Piga-piga panjahaion na ipatugah ijon dong na tarjadi bani panorang na sarupa. On patuduhkon anggo hita manggoluh bani panorang parpudi.​—Dan. 12:4.

• Ayat Pangk. 11:7; 12:13, 17; 13:1-8, 12

  Panjahaion Sadokah marribu tahun, domma irajai “binatang” ai halak i dunia on. Bani ari parpudi ugahan ma ulu na papituhon humbani binatang ai. Dob ai, malum ma ugahni, janah iihutkon ‘ganup na i tanoh on’ ma binatang ai. Igunahon Sibolis do ia laho mamorangi ‘ginompar na tading ai’.

  Parsaudni Dobkonsi Bah na Sumbang, munsuh ni Jahowa do na manrajai tanoh on. Dobkonsi 3.000 tahun, Inggris ma na markuasa i dunia on. Sadokah Porang Dunia I, gabe galek ma ia. Tapi gabe margogoh ma use ia dob marsada pakon Amerika Serikat. Sadokah ari parpudi, igunahon Sibolis do pamarentahan ni dunia on laho mangarsik-arsik juakjuak ni Naibata.

• Ayat Dan. 11:25-45

  Panjahaion Marsilawanan do raja utara pakon raja selatan sadokah panorang parpudi.

  Parsaudni Marsilawanan do Jerman pakon Inggris ampa Amerika Serikat. Bani tahun 1945 gabe raja utara ma Uni Soviet pakon sekutuni. Tahun 1991, lang dong be Uni Soviet. Jadi Rusia pakon sekutuni ma na gabe raja utara.

• Ayat Jes. 61:1; Mal. 3:1; Luk. 4:18

  Panjahaion Isuruh Jahowa ma ‘suruhan-Ni’ laho ‘pasirsirhon dalan’ paima jongjong Harajaon ni Mesianik. Sidea ma na “mangambilankon ambilan na madear bani halak na madoyuk”.

  Parsaudni Humbani tahun 1870, ringgas do si C. T. Russell pakon hasomanni patorangkon aha na iajarhon Bibel. Bani tahun 1881, ibotoh sidea ma maningon marbarita do juakjuak ni Naibata. Ibahen sidea ma artikel na marjudul “Ipindahi 1.000 Parbarita” ampa “Iminaki laho Marbarita”.

• Ayat Mat. 13:24-30, 36-43

  Panjahaion Isaburhon sada dalahi ma omei i juma. Dob ai, roh ma munsuh manaburhon simaromei-omei. Tubuh ma simaromei-omei ai janah lang taridah be omei ai. Tapi sanggah pariama, ipapulig ma simaromei-omei ai humbani omei.

  Parsaudni Humbani tahun 1870, lambin tangkas ma taridah parlegananni halak Kristen na sintong pakon na lang sintong. Sadokah panorang parpudi, ipatumpu ma sidea janah ipapulig humbani halak Kristen na lang sintong.

• Ayat Dan. 2:31-33, 41-43

  Panjahaion Dong sada patung na ibahen humbani marmasam logam. Naheini ibahen humbani bosi pakon tanoh liat.

  Parsaudni Tanoh liat ai manggambarhon rayat na irajai pamarentah Inggris pakon Amerika, janah ilawan sidea do pamarentah. Halani ai, gabe galek ma pamarentahan ai.

• Ayat Mat. 13:30; 24:14, 45; 28:19, 20

  Panjahaion Ipatumpu ma “omei” ai hubagas “sopou”, janah ipilih ma “juakjuak na bujur anjaha na maruhur” laho mansarihon “jabolon”. Ipararat ma ‘ambilan na madear pasal Harajaon’ hu “sab dunia on”.

  Parsaudni Bani tahun 1919, ipilih ma juakjuak na bujur laho mansarihon juakjuak ni Naibata. Humbani ari ai, lambin ringgas ma Siswa-Siswa Alkitab marbarita. Sonari, marbarita do Saksi Jahowa i lobih humbani 200 nagori, janah ibahen sidea do publikasi lobih humbani 1.000 bahasa.

