1. Aha do na ihatahon buku Pangungkabon pasal juakjuak ni Naibata?

 BANI buku Pangungkabon ipatalar do anggo Harajaon ni Naibata domma mamarentah i surga, anjaha Sibolis domma idabuhkon hu tanoh on. (Pangk. 12:1-9) Halani ai gabe damei ma i surga, tapi gabe bahat ma sitaronon i tanoh on. Mase? Halani marah tumang do Sibolis anjaha iparburu ia do juakjuak ni Naibata na setia mangidangi Jahowa.​—Pangk. 12:12, 15, 17.

2. Aha do na boi mangurupi hita ase totap setia bani Jahowa?

² Aha do na boi mangurupi hita ase totap setia hassi pe adong tantangan humbani Sibolis? (Pangk. 13:10) Anggo ibotoh hita aha na laho masa bani ari na laho roh, ai boi mangurupi hita. Umpamani, bani buku Pangungkabon ipatorang Apostel Johannes do pasu-pasu na laho ibere hubanta. Sada contoh ai ma iripaskon do holi munsuh-munsuh ni Naibata. Sonari ulas hita ma sonaha buku Pangungkabon manggambarhon munsuh-munsuh ni Naibata, anjaha aha do na laho masa hubani sidea.

3. Aha do deba lambang na igunahon bani buku Pangungkabon?

³ Bani buku Pangungkabon igunahon do bahasa lambang laho patugahkon ise munsuh-munsuh ni Naibata. Igambarhon do sidea songon binatang buas. Umpamani, adong binatang buas na “mandarat humbagas laut.” Binatang ai “sapuluh do tandukni anjaha pitu uluni”. (Pangk. 13:1) Dob ai, adong binatang buas na legan na “mandarat hun tanoh”. Binatang ai marsahap songon naga na mambahen ‘apuy turun hun langit’. (Pangk. 13:11-13) Anjaha ididah  hita do homa binatang buas na legan, ai ma “sada binatang sigerger” na ihunduli boru jalang. Hatolusi binatang on mawakili munsuh-munsuh ni Naibata na domma dokah manlawan dompak Jahowa pakon Harajaon-Ni. Halani ai ma ponting tumang do ibotoh hita ise do sidea.​—Pangk. 17:1, 3.

4-5. Sonaha ayat bani Daniel 7:15-17 boi mangurupi hita laho mangarusi aha do artini lambang-lambang ai?

⁴ Paima iparlajari hita ise do munsuh-munsuh ai, porlu do iarusi hita ise do na igambarhon binatang buas pakon boru jalang ai. Cara na sidearan laho mangarusi ai paruhurhon hita ma sonaha Bibel patorangkon ai. Bahat do gambaran na adong i buku Pangungkabon domma ipatorang bani buku na legan ibagas Bibel. Umpamani, ibagas panonggoran ni Nabi Daniel ididah ia “luar ma ompat binatang hun laut”. (Dan. 7:1-3) Ipatorang ia do aha na igambarhon ompat binatang buas ai. Binatang buas ai manggambarhon ompat “harajaon” atap pamarentahan. (Basa Daniel 7:15-17.) Hunjai iarusi hita ma anggo binatang bani buku Pangungkabon ai pasti manggambarhon kuasa politik atap pamarentahan.

⁵ Sonari ulas hita ma piga-piga gambaran na ipatorang bani buku Pangungkabon ase iarusi hita aha do artini lambang-lambang ai. Na parlobei, pardiateihon ma manggambarhon ise do sidea. Dob ai, iulas hita ma aha na masa bani binatang-binatang ai. Na parpudi, iulas hita ma aha na porlu ibahen hita dobkonsi mambotoh ai.

