1-2. Mase maningon iparuhurhon hita buku Pangungkabon?

 ONGGA do ham iarahkon hasoman mangidah album fotoni? Sanggah mangidah album ai, bahat do na lang itanda ham. Hape, dong ma sada na manarik bamu. Mase? Halani dong fotomu ijai. Lambin ipardiateihon ham foto ai, marusaha ma ham mardingat, ‘Ija do ge on? Sadihari do foto on ibuat?’ Marusaha do homa ham mardingat ganup halak na dong bani foto ai. Ponting tumang do bamu foto ai.

² Usih songon buku Pangungkabon do foto ai. Mase? Siotikanni dong dua alasan. Na parlobei, na laho hubanta do buku on ase isurat. Bani ayat na parlobei ihatahon, “On ma pangungkabon ni Jesus Kristus, na binerehon ni Naibata hu bani, laho patuduhkon hubani juakjuak-Ni na laho podas masa.” (Pangk. 1:1) Jadi buku on isurat pitah hubani juakjuak ni Naibata do, sedo hubani ganup halak. Halani ai lang tarsonggot hita sanggah saud panjahaion ai adong hita ibagas. Boi ihatahon adong do hita “ibagas album ai”.

3-4. Songon na ipatugah bani buku Pangungkabon attigan do panjahaion ai saud, janah aha ma na porlu ibahen hita?

³ Alasan na paduahon mase maningon iparuhurhon hita buku Pangungkabon, ai ma attigan panjahaion ai ipasaud. Ipatugah Apostel Johannes do attigan ai ipasaud sanggah ia mangkatahon, “Ibagas tonduy do ahu bani ari ni Tuhan in.” (Pangk. 1:10) Sanggah si Johannes manuratkon ai hira-hira tahun 96 M, dokah ope “ari ni Tuhan in”. (Mat. 25:14, 19; Luk. 19:12) Domu bani panjahaion ni Bibel,  ari ni Tuhan ipungkah bani tahun 1914, sanggah Jesus gabe Raja i surga. Humbani ari ai ma saud panjahaion bani buku Pangungkabon, janah dihut do juakjuak ni Naibata ibagas. Tongon, sonari hita manggoluh bani “ari ni Tuhan in”!

⁴ Malas tumang do uhurta halani ai. Jadi sihol do hita mamparuhurhon podah na isurat bani Pangungkabon 1:3, “Martuah ma na mambasa pakon na mambogei hata ni panjahaion on, na marimbagaskon na tarsurat ibagas on, ai dohor ma panorangni.” Sasintongni, porlu do hita ‘mambasa’ ase ‘ibogei hita hata ni panjahaion on’, janah “marimbagaskon” ai. Aha ma piga-piga panjahaion na porlu iparimbagaskon hita?

5. Sonaha buku Pangungkabon patuduhkon ponting tumang ipastihon hita panombahanta ijalo Jahowa?

⁵ Humbani bindu sada buku Pangungkabon, domma ipatugah anggo Jesus mambotoh aha na masa bani ganup kuria Kristen. (Pangk. 1:12-16, 20; 2:1) Taridah do ai humbani suratni na ikirim bani pitu kuria i Asia Kecil. Marhitei suratni ai, ibere ia do tugah-tugah na mangurupi halak Kristen bani abad na parlobei laho mamastihon ijalo Jahowa do panombahan ni sidea atap lang. Leganni ai, marguna do homa podah ai bani juakjuak ni Naibata sonari on. Aha ma parlajaranni hubanta? Jesus Kristus na gabe Kopala ni kuria, mambotoh sonaha parhasomananta pakon Jahowa. Jesus do na mambobahon hita, manjaga hita, janah ididah ia do ganup na masa. Ibotoh ia do homa aha na porlu ibahen hita ase totap iharosuhkon Jahowa. Jadi, tugah-tugah aha ma na dob ibere ia na porlu ipardiateihon hita?

6. (a) Songon na ihatahon Jesus bani Pangungkabon 2:3, 4, aha ma masalah na dong i kuria Epesus? (b) Aha ma parlajaranni hubanta?

