1-2. Mase hita sihol mamparlajari buku 3 Musa?

IHATAHON apostel Paulus do bani si Timoteus, “Sagala Surat in sinahapkon ni Naibata do, anjaha marguna.” (2 Tim. 3:16) Tontu marlaku do homa ai bani buku 3 Musa. Sonaha do pandapotmu pasal buku ai? Bahat halak na marpandapot buku ai pitah marisi aturan atap uhum, anjaha lang be marlaku sonari on. Tapi lang sonai pangahap ni halak Kristen.

² Buku 3 Musa isuratkon hira-hira 3.500 tahun na salpu. Hassi pe sonai ipaturut Jahowa do totap dong buku ai ronsi sonari “bahen podah banta”. (Rom 15:4) Humbani buku ai ibotoh hita ma sonaha pingkiran ni Naibata. Sasintongni bahat do na boi iparlajari hita humbani buku ai. Ulas hita ma ompat contohni.

3. Bani Ari Pardearan, mase maningon dong binatang na igalangkon?

³ Parlajaran na parlobei: Maningon iharosuhkon Jahowa do hita ase ijalo Ia galanganta. Somalni bani Ari Pardearan na ibahen sahali satahun, martumpu ma ganup halak Israel, janah ijai ma igalangkon sintua ni malim galangan binatang. Humbani galangan ai ibotoh halak Israel ma anggo sidea maningon ipaborsih humbani dousani. Tapi paima sintua ni malim manggalangkon daroh binatang i ianan na Pansing Tumang, dong sada tugas na maningon ihorjahon ia. Sasintongni, on do na sipontingan marimbangkon hasasapan ni dousa ni bangsa ai.

4. Domu bani 3 Musa 16:12, 13, aha do na ibahen sintua ni malim sanggah parlobei sahali ia masuk hu ianan na Pansing Tumang bani Ari Pardearan? (Tonggor ma gambar sampul.)

 ⁴ Basa 3 Musa 16:12, 13. Bayangkon ma aha na tarjadi bani Ari Pardearan ai. Masuk ma sintua ni malim hu Tabernakel. Bani ari ai, dong holi tolu hali ia masuk hu ianan na Pansing Tumang. Na parlobei, masuk ma ia mamboan ianan na marisi dahupa ampa sada ianan humbani omas na marisi narnar na gara. Paima ai, soh lobei ia tongkin i pudi ni hirei-hirei na gabe panutup ni ianan na Pansing Tumang. Dobkonsi ai, masuk ma ia hujai janah jongjong i lobei ni poti parpadanan. Boi ihatahon songon na domma jongjong ia i lobei ni Jahowa. Jadi maningon hormat ma ia sanggah masuk. Dob ai, inahkon ia ma dahupa ai hu narnar na gara, lanjar morum ma ianan ai. * Dobkonsi ai, masuk ma use ia hu ianan na Pansing Tumang laho manggalangkon daroh ni binatang. Anggo iparuhurhon hita, itutung malim ai do lobei dahupa paima ia manggalangkon daroh ni binatang.

5. Aha ma na boi iparlajari hita humbani dahupa na itutung bani Ari Pardearan?

⁵ Aha ma na boi iparlajari hita humbani dahupa na itutung ai? Bibel mangkatahon songon dahupa do i lobei ni Jahowa tonggo ni juakjuak-Ni. (Ps. 141:2; Pangk. 5:8) Dingat ma nongkan ai maningon hormat do sintua ni malim sanggah mamboan dahupa ai hu lobei ni Jahowa. Sonai ma hita sanggah martonggo hu Bani. Maningon hormat do hita. Martarima kasih do hita bani Jahowa, hassi pe Na Tang Sitimbulan Ia, tapi boi do hita dohor hu Bani usih songon anak na dohor bani bapani. (Jak. 4:8) Ra do Ia marhasoman pakon hita. (Ps. 25:14) Tontu ihargai hita do ganupan ai. Halani ai, lang ra hita mambahen borit uhur-Ni.

6. Aha ma na iparlajari hita humbani dahupa na itutung sintua ni malim paima mambere galangan?

⁶ Dingat ma, maningon itutung sintua ni malim do lobei dahupa ai paima ia mambere galangan. Ibahen ia sonai ase pos uhurni anggo Jahowa marosuh hu bani sanggah ia mambere galangan ai. Aha ma parlajaranni? Sadokah i tanoh on Jesus, dong do homa na sipontingan na ihorjahon ia paima ia manggalangkon dirini laho mangkopkop jolma. Tugas aha ma ai? Sadokah i tanoh on, maningon tongtong ma ia unduk bani Jahowa ase ra Jahowa manjalo sanggah ia manggalangkon dirini. Hunjon taridah ma Jesus sihol patuduhkon anggo hita maningon mangihutkon aturan ni Jahowa sadokah goluhta. Dob ai, ia sihol mambuktihon dearan do cara ni Jahowa mamarentah marimbangkon ise pe.

