1. Ninuhurmu sonaha do pandapot ni halak sanggah isaritahon ham hasintongan ibagas Bibel, hape aha do na masa?

AI IDINGAT ham do sonaha pangahapmu sanggah parlobei sahali ibotoh ham hasintongan ibagas Bibel? Pangahapmu urah tumang do iarusi hasintongan ai. Halani ai mintor isaritahon ham ma ai bani kaluarga ampa hasomanmu. Nini uhurmu ra do sidea manjalo barita ai. Pos do uhurmu anggo itangar sidea barita ai, gabe martuah ma goluhni janah ibotoh sidea ma pangarapan bani ari simagira. (Ps. 119:105) Hape, lang ra sidea manjalo barita ai.

2-3. Hinan, sanggah marbarita Jesus, sonaha ma pandapot ni buei halak?

² Ulang ma heran sanggah bahat halak lang ra manangar baritanta. Na hinan pe, bahat do homa halak lang porsaya bani Jesus. Hape humbani halongangan na ibahen ia, tangkas do taridah sinuruh ni Jahowa do Jesus ai. Umpamani, domma ipapuho Jesus si Lasarus anjaha bahat do na manaksihon ai, tarmasuk pambobai ugama ni halak Jahudi. Hassi pe sonai, totap do sangsi sidea anggo Jesus ai Mesias. Gabe sihol do sidea mambunuh Jesus pakon si Lasarus!​—Joh. 11:47, 48, 53; 12:9-11.

³ Domma ibotoh Jesus bahat do holi halak na lang porsaya ia do Mesias ai. (Joh. 5:39-44) Jadi ihatahon ia ma hubani susian ni si Johannes Pandidi, “Martuah ma halak na so sangsi pasal ahu.” (Mat. 11:2, 3, 6) Mase ma bahat halak lang ra manjalo Jesus?

4. Aha do na laho iulas hita bani artikel on?

 ⁴ Bani artikel on ampa bani artikel na mangihut iulas hita ma aha do alasanni mase bahat halak lang porsaya bani Jesus. Iulas hita homa mase sonari on bahat do homa halak lang ra manjalo barita na iboan hita. Anjaha na sipontingan na laho iulas hita, sonaha hita boi patoguhkon haporsayaonta hubani Jesus ase boi hita totap mangirikkonsi.

5. Aha do ra na mambahen halak lang porsaya anggo Jesus ai Mesias?

⁵ Halani asal usul ni Jesus, bahat do halak lang porsaya anggo ia do Mesias ai. Ibotoh sidea do namin anggo Jesus ai pandei mangajari janah boi homa mambahen halongangan. Tapi, sai tongtong do idingat sidea anggo Jesus ai anak ni tukang kayu na miskin. Janah i Nasaret do huta hagodanganni, sada huta na etek. Gari si Natanael pe, paima gabe susian ni Jesus ia, ihatahon do sonon, “Mintor tarbahen ma roh na madear hun Nasaret?” (Joh. 1:46) Ra do mapas uhurni mangidah huta ai. Atap ra do homa ibotoh ia bani Mika 5:1 isurat i Betlehem do tubuh Mesias, sedo i Nasaret.

6. Namin, aha do na maningon ibahen halak ase porsaya sidea anggo Jesus ai Mesias?

⁶ Aha do na ihatahon Bibel? Hinan, domma isuratkon nabi Jesaya bahat do munsuh ni Jesus na lang ra mamareksa “asal usulni [Mesias]”. (Jes. 53:8, Terjemahan Dunia Baru) Hape, bahat do na domma isuratkon nabi-nabi pasal asal usul ni Jesus. Anggo ra sidea mamareksa pasal tarombo ni Jesus, tontu gabe ibotoh sidea ma i Betlehem do Jesus tubuh janah ginompar ni Raja Daud do ia. (Luk. 2:4-7) Anjaha sosok do ai bani hatorangan na isurat i Mika 5:1. Tapi lang sonai ibahen sidea. Lang ipareksa sidea haganup hatoranganni. Halani ai gabe pis ma uhur ni sidea hubani Jesus. On ma na mambahen sangsi sidea anggo Jesus ai Mesias.

