1-2. Sanggah mubah situasinta, mase adong ayat ni Bibel na gabe ponting tumang iahap hita?

 SOMALNI sanggah pesta parhajabuan, adong do sahalak sintua na padaskon ambilan na marisi podah ni Bibel pasal parhajabuan. Haduasi pengantin ai pasti tongon-tongon mampardiateihon ambilan ai. Lang on na parlobei sahali sidea manangar podah ai, tapi sahali on legan do pangahap ni sidea manangar ambilan ai. Mase? Halani humbani ari ai idalankon sidea ma podah ai ibagas parhajabuan ni sidea.

² Sonai homa sanggah laho adong niombahni. Domma martahun-tahun sidea manangar podah pasal pagodangkon niombah. Tapi sonari ponting tumang do bani sidea podah ai halani sidea laho marniombah. Sada tanggung jawab na banggal do on. Sanggah mubah situasi, ra do adong piga-piga ayat ni Bibel gabe ponting tumang iahap hita. Halani ai ma ase juakjuak ni Naibata tongtong mambasa Bibel. Sapari, iparentahkon do homa raja-raja Israel ase mambasa titah ni Naibata janah manrimangi ai “sadokah manggoluh ia”.​—5 Mus. 17:19.

3. Aha do na laho iulas hita bani artikel on?

³ Nasiam namatoras, dong do tanggung jawab ni nasiam laho mangajarhon pasal Jahowa bani niombahmu. Tontu lang sungkup pitah patugahkon ise do Naibata. Tapi sihol do ham ase ihaholongi sidea Naibata humbani gokni uhurni. Aha do na boi ibahen nasiam laho mangurupi sidea mangkaholongi Jahowa? Bani artikel on, iulas hita  ma ompat prinsip ni Bibel na boi mangurupi nasiam. (2 Tim. 3:16) Iulas hita ma homa sonaha piga-piga namatoras mandapot guna halani mangihutkon podah ni Bibel.

4. Aha do sada prinsip na mangurupi namatoras laho mangajari niombahni mangkaholongi Jahowa humbani gok ni uhurni? (Jakobus 1:5)

⁴ Prinsip 1: Pindo ma panogu-noguon humbani Jahowa. Pindo ma ase iparuhuri Jahowa nasiam laho mangajari niombahmu mangkaholongi-Si. (Basa Jakobus 1:5.) Ia do Sibere podah na sidearan. Dong dua alasan: Na parlobei, Jahowa do namatoras na paling marpangalaman. (Ps. 36:10) Janah na paduahon, tongtong do marguna ganup podah-Ni.​—Jes. 48:17.

5. (a) Aha do na ipasirsir organisasi laho mangurupi namatoras? (b) Humbani pangalaman ni Sanina pakon Botou Amorim bani video ai, aha ma na boi iparlajari hita?

⁵ Marhitei Bibel ampa organisasi-Ni ipasirsir Jahowa do bahat podah na boi mangurupi namatoras mangajari niombahni laho mangkaholongi Jahowa. (Mat. 24:45) Umpamani, bahat do podah dapot nasiam humbani seri artikel “Bantuan untuk Keluarga”. Sadokah martahun-tahun, artikel on dong bani majallah Sadarlah! Tapi sonari artikel sisonai adong bani situs webta. Bahat do homa video i jw.org na boi mangurupi namatoras laho mangajari niombahni. *​—Pod. 2:4-6.

6. Aha ma na ihatahon sada bapa pakon istrini halani ipasirsir Jahowa pangurupion marhitei organisasi-Ni?

⁶ Bahat do namatoras mangkargai na dob ipasirsir Jahowa marhitei organisasi-Ni. Sahalak bapa na margoran si Joe mangkatahon, “Lang urah pagodangkon tolu niombah ibagas hasintongan. Tongtong do ahu pakon istriku mangindo pangurupion humbani Jahowa. Gati do iahap hanami artikel atap video na terbaru pas bani situasi ampa na ihaporluhon hanami. Sai tongtong do hanami marpangunsandeian bani podah ni Jahowa.”  Si Joe pakon istrini mangkatahon podah na ipasirsir organisasi mangurupi niombah ni sidea dohor bani Jahowa.

7. Mase maningon marusaha namatoras mambere contoh na dear? (Rom 2:21, 22)

⁷ Prinsip 2: Bahen ma contoh. Gati do dakdanak maniru aha na ididahni humbani namatorasni. Tongon, lang adong namatoras na gokan dear. (Rom 3:23) Age pe sonai, marusaha ma mambere contoh na dear. (Basa Rom 2:21, 22.) Sahalak bapa mangkatahon, “Usih songon spons do dakdanak ai na mangonsop haganup. Anggo adong na ihorjahon hita na lang domu bani na iajarhon hita, mintor ipatugah sidea do ai.” Jadi anggo sihol uhurta ase niombahta mangkaholongi Jahowa, maningon hita do lobei na mangkaholongi-Si janah patuduh ma ai.