7. Sanggah i tanoh on, mase Jesus sihol pamalaskon uhur ni Bapani?

⁷ Sadokah i tanoh on, tongtong do Jesus mangihutkon aturan ni Jahowa. Hassi pe bahat sitarononni janah ibotoh ia marsik do holi hamateanni, marusaha do ia mambuktihon cara ni Bapani do na sidearan mamarentah. (Pil. 2:8) Sanggah ai, “marhasoman doruh banggal ampa iluh” do ia martonggo. (Heb. 5:7) Hunjai, taridah ma humbani borsih ni uhur do Jesus martonggo janah sihol tongtong unduk bani Jahowa. Usih songon dahupa na morum do tonggoni ai i lobei ni Jahowa. Tontu malas do uhur-Ni mangidah aha na ibahen Jesus. Anjaha tarbukti ma cara ni Jahowa do na sidearan mamarentah.

8. Sonaha hita boi mangusihi Jesus?

⁸ Hita boi mangusihi Jesus anggo tongtong hita setia janah unduk bani Jahowa.  Humbani borsih ni uhur ma hita martonggo mangindo pangurupion-Ni. Anggo sonai ibahen hita, malas ma uhur-Ni. Taridah ma anggo hita marosuh mangihutkon aturan-Ni. Tontu lang ra Jahowa manangihon tonggonta anggo ihorjahon hita aha na ihagigihon-Si. Tapi anggo ihorjahon hita aha na iharosuhkon-Si, pos ma uhurta usih songon dahupa na morum do tonggonta i lobei-Ni. Anjaha gabe malas ma uhur ni Jahowa anggo tongtong hita manangihon-Si janah setia hu Bani.​—Pod. 27:11.

9. Mase halak Israel mambere galangan pardameian?

⁹ Parlajaran na paduahon: Hita mangidangi Jahowa halani martarima kasih hu Bani. Dong parlajaran na maharga humbani galangan pardameian na ibere halak Israel hinan. * Bani buku 3 Musa hita marlajar ibere halak Israel do galangan pardameian bahen “galangan puji-pujian”. (3 Mus. 7:11-13, 16-18) Sasintongni sedo halani maningon ase ibere sidea galangan sisonai, tapi halani rosuhni do. Jadi on ma na patuduhkon anggo sidea mangkaholongi Jahowa. Dob ai, dihut ma kaluargani pakonsi, ampa malim, mangankon daging na dob igalangkon ai. Tapi dong do piga-piga bagian humbani galangan ai na ibere pitah bani Jahowa. Bagian na ija ma ai?

10. Sonaha galangan pardameian na ipatorang bani 3 Musa 3:6, 12, 14-16, boi ipados songon pangidangion ni Jesus bani Jahowa?

¹⁰ Parlajaran na patoluhon: Halani holong do hita mambere na sidearan bani Jahowa.  Bagian na sidearan humbani galangan binatang ai ma taboh-taboh, sonai homa piah-piahni. (Basa 3 Musa 3:6, 12, 14-16.) Halani ai malas ma uhur ni Jahowa sanggah halak Israel ra mambere bagian na sidearan ai hu Bani. On ma na patuduhkon anggo halak na manggalangkon ai sihol mambere na sidearan bani Naibata. Sonai ma homa na ibahen Jesus. Sirsir do ia mambere na sidearan halani holongni bani Jahowa. (Joh. 14:31) Marosuh do Jesus mandalankon harosuh ni Naibata janah mangihutkon titah-Ni. (Ps. 40:9) Tontu malas tumang ma uhur ni Jahowa mangidah ai!

11. Mase pangidangionta boi ipausih songon galangan pardameian, janah mase ai mambahen tarapoh uhurta?

¹¹ Usih songon galangan pardameian ai ma pangidangionta bani Jahowa. Ibere hita do na sidearan halani hita mangkaholongi-Si humbani gok ni uhur. Tontu malas tumang uhur ni Jahowa mangidah marjuta halak mangidangi-Si humbani gok ni uhur. Janah iihutkon sidea do homa aturan-Ni. Ihargai Jahowa do ganup pambahenanta. Ibotoh Ia do homa mase hita mangkorjahon ai. Tontu tarapoh ma hita mambotoh on. Umpamani, ra do halani domma matua nasiam lang bahat be na boi ihorjahon nasiam. Tapi, pos ma uhurmu iarusi Jahowa do ai. Hassi pe pangahapmu otik dassa na boi ihorjahon nasiam, tapi ibotoh Jahowa do anggo na ihorjahon nasiam ai halani holong. Malas do uhur-Ni manjalo ai halani ai do na sidearan na boi ibere Nasiam.

12. Sonaha pangahap ni Jahowa mangidah galangan pardameian, janah sonaha ai boi mangojur hita?

¹² Aha ma na boi iparlajari hita humbani galangan pardameian ai? Sanggah apuy manutung bagian na sidearan humbani galangan binatang ai, gabe uap na misbou ma ai bani Jahowa janah malas ma uhur-Ni. Jadi pos ma uhurmu malas do uhur ni Jahowa anggo humbani gok ni uhurmu nasiam mambere na sidearan. (Kol. 3:23) Bayangkon ma tarsirom Ia mangidah nasiam. Maharga do Bani pambahenan ampa holong ni uhur na ipatuduh nasiam hassi pe otik atap bahat ai. Janah idingat Ia do ai ronsi sadokah ni dokahni.​—Mat. 6:20; Heb. 6:10.

