1-2. (a) Domu bani Epesus 6:16, mase ma porlu dong “gantar haporsayaon” banta? (b) Sungkun-sungkun aha na laho iulas hita?

AI DONG do “gantar [atap, perisai] haporsayaon” ni nasiam? (Basa Epesus 6:16.) Tontu dong. Songon perisai na boi manlinggomi ganup angkula, sonai homa haporsayaon boi manlinggomi hita ase daoh humbani panriah-riahon, kekerasan, atap aha pe na marlawanan pakon aturan ni Naibata.

² Tapi sonari on hita manggoluh bani “panorang parpudi” anjaha bahat do na manguji haporsayaonta. (2 Tim. 3:1) Halani ai, sonaha hita mamareksa ai toguh ope haporsayaonta atap lang? Anjaha aha do na porlu bahenonta ase totap toguh haporsayaonta? Ulas hita ma balosni ai.

3. Aha do na porlu ibahen sada tentara bani perisaini?

³ Hinan, sada tentara mamakei perisai na ilapisi kulit. Maningon gati do iminaki ia perisai ai ampa ijaga bosini ase ulang tasikon. Anggo ididah tentara ai dong na maseda bani perisaini, mintor podas ma ipadear ia ai ase boi ipakei use sanggah marporang. Sonaha perisai boi isarupahon pakon haporsayaonta?

4. Mase maningon tongtong ipareksa hita haporsayaonta, anjaha sonaha carani?

 ⁴ Songon tentara, maningon tongtong do ipareksa hita sonaha haporsayaonta, ase boi hita sirsir ibagas parporangan. Sasintongni ganup halak Kristen marporang manlawan Sibolis ampa malekat-malekatni. (Ep. 6:10-12) Jadi maningon ipatoguh hita do haporsayaonta. Lang dong halak na legan na boi mangkorjahon ai hubanta. Hunja ibotoh hita domma toguh haporsayaonta? Na parlobei, martonggo ma hita ase iurupi Jahowa. Dob ai, marhitei Bibel pareksa ma dirimu atap adong ope na porlu ipadear. (Heb. 4:12) Bibel mangkatahon, “Tenger ma uhurmu bani Jahowa humbani gok ni uhurmu, ulang ma ho marpangunsandeian bani pingkiranmu sandiri.” (Pod. 3:5, 6) Sanggah mambahen haputusan baru-baru on, ai tongtong do idingat ham ayat ai? Umpamani, ongga do nasiam sunsah ibagas parduitan? Ai idingat nasiam do janji ni Naibata na isurat bani Heber 13:5, na mangkatahon, “Sabonar na so tadingkonon-Ku do ho, sabonar na so paturuton-Ku do ho”? Ai porsaya do ham bani janji ai, anggo Jahowa tongtong do mangurupi ham? Anggo porsaya do, on patuduhkon na toguh do haporsayaonmu.

5. Dobkonsi ipareksa ham haporsayaonmu, aha do ra na ibotoh ham?

⁵ Dobkonsi irimangi ham sonaha haporsayaonmu, ra do ididah ham dong ope hahuranganmu. Umpamani, ra do sadokah on lalab haru uhurmu atap maretek ni uhur ham. Atap ra do itangar ham barita na lang madear pasal Saksi Jahowa. Ganupan ai mambahen galek haporsayaonta. Anggo ai do na masa bamu, aha ma na porlu bahenonmu ase toguh use haporsayaonmu?

6. Mase ma lang pala salah anggo haru uhurta?

⁶ Sasintongni lang pala salah anggo haru uhurta. Umpamani, dear do anggo haru uhurta lang mambahen Jahowa ampa Jesus marmalas ni uhur. (1 Kor. 7:32) Atap sanggah hita mambahen hasalahan, tontu haru do uhurta sonaha hita boi mardear use pakon Jahowa. (Ps. 38:19) Haru do homa uhurta lang mambahen pasanganta lang martuah, sonaha mansarihon kaluarga pakon hasoman sahaporsayaon.​—1 Kor. 7:33; 2 Kor. 11:28.

