1. Haputusan na ponting aha do na maningon ibahen ganup jolma?

 SONARI ganup halak maningon mambahen haputusan na ponting. Ai ipilih sidea do Naibata Jahowa gabe Raja, atap mangapiti Sibolis, munsuh na kejam in? Ganup halak maningon mambahen pilihan. Haputusan aha pe na ibahen sidea, dong do pengaruhni ai bani goluh ni sidea bani ari na laho roh. (Mat. 25:31-33, 46) Sadokah “hamarsikon banggal” ganup halak ibere tanda, laho ipaluah do sidea atap iripaskon.​—Pangk. 7:14; 14:9-11; Hes. 9:4, 6.

2. (a) Domu bani Heber 10:35-39, aha do na maningon ibahen hita? (b) Sonaha buku Pangungkabon boi mangurupi hita?

² Basa Heber 10:35-39. Anggo domma ipilih ham mangapiti Harajaon ni Naibata, dear ma haputusanmu ai. Tontu sihol do homa ham mangurupi halak na legan ase mambahen haputusan na dear. Boi do igunahon ham hatorangan bani buku Pangungkabon laho mangurupi sidea. Bani buku on, ipatugah do aha na laho masa bani sidea na manlawan dompak Jahowa. Janah ipatugah do homa pasu-pasu aha do na laho ibere bani sidea na mangapiti Harajaon ni Naibata. Maningon tangkas do iarusi hita hasintongan ai. Anggo ibahen hita sonai, gabe iurupi ma hita totap setia mangidangi Jahowa. Anjaha gabe boi ma homa hita mangurupi halak na legan laho mambahen haputusan na dear ampa mangidangi Jahowa.

3. Aha do na laho iulas hita bani artikel on?

³ Bani artikel on, holi iulas hita ma balos ni sungkun-sungkun on: Aha do na laho masa bani sidea na mangapiti Harajaon ni Naibata? Leganni ai, aha do na laho masa bani sidea na mangapiti binatang buas sigerger na igambarhon bani buku Pangungkabon?

4. Kalompok na ija do na rap pakon Jesus i surga, na ididah si Johannes?

⁴ Marhitei panonggoran, dong dua kalompok na mangapiti Harajaon ni Naibata ididah Apostel Johannes. Bilangan ni kalompok na parlobei ai dong 144.000. (Pangk. 7:4) Itobus hun tanoh on do sidea. Rap mamarentah ma sidea pakon Jesus hun surga hu tanoh on. (Pangk. 5:9, 10; 14:3, 4) Bani panonggoran ai, ididah si Johannes do sidea jongjong pakon Jesus i Dolog Sion.​—Pangk. 14:1.

5. Aha ma na laho masa bani halak na iminaki na tading ope i tanoh on?

⁵ Humbani panorang ni apostel ronsi sonari on, dong marribu halak na ipilih gabe bagian humbani 144.000 halak ai. (Luk. 12:32; Rom 8:17) Ipatugah do bani si Johannes otik dassa humbani 144.000 ai na tading i tanoh on sadokah panorang parpudi. Anggo totap sidea setia, jaloon ni sidea ma “sap” atap materai paima mulai hamarsikon banggal. (Pangk. 7:2, 3; 12:17) Anjaha, sadokah hamarsikon banggal iboan ma halak na tading ai hu surga ase marsada rap pakon bagian 144.000 na dob ipapuho hu surga. Ijai, rap mamarentah ma sidea pakon Jesus bani harajaon ni Naibata.​—Mat. 24:31; Pangk. 5:9, 10.

6-7. (a) Kalompok na ija do use na ididah si Johannes, janah aha do na boi iparlajari hita humbani sidea? (b) Mase Pangungkabon bindu 7 on menarik bani haduasi kalompok ai?