13. Domu bani 3 Musa 9:23, 24, sonaha Jahowa patuduhkon malas uhur-Ni bani malim na baru ilantik?

¹³ Parlajaran na paompathon: Ipasu-pasu Jahowa do organisasi-Ni i tanoh on. Paruhurhon ma aha na masa bani tahun 1512 SM. Sanggah ai, ipajongjong ma tabernakel i toruh ni Dolog Sinai. (2 Mus. 40:17) Dob ai, ilantik si Musa ma si Aron pakon anak-anakni gabe malim. Jadi martumpu ma ganup bangsa Israel laho mangidah sanggah parlobei sahali malim ai mambere galangan binatang. (3 Mus. 9:1-5) Sonaha Jahowa patuduhkon malas uhur-Ni bani malim na baru ilantik ai? Sanggah si Musa pakon si Aron mamasu-masu bangsa ai, iparoh Jahowa ma apuy laho mamboiskon galangan situtungon na dong bani anjap-anjap ai.​—Basa 3 Musa 9:23, 24.

14. Aha do kaitanni hamalimon ni si Aron bani panorangta sonari on?

¹⁴ Sanggah Jahowa parohkon apuy hun surga, aha do artini ai? Marosuh do Ia mangurupi si Aron pakon anakni na domma ipilih gabe malim. Jadi dob ididah bangsa Israel ai, gabe iarusi sidea ma maningon do homa iurupi sidea malim ai. Ai dong do kaitanni ai bani panorangta? Adong. Hamalimon ni Israel manggambarhon hamalimon na sibanggalan. Jesus Kristus do na ilantik gabe Sintua ni Malim. Janah dong 144.000 halak na ilantik gabe malim ampa raja na laho mamarentah rap pakon Jesus i surga.​—Heb. 4:14; 8:3-5; 10:1.

15-16. Hunja ibotoh hita anggo Jahowa marosuh bani “juakjuak na bujur anjaha na maruhur”?

 ¹⁵ Bani tahun 1919, ilantik Jesus ma piga-piga halak gabe “juakjuak na bujur anjaha na maruhur”. Jadi sidea ma na mambobahon horja parambilanon ampa mambere ganup halak Kristen “mangan bani panorangni”. (Mat. 24:45) Hunja ibotoh hita anggo Jahowa marosuh bani sidea?

¹⁶ Marusaha do Sibolis pakon pangihutni laho parontihon juakjuak na bujur anjaha na maruhur ai. Porini Jahowa lang mangurupi sidea, tontu lang marhasil sidea mandalankon tugasni. Bayangkon ma dua hali masa porang dunia na mambahen gabe adong hasunsahan ibagas parduiton. Dob ai, iparburu do homa juakjuak ni Naibata. Hassi pe sonai tongtong do juakjuak na bujur anjaha na maruhur manggoki haporluan ni ganup susian ni Jesus ase boi totap toguh. Sonari domma bahat publikasi na ipasirsir hubanta. Gratis do ai janah iterjemahkon ibagas 900 lobih bahasa. Tangkas ma iurupi Jahowa do juakjuak-Ni. Leganni ai, ipasu-pasu Jahowa do homa horja parambilanon. Sonari ambilan na madear domma ibaritahon “i sab dunia on”. (Mat. 24:14) Ganupan on patuduhkon itogu-togu anjaha ipasu-pasu Jahowa do organisasi-Ni ronsi sonari.

17. Sonaha hita boi mangurupi organisasi ni Jahowa?

¹⁷ Rimangi ma sungkun-sungkun on, ‘Ai malas do uhurhu boi gabe bagian humbani organisasi ni Jahowa?’ Bani panorang ni si Musa, iparoh Jahowa do apuy hun surga laho patuduhkon marosuh do Ia mangurupi malim na dob ipilih ai. Sonari pe tangkas do ipatuduh Jahowa anggo Ia marosuh bani organisasi-Ni. Tontu martarima kasih do hita hu Bani.  (1 Tes. 5:18, 19) Jadi sonaha ma hita boi mangurupi organisasi ni Jahowa? Dalankon hita ma aha na iparlajari hita hun Bibel, hun publikasinta, i partumpuan ampa i kebaktian. Leganni ai, marusaha ma humbani tuk ni gogohta marbarita ampa mangajari halak.​—1 Kor. 15:58.

18. Aha ma na sihol bahenon ni nasiam?

¹⁸ Jadi, sihol do hita mandalankon aha na iparlajari hita humbani buku 3 Musa. Sihol do hita ase ijalo Jahowa galanganta. Sihol do hita mangidangi-Si halani mangkargai pambahenan-Ni. Sihol do hita mambere na sidearan bani Jahowa halani mangkaholongi-Si humbani gok ni uhurta. Anjaha sihol do homa hita mangurupi organisasi-Ni humbani tuk ni gogohta. Anggo ihorjahon hita ganupan ai, taridah ma anggo hita martarima kasih bani Jahowa halani boi gabe Saksi-Ni.