7. Mase bahat halak lang ra manjalo baritanta?

⁷ Sonai do homa na masa sonari on? Eak. Halani bahat hita sedo halak na bayak, gabe ianggap halak ma hita “jolma na somal” janah lang dong sikolahta. (Lah. 4:13) Dong na marpingkir lang sosok hita mangajarhon Bibel halani lang tamatan sikolah pandita hita. Dong homa na mangkatahon anggo Saksi Jahowa ai “ugama hun Amerika”. Hape bahatan do hita na tading i nagori na legan. Dong homa na mangkatahon lang porsaya hita bani Jesus. Anjaha ihatahon sidea do homa hita “Komunis”, “Bibelon”, ampa “ugama na kahou”. Sasintongni humbani sarita ni halak do ai itangar sidea. Tapi, lang ra sidea mamareksa hasintonganni. Halani ai ma lang ra sidea gabe Saksi Jahowa.

8. Domu bani Lahoan 17:11, aha do na porlu ibahen ham laho mambotoh ise do juakjuak ni Naibata sonari on?

⁸ Sonaha ase totap toguh haporsayonmu? Maningon ipareksa nasiam do lobei hatorangan na sintong. Sonai do homa na ibahen si Lukas sanggah ia manuratkon Injil. Ipareksa ia do lobei “ganupan ai humbani mungkahni”. Sihol do ia “ase ibotoh [halak na mambasa] hasintongan” pasal Jesus. (Luk. 1:1-4) Sonai do homa na ibahen halak Jahudi i Beroa. Dob itangar sidea barita na madear pasal Jesus, mintor ipareksa sidea do Kitab-Kitab Ibrani, ase ibotoh sidea sintong do atap lang na itangar sidea ai. (Basa Lahoan 17:11.) Sonai ma homa na porlu ibahen nasiam. Maningon ibandingkon nasiam ma aha na iajarhon Saksi Jahowa pakon aha na ihatahon ibagas Bibel. Anjaha porlu do homa iparlajari nasiam sejarah ni  Saksi Jahowa ampa na ihorjahon sidea sonari on. Anggo ibahen nasiam sonai, gabe lang mintor porsaya nasiam bani sarita ni halak.

9. Aha do na masa halani lang ra Jesus mambahen tanda hun langit?

⁹ Age pe domma jenges carani Jesus mangajar, tapi bahat do halak lang porsaya hu bani. Ipindo sidea ma Jesus mambahen “tanda hun langit” ase porsaya sidea ia do Mesias ai. (Mat. 16:1) Ra do ibahen sidea sonai halani lepak sidea mangarusi panjahaion na isurat bani Daniel 7:13, 14. Hape, sedo bani panorang ai saud panjahaion ai. Sasintongni, humbani ajaranni pe domma tangkas taridah anggo Jesus ai do Mesias. Tapi halani lang ra Jesus mambahen halongangan, lang porsaya sidea.​—Mat. 16:4.

10. Sonaha Jesus manggoki panjahaion na isurat si Jesaya?

¹⁰ Aha do na ihatahon Bibel? Ihatahon si Jesaya do pasal Mesias, “Seng marsurak-surak Ia barang maling sora-Ni ibahen, anjaha seng ipabogeihon sora-Ni i dalan-dalan.” (Jes. 42:1, 2) Sadokah goluhni, lang ra Jesus pajuntul-juntulhon dirini. Lang ibahen ia rumah panombahan na banggal, lang marlobih-lobih pakeanni songon pakean ni pambobai ugama ijia. Anjaha lang ra ia ibere gelar-gelar na sangap hu bani. Sanggah iadili, lang ra ia mambahen tanda halongangan i lobei ni Raja Herodes. (Luk. 23:8-11) Memang, ongga do ia mambahen halongangan. Tapi mambaritahon ambilan na madear do na sipontingan ibagas goluhni. “Halani ai do ase roh ahu,” nini Jesus hubani susianni.​—Mrk. 1:38.