⁶ Basa ma Pangungkabon 2:3, 4. Ulang ma tadingkon holong ni uhur na bani mungkahni. Humbani surat ni Jesus bani kuria i Epesus, taridah ma anggo sidea tongtong mangidangi Jahowa janah sabar age pe bahat tantangan. Hassi pe sonai, lang songon na parlobei ai be holong ni sidea bani Jahowa. Jadi, porlu do sidea lambin mangkaholongi-Si. Anggo lang, lang ijalo Jahowa panombahan ni sidea. Sonai homa sonari on, lang sungkup hita pitah marsabar ni uhur, tapi porlu do homa sabar halani alasan na topat. Lang pitah bani aha na ihorjahon hita marosuh Naibata, tapi mase hita mangkorjahon ai. Sihol do uhur-Ni ase hita manombah Ia halani mangkaholongi-Si humbani gok ni uhurta janah mangkargai Ia.​—Pod. 16:2; Mrk. 12:29, 30.

7. (a) Songon na ihatahon Jesus bani Pangungkabon 3:1-3, masalah aha ma na masa i Sardes? (b) Aha ma na porlu bahenonta?

⁷ Basa ma Pangungkabon 3:1-3. Tongtong ma puho anjaha marjaga-jaga. Legan do homa masalah i kuria Sardes. Age pe hinan ringgas do sidea ibagas pangidangion, tapi sonari lang be. Halani ai ma ihatahon Jesus bani sidea “puho ma”. Aha ma parlajaranni hubanta? Tongon, lang lupa Jahowa bani aha na dob ihorjahon hita. (Heb. 6:10) Tapi ulang ma iagan hita halani ringgas hita mangidangi-Si sapari, lang pala be ringgas sonari. Hassi pe lang boi bahat ihorjahon hita songon ondi ai, tapi totap ma ringgas  “ibagas horja ni Tuhan in”, tongtong ma puho anjaha marjaga-jaga das hu ujung.​—1 Kor. 15:58; Mat. 24:13; Mrk. 13:33.

8. Aha ma na boi iparlajari hita humbani hata ni Jesus bani sanina botou i kuria Laodikea? (Pangungkabon 3:15-17)

⁸ Basa ma Pangungkabon 3:15-17. Ringgas anjaha humbani gok ni uhur ma ibagas pangidangion. Legan do homa masalah i kuria Laodikea. “Danggol-danggol sisilon” atap suam-suam kuku do panombahan ni sidea. Halani lang parduli be sidea bani pangidangionni, ihatahon Jesus ma anggo sidea ‘madoyuk anjaha masombuh’. Halani ai porlu do sidea mambahen hamubahon. (Pangk. 3:19) Aha ma parlajaranni hubanta? Anggo lang be ringgas hita ibagas pangidangion, porlu do hita manggunahon ganup persediaan na dob ipasirsir organisasi. (Pangk. 3:18) Ulang ma halani sihol bayak gabe lang be ibahen hita pangidangion na sipontingan ibagas goluhta.

9. Songon na ipatuduh bani surat ni Jesus hubani halak i Pergamon pakon i Tiatira, bahaya aha ma na porlu ipadaoh hita?

⁹ Tulak ma ajaran ni halak na murtad. Ipinsang Jesus do halak Kristen i Pergamon halani sidea mambahen parbolahan janah pararatkon ajaran na lang sintong. (Pangk. 2:14-16) Tapi ipuji ia do halak Kristen i Tiatira halani itulak sidea do ‘rusia na bagas humbani Setan’, janah iojur ia do ase ‘poltik ijolom sidea’ hasintongan in. (Pangk. 2:24-26) Maningon mambahen hamubahon do halak Kristen ijai halani sidea domma mangihutkon ajaran palsu. Aha ma parlajaranni hubanta? Maningon itulak hita do ajaran na lang domu bani pingkiran ni Jahowa. Ra do “songon-songon na daulat” taridah halak na murtad, hape “iparnalang sidea do gogoh ni ai”. (2 Tim. 3:5) Anggo ringgas hita mamparlajari Hata ni Naibata lambin urah ma hita manulak ajaran palsu.​—2 Tim. 3:14-17; Jud. 3, 4.

