Dobkonsi borngin ai gabe mubah ma goluhku. Gabe hudingat ma Naibata. Paima hutoruskon saritangku, hupatugah ma lobei sonaha ahu sanggah dakdanak. Ai do na mambahen ahu gabe sihol mananda Naibata.

Tahun 1937 tubuh ma ahu i Guesnain, sada kota i bagian utara Prancis. Horja i tambang batubara do bapangku. Iajari ia do ahu ase pongkut marhorja. Iajari do homa ase mangkorjahon na pintor. Bahat tumang do ididah bapa bos partambang ai na jahat bani parhorjani. Jadi, sihol ma ia mangurupi sidea. Halani ai margabung ma bapa bani sada organisasi na mambela parhorja. Leganni ai, borit do homa uhurni mangidah pambobai ugama Katolik. Age pe domma sonang goluh ni sidea, tapi gati do homa sidea manjalo sipanganon ampa duit humbani halak na miskin. Halani ai, lang marosuh ia mangajarhon pasal ugama bangku. Lang homa ongga ia marsarita pasal Naibata.

Dob magodang, lambin tangkas do huidah bahat halak ijon lang marosuh mangidah halak na maranto i Prancis. Tapi anggo ahu, malas uhurhu  marhasoman pakon sidea, janah rup marbola do hanami. Anjaha omakku pe halak Polandia, sedo halak Prancis. Sihol do uhurhu mangidah ganup halak boi marsaor janah mardamei.

Halani iwajibkon pamarentah ahu marporang bani tahun 1957, ai do na mambahen ase dong ahu i dolog Algeria bani borngin songon na husaritahon nongkan ai. Dobkonsi dilo-dilo “Tuhan, urupi Ham ma ahu!” hubotoh ma sedo munsuh na roh, halode do hape. Sonang ma pangahapku. Humbani ari ai, gabe lambin hupingkiri ma pasal hagoluhan on. Mase ahu itompa? Ai parduli do Naibata hubanta? Ai dong do holi hadameion i tanoh on?

Sanggah mulak ahu hu rumah, pajumpah ma ahu pakon Saksi Jahowa. Ibereni ma Bibel bangku. Hubasa ma ai dobkonsi mulak ahu hu Algeria. Tarsonggot ma ahu sanggah hubasa Pangungkabon 21:3, 4. Ijai ihatahon, “On ma ianan ni Naibata i tongah-tongah ni jolma . . . Anjaha apusan-Ni ma sagala iluh humbani mata ni sidea, seng dong be hamatean, age pusok ni uhur, age partangisan, age halojaon seng dong be.” Nini uhurhu ma, ‘Ai tongon do boi saud on?’ Na hinan lape hubotoh pasal Naibata, atap Bibel.

Dobkonsi salosei ahu wajib militer bani tahun 1959, pajumpah ma ahu pakon sahalak Saksi Jahowa, goranni si François. Iajari ia do ahu bahat hasintongan ni Bibel. Umpamani, Jahowa do hape goran ni Naibata. (Ps. 83:19) Ipatorang ia do homa anggo holi bahenon ni Naibata do tanoh on gabe paradeiso. Gabe adong ma hadameion i tanoh on, janah saud ma holi na ihatahon bani Pangungkabon 21:3, 4.

Urah do iarusi hasintongan ni Bibel ai, janah tarapoh ma uhurhu. Tapi gabe marah tumang do ahu hubani pambobai ugama halani sedo na ibagas Bibel na iajarhon sidea. Jadi maningon hujumpahi ma sidea janah hugilai. Sanggah ai sarupa do ahu songon bapa, lang sabar.

Iurupi si François pakon hasoman na legan do ahu ase sabar. Ipasingat sidea do anggo halak Kristen lang boi manguhumi, tapi maningon mambaritahon pasal Harajaon ni Naibata. Sonin do na ibahen Jesus hinan sanggah ia i tanoh on. Janah ai do homa na ibahen susianni. (Mat. 24:14; Luk. 4:43) Jadi, marusaha ma ahu basar hubani halak na legan, lang soal sonaha haporsayaon ni sidea. Songon na ihatahon Bibel, “Seng patut paringor-ingor anggo juakjuak ni Tuhan in, tapi parbasar do dompak haganup.”​—2 Tim. 2:24.

