1. Mambahen aha do hita ipaturut Jahowa?

IPATURUT Jahowa do hita mambahen pilihan. Iajari do hita sonaha mambahen pilihan na dear. Anggo hita mambahen haputusan na pamalaskon uhur-Ni, iurupi Ia ma hita ase marhasil mandalankon ai. (Ps. 119:173) Janah anggo iihutkon hita podah ni Bibel, lambin madear ma haputusan na ibahen hita.​—Heb. 5:14.

2. Sipata, aha do ra na masa dobkonsi ibahen hita haputusan?

² Hassi pe domma ibahen hita haputusan na dear, ra do lang urah mandalankon ai. Pardiateihon ma piga-piga contoh. Sada garama mamutuskon laho mambasa ganup isi ni Bibel. Idalankon ia do ai piga-piga minggu, tapi dob ai lang be. Hasomanta naboru mamutuskon laho gabe parintis biasa. Tapi lalab do ipadokah-dokah ia mandalankon ai. Badan penatua mamutuskon ase lambin gati mambahen kunjungan penggembalaan bani sanina botou i kuria. Tapi dob marbulan-bulan, lang ipungkah sidea ai. Palegan-legan do situasi ni sidea, tapi dong na sarupa na ibahen sidea. Ibahen sidea do haputusan, tapi lang idalankon. Sonai ma homa na masa i kuria Korint bani abad na parlobei. Ulas hita ma aha na boi iparlajari hita humbani sidea.

3. Haputusan aha ma na ibahen kuria Korint, tapi aha na masa?

³ Hira-hira tahun 55 M, dong haputusan na ponting na ibahen kuria Korint. Mungkahni, itangar sidea ma anggo sanina botou i Jerusalem ampa i Juda marsitaronon janah miskin. Anjaha ibotoh sidea ma domma ipatumpu kuria na legan duit laho mangurupi sanina botou ai. Halani pardear layak kuria Korint, iputuskon sidea ma dihut mambere sumbangan. Jadi isungkun sidea ma apostel Paulus sonaha carani mangurupi. Itulis si Paulus ma surat bani kuria ai janah isuruh ma si Titus  laho patumpuhon duit ai. (1 Kor. 16:1; 2 Kor. 8:6) Hape, dob piga-piga bulan, itangar si Paulus ma lape saud ipatumpu sidea duit ai. Ujungni, sanggah sumbangan humbani kuria na legan iboan hu Jerusalem, lang dong sumbangan hun kuria Korint.​—2 Kor. 9:4, 5.

4. Songon na ipatugah bani 2 Korint 8:7, 10, 11, podah aha ma na ibere si Paulus hubani kuria Korint?

⁴ Dear do haputusan na ibahen kuria Korint ai. Anjaha ipuji si Paulus do sidea halani toguh haporsayaonni janah sirsir mangurupi. Tapi ipodahi do homa sidea ase mandalankon haputusan na dob ibahen. (Basa 2 Korint 8:7, 10, 11.) Hunjon gabe ibotoh hita ma ra do lang urah bani halak Kristen mandalankon haputusan na dob ibahen.

5. Sungkun-sungkun aha ma na laho iulas hita?

⁵ Songon i kuria Korint hinan, ra do lang urah pangahapta laho mandalankon haputusan na dob ibahen hita. Mase? Halani lang sempurna, ra do ipadokah-dokah hita mandalankon ai. Atap halani sompong mubah situasinta, ra do lang tarbahen hita mandalankon haputusanta. (Par. 9:11; Rom 7:18) Jadi sonaha ma hita mambahen haputusan na madear? Anggo mubah situasinta, sonaha hita boi mamingkirhon use haputusan na dob ibahen hita? Janah sonaha hita boi pasaloseihon aha na dob ipungkah hita?

6. Mase sipata maningon iubah hita haputusanta?

⁶ Dong do haputusan na lang boi iubah hita. Umpamani, maningon idalankon hita do haputusanta laho manombah Jahowa. Janah maningon setia do hita bani pasangan goluhta. (Mat. 16:24; 19:6) Tapi, ra do adong haputusan na maningon iubah hita halani mubah situasinta. Jadi aha ma na boi mangurupi hita laho mambahen haputusan na sidearan?