10. Aha ope na boi iparlajari hita humbani hata ni Jesus bani kuria i Pergamon pakon i Tiatira?

¹⁰ Ulang ma horjahon parriah-riahon atap pe setuju bani halak na mangkorjahon ai. Dong ope masalah na legan i Pergamon pakon i Tiatira. Ipinsang Jesus do piga-piga halak i kuria ai halani ipaturut sidea adong na mangkorjahon parriah-riahon. (Pangk. 2:14, 20) Aha ma parlajaranni hubanta? Ulang ma  iagan hita ipaturut Jahowa hita mangkorjahon parriah-riahon halani domma martahun-tahun hita mangidangi-Si janah dong homa tanggung jawabta i kuria. (1 Sam. 15:22; 1 Ptr. 2:16) Sihol do Jahowa ase hita mangihutkon aturan-Ni, hassi pe lambin sambor parlahou ni dunia on.​—Ep. 6:11-13.

11. Aha ma na domma iparlajari hita? (Tonggor homa kotak “ Parlajaranni Hubanta”.)

¹¹ Aha ma na domma iparlajari hita? Ponting tumang do ipastihon hita panombahanta ijalo Jahowa. Anggo adong pambahenanta na mambahen lang marosuh Jahowa, podas ma mambahen parubahan ase ijalo Jahowa panombahanta. (Pangk. 2:5, 16; 3:3, 16) Leganni ai, dong ope na ipatugah Jesus bani kuria-kuria. Aha ma ai?

12. Aha ma na iparlajari hita humbani hata ni Jesus bani sanina botou i Simirna pakon i Piladelpia? (Pangungkabon 2:10)

¹² Pardiateihon hita ma surat ni Jesus bani kuria Simirna pakon Piladelpia. Jesus mangkatahon ase ulang mabiar sidea sanggah iparburu halani ipasu-pasu Jahowa do sidea anggo totap setia. (Basa Pangungkabon 2:10; 3:10) Aha ma na boi iparlajari hita? Ibotoh hita do anggo hita pasti iparburu. Halani ai, maningon totap ma hita setia. (Mat. 24:9, 13; 2 Kor. 12:10) Mase ponting sipasingat ai?

13-14. Aha ma na masa bani juakjuak ni Naibata halani peristiwa na ipatugah bani Pangungkabon bindu 12?

¹³ Bani buku Pangungkabon ipatugah do anggo juakjuak ni Naibata iparburu bani panorangta atap bani “ari ni Tuhan in”. Bani Pangungkabon bindu 12 ipatugah masa ma porang i surga dobkonsi jongjong Harajaon ni Naibata. Si Mikael, ai ma goran ni Jesus i surga, ampa malekat-malekatni, marporang manlawan Sibolis pakon begu-beguni. (Pangk. 12:7, 8) Ujungni, talu ma Sibolis janah idabuhkon ma sidea hu tanoh on. Gabe sunsah ma tanoh on ampa ganup pangisini. (Pangk. 12:9, 12) Tapi, aha ma na masa bani juakjuak ni Naibata?

¹⁴ Buku Pangungkabon patugahkon aha use na ibahen Sibolis. Halani lang boi be hu surga, iparburu ia ma halak Kristen na iminaki na i tanoh on halani sidea do wakil ni Harajaon ni Naibata. Sidea do “na manjolom hasaksian pasal Jesus”. (Pangk. 12:17; 2 Kor. 5:20; Ep. 6:19, 20) Sonaha panjahaion ai saud?

15. Ise ma na igambarhon ‘dua saksi’ bani buku Pangungkabon bindu 11, janah aha ma na masa bani sidea?

¹⁵ Ibahen Sibolis ma ase iparburu  munsuh ni Naibata sanina-sanina na iminaki na mambobahon horja parambilanon. Sidea na banggal tanggung jawabni isobut ‘dua saksi’ bani buku Pangungkabon, janah ibunuh do sidea. * (Pangk. 11:3, 7-11) Bani tahun 1918, ihukum ma ualuh sanina na martanggung jawab i organisasi halani tuduhan palsu. Iuhum ma sidea sadokah martahun-tahun. Buei halak mangahap domma soh horja ni sidea ai.

