1. Mase porlu ipindo hita hapentaran humbani Naibata? (Podah 3:13, 15)

 SANGGAH ham sihol mambahen haputusan, tontu martonggo do ham mangindo hapentaran. (Jak. 1:5) Songon na ihatahon Raja Salomo, “Harganan do [hapentaran] ase mutiha.” (Basa Podah 3:13, 15.) Hapentaran na ihatahon si Salomo ijon, ai ma hapentaran na humbani Naibata. (Pod. 2:6) Jadi, sonaha hita boi mandalankon hapentaran humbani Naibata ibagas goluhta? Ulas hita ma ai bani artikel on.

2. Sonaha carani hita boi mandapot hapentaran?

² Ase hita boi mandapot hapentaran, marlajar ma hita humbani si Salomo pakon Jesus. Bibel mangkatahon “ilayak-layakkon Naibata do hu bani si Salomo hapentaran pakon pangarusion na bagas tumang”. (1 Raj. 5:9) Anggo Jesus, ia do jolma na sipentaran i tanoh on. (Mat. 12:42) Bibel mangkatahon, “Sogop ma hubani [Jesus] tonduy ni Jahowa, tonduy hauhuron ampa pangarusion.”—Jes. 11:2.

3. Aha do na laho iulas hita bani artikel on?

³ Halani ibere Naibata hapentaran bani si Salomo pakon Jesus, gabe boi ma sidea mambere podah na marguna banta. Bani artikel on, iulas hita ma piga-piga podah ni sidea pasal duit, horja, ampa sonaha ase hita lang margijang ni uhur atap mangahap lang maharga dirinta.

4. Aha do bedani hagoluhan ni si Salomo pakon Jesus?

⁴ Bayak tumang do si Salomo ai, sonang goluhni, janah jenges homa rumahni. (1 Raj. 10:7, 14, 15) Tapi legan Jesus, otik do barang-barangni janah lang dong rumahni. (Mat. 8:20) Hassi pe lang sarupa hagoluhan ni sidea, tapi dos do sidea lang mambahen arta na sipontingan ibagas goluhni.

5. Aha do na ihatahon si Salomo pasal duit?

⁵ Ibotoh si Salomo do anggo duit ai boi gabe ‘parlinggoman’. (Par. 7:12) Anggo dong duitta, boi ma hita mamboli haporluanta atap pe aha na iharosuhkon hita. Tapi age pe bayak si Salomo, ibotoh ia do adong na sipontingan marimbangkon duit. Umpamani, ia mangkatahon, “Harganan do goran na madear ase habayakon na buei.” (Pod. 22:1) Bahat do homa halak na bayak na itonggor si Salomo, lang martuah goluhni. (Par. 5:9, 11) Halani ai ma ase ipasingat si Salomo hita, ase ulang mambahen duit na sipontingan ibagas goluhta, halani boi do ai sompong magou.​—Pod. 23:4, 5.

6. Aha do na ihatahon Jesus pasal habayakon? (Mateus 6:31-33)

⁶ Age pe lang bayak Jesus, tapi ipangan ia do homa sipanganon na mantin. (Luk. 19:2, 6, 7) Anjaha mukjizatni na parlobei, ibahen Jesus do anggur na sidearan. (Joh. 2:10, 11) Dong do homa baju ni Jesus na mahal. (Joh. 19:23, 24) Age pe sonai, sedo arta atap pe duit na sipontingan bani Jesus. Halani ai, ipasingat ia do susianni, “Seng tarbalosi sada halak dua tuan . . . Seng tarbalosi nasiam Naibata rap pakon [Habayakon].” (Mat. 6:24) Jadi Jesus mangajarhon anggo ipalobei hita Harajaon ni Naibata, bereon ni Naibata ma ganup na porlu banta.​—Basa Mateus 6:31-33.

7. Pasu-pasu aha do na iahapkon sada sanina halani lang ibahen ia duit na sipontingan ibagas goluhni?

⁷ Bahat do sanina botou na mangahapkon pasu-pasu halani lang ibahen sidea  duit na sipontingan ibagas goluhni. Pardiateihon ma sada garama na margoran si Daniel. Nini do, “Sanggah remaja ope ahu, marcita-cita do ahu mambere bahat panorang laho mangidangi Jahowa.” Halani ai, isederhanahon si Daniel ma goluhni. Gabe boi ma ia mangurupi sanina botou na hona bencana ampa mangidangi i Betel. Dob ai, nini do use, “Lang ongga husolsoli haputusanku on. Boi do namin husari bahat duit. Tapi anggo hubahen sonai, tontu lang boi hutanda bahat sanina botou na boi gabe hasomanku. Anjaha lang dapotku be malas ni uhur songon na huahapkon sonari on. Banggalan do pasu-pasu ni Jahowa marimbangkon arta na boi idapot hita.” Hunjon tangkas ma ibotoh hita, anggo ringgas hita mangidangi Jahowa, ai do na mambahen martuah goluhta, sedo halani bahat duitta.