7. Domu bani Podah 29:25, mase lang pala hita mabiar bani jolma?

⁷ Tapi anggo lalab haru uhurta, on ma na mambahen galek haporsayaonta. Umpamani, ra do haru uhurta pasal sipanganon atap pakeian. (Mat. 6:31, 32) Jadi, lalab ma mansari duit horjanta. Ujungni, gabe holongan ma uhurta bani duit. On mambahen galek haporsayaonta janah maseda ma parhasomananta pakon Jahowa. (Mrk. 4:19; 1 Tim. 6:10) Leganni ai, ra do haru uhurta mamingkirhon sonaha pandapot ni halak pasal Saksi Jahowa. Ujungni, mabiar ma hita iparburu anjaha lang ibahen hita be Jahowa marmalas ni uhur. Jadi ase ulang sonai ibahen hita, pangindo ma bani Jahowa ase iambahi haporsayaonta janah barani hita sanggah dong tantangan.​—Basa Podah 29:25; Luk. 17:5.

8. Mase lang ra hita porsaya bani halak na murtad?

⁸ Halani “bapa ni ladung” do Sibolis ai, ipakei ia ma halak i dunia on laho pararatkon ladung pasal Jahowa ampa sanina botou. (Joh. 8:44) Umpamani, ibahen halak na murtad do barita na lang dear pasal organisasi ni Jahowa i TV atap Internet. Songon “panah apuy” humbani Sibolis do barita sisonai. (Ep. 6:16)  Aha ma na maningon bahenonta anggo dong na pararatkon barita sisonai banta? Ulang ma ra hita manangihon sidea. Mase? Halani, porsayanan do hita bani Jahowa ampa sanina botounta. Jadi ulang ra hita marbuali pakon halak na murtad pasal aha pe janah ulang ma sihol mambotoh aha na ihatahon sidea.

9. Sonaha do ujungni anggo lalab hita mandolei?

⁹ Anggo mandolei hita, on pe boi mambahen galek haporsayaonta. Sipata, halani bahatni parsoalan ra do gabe mandolei hita. Tapi, ulang ma lalab parsoalan ai na ipingkiri hita, ase ulang lupa hita bani pangarapan na ibere Jahowa hubanta. (Pangk. 21:3, 4) Anggo lalab hita mandolei, ujungni gabe galek ma haporsayaonta janah lang be mangidangi Jahowa. (Pod. 24:10) Hassi pe sonai, dong na boi mangurupi hita ase ulang sonai.

10. Aha ma na boi iparlajari hita humbani surat ni hasomanta?

¹⁰ Dong sada botou i Amerika Serikat na toguh haporsayaonni, hassi pe mangurus suamini na boritan. Ikirim ia ma surat hu kantor pusat, janah sonon ma isini, “Sipata maretek ni uhur do hanami halani boratni sitaronon. Tapi totap do idingat hanami pangarapannami. Martarima kasih do hanami bani hatorangan na boi patoguhkon janah mangojur hita. Porlu tumang do podah sisonai bannami. Gabe iurupi do hanami ase totap martahan hassi pe bahat tantangan na ibahen Sibolis.” Pangalaman ni botou ai patuduhkon hita pe boi lang mandolei. Sonaha carani? Sanggah dong sitarononta, dingat ma parlajouan humbani Sibolis do ai. Tapi porsaya ma bani pangurupion ni Jahowa. Janah tongtong ma parlajari publikasi humbani organisasi-Ni.

11. Sungkun-sungkun aha ma na porlu irimangi hita laho mambotoh toguh do haporsayaonta atap lang?

¹¹ Ganup hita sihol mambotoh ai toguh do haporsayaonta atap lang. Halani ai rimangi ma sungkun-sungkun on: Ai lalab do nasiam holsohan sanggah dong hasunsahan? Ai ra do nasiam manangar ladung ni halak na murtad atap marsahap pakon sidea? Ai mandolei do nasiam sanggah dong sitaronon? Anggo lang balosmu bani ganup sungkun-sungkun ai, on  patuduhkon domma toguh haporsayaonmu. Tapi maningon totap ma hita jaga halani dong ope sinjata na igunahon Sibolis laho mambahen galek hita. Ulas hita ma pasal ai.

12. Sonaha do ujungni anggo hita holongan bani duit?

¹² Anggo hita holongan bani duit, gabe galek ma haporsayaonta. Ujungni lang be ibere hita na sidearan bani Jahowa. Apostel Paulus mangkatahon, “Sada tentara na mandalankon tugas, seng ra ia taralit bani urusan-urusan goluh siganup ari, ase harosuh ia bani kopalani.” (2 Tim. 2:4) Sasintongni, ilarang do tentara Rom marbisnis. Sonaha ma ujungni anggo lang idihutkon sidea aturan ai?