11. Ugama na sonaha do na iharosuhkon bahat halak sonari on?

¹¹ Sonai do homa na masa sonari on? Eak. Sonari on, bahat do halak rosuhan mangidah gereja-gereja na banggal, na bahat hiasanni. Martitel do ganup pambobai ni ugama ni sidea. Anjaha ibahen sidea do perayaan-perayaan na banggal, hape lang ipingkirhon sidea hunja do asal ni perayaan ai. Hassi pe  sonai, lang dong iparlajari sidea pasal Naibata ampa harosuhni. Legan do anggo Saksi Jahowa. Iparlajari do aha harosuh ni Naibata janah sonaha mandalankon ai. Age pe sederhana bangunan Balei Harajaonni janah lang marlobih-lobih hiasanni, tapi borsih do ai. Na mambobahon i kuria pe lang ibahen titelni anjaha lang marlobih-lobih pakeian ni sidea. Humbani Bibel do ganup na iajarhon. Hassi pe sonai, totap do lang marosuh halak mangidah Saksi Jahowa halani lang ra dihut bani hasomalan ni sidea. Janah iahap sidea do lang sosok bani sidea aha na iajarhon hita.

12. Domu bani Heber 11:1, 6, aha do na maningon ibahen hita ase toguh haporsayaonta?

¹² Sonaha ase totap toguh haporsayaonta? Isuratkon si Paulus do bani halak Kristen i Rom, “Humbani na manangar ambilan do roh ni haporsayaon, anjaha ambilan ai roh humbani hata ni Kristus.” (Rom 10:17) Jadi, ase boi toguh haporsayaonta, maningon iparlajari hita do isi ni Bibel. Sedo dihut bani perayaan-perayaan age pe mariah iahap hita ijai. Bahat do perayaan na lang mardomu pakon ajaran ni Bibel. Bani Bibel dong ihatahon “anggo seng porsaya halak, seng tarbahen harosuh ia bani Naibata”. (Basa Heber 11:1, 6.) Jadi, maningon maronjolan bani Bibel do haporsayaonta. Leganni ai, lang maningon adong tanda halongangan ase porsaya hita. Anggo bagas ipareksa hita isi ni Bibel, lang sangsi be hita sintong do na iajarhon Saksi Jahowa. Hasilni, gabe toguh ma haporsayaonta.

¹³Bahat do susian ni si Johannes Pandidi na heran halani lang marpuasa susian ni Jesus. Tapi ipatorang Jesus ma lang porlu susianni marpuasa sanggah manggoluh ope ia. (Mat. 9:​14-​17) Manggila do halak Parisei ampa ganup munsuhni halani lang iihutkon Jesus hasomalan ni sidea. Anjaha lang sonang sidea sanggah ipamalum Jesus halak na boritan bani ari Sabat. (Mrk. 3:​1-6;  Joh. 9:​16) Bangga do pambobai ugama ai mangkatahon anggo sidea mandalankon ari Sabat. Hape, sanggah dong na marjualan i rumah panumbahan, lang igilai sidea halak ai. Halani ai, marah ma Jesus bani sidea. (Mat. 21:12, 13, 15) Sanggah Jesus mangajar i sinagoga i Nasaret, ibahen ia ma limbaga na patuduhkon sonaha jahatni pambahenan ni sidea ai. Taridah ma lang dong haporsayaon ni sidea. (Luk. 4:​16, 25-​30) Jadi bahat do halak lang porsaya bani Jesus halani lang marosuh sidea manangar ajaranni.​—Mat. 11:16-​19.

14. Mase iburai Jesus adat atap pe perayaan na lang sosok pakon Hata ni Naibata?

¹⁴ Aha do na ihatahon Bibel? Marhitei nabi Jesaya ihatahon Jahowa do, “Ipadohor bangsa on dirini marhitei pamanganni anjaha ipasangap sidea Ahu marhitei bibirni, hape uhurni ganggang do hun Bangku, anjaha biar ni sidea Bangku, domu bani titah-titah ni jolma, na ginuruhon do hansa.” (Jes. 29:13) Jadi sosok ma anggo iburai Jesus perayaan na lang mardomu pakon Hata ni Naibata. Sasintongni, ise pe na palobeihon adat atap pe perayaan marimbangkon isi ni Bibel, domma manlawan ia dompak Jahowa pakon Jesus.

