiam?

⁸ Sanggah marlajar, ulang pitah mambasa tumang atap pe manggarisi balos ni sungkun-sungkun parlajaran. Tapi marusaha ma mangarusi aha na iparlajari ase boi mandapot guna humbani parlajaran ai. Umpamani, sanggah mambahen persiapan majallah Ambilan na Madear, basa ma lobei bagian “Na laho Iulas” na dong bani awal artikel. Pardiateihon ma judul artikel, subjudul, ampa sungkun-sungkun tinjauan. Dob ai, asok-asok ma basa artikel ai. Sanggah mambasa pardiateihon ma kalimat-kalimat na patorangkon parlajaran na iulas bani paragrap ai. Somalni kalimat sisonai dong bani awal paragrap. Dob ibasa nasiam artikel ai, pingkirhon ma sonaha tiap paragrap patorangkon subjudul janah aha do kaitanni hubani tema artikel. Anggo dong hatorangan na lang sai iarusi nasiam, surat ma ai ase boi holi iriset.

9. (a) Sanggah persiapan, mase maningon ipardiateihon hita ganup ayat, janah sonaha carani? (b) Domu bani Josua 1:8, sanggah mambasa Bibel aha ma na porlu ibahen hita?

⁹ Sanggah hita mangulas parlajaran Ambilan na Madear i partumpuan, iurupi do hita ase mangarusi isi ni Bibel. Halani ai, maningon ipardiateihon hita ma ganup ayat na dong bani artikel  ai, tarlobih ma ayat-ayat na laho ibasahon. Pingkirhon ma sonaha kata kunci atap kalimat bani ayat ai ipatorang ibagas paragrap. Leganni ai, rimangi ma sonaha nasiam boi mandalankon ayat ai ibagas goluhmu.​—Basa Josua 1:8.

10. Domu bani Heber 5:14, mase namatoras porlu mangurupi niombah sonaha cara ni marlajar ampa mambahen riset sanggah parlajaran Bibel kaluarga?

¹⁰ Nasiam namatoras, porlu do homa mamingkirhon sonaha mambahen Parlajaran Bibel Kaluarga na mantap janah iharosuhkon niombah. Sanggah mamilih bahan na laho iulas, pingkirhon nasiam ma bahan na sosok bani umur ampa harosuh ni sidea. Umpamani, boi do nasiam mambahen drama pasal sarita na adong bani Bibel. Tapi lang maningon tiap minggu ibahen nasiam sonai. Hassi pe nasiam boi manonton JW Broadcasting atap mambahen proyek-proyek, songon contoh parau ni si Noak, tapi na sipontingan ajari ma niombah sonaha carani marlajar na dear. Ajari ma sidea sonaha mambahen persiapan parlajaran na laho iulas i partumpuan. Atap sonaha mambahen riset sanggah dong parsoalan i sikolah. (Basa Heber 5:14.) Anggo ipasomal niombah marlajar i rumah, on ma na mangurupi sidea ase mampardiateihon acara i partumpuan ampa i kebaktian, hassi pe lang dong video iputar.

11. Mase maningon iajari hita parlajar Bibelta mambahen riset ampa mambahen parlajaran na dear?

¹¹ Parlajar Bibelta pe porlu do homa mambotoh sonaha carani marlajar. Sanggah baru ope sidea marlajar, domma malas uhurta mangidah sidea manggarisi balosni sungkun-sungkun bani buku parlajaranni atap bani buku na iulas i partumpuan. Tapi, porlu do hita mangajari sidea sonaha mambahen riset ampa mambahen parlajaran na dear. Jadi, sanggah dong parsoalanni, lang mintor isungkun parlajar Bibelta ai halak i kuria, aha na maningon bahenonni. Tapi, domma ibotoh ia mangindahi hatorangan hun publikasinta na boi mangurupisi.

12. Aha do tujuanta marlajar?

¹² Porini lang marosuh ham marlajar, ulang ma mintor etek uhurmu. Anggo totap ham marusaha, ujungni boi do gabe marosuh ham marlajar. Mulai ma marlajar tongkin, dokah-dokah boi  do iambahi ham panorangni. Pingkirhon ma homa aha do tujuanmu marlajar. Tujuanta na sipontingan laho marlajar ai ma ase lambin dohor bani Jahowa. Anjaha sihol do homa hita marlajar ase boi mambalosi sungkun-sungkun ni halak atap mambahen riset sanggah dong parsoalan.

