1-2. Aha do na ihatahon sada penulis, anjaha aha do na laho iulas hita bani artikel on?

BAHAT halak sonari on mangkatahon porsaya do sidea bani Jesus. Age pe sonai, lang iihutkon sidea ajaranni. (2 Tim. 4:3, 4) Sada penulis mangkatahon, “Porini dong halak sonari on na mangajarhon aha na iajarhon Jesus hinan . . . , ai itulak hita do ai songon halak na manulak Jesus hinan? . . . Pasti ma itulak hita ia.”

² Bani abad na parlobei, bahat do halak na manangar ajaran ni Jesus janah mangidah halongangan na ibahen ia. Tapi, totap do lang porsaya sidea hu bani. Mase? Bani artikel na salpu domma iulas hita ompat alasanni. Bani artikel on, iulas hita ma ompat alasan na legan mase lang ra sidea mangirikkon Jesus. Iulas hita homa mase sonari on bahat halak lang ra manangar baritanta, anjaha aha do na porlu ibahen hita ase totap mangirikkon Jesus.

3. Aha do na mambahen piga-piga halak lang marosuh hubani Jesus?

³ Sanggah Jesus i tanoh on, bani ganup halak do ia marhasoman. Rap mangan do ia pakon halak na bayak ampa na marpangkat. Tapi ra do homa ia marsahapi pakon halak na miskin ampa na susah. Anjaha bujur do ia hubani “halak pardousa”. Halani ai, dong na lang marosuh bani pambahenanni ai. Ihatahon sidea ma bani susianni, “Mase ma mangan anjaha minum nasiam rap pakon sijalo [pajak] ampa pardousa?” Nini Jesus ma mambalosi sidea, “Seng porlu doktor bani na jorgit,  bani na boritan do! Seng roh ahu mandilo halak parpintor, tapi halak pardousa do, ase ipaubah uhurni.”​—Luk. 5:29-32.

4. Domu bani na ihatahon nabi Jesaya, aha do namin na maningon iarusi halak Jahudi pasal Mesias?

⁴ Aha do na ihatahon Bibel? Paima roh Jesus hu tanoh on, domma ipatugah nabi Jesaya bahat do holi halak lang marosuh bani Mesias. Ihatahon do, “Ipahiri anjaha isimbili jolma do ia . . . iponopkon halak do bohini dompaksi, ipahiri do ia anjaha seng masuk hira ia bennami.” (Jes. 53:3) Isimbili “jolma” do holi Mesias ai. Anggo idingat halak Jahudi hinan ayat ai, tontu iarusi sidea ma mase bahat halak lang ra manangar ajaran ni Jesus.

5. Sonaha do pandapot ni buei halak pasal Saksi Jahowa?

⁵ Sonai do homa na masa sonari on? Eak. Bahat do pemimpin ugama marosuh anggo na gabe anggota gerejani ai ma halak na bayak, na marpangkat, ampa na pentar. Age pe lang dear parlahou ni sidea, totap do marosuh pemimpin ugama ai bani sidea. Tapi lang marosuh pemimpin ugama bani Saksi Jahowa halani bahat do hita sedo halak na bayak. Hassi pe sonai, dear do parlahounta. Songon na ihatahon si Paulus, halak ‘na galek ninuhur ni dunia on’ do na ipilih Jahowa. (1 Kor. 1:26-29) Hassi pe sonai, maharga do ganup hita i lobei-Ni.

6. Domu bani Mateus 11:25, 26, aha do na boi itiru hita humbani Jesus?

⁶ Sonaha ase totap toguh haporsayaonta? (Basa Mateus 11:25, 26.) Ulang ma ra hita manangihon na ihatahon halak i dunia on pasal Saksi Jahowa. Dingat ma halak na toruh maruhur do na igunahon Jahowa laho mangkorjahon harosuh-Ni. (Ps. 138:6) Sasintongni bahat tumang do na dob ihorjahon Saksi Jahowa age pe iahap halak i dunia on lang pandei sidea.