8-9. Aha ma na boi iparlajari hita humbani pangalaman ni si Andrew pakon si Emma?

⁸ Bahat do cara na boi igunahon namatoras laho mangajari niombahni ase mangkaholongi Jahowa. Pardiateihon ma na ihatahon si Andrew sada garama na marumur 17 tahun, “Tongtong do iajarhon namatorasku bangku ponting tumang do martonggo ai. Tiap borngin iarahkon bapa do ahu martonggo hassi pe domma martonggo ahu. Gati do ihatahon bapa hubangku pakon botoungku, ‘Sadihari pe boi do hanima martonggo.’ Halani ai ponting tumang do huahap tonggo ai. Sonari lambin urah ma huahap martonggo janah huanggap do Jahowa ai Bapa na parholong.” Nasiam namatoras dingat ma, anggo ihaholongi ham Jahowa gabe boi ma iurupi ham niombahmu laho mangkaholongi Jahowa.

⁹ Pardiateihon ma homa pangalaman ni si Emma. Sanggah itadingkon bapani sidea, itadingkon do homa utang na maningon igalari omakni. Si Emma mangkatahon, “Age pe gati lang adong duit ni omak, tapi tongtong do ihatahon ia isarihon Jahowa do juakjuak-Ni. Boi do huidah porsaya do omak bani aha na ihatahonni ai. Ihorjahon omak do aha na iajarhonni bannami.” Aha ma parlajaranni? Age pe lang urah situasinta, boi do namatoras mambahen contoh na dear bani niombahni.​—Gal. 6:9.

10. Sadihari do panorang na i pakei halak Israel laho marbuali pakon niombahni? (5 Musa 6:6, 7)

¹⁰ Prinsip 3: Taratur ma marbuali pakon niombahnima. Hinan iparentahkon Jahowa do halak Israel ase taratur mangajari niombahni. (Basa 5 Musa 6:6, 7.) Bahat do panorang na boi igunahon namatoras laho mangajari niombahni ase mangkaholongi Jahowa. Contohni, dakdanak dalahi somalni mangurupi bapani i juma sanggah manuan ampa marpariama. Dakdanak naboru mangurupi omakni i rumah sanggah martonun atap manjahit ampa mangkorjahon tugas-tugas na legan. Sanggah rup marhorja, bahat do na boi isaritahon sidea. Boi do iulas sidea pasal sifat-sifat ni Jahowa ampa sonaha Ia mangurupi sidea.

11. Sadihari do namatoras boi marbuali pakon niombahni?

¹¹ Sonari on situasi domma mubah. Bani piga-piga ianan lang boi be namatoras pakon niombahni rup sadari bod. Namatoras i parhorjaan janah niombahni i parsikolahan. Halani ai, namatoras ma na mangatur panorang ase boi marbuali pakon niombahni. (Ep. 5:15, 16; Pil. 1:10) Sada panorang na dear ai ma sanggah parlajaran Bibel kaluarga. Sahalak garama na margoran si Alexander mangkatahon,  “Sai iatur bapa do parlajaran kaluarganami. Lang ilopas ia aha pe manlanglangi ai. Dobkonsi ai, marbuali ma hanami.”

12. Aha do na porlu idingat kopala kaluarga sanggah parlajaran Bibel kaluarga?

¹² Anggo ham kopala kaluarga, aha do na boi ibahen ham ase menarik parlajaran Bibel kaluarga bani niombahmu? Boi do isuba nasiam mamakei buku Hagoluhan na Martuah Sadokah ni Dokahni. Buku on ibahen laho mangurupi ganup anggota kaluarga lambin ringgas sanggah parlajaran Bibel kaluarga. Gabe ra ma dakdanak patugahkon aha na ipingkirhon atap holsoh ni uhurni. Ulang ma gunahon nasiam panorang ai laho maminsang niombahmu. Ulang mintor manggila sanggah lepak parsahap atap parlahou ni niombahmu. Tapi, puji ma sidea halani ra patugahkon ai. Lambin urah ma nasiam mangurupi niombahmu anggo ibotoh nasiam sonaha pangahapni.

13. Sadihari do use panorang na pas laho mangurupi niombah ase dohor bani Jahowa?

¹³ Nasiam na matoras, pindahi ma panorang laho mangurupi niombahmu marlajar pasal Jahowa. Ulang pala maningon pas studi iajarhon ham pasal Naibata bani sidea. Pardiateihon ma na ihatahon sahalak inang na margoran si Lisa, “Igunahon hanami do na adong i sakalilingnami laho mangurupi niombahnami marlajar pasal Jahowa. Umpamani, sanggah baliangnami mambahen na lucu, ihatahon hanami ma anggo Jahowa ai Naibata na martuah janah sihol ase hita martuah.”

