1-2. Hasunsahan aha do na iahapkon bahat hasomanta?

IOJUR si Paulus do si Timoteus ase mangidangi humbani tuk ni gogohni. (2 Tim. 4:5) Tontu sihol do homa hita mandalankon podah ni si Paulus ai. Tapi lang sai urah mangkorjahon ai. Bahat do sanina botounta na mabiar marbarita. (2 Tim. 4:2) Umpamani, dong do sanina botounta na tading i nagori na manlarang atap mambatasi horja parambilanonta. Tapi age pe mabiar, totap do sidea marbarita hassi pe halani ai ra do gabe ipenjarahon sidea!

² Dong homa na maretek ni uhur halani bahat sitarononni. Umpamani, maningon sadari bod ma sidea marhorja laho mansarihon kaluargani. Sihol do namin sidea marbarita bani ujung ni minggu. Tapi lang margogoh be sidea. Leganni ai, dong na lang boi be marbarita halani domma matua atap halani parah naboritni. Jadi maningon i rumah ma torus sidea. Dong homa hasomanta na urah mandolei. Si Meri, * hasomanta na tading i Timur Tengah mangkatahon, “Loja tumang huahap halani manlawan pingkiran negatif. Halani ai, lang be margogoh ahu mangidangi. Ujungni, husolsoli ma diringku.”

3. Aha do na laho iulas hita bani artikel on?

³ Lang soal sonaha sitarononta, ipargogohi Jahowa do hita ase boi totap mangidangi-Si humbani tuk ni gogohta. Holi iulas hita ma sonaha Jahowa mangurupi hita. Tapi iulas hita ma lobei sonaha Ia mangurupi si Paulus pakon si Timoteus ase totap mangidangi age pe bahat sitarononni.

4. Sitaronon aha do na iahapkon si Paulus?

⁴ Bahat do homa sitaronon ni si Paulus. Ongga do ia ipargijig  bani batu, ibogbogi, anjaha ipenjarahon. Halani ai, porlu tumang ma ia ipargogohi. (2 Kor. 11:23-25) Marusaha do homa ia manlawan pingkiran negatif. (Rom 7:18, 19, 24) Anjaha dong homa naboritni na songon “duri ibagas daging”. Sihol do ia ase itanggali Naibata ai humbani dirini.​—2 Kor. 12:7, 8.

5. Aha do na ibahen si Paulus age pe bahat sitarononni?

⁵ Ipargogohi Jahowa do si Paulus ase boi totap marbarita age pe bahat sitarononni. Umpamani, sanggah gabe tahanan rumah ia i Rom, marbarita do ia hubani pemimpin ni halak Jahudi atap ra do homa ia marbarita hubani pejabat na dong ijai. (Lah. 28:17; Pil. 4:21,22) Marbarita do homa ia bani ganup halak na roh manjumpahisi. (Lah. 28:30, 31; Pil. 1:13) Sanggah ipenjarahon ai do homa ia manulis surat laho patoguhkon halak Kristen ijia. Anjaha marguna do suratni ai hubanta ronsi sonari. Halani siusihan na ibahen si Paulus, gabe ipatoguh ma sanina botou i kuria Rom. Gabe ‘roh boranini ma sidea mangkatahon hata ni Naibata, seng mabiar-biar’. (Pil. 1:14) Jadi, age pe si Paulus ipenjarahon, totap do marusaha ia marbarita. Hasilni, lambin tarbarita do “ambilan na madear” ai halani na masa hu bani.​—Pil. 1:12.

6. Domu bani 2 Korint 12:9, 10, aha do na mangurupi si Paulus boi totap mangidangi Naibata?

⁶ Ibotoh si Paulus do sedo halani gogohni ia boi totap mangidangi Naibata. Tapi halani ipargogohi Jahowa do ia. Ia mangkatahon “ibagas hagalekon do gabe gok hagogohon” ni Naibata. (Basa 2 Korint 12:9, 10.) Jadi, ibere Jahowa do tonduy na pansing hubani si Paulus ase margogoh ia mandalankon pangidangionni, age pe ia iparburu atap pe ipenjarahon.