7. Mase Jesus mangkatahon munafik do halak Parisei ai, anjaha gabe sonaha ma pangahap ni sidea mangidah Jesus?

⁷ Barani do Jesus maminsang pemimpin ugama halani lang iajarhon sidea cara na sintong laho manombah Jahowa. Umpamani, ihatahon Jesus do halak Parisei ai munafik halani pontingan do iahap sidea mamurihi tangan marimbangkon mansarihon namatorasni. (Mat. 15:1-11) Ra do adong susian ni Jesus na tarsonggot manangar ai. Jadi nini sidea ma, “Domma ibotoh ham, na dob marah do Parisei ai mambogei hata ai?” Tapi nini Jesus ma mambalosi, “Siorbaton do sagala suan-suanan, na so sinuan ni Bapa na i nagori atas ai. Paturut hanima ma sidea, pambobai na mapitung do sidea manogu na mapitung. Tapi anggo na mapitung manogu na mapitung, tarrobung ma sidea haduasi.” (Mat. 15:12-14) Jadi totap do ipatugah Jesus aha na sintong age pe domma sogam uhur ni pemimpin ugama hu bani.

8. Sonaha Jesus patuduhkon lang ganup ugama ijalo Naibata?

⁸ Ipatuduh Jesus do lang ganup ugama mangajarhon na sintong. Lang dong ihatahon Jesus ijalo Naibata do ganup ugama. Tapi ihatahon ia do bahat holi halak na mardalan i dalan na bolag na manogu-nogu hu hamagouan. Anjaha otik do halak na mardalan i dalan na sompit na manogu-nogu hu hagoluhan. (Mat. 7:13, 14) Nini Jesus homa bahat do halak na mangkatahon anggo sidea mangidangi Naibata, hape humbani pambahenanni lang sonai. Halani ai ma ihatahon Jesus, “Jaga ma hanima dompak nabi parladung, ai roh do sidea bannima marrupahon biribiri, tapi uhurni ibagas begu panoroh  do. Hun bani buahni do tandaonnima sidea.”​—Mat. 7:15-20.

9. Ajaran na ija do na ipatuduh Jesus lang sintong ai?

⁹ Aha do na ihatahon Bibel? Domma dokah isuratkon holong do uhur ni Mesias bani rumah panumbahan. (Ps. 69:10; Joh. 2:14-17) Halani ai ma sanggah i tanoh on Jesus ipatuduh ia do na ija do ajaran na lang sintong ai. Umpamani, porsaya do halak Parisei dong do tonduy ni halak na matei. Tapi Jesus mangajarhon songon na modom do halak na matei ai. (Joh. 11:11) Lang porsaya halak Sadukei anggo halak na matei boi mulak manggoluh. Tapi ipagoluh Jesus do si Lasarus. (Joh. 11:43, 44; Lah. 23:8) Halak Parisei mangajarhon domma isuratkon atap itakdirhon Naibata ganup na masa hubanta. Tapi Jesus mangajarhon ganup do jolma boi mamilih laho manombah Naibata atap lang.​—Mat. 11:28.

10. Mase bahat halak lang marosuh manangar na iajarhon hita?

¹⁰ Sonai do homa na masa sonari on? Eak. Bahat halak lang marosuh hubanta halani ipatuduh hita humbani Bibel lang sintong na iajarhon pemimpin ugama ni sidea. Iajarhon pemimpin ugama ai do anggo halak parjahat iuhum Naibata i apuy naraka. Tapi anggo Bibel mangajarhon parholong do Jahowa ai. Jadi salah do ajaran apuy naraka ai. Dob ai, iajarhon sidea do homa dong do tonduy ni halak na matei. Porini tongon ajaran ai, tontu lang boi halak na matei ipapuho. Hapeni anggo Bibel mangajarhon boi do halak na matei ipapuho. Leganni ai, bahat do ugama mangajarhon anggo Naibata domma manontuhon sagala na masa i dunia on ampa na masa hubanta. Tapi anggo Bibel mangajarhon ganup do jolma boi mamilih laho manombah Naibata do atap lang. Ai do na mambahen bahat pemimpin ugama lang marosuh hubanta.

11. Domu bani Johannes 8:45-47, aha do na iparentahkon Naibata hubani juakjuak-Ni?

¹¹ Sonaha ase totap toguh haporsayaonta? Anggo holong uhurta hubani hasintongan, maningon porsaya do hita bani Hata ni Naibata. (Basa Johannes 8:45-47.) Ulang ma hita songon Sibolis na parladung. Tapi totap ma hita mangkorjahon na sintong. Ulang ihorjahon  hita aha pe na lang sosok pakon isi ni Bibel. (Joh. 8:44) Iparentahkon Jahowa do hita ase ‘magigi bani na jahat’, tapi ase ‘iparayak hita na madear’ songon na ibahen Jesus.​—Rom 12:9; Heb. 1:9.