8. Aha do na ihatahon si Salomo pasal marhorja? (Parambilan 5:18, 19)

⁸ Si Salomo mangkatahon malas ni uhur na dapot hita humbani horjanta “sibere-bere ni Naibata” do homa ai. (Basa Parambilan 5:17, 18.) Ihatahon ia do, “Ibagas sagala hangaluton [atap halojaon] adong do untung.” (Pod. 14:23) Si Salomo pe ringgas do ia marhorja. Ipajongjong ia do bahat kota, rumah, kebun anggur, taman bunga, ampa kolam. (1 Raj. 9:19; Par. 2:4-6) Tontu malas do uhurni halani ai. Tapi ibotoh ia do ase martuah goluhni maningon ringgas do ia mangidangi Jahowa. Umpamani, ipajongjong ia do Rumah Panumbahan na jenges tumang janah pitu tahun ma dokahni ia pajongjongkon ai! (1 Raj. 6:38; 9:1) Humbani ganup na ihorjahonni ai, ibotoh ia ma dearan do anggo sasahalak ringgas mangidangi Jahowa marimbangkon mangkorjahon na legan. Ihatahon ia do, ‘Rimpunan ni haganup na dob binogei ai, “Habiari ma Naibata, anjaha dalankon ma titah-Ni.”’​—Par. 12:13.

9. Hunja ibotoh hita lang mansari duit na sipontingan bani Jesus?

⁹ Jesus pe ringgas do homa marhorja. Sanggah poso ope, marhorja do ia gabe tukang kayu. (Mrk. 6:3) Tontu malas do uhurni namatorasni halani iurupi Jesus sidea mansari duit, laho mamboli haporluan ni sidea. Halani sempurna Jesus, tontu jenges ma hasil horjani janah bahat ma halak na marosuh mamboli barang-barang na ibahen ia. Jesus pe marosuh do homa mangkorjahon ai. Age pe sonai, totap do ibere Jesus panorangni laho mangidangi Jahowa. (Joh. 7:15) Ujungni ibere Jesus do ganup panorangni laho marbarita. Sanggah ia mangajar, ihatahon ia do bani ganup halak, “Ulang ma sipanganon na laho salpu horjahon nasiam, tapi sipanganon na totap ronsi hagoluhan sisadokah ni dokahni.” (Joh. 6:27) Leganni ai, sanggah ia marambilan i Dolog, ihatahon ia do homa, “Patumpu-tumpu hanima ma arta bannima i nagori atas.”​—Mat. 6:20.

10. Anggo ringgas hita i parhorjaan, tantangan aha do ra na roh hubanta?

¹⁰ Podah ni Naibata boi do mangurupi hita sanggah marhorja. Ipodahi do halak Kristen ase ringgas janah dear marhorja. (Ep. 4:28) Ra do ongga ipuji bos hita halani ringgas marhorja janah halani jujur hita. Tapi halani sihol hita ase ipuji bos-ta  Saksi Jahowa gabe gati ma hita lembur. Anggo ibahen hita sonai, holi lang adong be panorangta laho mandalankon tanggung jawabta ibagas kaluarga atap pe ibagas pangidangion. Jadi porlu ma ibahen hita parubahan ase boi ihorjahon hita na sipontingan.

11. Aha do na iparlajari sada sanina humbani sada sintua?

¹¹ Ipardiateihon si William do sitiruon na ibahen sahalak sintua na ongga gabe bosni. Nini si William do, “Ringgas tumang do sanina ai marhorja. Bahat do pelangganni na marosuh bani horjani. Tapi anggo domma jumpah panorangni laho mulak, lang lalab marhorja ia. Halani ibotoh ia dong homa tanggung jawabni ibagas kaluargani. Janah maningon ipatoguh ia do homa parhasomananni pakon Jahowa. Malas tumang do uhur ni sanina ai huidah!” *