7. Tantangan aha do na iahapkon si Timoteus ibagas pangidangionni?

⁷ Marpangunsandeian do homa si Timoteus hubani Naibata ase boi totap mangidangi. Orot do parhasomananni pakon si Paulus. Janah gati do ia mangkasomani si Paulus laho marbarita hu kota-kota ne legan. Isuruh si Paulus do ia ase roh hu kuria-kuria na legan laho patoguhkon sanina botou ijai. (1 Kor. 4:17) Tapi, ra do iahap si Timoteus lang marpangalaman ia. Halani ai do ra ase ihatahon si Paulus hu bani, “Ulang ma adong na marmapas ni uhur bam halani haposoonmu.” (1 Tim.  4:12) Leganni ai, ‘gati do boritan’ si Timoteus ai. (1 Tim. 5:23) Tapi pos do uhur ni si Timoteus ipargogohi Jahowa do ia marhitei tonduy-Ni ase boi totap marbarita janah mangidangi sanina botou.​—2 Tim. 1:7.

8. Sonaha cara ni Jahowa mambere hagogohon hubanta?

⁸ Ibere Jahowa do banta “hagogohon na sumurung” ase boi hita totap setia mangidangi-Si. (2 Kor. 4:7) Ulas hita ma dong ompat sibere-bere ni Naibata na boi mangurupi hita ase totap martahan, ai ma: marhitei tonggo, Bibel, hasoman sahaporsayaon, ampa horja parambilanonta.

9. Aha do gunani anggo martonggo hita?

⁹ Ipatoguh marhitei tonggo. Songon na ipatugah bani Epesus 6:18, iojur si Paulus do hita ase totap martonggo “barang sadihari pe”. Ibalosi Jahowa do tonggonta janah ipargogohi do hita. Pardiateihon ma pangalaman ni hasomanta si Jony, na tading i Bolivia. Margantih soluk do sitarononni. Boritan ma istrini pakon namatorasni. Lang urah iahap ia mansarihon haporluan ni sidea. Ujungni matei ma inangni. Janah dokah do ase malum istrini pakon bapani. Tapi ihatahon si Jony ma, “Sanggah lutu pingkiranku, martonggo ma ahu bani Jahowa janah hupatugah ma aha na ibagas uhurhu. Gabe damei do pangahapku.” Jadi ipargogohi Jahowa do ia ase totap martahan. Dong homa pangalaman ni hasomanta si Ronald, sintua hun Bolivia homa. Hona kanker ma inangni. Dob sabulan marujung goluh ma inangni ai. Tapi, aha do na boi mangurupisi ase totap martahan? Nini do, “Hupatugah do aha na ibagas uhurhu hubani Jahowa. Pos uhurhu pitah Jahowa do na mambotoh sonaha pangahapku na sasintongni.” Sipata, ra do halani borat ni sitarononta, gabe lang ibotoh hita aha na laho itonggohon. Tapi sihol do Jahowa ase totap hita martonggo hu Bani, age pe lang ibotoh hita aha na laho sihatahonon.​—Rom 8:26, 27.

10. Domu bani Heber 4:12, mase ponting tumang mambasa Bibel ampa manrimangi isini?

¹⁰ Ipatoguh marhitei Bibel. Ringgas tumang do si Paulus mamparlajari Hata ni Naibata. Ai do na mambahen ia gabe toguh. Halani ai, tiru hita ma ia. (Rom 15:4) Anggo ibasa hita Bibel janah irimangi hita isini, gabe iurupi Naibata ma hita laho mangarusi prinsip ni Bibel na boi mangurupi hita bai ganup situasi. (Basa Heber 4:12.) Si Ronald na ipatugah nongkan ai mangkatahon, “Marusaha do ahu mambasa Bibel tiap borngin. Janah huahapkon do bahat gunani ai bangku. Lambin bahat ma na hubotoh pasal paruhuran ni Jahowa. Anjaha huarusi ma sai tongtong do isarihon Jahowa juakjuak-Ni. Gabe lambin toguh ma uhurhu halani ai.”