6. Aha do artini binatang buas na pitu uluni na isobut bani Pangungkabon 13:1-4?

⁶ Aha do binatang buas na pitu uluni ai? (Basa Pangungkabon 13:1-4.) Songon na dob ibasa hita, usih songon macan tutul do rupani binatang ai, tapi naheini songon nahei ni gipul, babahni songon babah ni singa, janah dong sapuluh tandukni. Ganupan ai dong bani ompat binatang na ipatugah i Daniel bindu 7. Hape bani buku Pangungkabon, ganupan ai dong bani sada binatang, sedo bani ompat binatang. Binatang buas on lang pitah mawakili sada pamarentahan. Apostel Johannes patugahkon anggo binatang ai “manggomgomi sagala marga, suku, hata pakon bangsa”. Jadi, maningon banggalan do ia marimbangkon ganup pamarentahan na adong. (Pangk. 13:7) Anjaha, binatang buas on maningon mawakili ganup pamarentahan na markuasa bani ganup jolma ronsi sonari. *​—Par. 8:9.

7. Aha do na igambarhon binatang buas na pitu uluni ai?

⁷ Manggambarhon aha do ulu bani binatang buas na pitu uluni ai? Bani Pangungkabon bindu 17, iurupi do hita laho mambotoh balosni. Ijai ipatorang do aha na ipatugah bani Pangungkabon bindu 13. Pangungkabon 17:9, 10 mangkatahon, “Pitu raja do ai. Lima hunjai domma madabuh, na sada adong ope, na sada nari lang roh ope; anjaha anggo roh, tongkin do hansa ia adong.” Humbani ganup pamarentahan na igunahon Sibolis, dong pitu na sigogohan na sosok gabe “ulu”. Banggal do pengaruhni ganup kuasa dunia ai hubani juakjuak ni Naibata. Sanggah Apostel Johannes mandapot panonggoran ai, lima harajaon na domma mamarentah ai ma: Masir, Assur, Babel,  Madai pakon Persia, ampa Gorik atap Junani. Kuasa dunia na paonomkon, ai ma Rom, mamarentah ope sanggah ai. Jadi, pamarentah na ija do na gabe ulu, atap kuasa dunia na papituhon?

8. Kuasa politik na ija do na manggambarhon ulu na papituhon?

⁸ Songon na dob ididah hita, humbani panjahaion na dong bani buku Daniel gabe ibotoh hita ma ise do ulu na papituhon atap ulu na parpudi ai. Kuasa dunia na ija do na mamarentah sadokah panorang parpudi, atap sadokah “ari ni Tuhan in”? (Pangk. 1:10) Gabungan humbani Inggris Raya pakon Amerika Serikat do ai, na isobut Kuasa Dunia Anglo-Amerika. Halani ai, boi ma ihatahon ia do ulu na papituhon na ipatugah bani Pangungkabon 13:1-4.

9. Aha do na igambarhon binatang buas na ‘dua tandukni songon tanduk ni biribiri’ ai?

⁹ Bani Pangungkabon bindu 13 ipatugah do homa anggo Kuasa Dunia Anglo-Amerika igambarhon songon binatang buas na ‘dua tandukni songon tanduk ni biribiri, anjaha songon parsahap ni naga do parsahapni’. “Ibahen [binatang ai] do tanda na banggal, pala ipaturun apuy hun langit hu tanoh i lobei ni jolma.” (Pangk. 13:11-15) Bani Pangungkabon bindu 16 pakon 19, igambarhon do binatang buas ai songon “nabi sipakulah-kulah”. (Pangk. 16:13; 19:20) Sosok do on pakon panjahaion ni si Daniel na mangkatahon “jangin tumang do pansedaini” na ibahen Kuasa Dunia Anglo-Amerika. (Dan. 8:19, 23, 24) Sanggah ibahen sidea dua bom, usih songon mambahen ‘apuy turun hun langit hu tanoh on’ do ai. On ma na masa sanggah Porang Dunia II, ilmuwan Inggris pakon Amerika do na mambahen bom ai na mangujungi Porang Dunia II.

10. Aha do na igambarhon “gana-gana ni binatang” ai? (Pangungkabon 13:14, 15; 17:3, 8, 11)

¹⁰ Dob ai ididah hita use adong binatang buas na legan. Binatang on suman pakon binatang buas na pitu uluni nongkan ai. Tapi na sada on gerger do. Isobut do ia ‘gana-gana humbani binatang ai’ janah igambarhon do ia raja “na paualuhkon”. * (Basa Pangungkabon 13:14, 15; 17:8, 11.) Adong hinan do “raja” on, tapi dob ai lang adong be, hape roh use. Sosok do on manggambarhon Perserikatan Bangsa-Bangsa (PBB) na mamajuhon kepentingan politik i sab dunia on. Mungkahni isobut do ia Liga Bangsa-Bangsa. Tapi lang adong be ia sadokah porang dunia na paduahon, dob ai roh use gabe PBB.