13. Mase sahalak tentara lang boi marbisnis?

¹³ Bayangkon ma sarita on: Bani sogod ni ari dong ma sakalompok tentara na marlatih manggunahon podang. Tapi dong sada tentara na lang taridah. Hape laho ia martiga-tiga. Dob ai, bornginni ipareksa sidea ma sinjatani anjaha ipamarot ma podangni. Tapi, sibuk do hasomanni na sada ai pasirsirhon jualanni patar. Dob ai, patarni sompong roh munsuh laho mandorab sidea. Tentara na ija do na sirsir marporang, anjaha ise do na iharosuhkon kopalani? Porini dihut ham marporang, ai i lambung ni tentara na martiga-tiga ai do marosuh ham, atap na marlatih nongkan ai?

14. Aha do na sipontingan bani tentara ni Kristus?

¹⁴ Ganup hita sihol maniru tentara na dear ai. Hita sihol mambahen Jahowa ampa Jesus marmalas ni uhur. Ai do na sipontingan marimbangkon aha pe na dong i dunia on. Jadi gunahon hita ma panorang ampa gogohta laho mangidangi Jahowa ampa patoguhkon haporsayaonta. Dob ai, maningon pastihon hita ma ganup sinjatanta domma sirsir ipakei laho marporang.

15. Sipasingat aha do na ibere si Paulus, janah mase?

¹⁵ Maningon tongtong ma hita manjaga uhurta. Mase? Si Paulus pasingatkon anggo “halak na sihol bayak” boi do gabe “kahou humbani haporsayaon”. (1 Tim. 6:9, 10) “Kahou” ijon maksudni boi do gabe lalab ipingkiri hita sonaha ase mamboli bahat barang,  age pe lang iporluhon hita ai. Ujungni, gabe ipindahi hita ma “hisap-hisap haotoon” na parohkon hasedaon. Tapi, dingat ma sinjata ni Sibolis do ai. Anjaha ai do na igunahon ia laho pasedahon haporsayaonta.

16. Domu bani sarita na isurat bani Markus 10:17-22, sungkun-sungkun aha ma na porlu irimangi hita?

¹⁶ Porini bahat duitta, ai salah do hita mamboli bahat barang hassi pe ai lang ihaporluhon hita? Tontu lang salah. Tapi rimangi ma sungkun-sungkun on: Porini iboli hita holi bahat barang, ai lang bois holi gogoh ampa panorangta laho mangurus ai? Ai boi do holi ai mambahen holongan hita bani barang-barang? Ai boi do holi ai mambahen hita songon dalahi na lang ra mangirikkon Jesus? (Basa Markus 10:17-22.) Jadi dearan anggo otik dassa barang-barangta, ase boi igunahon hita bahat panorang ampa gogohta laho mangkorjahon harosuh ni Jesus.

17. Aha ma na maningon idingat hita?

¹⁷ Dingat ma tongtong bani ganup ari do hita marporang. Jadi maningon totap ma hita sirsir. (Pangk. 12:17) Maningon marusaha ma hita patoguhkon haporsayaonta. Lang boi sanina botou na mangkorjahon ai banta.

18. Mase ma sada tentara maningon manjolom perisaini

 ¹⁸ Hinan, ipasangap do sada tentara na barani sanggah marporang. Tapi, iapasi do ia anggo lang mamboban perisaini. Si Tacitus, sahalak sejarawan Rom mangkatahon, “Sada hailaon do anggo sahalak tentara lang mamboban perisaini.” On ma na mambahen ase tentara totap manjolom perisaini.

19. Sonaha hita boi patoguhkon haporsayaonta?

¹⁹ Gabe toguh ma haporsayaonta anggo tongtong hita martumpu janah mambaritahon pasal goran ni Jahowa ampa Harajaon-Ni. (Heb. 10:23-25) Leganni ai, anggo ibasa hita Bibel bai ganup ari janah martonggo, iurupi ma hita mandalankon podah-Ni. (2 Tim. 3:16, 17) Anggo ibahen hita sonai, lang dong sinjata ni Sibolis na boi manaluhon hita. (Jes. 54:17) Hasilni, gabe boi ma ‘gantar haporsayaonta’ manlinggomi hita. Gabe toguh ma homa hita anggo marsiurupan pakon sanina botou. Janah boi ma hita monang ibagas parporangan bai ganup ari. Na sipontingan, gabe megah ma pangahapta boi mangidah Jesus monang sanggah manlawan Sibolis ampa malekatni.​—Pangk. 17:14; 20:10.