15. Mase bahat halak lang marosuh hubani Saksi Jahowa?

¹⁵ Sonai do homa na masa sonari on? Eak. Bahat do halak lang marosuh mangidah Saksi Jahowa halani lang dihut bani perayaan-perayaan, songon Ari Natal ampa ulang tahun. Bahat do homa na manggila hubani Saksi Jahowa halani lang ra mangihutkon adat na ibahen hubani halak na matei, atap halani lang ra dihut bani perayaan na ibahen negara. Iagan sidea do marosuh Jahowa mangidah panombahan ni sidea ai. Hapeni lang marosuh Jahowa mangidah sidea halani lang mardomu na ibahen sidea ai pakon ajaran ni Bibel.​—Mrk. 7:7-9.

16. Domu bani Psalmen 119:97, 113, 163-165, aha do na porlu ibahen hita, anjaha aha do na lang boi ibahen hita?

¹⁶ Sonaha ase totap toguh haporsayaonta? Maningon holongan do uhurta bani titah ampa prinsip ni Jahowa. (Basa Psalmen 119:97, 113, 163-165.) Anggo holong uhurta hubani Jahowa, tontu lang ra hita dihut bani perayaan ampa hasomalan na lang iharosuhkon-Si. Anjaha maningon ibahen hita do Jahowa na sipontingan ibagas goluhta.

17. Iagan halak Jahudi aha do na laho bahenon ni Mesias?

¹⁷ Bahat do halak Jahudi na mangarap ase igantih Jesus pamarentahan na markuasa sanggah ai. Iagan sidea do roh Mesias laho paluahkon sidea humbani pamarentahan Rom. Tapi sanggah marusaha sidea mambahen Jesus gabe raja, lang ra ia. (Joh. 6:14, 15) Leganni ai, gabe haru do uhur ni pambobai ai anggo ibahen Jesus holi pamarentahanni, gabe manggila ma halak Rom janah lang boi be sidea markuasa. Ai do homa na mambahen bahat halak lang marosuh hubani Jesus.

18. Aha do na lang iarusi bahat halak bani panorang ni Jesus?

¹⁸ Aha do na ihatahon Bibel? Memang bahat do panjahaion na mangkatahon monang do holi Mesias humbani munsuh-munsuhni. Tapi ihatahon do homa maningon matei do lobei Mesias laho manasap dousanta. (Jes. 53:9, 12) Jadi, mase ma bahat halang lang mangarusi ai? Halani lang tongon-tongon iarusi sidea panjahaion ni Bibel pasal Mesias. Iagan sidea do anggo Mesias ai roh laho pasaloseihon masalah ni sidea bani panorang ai.​—Joh. 6:26, 27.

19. Mase bahat halak lang ra manjalo baritanta?

¹⁹ Sonai do homa na masa sonari on? Eak. Bahat do halak lang marosuh mangidah hita  halani lang dihut hita bani politik. Sihol do sidea ase dihut hita sanggah pemilihan umum. Tapi anggo ra hita mamilih jolma gabe rajanta, dos do ai hita manulak Jahowa. (1 Sam. 8:4-7) Leganni ai, sihol do halak ase ipajongjong hita sikolah-sikolah ampa rumah sakit, janah dihut mangurupi buei halak. Hape, halani lang ra hita dihut bani horja-horja sisonai, tapi sibuk do hita mambaritahon pasal Harajaon, gabe lang ra sidea manjalo baritanta.

20. Domu bani na ihatahon Jesus bani Mateus 7:21-23, aha do na sipontingan na ibahen hita?

²⁰ Sonaha ase totap toguh haporsayaonta? (Basa Mateus 7:21-23.) Maningon marusaha ma hita mandalankon tugas na ibere Jesus hubanta. (Mat. 28:19, 20) Ulang ma sibuk hita mangurus urusan ni dunia on. Tongon, holong do uhurta hubani halak janah parduli do hita sanggah dong parsoalan ni sidea. Tapi, pitah Harajaon ni Naibata do na boi pasaloseihon parsoalan ni ganup jolma. Halani ai, maningon marusaha ma hita mangurupi sidea ase dohor bani Jahowa.

21. Aha do na maningon bahenonta?

²¹ Bani artikel on domma iulas hita ompat alasan na mambahen buei halak bani abad na parlobei lang ra manjalo barita na ipadas Jesus. Domma iulas hita mase bahat halak sonari on lang ra manjalo baritanta. Tapi, pitah ai dassa alasanni? Lang. Bani artikel na mangihut iulas hita ma ompat nari alasanni. Jadi, patoguh hita ma haporsayaonta janah totap ma hita mangirikkon Jesus.