12. Halani Jesus matei bani sada hayu, mase bahat halak Jahudi lang porsaya hu bani?

¹² Aha ope na mambahen halak Jahudi lang marosuh mangidah Jesus? Si Paulus mangkatahon, “Ibaritahon hita do pasal Kristus na ibunuh bani hayu. Gabe parsangsian do in bani halak Jahudi.” (1 Kor. 1:23, Terjemahan Dunia Baru) Mase ma gabe sangsi halak Jahudi bani Jesus halani igantung ia bani hayu? Somalni, parjahat do na igantung bani hayu. Ai ma na mambahen lang porsaya halak Jahudi anggo Jesus ai Mesias.​—5 Mus. 21:22, 23.

13. Aha do na lang ihaporsayai halak Jahudi pasal Jesus?

¹³ Bahat do halak Jahudi lang porsaya anggo Jesus ai sasintongni lang marsalah. Lang porsaya homa sidea domma ifitnah Jesus, janah lang adil na ibahen halak hu bani. Mintor podas do anggota pengadilan ni halak Jahudi manguhum Jesus. Janah pengadilan na ibahen sidea lang mangihutkon aturan na sah. (Luk. 22:54; Joh. 18:24) Lang ipindahi sidea lobei tongon do Jesus ai marsalah atap lang. Tapi ‘ipindahi sidea do hasaksian ladung dompak Jesus’ ase boi ia iuhum matei. Tapi lang marhasil ai. Jadi ibahen sidea ma hata ni Jesus sanggah i pengadilan ai gabe dalan laho mamunuhsi. Domma manlanggar uhum na ibahen sidea ai. (Mat. 26:59; Mrk. 14:55-64) Dobkonsi ipapuho Jesus, roh ma anggota ni pengadilan ai manjumpahi tentara Rom na manjaga kuburan ni Jesus. Ibere sidea ma “buei duit bani tentara ai” ase ihatahon sidea domma itangko susian ni Jesus bangkeini. Ujungni gabe rarat ma sarita ai.​—Mat. 28:11-15.

14. Aha do na ihatahon bani na tarsurat pasal Mesias?

¹⁴ Aha do na ihatahon Bibel? Sasintongni domma isuratkon maningon matei do Mesias. Ihatahon do sonon, ‘lbere ia do hosahni  hu hamatean, anjaha tarhira do ia bani halak parjahat, halani na niusungni dousa ni buei halak, anjaha iapiti halak parjahat.’ (Jes. 53:12) Anggo iarusi halak Jahudi ayat ai, tontu lang gabe sangsi sidea bani Jesus age pe iuhum matei ia.

15. Aha do na gati ihatahon halak pasal Saksi Jahowa?

¹⁵ Sonai do homa na masa sonari on? Eak! Songon na hinan, sonai do homa na ibahen halak hubani Saksi Jahowa. Ituduh do sidea mangkorjahon na jahat. Umpamani, sadokah tahun 1930-an pakon tahun 1940-an i Amerika Serikat, gati do hita hu pengadilan ase mandapot izin laho beribadah. Dong do homa hakim na marusaha mambahen ase hita iuhum. Anjaha i kota Quebec, Kanada, kerja sama do Gereja Katolik pakon pamarentah laho manlarang horja parambilanonta. Gabe bahat ma hasomanta na ipenjarahon halani sidea mambaritahon pasal Harajaon ni Naibata. Sanggah pamarentahan Nazi i Jerman, bahat do hasomanta na maposo na ibunuh halani haporsayaon ni sidea. Bani piga-piga tahun na parpudi on, bahat tumang hasomanta i Rusia na ipenjarahon halani sidea mangulas isi ni Bibel. Ihatahon do sidea ai “halak na mambahayahon negara”. Isita janah ilarang do homa Bibel Terjemahan Dunia Baru bahasa Rusia. Ihatahon do ai “basaan na berbahaya” halani dong isurat ijai goran ni Jahowa.