11. Sonaha sada botou gabe ipatoguh uhurni dob mambasa Bibel?

¹¹ Anggo ibasa hita Bibel, ai do na mangurupi hita ase ulang urah-urah mandolei sanggah dong sitaronon. Pardiateihon ma pangalaman ni sada botou na baru mabalu. Iojur sintua do botou ai ase marlajar humbani sarita ni si Job. Jadi ibasa botou ai ma sarita pasal si Job janah ibayangkon ia ma situasini. Mungkahni ninuhurni ma sonon, “Aih Job, ulang lalab parsoalanmu na ipingkirhon ho!” Tapi dobkonsi ai, gabe sadar ma ia anggo ia pe domma songon si Job na lalab mamingkiri parsoalanni. Ujungni mubah ma botou ai. Anjaha dobkonsi ai, lang sai pusok be uhurni. Gabe ipatoguh do uhurni.

12. Sonaha Jahowa patoguhkon hita marhitei sanina botounta?

 ¹² Ipatoguh marhitei hasoman sahaporsayaon. Ipatoguh Jahowa do homa hita marhitei hasomanta. Si Paulus manulis masihol do uhurni marsiojuran pakon sanina botou ase “dapotan gogoh” sidea samah sidea. (Rom 1:11, 12) Ai ma homa na iahapkon si Meri, na ipatugah nongkan ai. Ia mangkatahon, “Igunahon Jahowa do sanina botounta laho mangurupi hita age lang ibotoh sidea aha do parsoalanta. Sipata, sanggah borat huahap situasingku dong sanina botou na mambahen hata apoh-apoh ibagas surat, atap kartu. Janah ikirim sidea ma ai bangku. Ra do homa ahu marsarita hubani sanina botou na sarupa parsoalanni pakon ahu. Janah bahat do parlajaran na hudapot humbani sidea. Dong homa sintua i kuria na mangurupi ahu ase porsaya holong tumang do ganup sanina botou bangku.”

13. Sonaha hita boi marsiojuran sanggah i partumpuan?

¹³ Sanggah i partumpuan, marsiojuran ma hita samah hita. Jadi, sanggah roh ham hu partumpuan, marusaha ma laho patoguhkon na legan. Puji ma sidea janah hatahon ma holong tumang uhurmu hu bani. Ai do na ibahen sahalak sintua na margoran si Piter. Paima mulai acara partumpuan, roh ma ia manjumpahi sada botou na suamini lang Saksi. Ihatahon ia ma, “Malas tumang uhur mangidah nasiam. Tongtong do iboan ham niombahmu na onom on martumpu. Janah iurupi ham do homa sidea mambere komentar.” Gabe tariluh ma botou ai manangar hatani. Nini ma mambalosi, “Aih, sabas tumang pangahap manangar hatamu ai botou.”

14. Anggo ringgas hita marbarita, mase ai boi patoguhkon hita?

¹⁴ Ipatoguh halani ringgas marbarita. Sanggah hita marbarita, gabe malas do uhurta, lang soal dong na manjalo atap lang. (Pod. 11:25) Ai do na iahapkon hasomanta si Stecy. Dong sada kaluargani na ipecat. Gabe pusok ma uhurni halani ai. Sai lalab do ipingkiri ia ai. Ninuhurni ma sonon, ‘Aih, sonaha ma ahu boi mangurupi kaluargaku?’ Tapi aha do na ibahen botou ai ase ulang lalab pusok uhurni? Lambin ringgas ma ia marbarita. Sanggah marbarita ia, gabe ipingkirhon ia ma sonaha carani mangurupi halak na legan. Ihatahon ia ma, “Dapot ahu ma sada parlajar Bibel na bujur tumang. Podas do ia mandalankon aha na iparlajarini. Malas tumang uhurhu. Huahapkon do anggo ringgas hita marbarita, gabe ipatoguh ma uhurta sanggah dong sitaronon.”