13. (a) Sonaha na maposo boi patorangkon haporsayaonni i sikolah? (b) Sanggah patorangkon ai, sonaha hanima mangihutkon Kolosse 4:6?

¹³ Hanima na maposo, tontu bahat do tantangan i sikolah. Umpamani, halani lang dihut mandodingkon lagu kebangsaan, ra do gabe irisai hasoman hanima. Tontu sihol do hanima patugahkon hasintongan ni Bibel bani sidea. Tapi ra do pangahapnima lang pandei hanima patorangkon ai. Halani ai, bahen ma riset! Pindahi ma hatorangan hun publikasinta. Sanggah mambahen riset, bahen ma dua tujuan: (1) laho patoguhkon haporsayaonnima mase maningon pulig hanima hun dunia on, anjaha (2) ase ibotoh hanima sonaha patorangkon ai hubani hasoman. (Joh. 17:16; 1 Ptr. 3:15) Tapi paima mambahen riset, pingkirhon ma aha do hira-hira na laho ihatahon sidea ase dihut hanima mandodingkon lagu kebangsaan ai. Anggo domma ibahen hanima sonai, ujungni gabe ibotoh hanima ma, ra do lang songon na ibayangkon hanima sunsahni patugahkon haporsayaonmu. Bahat do halak na mandodingkon lagu kebangsaan halani hormat hubani sidea na marsuruh mandodingkon ai. Jadi anggo domma dapotnima sada atap dua hatorangan na boi ipatugah hanima hubani sidea, ra do gabe dong hasomanmu na sihol marlajar Bibel.​—Basa Kolosse 4:6.

14-16. (a) Sanggah mamparlajari buku na lang sai itanda nasiam, aha ma na boi ibahen ham? (b) Patorang ma sonaha ayat-ayat bani refrensi silang boi mangurupi nasiam mangarusi buku Amos. (Tonggor ma kotak “ Bayangkon ma Saritani!”)

¹⁴ Bayangkon ma bani jadwal pambasaan Bibel i partumpuan na laho roh, hita mambasa janah mangulas buku na isurat sada nabi. Tapi, lang sai itanda ham nabi ai. Jadi marusaha ma ase lambin marosuh ham mambotoh aha do na isuratkon nabi ai. Sonaha carani?

¹⁵ Sungkun ma dirimu, ‘Aha do na hubotoh pasal panurat ni buku on? Ise do ia, ija do ia tading, anjaha aha do horjani?’ Lambin bahat na ibotoh hita pasalsi, lambin iarusi hita ma aha na isuratkon ampa limbaga na igunahon ia. Jadi, sanggah mambasa Bibel, pardiateihon ma kalimat na mangurupi nasiam mambotoh halak na sonaha do ia sasintongni.

¹⁶ Dob ai dear do homa anggo ipindahi ham ija buku ai isuratkon. On boi itonggor ham ibagas “Daftar Buku-Buku Alkitab”, bani Kitab Suci Terjemahan Dunia Baru. Tonggor ma homa tabel nabi ampa raja, i Lampiran (A6). Anggo na iparlajari ai buku na isuratkon nabi-nabi, pindahi ma homa pasal situasi na masa ijia. Sipasingat aha do na ibere nabi ai hubani halak na ijia? Ise do nabi na mangidangi sanggah ai? Ase lambin iarusi ham situasini, boi do homa ipindahi ham hatorangan hun buku na legan. Umpamani, laho mangarusi situasi sanggah nabi Amos mangidangi, basa ma 2 Raja-raja 14:25-28 ampa 2 Kronika 26:1-15. *  Sobali ai, boi do homa itonggor ham buku Hosea. Ra, nabi Hosea mangidangi rap pakon nabi Amos. Anggo ipindahi ham hatorangan hun buku na legan, lambin iarusi ham ma aha na masa bani panorang ni nabi Amos.​—Hos. 1:1-11.

17-18. Patugah ma contoh na adong bani paragrap on, atap na ongga ibahen nasiam, na patuduhkon sonaha hatorangan na lang sai ponting boi mambahen hita marosuh marlajar Bibel.