Hubahen ma parubahan anjaha ididi ma ahu bani tahun 1959, sanggah kebaktian wilayah. Ijai pajumpah ma ahu pakon sada botou na margoran si Angèle. Marosuh do ahu mangidahsi. Jadi, martumpu ma ahu hu kuriani. Bani tahun 1960 marhajabuan ma hanami. Huahap sibere-bere na maharga humbani Jahowa do ia, istri na bujur pakon na maruhur.​—Pod. 19:14.

Sadokah martahun-tahun, bahat do ahu marlajar humbani sanina na marpangalaman janah maruhur. Parlajaran ponting na hudapot ai ma ase boi marhasil mandalankon tugas, maningon  toruh maruhur do hita janah mangkorjahon prinsip na dong bani Podah 15:22. Ijai ihatahon, “Saud do [ranggian] anggo buei sipamodahi.”

Marguna tumang do huahap podah ai. Bani tahun 1964 mangidangi gabe sintua kaliling ma ahu. Maningon roh ma ahu hu kuria-kuria laho mangurupi sanina botou ase lambin orot bani Jahowa. Sanggah ai marumur 27 tahun ope ahu anjaha lang marpangalaman. Tapi, ra do ahu mambahen parubahan, janah bahat do “sipamodahi” na pentar janah marpangalaman na mangurupi ahu.

Dong pangalamanku sanggah baru ope ahu gabe sintua kaliling. Dobkonsi manrohi sada kuria i Paris, sada sanina na marpangalaman manungkun bangku atap na boi do hanami nadua marbuali. “Boi,” ningku.

Isungkun ia ma ahu, “Louis, ise do na itambari dokter, halak na sehat do, atap halak na boritan?”

“Halak na boritan,” ningku.

Nini use, “Tongon do ai. Anggo hupardiateihon gatinan do ham marsaor pakon sidea na toguh haporsayaonni, songon sintua. Hape i kurianta bahat do sanina botou na maretek ni uhur, na baru ope, atap na parmaila. Tontu gabe tarojur do sidea anggo ra ham marsaor pakon sidea, atap pe mangan hu rumahni.”

Martarima kasih do ahu halani ra sanina ai pasingatkon ahu. Huahapkon do holong ni uhurni hubani sanina botou i kuria. Tongon do ai, domma lepak ahu. Sasintongni maila do ahu sanggah mambotoh ai. Age pe sonai hudalankon do podahni ai. Anjaha martarima kasih do ahu bani Jahowa.

Bani tahun 1969 pakon 1973, itugaskon ma ahu gabe pengawas bagian na pasirsirhon sipanganon bani dua kebaktian internasional i Colombes, Paris. Bani kebaktian tahun 1973, maningon ipasirsir hanami ma sipanganon hubani hira-hira 60.000 halak sadokah lima ari. Lang hubotoh sonaha hanami boi mangkorjahon ai. Tapi hudingat ma Podah 15:22. Jadi, huriahkon ma ai pakon sanina-sanina na marpangalaman i bagian ai. Dong sanina na marjual daging, parjuma-juma, ampa tukang masak. Halani ai, gabe boi ma dear ihorjahon hanami tugas na borat ai.

Ibagas tahun 1973, itugaskon ma ahu pakon istringku mangidangi i Betel Prancis. Tugasku na baru ai ma mangindahi cara laho mangirim publikasinta  hubani sanina botou i Kamerun, Afrika. Ijia, ilarang pamarentah do tugas parambilanonta humbani tahun 1970 ronsi 1993. Jadi, borat do huahap tugas on. Haru uhurhu boi do atap lang huhorjahon on. Mintor ipardiateihon sada sanina na mangawasi i Betel ma ai, janah iojur ia ma ahu. Nini ma, “Ganup sanina botou i Kamerun mamorluhon publikasinta on. Eta urupi hita ma sidea!” Jadi ihorjahon hanami ma ai.