11. Aha do na ibahen binatang buas ai, janah mase lang pala mabiar hita?

¹¹ Dob ai, ibahen binatang buas atap pamarentahan dunia on ma bahat halak manlawan Jahowa ampa juakjuak-Ni. Si Johannes mangkatahon ipatumpu sidea ma “raja-raja ni sab dunia on” laho marporang i Harmagedon, ai ma “ari na banggal ai, ari ni Naibata, Sigomgom haganupan”. (Pangk. 16:13, 14, 16) Tapi ulang pala mabiar hita. Mintor podas do Jahowa, Naibata na Sitimbulan in, paluahkon ise pe na ra unduk bani pamarentahan-Ni.​—Hes. 38:21-23.

12. Aha do na laho masa bani ganup binatang buas ai?

¹² Aha do na masa bani ganup binatang buas ai? Pangungkabon 19:20 mambalosi, “Gabe tartangkap ma binatang ai rap pakon nabi sipahulah-kulah ai, na dob mambahen  tanda-tanda i lobeini, parhiteianni paoto-otohon sagala na manjalo tanda ni binatang ai pakon na manombah gambaranni. Manggoluh do na dua ai idabuhkon hu laut apuy na gajag marhasoman hirtah.” Jadi, sanggah mamarentah ope munsuh-munsuh ni Naibata ai, iripaskon ma ganupan sidea ronsi sadokah ni dokahni.

13. Tantangan aha do na roh hubani halak Kristen halani pamarentah ni dunia on?

¹³ Aha do artini ai hubanta? Halani halak Kristen hita, maningon setia ma hita hubani Naibata ampa Harajaon-Ni. (Joh. 18:36) Halani ai, maningon totap ma hita netral ibagas ganup urusan ni dunia on. Ra do lang urah ai halani ipaksa pamarentah do hita ase mangapiti sidea marhitei parsahap ampa pambahenanta. Sidea na ra mangihutkon harosuh ni pamarentah patuduhkon manjalo tanda humbani binatang buas ai. (Pangk. 13:16, 17) Tapi, barang ise pe na ra manjalo tanda ai, lang be iharosuhkon Jahowa ia, anjaha lang boi ia manggoluh sadokah ni dokahni. (Pangk. 14:9, 10; 20:4) Halani ai, ponting tumang do hita totap netral lang soal bahat tantangan humbani pamarentah!

14. Aha do na ididah Apostel Johannes na mambahen longang uhurni? (Pangungkabon 17:3-5)

¹⁴ Apostel Johannes mangkatahon dong na ididah ia na mambahen ‘longang tumang uhurni’. Aha gakni ai? Ididah ia ma dong sada naboru hundul i atas ni sada humbani binatang buas ai. (Pangk. 17:1, 2, 6) Igambarhon do naboru ai “boru jalang na banggal” anjaha isobut do ia “Babel na Banggal”. “Marbangkis” do ia pakon “raja-raja ni tanoh in”.​—Basa Pangungkabon 17:3-5.

15-16. Ise do “Babel na Banggal” ai, janah hunja ibotoh hita ai?

¹⁵ Ise do “Babel na Banggal” ai? Lang mungkin ai organisasi politik halani ihatahon marbangkis do naboru ai pakon pamimpin ni politik dunia on. (Pangk. 18:9) Marusaha do ia manrajai pamarentah ni dunia on, atap hundul i atas ni sidea. Leganni ai, lang mungkin ia manggambarhon partiga-tiga na tamak halani pulig do igambarhon “partiga-tiga ni tanoh on” pakon naboru ai.​—Pangk. 18:11, 15, 16.