• Ayat Dan. 12:11; Pangk. 13:11, 14, 15

  Panjahaion Isuruh sada binatang na dua tandukni ai ma halak i tanoh on mambahen ‘gana-gana ni binatang’ ai, anjaha ibere do “hosah bani gana-gana ni binatang ai”.

  Parsaudni Ibahen Inggris pakon Amerika Serikat ma Liga Bangsa-Bangsa. Bahat do bangsa-bangsa na dihut gabe anggotani. Humbani tahun 1926 ronsi 1933, dihut do homa raja utara gabe anggotani. Porsaya do halak anggo Liga Bangsa-Bangsa boi parohkon hadameion. Ai do homa na ihaporsayai halak sanggah ibahen PBB. Hape sasintongni pitah Harajaon ni Naibata do na boi mambahen sisonai.

• Ayat Dan. 8:23, 24

  Panjahaion Dong sada raja na ‘jangin tumang pansedaini’.

  Parsaudni Bahat tumang do halak na ibunuh Inggris pakon Amerika Serikat, janah bahat do hasedaon na ibahen sidea. Umpamani, sadokah Porang Dunia II, idabuhkon Amerika Serikat ma dua bom atom hu sada negara na gabe munsuh ni sidea. Parah tumang do hasedaon na ibahen bom ai.

• Ayat Dan. 11:31; Pangk. 17:3, 7-11

  Panjahaion “Binatang sigerger” na sapuluh tandukni naik hun ruang partoruh. Raja na paualuhkon do ia. Bani buku Daniel, igambarhon do raja ai songon “gana-gana hagigi na parohkon hasedaon”.

  Parsaudni Sadokah Porang Dunia II lang aktif Liga Bangsa-Bangsa. Dobkonsi porang ai, “ipajongjong” ma PBB. Songon Liga Bangsa-Bangsa, ipasangap halak do PBB ai. Hape Harajaon ni Naibata do na maningon ipasangap. PBB do holi na manripaskon ugama.

• Ayat 1 Tes. 5:3; Pangk. 17:16

  Panjahaion Ibahen bangsa-bangsa ma tugah-tugah na mangkatahon ‘damei anjaha sonang’. Anjaha iserang ‘sapuluh tanduk’ ampa “binatang” ai ma “boru jalang” ai, janah iripaskon. Dobkonsi ai, iripaskon ma bangsa-bangsa.

  Parsaudni Ihatahon bangsa-bangsa ma  domma ibahen sidea dunia on gabe damei janah sonang. Dob ai, iripaskon bangsa-bangsa na gabe anggota ni PBB ai ma ugama palsu. On ma gabe tanda anggo hamarsikon banggal domma imulai. Bani ujung ni hamarsikon banggal ai, roh ma Jesus manripaskon dunia ni Sibolis i Harmagedon.

• Ayat Hes. 38:11, 14-17; Mat. 24:31

  Panjahaion Iserang Gog ma juakjuak ni Naibata. Dob ai, patumpuon ni malekat ma “halak na dob pinilih”.

  Parsaudni Iserang raja utara pakon pamarentah na legan ma juakjuak ni Naibata. Dobkonsi serangan ai, ipatumpu ma halak na iminaki na tading ope i tanoh on ase naik hu surga.

• Ayat Hes. 38:18-23; Dan. 2:34, 35, 44, 45; Pangk. 6:2; 16:14, 16; 17:14; 19:20

  Panjahaion “Marhamonangan” do na ‘mangajak huda putih’ ai. Iripaskon ia do Gog pakon tentarani. “Binatang” ai “idabuhkon hu laut apuy”, janah iropukkon ma patung na banggal ai.

  Parsaudni Jesus Kristus mamarentah gabe Raja i Harajaon ni Naibata, janah ipaluah ia ma juakjuak ni Naibata. Jesus Kristus pakon 144.000 halak ai, ampa malekat-malekat, manripaskon bangsa-bangsa na mangihutkon Sibolis.