Laho ma ahu hu perbatasan Kamerun laho manjumpahi sintua-sintua ijai. Sanina na pangkar janah maruhur do sidea. Iurupi do ahu ase boi mangirim publikasi hu Kamerun. Ipasu-pasu Jahowa do horjanami ai. Sadokah 20 tahun tongtong do sanina botou ijai mandapot majallah Ambilan na Madear ampa Pelayanan Kerajaan Kita.

Sadokah marhalet, hupardiateihon orot do parhasomanan ni si Angèle pakon Jahowa. Dob marhajabuan, lambin tangkas ma huidah ai. Umpamani, dobkonsi pesta partongah jabuannami, bani bornginni ai ipindo ia ma ahu martonggo. Ihatahon hanami ma bani Jahowa sihol do uhurnami lambin ringgas mangidangi-Si. Ibalosi Jahowa do tonggonami ai.

Iurupi si Angèle do homa ahu ase lambin marpangunsandeian bani Jahowa. Contohni, bani tahun 1973 sanggah iontang hanami mangidangi i Betel, ragu do ahu halani rosuhan do ahu mangidangi gabe sintua kaliling. Tapi, ipasingat si Angèle do anggo hanami domma mangondoskon diri hubani Jahowa. Halani ai, maningon ihorjahon ma tugas na ibere organisasi-Ni. (Heb. 13:17) Tongon do na ihatahon istringku ai. Jadi laho ma hanami hu Betel. Huahapkon ma pentar do istringku, lamlam janah orot parhasomananni pakon Jahowa. Ai do na patoguhkon parhajabuannami janah mangurupi hanami mambahen haputusan na madear.

 Hassi pe domma matua hanami, tapi totap do iurupi istringku ahu. Contohni, ase boi dihut hanami bani sikolah na ipasirsir organisasi, maningon marlajar bahasa Inggris do hanami halani bahatan do sikolah ai ipasirsir ibagas bahasa Inggris. Jadi pindah ma hanami hu kuria na marbahasa Inggris, age pe sanggah ai domma marumur 70-an hanami. Sasintongni sibuk do ahu halani mangidangi gabe anggota Panitia Cabang. Jadi lang urah bangku pasirsirhon panorang laho marlajar bahasa Inggris. Tapi, marsiurupan ma ahu pakon istringku. Sonari domma marumur 80 lobih hanami. Tapi totap do ibahen hanami persiapan laho martumpu ibagas bahasa Inggris pakon Prancis. Marusaha do homa hanami mambere komentar janah rup mangidangi pakon sanina botou i kuria. Ipasu-pasu Jahowa do haringgasonnami ai.

Bani tahun 2017, iontang ma ahu pakon istringku dihut bani Sikolah bani Anggota Panitia Cabang pakon Istri. Sikolah ai ibahen i Pusat Pendidikan Menara Pengawal i Patterson, New York.

Jahowa do guru na sibanggalan. (Jes. 30:20) Halani ai, ibere Ia do pangajaran na sidearan hubani ganup juakjuak-Ni, age na matua, sonai homa na maposo. (5 Mus. 4:5-8) Domma huidah, anggo ra na maposo mandalankon hata ni Jahowa, anjaha ra marlajar humbani sanina botou na marpangalaman, gabe iurupi ma sidea mambahen haputusan na madear. Gabe boi ma sidea totap setia mangidangi Jahowa. Sosok do ai songon na ihatahon bani Podah 9:9, “Bere ma bani siparuhur, ase lambin maruhur ia, ajari ma halak parpintor, ase tambah habotohonni.”

Sipata, hudingat do sanggah i dolog Algeria ai ahu hira-hira 60 tahun na salpu. Sanggah ai, huagan do lang boi be martuah goluhku. Hape bahat tumang do pasu-pasu na ibere Jahowa hubangku. Ibere do istri na bujur, ai ma si Angèle. Dob ai, bahat do ahu marlajar humbani sanina na legan. Halani ai, sihol do uhurnami ase torus marlajar pasal Jahowa, janah marlajar humbani sanina botou na mangkaholongi-Si.