¹⁶ Bani Bibel, istilah “parbangkis” igunahon bani sidea na mangaku manombah Naibata, hape dihut bani panombahan gana-gana janah marhasoman pakon dunia on. (1 Kron. 5:25; Jak. 4:4) Tapi, sidea na setia manombah Naibata isobut do “anak boru na so haliaban” (perawan suci). (2 Kor. 11:2; Pangk. 14:4) Sapari, i kota Babel do pusat ugama palsu. Halani ai, Babel na Banggal pasti manggambarhon ganup ugama palsu. Jadi Babel na Banggal ai ma: ganup ugama palsu i tanoh on.​—Pangk. 17:5, 18; tonggor ma artikel “Apa Babilon Besar Itu?” bani jw.org.

17. Aha do na laho masa bani Babel na Banggal ai?

¹⁷ Aha do na laho masa bani Babel na Banggal ai? Dong do balosni ai bani Pangungkabon 17:16, 17. Ijai ihatahon, “Ia tanduk na sapuluh ai, na nididahmai, pakon binatang ai, domdoman ni sidea ma boru jalang ai, lungunan ma bahenon ni sidea ia anjaha talanjang, panganon ni sidea ma dagingni, anjaha tutungon ni sidea ma ia bani apuy. Ai ipuhoi Naibata do uhur ni sidea, laho pasaudkon sura-sura ni uhur-Ni.” Jadi ibahen Jahowa ma holi ase igunahon bangsa-bangsa binatang buas sigerger ai atap PBB, manripaskon ganup ugama palsu i tanoh on ronsi lang adong be ai.​—Pangk. 18:21-24.

18. Sonaha hita mamastihon anggo hita lang dihut ibagas Babel na Banggal ai?

 ¹⁸ Aha do artini ai hubanta? Maningon tongtong ma hita ibagas “parugamaon na borsih anjaha na so adong sihataon bani uhur ni Naibata”. (Jak. 1:27) Ulang ma ra hita ipengaruhi ajaran na palsu. Ulang homa dihut bani ari-ari raya pakon parlahou ni dunia na sambor on. Janah ulang ma ihorjahon hita spiritisme. Leganni ai, maningon tongtong ma ipasingat hita ganup halak ase ‘kaluar hun tongah-tongahni’ Babel na Banggal ai, ase ulang dihut sidea ihonai sitarononni.​—Pangk. 18:4.

19. Ise do “naga na banggal songon apuy” ai?

¹⁹ Bani buku Pangungkabon ipatugah do homa pasal ise do “naga na banggal songon apuy” ai. (Pangk. 12:3) Marporang do naga ai manlawan Jesus pakon malekat-malekatni. (Pangk. 12:7-9) Iparburu ia do homa juakjuak ni Naibata. Janah ibere ia do kuasa hubani binatang buas atap pamarentah ni dunia on. (Pangk. 12:17; 13:4) Jadi, ise ma naga ai? “Ulog na basaia ai [do ia], ai ma Sibolis pakon Setan”. (Pangk. 12:9; 20:2) Ia do na manrajai ganup munsuh ni Jahowa.

20. Aha do na laho masa bani naga ai?

²⁰ Aha ma na laho masa bani naga ai? Bani Pangungkabon 20:1-3 ihatahon dong sada malekat na mandabuhkon Sibolis hu ruang partoruh. Usih songon penjara ma ai hu bani. Sadokah ibagas ai, “lang be ipakahou [Sibolis] sagala bangsa, paima gok na 1.000 tahun ai”. Ujungni, idabuh ma Sibolis ampa begu-beguni hu “laut apuy pakon hirtah”. On artini iripaskon ma sidea sadokah ni dokahni. (Pangk. 20:10) Bayangkon ma i dunia on lang adong be Sibolis ampa begu-beguni. Tontu malas tumang uhurta tading ijai!

21. Mase malas uhurta dob mangarusi aha na dob ibasa hita ibagas buku Pangungkabon?

²¹ Tontu gabe ipatoguh do uhurta dob mangarusi arti ni lambang-lambang na isurat bani buku Pangungkabon! Domma ibotoh hita ise do munsuh ni Jahowa, anjaha ibotoh hita do homa aha na laho masa bani sidea. Jadi, “martuah ma na mambasa pakon na mambogei hata ni panjahaion on”! (Pangk. 1:3) Tapi, dobkonsi iripaskon ganup munsuh ni Naibata, pasu-pasu aha ma na ijalo halak na setia? Ulas hita ma balosni ai bani artikel na mangihut.