⁶ Dob ididah si Johannes kalompok na hu surga ai, ididah ia ma use “humpulan na banggal”. On sedo songon kalompok na 144.000 ai. Lang ipatugah bani Bibel sadiha do bilangan ni halak i kalompok na banggal on. (Pangk. 7:9, 10) Aha ma na boi iparlajari hita humbani sidea? Ipatugah ma bani si Johannes, “In ma na dob roh humbani hamarsikon banggal ai; domma iburihi sidea hiou ni sidea anjaha ipaputih ibagas daroh ni Anak ni Biribiri in.” (Pangk. 7:14) Dobkonsi maluah hun hamarsikon banggal, manggoluh ma “humpulan na banggal” ai i tanoh on janah marmalas ni uhur.​—Ps. 37:9-11, 27-29; Pod. 2:21, 22; Pangk. 7:16, 17.

⁷ Lang soal hita ipilih hu surga atap pe i tanoh on, maningon pos do uhurta sanggah saud holi panjahaion bani Pangungkabon bindu 7, dong do hita ibagas. Marmalas ni uhur do holi haduasi kalompok ai! Tontu malas tumang uhurta halani domma mangapiti Harajaon ni Naibata. Aha ma use na ihatahon buku Pangungkabon pasal hamarsikon banggal?​—Mat. 24:21.

8. Sonaha hamarsikon banggal ai ipungkah, janah aha ma na ibahen buei halak?

⁸ Songon na dob ipatugah bani artikel na salpu, iserang pamarentah ma holi Babel na Banggal, ai ma ganup ugama palsu i tanoh on. (Pangk. 17:16, 17) Dob ai ipungkah ma hamarsikon banggal. Ai bahat do holi na ra mangidangi Jahowa halani peristiwa ai? Lang. Pangungkabon bindu 6 patuduhkon bani panorang hasosakan ai, sidea na lang mangidangi Jahowa mangindahi parlinggoman humbani politik ampa partiga-tiga i dunia on, na isarupahon songon dolog. Halani lang ra sidea mangapiti Harajaon ni Naibata, ianggap Jahowa ma holi sidea imbang-Ni.​—Luk. 11:23; Pangk. 6:15-17.

9. Sonaha juakjuak ni Jahowa legan humbani na legan sadokah hamarsikon banggal, janah sonaha ma ujungni?

⁹ Sasintongni, legan do holi na ibahen juakjuak ni Jahowa sadokah panorang  hasosakan ai. Pitah sidea ma holi kalompok na mangidangi Naibata Jahowa i tanoh on janah lang ra mangapiti “binatang” buas ai. (Pangk. 13:14-17) Halani totap setia hubani Jahowa, gabe marah tumang ma munsuh-munsuh ni Jahowa hubani sidea. Ujungni, marsada ma bangsa-bangsa laho mandorab juakjuak ni Naibata i sab tanoh on. Bani Bibel isobut do serangan ai serangan Gog hun Magog.​—Hes. 38:14-16.

10. Songon na ipatugah bani Pangungkabon 19:19-21, aha ma na ibahen Jahowa halani iserang juakjuak-Ni?

¹⁰ Aha ma na ibahen Jahowa halani iserang juakjuak-Ni? Ia mangkatahon, “Manggila tumang do Ahu.” (Hes. 38:18, 21-23) Bani Pangungkabon bindu 19 igambarhon do use aha na masa. Isuruh Jahowa ma Anak-Ni manlinggomi juakjuak-Ni janah manaluhon ganup munsuh-Ni. Jadi, Jesus pakon “sagala bala na i surga”, ai ma ganup malekat na setia rap pakon na 144.000 ai, marporang manlawan Gog hun Magog. (Pangk. 17:14; 19:11-15) Sonaha ma ujungni? Iripaskon ma ganup jolma ampa organisasi na manlawan dompak Jahowa!​—Basa Pangungkabon 19:19-21.