14. Mase ponting bani namatoras mangurupi niombahni mamilih hasoman? (Podah 13:20)

¹⁴ Prinsip 4: Urupi ma niombahmu mamilih hasoman. Bibel mangkatahon parhasomanan boi parohkon na madear atap na masambor hubanta. (Basa Podah 13:20.) Nasiam namatoras, itandai nasiam do hasoman ni niombahmu? Ongga do nasiam pajumpah ampa marsaor pakon sidea? Sonaha ham mangurupi niombahmu ase marhasoman pakon na mangkaholongi Jahowa? (1 Kor. 15:33) Contohni, boi do iontang nasiam  sanina botou na mangkaholongi Jahowa hu rumahmu ase boi nasiam rup marguro-guro.​—Ps. 119:63.

15. Sonaha namatoras mangurupi niombahni laho mamilih hasoman na dear?

¹⁵ Paruhurhon ma pangalaman ni sahalak bapa na margoran si Tony. Ia patorangkon aha na dob ibahen ia pakon istrini laho mangurupi niombahni mangindahi hasoman na bujur. Ia mangkatahon, “Ahu pakon istriku mangontang sanina botou na matua pakon na maposo hu rumahnami. Rup mangan do hanami ampa mambahen parlajaran Bibel kaluarga. On ma cara na sidearan laho mananda sidea na mangkaholongi Jahowa ampa na marmalas ni uhur mangidangi-Si. Iontang hanami do homa sintua kaliling ampa misionaris ase marborngin i rumah. Bahat do na boi iparlajari niombahnami humbani pangalaman ampa haringgason ni sidea ibagas pangidangion. Ganupan on mangurupi niombahnami lambin orot bani Jahowa.” Nasiam namatoras, tongtong ma marusaha mangurupi niombahmu mangindahi hasoman na bujur.

16. Sonaha anggo niombahmu mangkatahon lang ra be ia mangidangi Jahowa?

¹⁶ Sonaha anggo niombahmu mangkatahon lang ra be ia mangidangi Jahowa, hassi pe domma marusaha nasiam mambahen na sidearan laho mangurupisi? Ulang ma iagan nasiam domma gagal nasiam mandalankon tanggung jawab. Ibere Jahowa do habebason mamilih bani ganup jolma, tarmasuk ma bani niombahmu. Jadi, hita sandiri do na mamilih laho mangidangi Jahowa atap lang. Anggo domma ipilih niombahmu manadingkon Jahowa, torus ma nasiam mangarap mulak do holi ia. Dingat ma limbaga pasal anak na magou. (Luk. 15:11-19, 22-24) Hassi pe domma bahat na ihorjahonni na masambor, tapi mulak do ia use. Ra do adong na mangkatahon, “Pitah sarita do ai. Ai ra do mulak use anakku mangidangi Jahowa?” Ra! Ai do na masa bani sada garama na margoran si Elie.

17. Sonaha pangalaman ni si Elie boi patoguhkon uhurmu?

 ¹⁷ Isaritahon si Elie ma pangalamanni, “Marusaha do namatorasku mangurupi ahu ase mangkaholongi Jahowa ampa Bibel. Tapi, sanggah marumur hira-hira 15 tahun, mulai ma ahu manlawan dompak sidea.” Sip-sip ihorjahon si Elie ma na lepak. Marusaha do namatorasni mangurupi ia ase totap dohor bani Jahowa, tapi lang ra ia manangihon sidea. Dobkonsi itadingkon ia rumah, lambin sambor ma parlahouni. Hassi pe sonai, sipata ra do ia mambere hasaksian bani sada hasomanni. Si Elie mangkatahon, “Lambin gati ahu mansaritahon pasal Jahowa bani hasomanku ai, lambin gati ma hupingkiri pasal Jahowa. Nanget-nanget tubuh ma use hasintongan na ongga iajarhon namatorasku bangku.” Ujungni mulak ma use si Elie. * Tontu malas tumang ma uhur ni namatorasni halani domma mangajarhon hasintongan humbani etek-etek nari si Elie!​—2 Tim. 3:14, 15.

18. Sonaha pangahapta mangidah namatoras na lang marnaloja mangurupi niombahni ase mangkaholongi Jahowa?

¹⁸ Nasiam namatoras, domma ibere Jahowa tanggung jawab bamu laho mangurupi niombah ase manombah Jahowa. (Ps. 78:4-6) Sedo tugas na urah on. Ipuji hanami do nasiam halani lang marnaloja mangurupi niombahmu laho mangkaholongi Jahowa janah mangajari sidea ase unduk hu Bani. Pos ma uhurmu malas do uhur-Ni mangidah nasiam.​—Ep. 6:4.