12. Hunja ibotoh hita halak na martoruh ni uhur do si Salomo mungkahni, tapi aha na mambahen ia lang be sonai?

¹² Mungkahni sanggah isombah si Salomo Jahowa, halak na martoruh ni uhur do ia. Martonggo do ia bani Jahowa ase itogu-togu langkahni. (1 Raj. 3:7-9) Sanggah baru mamarentah, ibotoh ia bahaya do gijang ni uhur ai. Nini do, ‘Parlobei ni hasedaon ai ma gijang ni uhur, anjaha halak na pajuntul-juntulhon dirini do na laho madabuh.’ (Pod. 16:18) Tapi ujungni, ia do na lang mandalankon podah ai. Gabe ginjang ma uhurni janah lang idalankon ia Titah ni Jahowa. Umpamani, bani titah ihatahon do anggo raja Israel “seng bulih pabueionni parinangonni, ase ulang manlembang uhurni”. (5 Mus. 17:17) Tapi ibuat si Salomo do 700 parinangonni ampa 300 gundikni, janah bahatan do sidea  lang sisombah Jahowa! (1 Raj. 11:1-3) Ra do iahap si Salomo lang mahua ia mangkorjahon ai. Tapi ujungni gabe mandaoh ma ia humbani Jahowa janah bahat ma sitarononni.​—1 Raj. 11:9-13.

13. Aha do na boi iparlajari hita humbani Jesus?

¹³ Totap do martoruh ni uhur Jesus. Sanggah lape roh ia hu tanoh on, i surga do ia marhorja rap pakon Jahowa. Marhiteihon Jesus do “itompa haganup na i nagori atas ampa na i tanoh on”. (Kol. 1:16) Sanggah ididi Jesus, ra do gabe idingat ia ma ganup na ihorjahonni sanggah ia rap pakon Bapani i surga. (Mat. 3:16; Joh. 17:5) Age pe sonai, lang gabe ginjang uhurni janah lang iahap ia dearan ia marimbangkon na legan. Ihatahon ia do bani susianni anggo ia ‘seng roh ase iidangi halak, tapi ase mangidangi do, anjaha ibere ia do hosahni bahen tobus ni buei jolma’. (Mat. 20:28) Leganni ai, ganup na ihorjahonni lang ongga mangihutkon harosuh ni sandiri. (Joh. 5:19) Jadi, halak na martoruh ni uhur tumang do Jesus ai. Ia ma contoh na sidearan na boi itiru hita.

14. Sanggah hita maretek ni uhur, aha do na boi iparlajari hita humbani na ihatahon Jesus?

¹⁴ Iajarhon Jesus do bani susianni harga tumang do sidea i lobei ni Jahowa. Nini do, “Gari haganup jambulan na bani ulunima in domma ibilangi” Naibata. (Mat. 10:30) Ayat on boi mangapoh hita, tarlobih sanggah maretek ni uhur hita halani gati marpingkir na lang dear pasal diri sandiri. Parduli tumang do Jahowa hubanta janah harga do hita i lobei-Ni. Pasti halani holong do uhur ni Naibata bamu, ase ipilih Ia ham gabe saksi-Ni janah ibere Ia pangarapan hagoluhan sadokah ni dokahni i dunia na baru.

15. (a) Songon na ihatahon bani Menara Pengawal, aha do na porlu ibahen hita? (b) Songon gambar bani alaman 24, aha do bahayani anggo hita mamontingkon diri sandiri?

¹⁵ Bani Menara Pengawal na iterbitkon  15 tahun na salpu, dong ihatahon sonon, “Tontu lang ra hita mangahap gijangan dirinta marimbangkon halak na legan. Atap pe lang ra homa hita mangahap lang marharga dirinta. Dear do anggo ibotoh hita hahuranganta tapi ibotoh hita homa halobihanta. Sada hasomanta naboru mangkatahon, ‘Ahu sedo halak na jahat tapi lang homa ahu na sibujuran marimbangkon halak na legan. Dong do hahuranganku tapi dong do homa na dear ibagas diringku. Sonai ma homa halak na legan.’” * Jadi tangkas ma ulang ma hita marginjang ni uhur janah ulang ma homa iahap hita lang marharga dirinta.

16. Mase ibere Jahowa podah hubanta?

¹⁶ Marhitei Bibel, ibere Jahowa do podah-Ni hubanta. Holong do uhur-Ni banta janah sihol do Ia ase martuah goluhta. (Jes. 48:17, 18) Jadi ase martuah goluhta, ibahen hita ma Jahowa na sipontingan ibagas goluhta. Ulang ma ibahen hita duit, arta, atap dirinta sandiri na sipontingan. Halani bahat do parsoalan na iahapkon halak na mangkorjahon sisonai. Anggo marusaha hita mandalankon podah ni Naibata, gabe pentar ma hita janah malas ma uhur ni Jahowa!​—Pod. 23:15.