11. Aha do peristiwa na sipontingan bani buku Pangungkabon?

¹¹ Bayangkon ma sonaha pangahap ni ganup halak na setia, na maluah hun parporangan ai. Tontu marmalas ni uhur tumang ma sidea. Dihut do homa na i surga marmalas ni uhur sanggah Babel na Banggal ai iripaskon. (Pangk. 19:1-3) Janah adong do na mambahen lambin tambah malas ni uhur ni sidea, ai ma “pesta parunjukon ni Anak ni Biribiri in”. Sasintongni, ai do peristiwa na sipontingan bani buku Pangungkabon.​—Pangk. 19:6-9.

12. Songon na ipatuduh bani Pangungkabon 21:1, 2, attigan do pesta parunjukon ni Anak ni Biribiri in?

¹² Attigan do pesta parunjukon in? Haganup na 144.000 ai domma i surga paima masa porang Harmagedon. Tapi, lape saud pesta parunjukon in sanggah ai. (Basa Pangungkabon 21:1, 2.) Pesta parunjukon ni Anak ni Biribiri in saud dobkonsi porang Harmagedon ampa dobkonsi iripaskon ganup munsuh ni Naibata.​—Ps. 45:4, 5, 14-18.

13. Aha ma na masa bani pesta parunjukon ni Anak ni Biribiri in?

¹³ Aha do na masa bani pesta parunjukon ai? Bani pesta parhajabuan, marsada ma sada dalahi pakon sada naboru. Sonai ma homa bani pesta parunjukon ni Anak ni Biribiri in. Marsada ma Jesus Kristus, Raja in, pakon ‘tunanganni’, ai ma na 144.000 in. Dobkonsi ai, rap mamarentah ma sidea sadokah 1.000 tahun.​—Pangk. 20:6.

14-15. Bani Pangungkabon bindu 21, isarupahon songon aha do na 144.000 ai? (Tonggor ma gambar sampul.)

¹⁴ Dob ai, bani Pangungkabon bindu 21 isarupahon do na 144.000 songon kota na jenges tumang na isobut “Jerusalem na Bayu”. (Pangk. 21:2, 9) Dong 12 batu onjolan ni kota ai janah dong tarsurat “goran ni na 12 apostel ni Anak ni Biribiri in”. Mase iparuhurhon si Johannes ai? Halani dong ididah ia tarsurat goranni bani sada batu ai. Hasangapon na banggal tumang do on!​—Pangk. 21:10-14; Ep. 2:20.

 ¹⁵ Lang sarupa kota on pakon kota na legan. Humbani omas pitah do dalan ni kota ai, 12 horbangan humbani mutiha, humbani batu na maharga do onjolan ni tembokni, janah dos do ganjangni pakon bolagni. (Pangk. 21:15-21) Tapi, adong na magou! Pardiateihon ma use na ihatahon si Johannes, “Seng dong huidah rumah panumbahan ibagas huta ai, ai Tuhan Naibata, Sigomgom haganup do na gabe rumah panumbahan ijai, rap pakon Anak ni Biribiri in. Seng porlu bani huta ai mata ni ari atap bulan laho manondangisi; ai hasangapon ni Naibata do na paliharhonsi anjaha Anak ni Biribiri in do panondangni.” (Pangk. 21:22, 23) Rap pakon Jahowa do sidea na gabe bagian humbani Jerusalem na Bayu ai. (Heb. 7:27; Pangk. 22:3, 4) Jadi, Jahowa pakon Jesus do rumah panumbahan i kota ai.

16. Aha ma na masa bani ganup jolma sadokah Pamarentahan Saribu Tahun?

¹⁶ Sai tarpaima-ima do ganup halak na iminaki bani kota ai. Tapi lang pitah sidea. Ganup halak na marpangarapan manggoluh i tanoh on pe marosuh do homa bani kota ai. Sanggah mamarentah Harajaon ni Naibata sadokah 1.000 tahun, bahat do holi pasu-pasu na ibere marhitei Jerusalem na Bayu ai. Isarupahon si Johannes do pasu-pasu ai songon “bah banggal hagoluhan”. Anjaha bani topi ni bah ai adong do “hayu hagoluhan”, janah gabe “hamalumon do [bulungni] bani bangsa-bangsa”. (Pangk. 22:1, 2) Ganup halak na tading ijai mandapot guna humbani aha na ipasirsir Naibata. Dob ai anget-anget gabe gokan dear ma holi ganup jolma. Lang adong be na boritan, na marpusok ni uhur, ampa partangisan.—Pangk. 21:3-5.

