BAHAT do halak na mambotoh anggo marratus tahun na salpu igunahon halak Masir do hayu papirus laho mambahen hortas. * Ai do homa na ibahen halak Junani pakon halak Rom. Tapi lang bahat halak na mambotoh anggo hayu papirus ai boi do homa igunahon laho mambahen parau atap pe solu.

Hira-hira 2.500 tahun na salpu, ihatahon nabi Jesaya ma “dong halak na tading i dohor ni bah i Etiopia” na marsuruh “utusanni mandipari laut marhitei kapal humbani hayu papirus”. Dob ai, nabi Jeremia pe mangkatahon sanggah roh halak Madai pakon Persia mamorangi halak Babilon, itutung sidea ma ganup “parau humbani papirus” ase lang boi halak Babilon ai lintun.​—Jes. 18:1, 2; Jer. 51:32, Terjemahan Dunia Baru.

Humbani Naibata do ganup na isuratkon ai. (2 Tim. 3:16) Halani ai, anggo iparlajari hita Bibel lang heran hita sanggah adong penemuan na patuduhkon anggo sapari ibahen halak do parau humbani hayu papirus. Aha do gakni na dapot sidea? Dong dapot sidea penemuan na patuduhkon igunahon halak Masir do papirus laho mambahen parau.

Bani dingding kuburan ni halak Masir dong ukiran na patuduhkon sonaha halak sapari patumpuhon hayu papirus ampa mambahen ai gabe parau. Dong na mamonggoli, dong na manangkut, anjaha dong na padomuhon papirus ai. Sanggah ipadomu ai, gabe lambin gogoh ma papirus ai. Bani buku A Companion to Ancient Egypt, ihatahon sada parau humbani papirus ganjangni boi do hira-hira 17 m. Anjaha i sabolah kiri pakon siamunni dong ibahen 10 ronsi 12 dayung.

Bahat do tubuh hayu papirus i topi ni Bah Nil. Halani ai, urahan do mambahen parau humbani papirus. Age pe dobkonsi ai dong halak na mambahen kapal na banggal humbani hayu, tapi bahat do sijala dengke ampa parburu na totap ope manggunahon parau humbani papirus.

Dokah do igunahon halak parau humbani papirus. Si Plutarch, sahalak penulis Junani na manggoluh bani abad na parlobei mangkatahon anggo bani panorang ai dong ope halak na manggunahon parau humbani papirus.