16. Bani tahun 1919, aha do na masa na lang isangka-sangka, tapi aha do na tongtong ibahen Sibolis?

¹⁶ Bani buku Pangungkabon bindu 11 ihatahon lang piga dokah manggoluh do use ‘dua saksi’ nongkan ai. Lape das satahun sanina-sanina ai ipenjara saud ma panjahaion ai. Bani bulan Maret 1919, ibebaskon ma ganup sanina-sanina ai, janah icabut ma tuduhan bani sidea. Mintor ibobahon sidea ma use horja parambilanon. Tapi lang maronti Sibolis mamparburu juakjuak ni Naibata. Humbani ari ai, ibahen Sibolis ma parburuan hubani juakjuak ni Naibata songon “bah banggal”. (Pangk. 12:15) Halani ai maningon sabar ma hita haganupan anjaha porsaya hubani Jahowa.​—Pangk. 13:10.

17. Age pe juakjuak ni Naibata iparburu Sibolis, pangurupion aha ma na iahapkon sidea?

¹⁷ Pangungkabon 12:16 mangkatahon ibondut “tanoh ai” ma “bah banggal”. On patuduhkon anggo juakjuak ni Naibata mandapot pangurupion na lang isangka-sangka. Tongon ai ma na masa. Sipata, adong do piga-piga pangadilan i dunia on na mambahen haputusan na adil hubani juakjuak ni Naibata. Halani ai gati do Saksi Jahowa monang i pangadilan. Gabe boi ma sidea mangahapkon piga-piga habebason. Sonaha ma sidea manggunahon habebason ai? Pangkei do sidea manggunahon panorang ase boi mandalankon tugas humbani Jahowa. (1 Kor. 16:9) Aha ma deba tugas ni sidea?

18. Aha ma tugasta na sipontingan bani panorang parpudi?

¹⁸ Jesus mangkatahon anggo juakjuak ni Naibata mambaritahon ‘ambilan na madear pasal Harajaon’ i sab tanoh on paima roh ujungni. (Mat. 24:14) Sanggah  marbarita, iurupi sada atap piga-piga malekat do sidea. Dong do bani malekat ai “ambilan na madear sisadokah ni dokahni, siambilankononni bani na mangiankon tanoh in, bani haganup bangsa, marga, hata pakon suku”.​—Pangk. 14:6.

19. Barita aha ope na porlu ipadas Saksi Jahowa?

¹⁹ Lang pitah barita na madear pasal Harajaon na ibaritahon juakjuak ni Naibata. Songon na ipatugah bani Pangungkabon bindu 8 ronsi 10, isuruh do malekat padaskon barita panguhuman hubani ganup halak na lang ra manjalo Harajaon ni Naibata. Maningon iurupi hita do malekat-malekat ai. Jadi tongtong do ibaritahon Saksi Jahowa panguhuman ai, na isarupahon songon “sira-sira pakon apuy”. (Pangk. 8:7, 13) Jadi porlu do ibotoh halak dohor mando ujung ni dunia on, ase boi sidea mambahen hamubahon janah maluah humbani ari ringis ni Naibata. (Sep. 2:2, 3) Tapi bahat do halak na lang marosuh manangar barita ai. Halani ai, porlu do habaranion laho padaskon barita ai. Janah lambin karas do barita ai sadokah hamarsikon banggal.​—Pangk. 16:21.

20. Aha ma na iulas hita bani dua artikel na mangihut?

²⁰ Maningon iparimbagaskon hita ma “hata ni panjahaion on” halani dihut do hita ibagas sanggah saud panjahaion bani buku Pangungkabon. (Pangk. 1:3) Tapi, sonaha ase hita totap setia sanggah iparburu janah totap barani marbarita? Bani dua artikel na mangihut dong dua na boi patoguhkon uhurta. Na parlobei, aha do na ihatahon buku Pangungkabon pasal munsuh ni Naibata? Na paduahon, pasu-pasu aha do na dapot hita anggo totap setia?