7. Aha do na maningon itonggohon hita, janah mase?

⁷ Martonggo ma mangindo hapentaran. Si Jakobus mangkatahon, “Anggo adong i tongah-tongah nasiam na hurangan bani hauhuron, ipindo ma ai hubani Naibata, na layak mambere bani haganup.” (Jak. 1:5) Sasintongni ganupan do hita “hurangan bani hauhuron” atap hapentaran. Halani ai, martonggo ma bani Jahowa ase iurupi ham sanggah mambahen atap mangubah haputusan. Dob ai, iurupi Jahowa ma holi ham ase boi mambahen haputusan na sidearan.

8. Aha do na porlu ibahen ham paima mambahen haputusan?

⁸ Bahen ma riset. Parlajari ma Bibel janah basa ma publikasi na ipasirsir organisasi. Dob ai, patugah ma rencanamu bani hasoman na boi mambere podah na madear. (Pod. 20:18) Ponting tumang do mambahen riset sisonai paima mambahen haputusan. Umpamani, sanggah mangindahi horja atap pindah hu ianan na legan. Atap pe sanggah mamilih sikolah ase boi holi dapotmu horja laho manggoki haporluanmu, janah lang manlanglangi ham ibagas pangidangion.

9. Aha do gunani anggo hita jujur sanggah mambahen haputusan?

⁹ Pingkirhon ma mase ibahen ham haputusan ai. Ponting tumang do bani Jahowa alasanta mambahen haputusan. (Pod. 16:2) Ia sihol ase jujur hita ibagas haganup. Halani ai, sanggah mambahen haputusan, maningon jujur ma hita bani dirinta ampa bani na legan tarsingat tujuanta mambahen haputusan ai. Anggo lang jujur hita, ra do lang urah hita mandalankon haputusan ai. Umpamani, sahalak garama sihol gabe parintis biasa. Dob piga-piga dokah, sunsah do ia manggoki jam dinasni. Ra do homa lang be malas uhurni mandalankon ai. Mungkahni, ra do tujuanni marintis halani sihol pamalaskon uhur ni  Jahowa. Hape sasintongni tujuanni marintis halani sihol pasonangkon namatorasni ampa halak na legan.

10. Aha do na boi mangurupi hita mambahen parubahan?

¹⁰ Contoh na legan: Dong sahalak parlajar Bibel mamutuskon lang be mangissop. Hassi pe lang urah, boi ma ia lang mangissop hira-hira dua minggu. Tapi dob ai, iulakkon ia use mangissop. Hassi pe sonai ujungni marhasil do ia. Halani mangkaholongi Jahowa janah sihol pamalaskon uhur-Ni, gabe boi ma ia parontihon hasomalanni ai.​—Kol. 1:10; 3:23.

11. Mase maningon ipingkirhon ham sonaha carani mandalankon haputusanmu?

¹¹ Pingkirhon ma sonaha mandalankon haputusan ai. Lambin urah ma holi ham mandalankon haputusanmu anggo ipingkirhon ham lobei aha na laho bahenonmu. Umpamani, domma ibahen ham rencana laho mambasa Bibel bani ganup ari. Tapi anggo lang ibahen ham jadwal, ra do lang saud ihorjahon ham ai. * Contoh na legan: Ra, sintua i kuria mamutuskon ase lambin gati mambahen kunjungan penggembalaan. Tapi dob piga-piga dokah lang ihorjahon sidea ai. Ase boi marhasil, maningon ipingkirhon sidea ma sonaha mandalankon ai. Umpamani, ibahen sidea ma lobei daftar sanina botou na porlu irohi. Dob ai, dear do homa anggo iatur sidea panorang na sosok ase boi manjumpahi sanina botou ai.

12. Sipata aha do ra na porlu ibahen hita, janah mase?

¹² Maningon masuk akal ma. Tontu bahat do na sihol ihorjahon hita. Tapi pingkirhon ma, ‘Ai sungkup do panorang, duit, ampa gogohta laho mangkorjahon ganup harosuhta?’ Halani ai, maningon masuk akal do homa hita. (Par. 3:6) Sipata, porlu do iubah ham haputusanmu halani lang tarhorjahon ham ganupan ai. Ra, dob ipingkirhon ham use haputusanmu ondi ai, gabe ibotoh ham ma parubahan aha na maningon ibahen ase boi ham mandalankon ai. Sonari, ulas hita ma lima cara na porlu ibahen ase boi pasaloseihon aha na dob ipungkah hita.

13. Sonaha ase margogoh ham mandalankon haputusanmu?

¹³ Martonggo ma mangindo gogoh. Naibata sihol mambere gogoh ase boi ham mandalankon haputusanmu. (Pil. 2:13) Jadi marhitei tonggo, pindo ma tonduy na pansing bani Jahowa ase ipargogohi ham. Porini iahap ham lape ibalosi tonggomu ai, totap ma martonggo. Jesus mangkatahon, “Pangindo hanima ma, sai na bereon do [tonduy na pansing] bannima.”​—Luk. 11:9, 13.