¹⁷ Sanggah mambasa Bibel hita, dear do anggo marosuh hita mamparlajari lambin bahat. Umpamani bayangkon ma sonari nasiam mambasa panjahion na isurat bani Sakaria bindu 12, na patugahkon pasal parmatei ni Mesias. (Sak. 12:10) Das ma nasiam bani ayat 12. Ijai dong isurat pusok tumang do uhur ni “ginompar ni si Natan na saompung” halani matei Mesias. Soh ma nasiam tongkin, janah pardiateihon ma, ra do adong hatorangan na sadokah lang sai ponting iahap hita. Umpamani, ‘Aha do kaitanni ginompar ni si Natan pakon mesias tene? Ai dong do hatorangan na legan pasal ai?’ Bahen ma riset laho mangindahi balosni ai. Pardiateihon ma, bani Bibel dong tanda kurung dobkonsi ayat 12. Ijai dong isurat 2 Samuel 5:14 pakon Lukas 3:31. Ijai ipatugah do anggo si Natan ai anak ni si Daud. Leganni ai, sanggah ibasa nasiam Lukas 3:23, ibotoh nasiam ma anggo Jesus ai ginomparni si Natan marhitei si Maria. (Tonggor ma Majallah Menara Pengawal, No. 3 2016, alm. 9 par. 1-3, bani artikel “Tahukah Anda?”) Lambin marosuh ma nasiam marlajar halani tambah use bukti na patuduhkon anggo Jesus ai ginomparni si Daud. (Mat. 22:42) Hassi pe lobih 20 anak ni si Daud, tapi  mantap tene, boi ipatugah si Sakaria anggo ginompar ni si Natan do na marpusok ni uhur halani hamateian ni Jesus.

¹⁸ Pardiateihon ma contoh na legan. Bani buku Lukas bindu sada isurat anggo malekat Gabriel manjumpahi si Maria laho patugahkon pasal anak na laho itubuhkon ia. Nini do, “Banggal do ia use, goranon do ia Anak ni Sitimbulan in; bereon ni Naibata do bani paratas ni si Daud, bapani ai. Rajaanni do ginompar ni si Jakob sadokah ni dokahni.” (Luk. 1:32, 33) Ra, na ipardiateihon hita pitah kalimat na mangkatahon anggo Jesus ai “Anak ni Sitimbulan”. Hape ihatahon si Gabriel do homa anggo Jesus holi gabe Raja. Jadi rimangi ma, aha do na ipingkirhon si Maria sanggah si Gabriel mangkatahon ai. Ai adong do iagan si Maria anggo Jesus do holi na manggantihon Raja Herodes? Anggo gabe Raja Jesus, gabe inang ni raja ma si Maria janah tading i istana ma holi ia pakon kaluargani. Tapi bani Bibel lang dong ipatugah sonai pingkiran ni si Maria. Lang ongga homa ibasa hita anggo si Maria mangindo pangkat songon na ibahen dua susian ni Jesus. (Mat. 20:20-23) Hatorangan on mambahen hita lambin porsaya anggo si Maria ai tongon do halak na toruh maruhur!

19-20. Domu bani Jakobus 1:22-25 ampa bindu 4:8, aha do tujuanta marlajar Bibel?

¹⁹ Jadi, dingat ma tujuanta na sipontingan sanggah mamparlajari Bibel ampa publikasinta. Hita sihol ase lambin dohor bani Jahowa. Leganni ai, hita sihol mambotoh halak na “sonaha” do hita, janah parubahan aha do na maningon ibahen hita laho pamalaskon uhur ni Jahowa. (Basa Jakobus 1:22-25; 4:8.) Halani ai paima marlajar hita, pindo ma pangurupion ni Jahowa marhitei tonduy na pansing. Pindo ma homa ase boi hita mandapot guna humbani aha na iparlajari hita.

²⁰ Andohar ma ganupan hita usih songon juakjuak ni Naibata na igambarhon bani buku Psalmen, “Titah ni Jahowa do harosuh ni uhurni, sai titah-Ni ai do ipingkiri arian pakon borngin. . . . Sagala hinorjahonni manjadi do.”​—Ps. 1:2, 3.