17. Songon na ijanjihon bani Pangungkabon 20:11-13, ise do holi na mandapot pasu-pasu sadokah Pamarentahan Saribu Tahun ai?

¹⁷ Ise ma holi na mangahapkon pasu-pasu ai? Na parlobei mandapot guna ai ma humpulan na banggal na maluah hun Harmagedon, rap pakon dakdanak na mungkin tubuh i tanoh na baru. Anjaha, bani Pangungkabon bindu 20 dong janji anggo halak na matei ipapuho do holi. (Basa Pangungkabon 20:11-13.) Jadi, manggoluh do use halak “parpintor” na dob matei hinan, sonai homa  halak “pargeduk” na lape ongga marlajar pasal Jahowa. Ganupan sidea ipapuho laho manggoluh i tanoh on. (Lah. 24:15; Joh. 5:28, 29) Tapi, ai ganup do halak na matei ipapuho sadokah Pamarentahan Saribu Tahun ai? Lang. Ganup halak na jahat, na lang ra mangidangi Jahowa lang ipapuho. Domma ibere panorang bani sidea, tapi lang ra sidea mubah. On patuduhkon anggo sidea lang talup mandapot hagoluhan i Paradeiso i tanoh on.​—Mat. 25:46; 2 Tes. 1:9; Pangk. 17:8; 20:15.

18. Aha do na masa i tanoh on bani ujungni 1.000 tahun ai?

¹⁸ Bani ujungni 1.000 tahun ai, gabe gokan dear ma ganup halak na manggoluh i tanoh on. Lang adong be holi dousa tean-teanon humbani si Adam. (Rom 5:12) Halani ai, ganup halak na i tanoh on “mulak manggoluh” janah gokan dear bani ujungni 1.000 tahun ai.​—Pangk. 20:5.

19. Mase maningon adong ujian na parpudi?

¹⁹ Songon na ibotoh hita, totap do setia Jesus bani Jahowa hassi pe Sibolis manlajou ia. Tapi, ai ganup do holi manisia na gokan dear boi totap setia bani Jahowa anggo ibere panorang bani Sibolis laho manlajou sidea? Ganup halak boi mambuktihon ai sanggah Sibolis ipaluah humbani tutupanni atap hun ruang partoruh bani ujungni 1.000 tahun ai. (Pangk. 20:7) Sidea na mambuktihon diri totap setia sadokah ujian na parpudi ai, mandapot hagoluhan na sadokah ni dokahni janah mangahapkon habebason na sasintongni. (Rom 8:21) Tapi sidea na manlawan dompak Jahowa, iripaskon sadokah ni dokahni rup pakon Sibolis ampa begu-beguni.​—Pangk. 20:8-10.

20. Sonaha pangahapmu dobkonsi mangulas pasal panjahaion bani buku Pangungkabon?

²⁰ Sonaha pangahapmu dob mangulas pasal panjahaion na adong bani buku Pangungkabon? Tontu malas tumang uhurta halani manggoluh bani panorang sanggah panjahaion ai saud. Pasti sihol do uhurta mangontang halak na legan ase dihut manombah Naibata Jahowa. (Pangk. 22:17) Sanggah hita mamingkirhon peristiwa na masa bani ari na laho roh, tontu tarojur do hita mangkatahon songon na ihatahon Apostel Johannes, “Amen! Roh ma ham, Tuhan Jesus!”​—Pangk. 22:20.