14. Sonaha prinsip bani Lukas 14:28 boi mangurupi ham mandalankon haputusanmu?

¹⁴ Bahen ma rencana. (Basa Lukas 14:28.) Ase boi mandobkon horja na domma ipungkah ham, porlu do ibahen ham rencana. Sonai ma homa sanggah ham mambahen sada haputusan. Bahen ma daftar na porlu bahenonmu laho mandalankon haputusan ai. Anggo bahat na maningon ihorjahon ham, horjahon ma ai otik-otik. Dob ai, gabe ibotoh ham ma domma sadiha bahat na dob idalankon. Jadi lambin urah ma ham pasaloseihon horjamu ai. Si Paulus mangojur kuria Korint ase patumpuhon sumbangan sibar na boi tarbahen sidea “siap ari minggu”. (1 Kor. 16:2) Parlajaranni, anggo otik-otik ihorjahon ham tugas na borat, lambin urah ma pangahapmu mandobkon ai.

15. Dob mambahen rencana, aha ope na boi ibahen ham?

¹⁵ Anggo isurat ham rencanamu, lambin urah ma ham mandalankon ai. (1 Kor. 14:40) Umpamani, itugaskon badan penatua  ma sahalak sintua ase manuratkon ganup haputusan na domma ibahen sidea, ise na mangkorjahon ai, ampa attigan tugas ai maningon salosei. Anggo ibahen sintua daftar sisonai, lambin urah ma sidea mandalankon haputusan na domma ibahen. (1 Kor. 9:26) Nasiam pe, boi do homa mambahen na sisonai. Umpamani boi do ibahen ham daftar na laho bahenonmu ganup ari. Janah parlobei ma suratkon na sipontingan. Anggo sonai ibahen ham, lambin urah ma nasiam pasaloseihon horjamu ai. Dob ai, gabe adong ma panorangmu laho mangkorjahon na legan.

16. Aha ope na porlu ibahen laho mandalankon haputusanmu, janah sonaha Rom 12:11 boi mangurupi ham?

¹⁶ Totap ma marusaha. Maningon tongtong do ham marusaha mandalankon rencanamu janah pasaloseihon ai. (Basa Rom 12:11.) Ipodahi si Paulus do si Timoteus ase ‘inunuti’ ia manlatih dirini janah marusaha ase lambin pandei mangajar. Marguna do homa podah ai hubanta sanggah hita sihol mandalankon cita-cita ibagas pangidangion.​—1 Tim. 4:13, 16.

17. Sonaha podah bani Epesus 5:15, 16 mangurupi hita laho mandalankon rencananta?

¹⁷ Dear ma atur panorangmu. (Basa Epesus 5:15, 16.) Tontuhon ma panorang laho mandalankon rencanamu janah ulang ma igantih ham ai. Ulang ma lalab ipaima-ima ham situasi na sosok laho mangkorjahon ai. Tapi mintor horjahon ma. (Par. 11:4) Jaga ma ase ulang iparbois-boi ham panorang ampa gogohmu laho mangkorjahon na hurang ponting. (Pil. 1:10) Anggo boi, dear ma atur panorangmu ase ulang targanggu ham sanggah mangkorjahon ai. Pamatei ma HP-mu. Porini dong email atap pesan masuk, holi ma basa ham ai. *

18-19. Aha do na boi mangurupi ham ase lang marnaloja laho mandalankon haputusanmu.

¹⁸ Totap ma pingkirhon hasilni. Tontu malas uhurmu anggo boi isaloseihon ham tugasmu ai. On boi ipausih songon sada ianan na laho ituju ham. Anggo sihol ham hu ianan ai, marusaha do ham ase boi das hujai age pe itutup dalanni. Tontu ipindahi ham do dalan na legan. Sonai ma homa na ibahen hita sanggah laho mandalankon haputusanta. Anggo totap ipingkiri hita hasilni, tontu lang marnaloja hita mangkorjahon ai hassi pe dong tantangan.​—Gal. 6:9.

¹⁹ Tontu lang sai urah mambahen haputusan na madear, sonai homa sanggah laho mandalankon ai. Tapi sai iurupi Jahowa do ham. Ibere do hapentaran ampa hagogohon ase boi ham mandalankon haputusan na dob ibahen.