15. Aha do na boi iparlajari hita humbani pangalaman ni si Meri?

¹⁵ Ra do adong na marpangahap lang marguna ia. Anggo sonai do homa pangahapmu, dingat ma malas do uhur ni Jahowa anggo marusaha ham mambahen na sidearan. Pardiateihon ma use pangalaman ni si Meri. Sanggah pindah ia hu kuria na marbahasa na legan, iahap ia ma lang marguna ia. Nini ma sonon, “Pitah mambere komentar na pondok dassa boi ahu, atap pitah mambasa Bibel. Sanggah marbarita, pitah mambere risalah dassa na tarbahen ahu.” Halani lalab ibandingkon ia dirini pakon na legan, gabe maretek ni uhur ma ia. Tapi ujungni, gabe mubah ma botou ai. Iarusi ia ma boi do igunahon Jahowa ia hassi pe lang pandei. Nini ma, “Sasintongni, urah tumang do Bibel ai iarusi. Anjaha parohkon hagoluhan do ai bani halak na ra manangar.”

16. Aha do na boi patoguhkon uhur ni sanina botou na lang boi hu darat halani boritan sidea?

¹⁶ Sonaha ma anggo sihol hita marbarita  tapi lang boi hita hu darat halani boritan? Ibotoh Jahowa do harosuhta ai. Halani ai, iurupi Ia do hita ase boi marbarita hubani perawat, dokter, atap hubani halak na mangurus hita. Anggo ibandingkon hita na ihorjahon hita hinan pakon sonari, ra do gabe maretek ni uhur hita. Tapi anggo irimangi hita sonaha Jahowa mangurupi hita ronsi sonari, gabe ipatoguh ma uhurta janah totap marmalas ni uhur age pe dong sitarononta.

17. Domu bani Parambilan 11:6, mase maningon totap hita marbarita age pe lang adong na manjalo?

¹⁷ Lang ibotoh hita sadihari do tubuh bonih hasintongan na isaburhon hita. (Basa Parambilan 11:6.) Pardiateihon ma pangalaman ni si Barbara na domma marumur 80-an. Gati do ia marbarita marhitei telepon, atap manulis surat. Bani sada ari, ipamasuk ia ma homa majallah Menara Pengawal 1 Maret 2014 hubagas suratni ai. Judul sampulni “Apa yang Allah Beri untuk Anda”. Hape sapasang suami istri na dob ipecat hun kuria do na manjalo suratni ai. Janah lang ibotoh si Barbara ai. Marulak-ulak do ibasa sidea majallah ai. Iahap suamini ai ma songon Jahowa do na langsung marsahap hu bani. Roh ma sidea hu partumpuan. Ujungni, ijalo ma use sidea gabe Saksi Jahowa, dobkonsi 27 tahun lobih ipecat. Tontu malas tumang ma uhur ni si Barbara halani lang isangka ia dear tumang do hasilni suratni ai!

18. Aha do na maningon ibahen hita ase ipargogohi Jahowa?

¹⁸ Bahat do sibere-bere ni Naibata na boi mampargogohi hita. Ipargogohi do hita sanggah martonggo, mambasa Bibel, marsaor pakon sanina botou, ampa sanggah marbarita. Anggo torus ihorjahon hita haganupan ai, taridah ma pos do uhurta sai tongtong do urupan ni Jahowa hita. Jadi, totap ma marpangunsandeian bani Naibata, halani sihol do uhur-Ni “mambere gogoh hubani halak paruhur na marsijoloman hu Bani”.​—2 Kron. 16:9.