16. Domu bani 1 Johannes 4:1, mase lang ra hita manangihon barita-barita na lang tongon pasal Saksi Jahowa?

¹⁶ Sonaha ase totap toguh haporsayaonta? Maningon ipindahi hita do hatorangan na sintong. Sanggah Jesus marambilan i Dolog, ihatahon ia ma bahat do holi halak na mangkatahon “bagei ni hata na masambor, na so tongon” dompak susianni. (Mat. 5:11) Sasintongni humbani Sibolis do hata sisonai. Ibahen ia do halak na lang marosuh bani Saksi Jahowa laho pararatkon barita na lang tongon pasal hita. (Pangk. 12:9, 10) Barita na sisonai boi mambahen hita gabe mabiar. Halani ai, ulang ma ibasa atap itangar hita barita ai ase ulang galek haporsayaonta.​—Basa 1 Johannes 4:1.

17. Aha ope na mambahen halak lang ra mangihutkon Jesus?

¹⁷ Lang piga dokah paima matei Jesus, adong sada apostelni na menghianati ia. Leganni ai, dong homa apostelni na mamorsou ia ronsi tolu hali. Anjaha paima matei Jesus, ganup do apostelni manadingkonsi. (Mat. 26:14-16, 47, 56, 75) Tapi domma dokah ibotoh Jesus na laho masa do sonai hu bani. (Joh. 6:64; 13:21, 26, 38; 16:32) Porini dong halak na mangidah ai, ra do sidea marpingkir, ‘Anggo susianni pe manadingkonsi, benaha ma iirikkon hita ia?’

18. Ayat na ija do na saud bani Jesus paima hamateanni?

¹⁸ Aha do na ihatahon Bibel? Marratus tahun paima roh Jesus hu tanoh on, domma isuratkon dong holi halak na menghianati Jesus. (Sak. 11:12, 13) Anjaha hasoman na orot pakonsi do na menghianati ia. (Ps. 41:9) Leganni ai, isuratkon nabi Sakaria do homa, “Hubogbog ma parmahan in, ase merap biribiri in.” (Sak. 13:7) Anggo iarusi halak ayat ai, tontu totap do sidea mangihutkon Jesus age pe bahat halak na manadingkonsi.

19. Pasal aha do na iarusi halak na toruh maruhur ibagas Bibel?

¹⁹ Sonai do homa na masa sonari on? Eak. Dong do piga-piga halak hinan Saksi Jahowa tapi sonari domma murtad sidea. Marusaha do sidea pakahouhon halak na legan. Ibahen sidea ma sarita na pabajan-bajankon Saksi Jahowa i Internet, i radio, atap pe i TV.  Tapi anggo halak na toruh maruhur ibotoh do domma isuratkon bani Bibel bahat holi halak sisonai. Halani ai lang ra sidea porsaya bani barita sisonai.​—Mat. 24:24; 2 Ptr. 2:18-22.

20. Aha do na porlu ibahen hita ase ulang ipakahou halak na murtad? (2 Timoteus 4:4, 5)

²⁰ Sonaha ase totap toguh haporsayaonta? Maningon ringgas ma hita marlajar Bibel, gati martonggo, ampa totap mangkorjahon tugas na ibere Jahowa hubanta. (Basa 2 Timoteus 4:4, 5.) Anggo porsaya hita bani Jahowa, lang mabiar hita anggo dong barita na pasambor-samborhon Saksi Jahowa. (Jes. 28:16) Patoguh hita ma holongta bani Jahowa, sanina botou, ampa bani isi ni Bibel. Anggo ibahen hita sonai, lang boi halak na murtad pakahouhon hita.

21. Age pe bahat halak lang ra manangihon baritanta, tapi aha do na paposkon uhurta?

²¹ Bani abad na parlobei, bahat do halak lang porsaya bani Jesus. Age pe sonai, bahat do homa halak na gabe susianni. Umpamani, dong do anggota Sanhedrin na gabe susian ni Jesus. Anjaha ‘buei do homa malim’ na porsaya bani Jesus. (Lah. 6:7; Mat. 27:57-60; Mrk. 15:43) Sonai homa sonari on. Dong marjuta halak na dob gabe susian ni Jesus. Totap do sidea mangirikkon Jesus halani holong uhur ni sidea bani hasintongan ni Bibel. Halani ai, tongon do na ihatahon bani Bibel, “Damei na sumurung do rupei ni halak na mangkaholongi titah-Mu, seng anjai tartolsu sidea.”​—Ps. 119:165.