1-2. (a) Sanggah dong sitaronon, aha do na boi mangurupi hita ase martahan? Patorang. (b) Aha do na laho iulas hita bani artikel on?

ONGGA do ra ihatahon nasiam sonon, “Sanggah hudingat sitarononku hinan, huahap anggo pitah gogohku sandiri lang sanggup ahu martahan.” Tontu bahat do hita mangahapkon sisonai. Ra do adong hita na boritan atap marpusok ni uhur halani matei na hinaholonganta. Anggo idingat hita ganupan ai, tontu iahapkon hita do ganup ari hita boi martahan halani ibere Jahowa “hagogohon na sumurung” marhitei tonduy na pansing.​—2 Kor. 4:7-9.

² Porlu do homa hita iurupi tonduy na pansing laho manlawan pangaruh ni dunia na jahat on. (1 Joh. 5:19) Leganni ai, porlu do hita ipargogohi laho manlawan Sibolis ampa malekatni. (Ep. 6:12) Bani artikel on, iulas hita ma dua cara sonaha tonduy na pansing boi mangurupi hita. Janah iulas hita do homa sonaha carani ase boi dapot hita lambin bahat tonduy na pansing.

3. Sanggah dong sitaronon, sonaha Jahowa mangurupi hita ase totap martahan?

³ Hassi pe marsitaronon, domma iahapkon apostel Paulus anggo ia boi totap mangidangi Jahowa halani “hagogohon ni Kristus”. (2 Kor. 12:9) Sadokah pardalananni na paduahon gabe misionaris, lang pitah marbarita ia, tapi maningon do homa ia mansarihon haporluanni. Sanggah i Korint, ia tading i rumah ni si Akila pakon si Priskilla. Anjaha rup marhorja do sidea mambahen tenda. Jadi, ipargogohi tonduy na pansing do si Paulus ase boi marhorja laho mansarihon hagoluhanni, janah totap marbarita. (Lah. 18:1-4) Hunjon, ibotoh hita ma anggo Jahowa mampargogohi hita ase totap martahan hassi bahat tantangan.

4. Domu bani 2 Korint 12:7b-9, aha do na mambahen si Paulus marsitaronon?

 ⁴ Basa 2 Korint 12:7b-9. Bani ayat-ayat ai ihatahon si Paulus dong ‘duri ibagas dagingni’. Aha do maksudni ai? Porini dong duri masuk hubagas dagingmu, tontu borit tumang pangahapmu. Jadi si Paulus mangkatahon dong piga-piga sitarononni. Pangahapni songon adong “suruhan ni Sibolis” na “mangkantam” ia, na mambahen ia marsitaronon. Ra, sedo Sibolis pakon malekatni na mambahen ia marsitaronon. Tapi sanggah ididah sidea si Paulus marsitaronon, ra do marusaha sidea mambahen ase lambin parah sitarononni. On usih songon sasada halak na manancapkon duri ai lambin bagas hu dagingni.

5. Sonaha Jahowa mambalosi tonggo ni si Paulus?

⁵ Sasintongni, sihol do si Paulus ase iambukkon Jahowa “duri” ai. Ia mangkatahon, ‘Tolu hali ma hupangindo humbani Tuhan [Jahowa], ase tanggal in hun bangku.’ Hassi pe domma itonggohon si Paulus, tapi totap do adong duri ai. Ai na lang ibalosi Jahowa do tonggoni? Lang sonai. Hassi pe ipaturut Jahowa totap ope dong duri ai, tapi ipargogohi Ia do si Paulus ase boi martahan. Jahowa mangkatahon, “Ibagas hagalekon do gabe gok hagogohon[-Ku]”. (2 Kor. 12:8, 9) Anjaha iurupi Ia do si Paulus ase totap marmalas ni uhur janah mangahapkon hadameion.​—Pil. 4:4-7.

6. (a) Sonaha do ra Jahowa mambalosi tonggonta? (b) Ayat na ija do bani paragrap on na boi patoguhkon uhurmu?

⁶ Ongga do nasiam mangindo bani Jahowa ase ipaluah humbani sitaronon? Ra, domma piga-piga hali nasiam manonggohon ai. Tapi totap do adong sitarononmu atap lambin parah homa. Ai gabe haru do uhurmu anggo Jahowa lang be marosuh mangidah ham? Anggo sonai, dingat ma pangalaman ni si Paulus. Tontu ibalosi Jahowa do tonggomu songon Ia mambalosi tonggo ni si Paulus. Ra do ipaturut Jahowa nasiam totap marsitaronon. Tapi marhitei tonduy na pansing, ipargogohi do nasiam ase boi martahan. (Ps. 61:4, 5) Ra do pangahapmu songon na “ipatompaskon”, tapi lang tadingkonon ni Jahowa ham.​—2 Kor. 4:8, 9; Pil. 4:13.

7-8. (a) Sonaha tonduy na pansing mangurupi hita? (b) Sonaha apostel Petrus patorangkon pasal cara ni tonduy na pansing mangurupi hita?

⁷ Sonaha ope carani tonduy na pansing mangurupi hita? On boi ibandingkon hita pakon logou. Marhitei logou, boi do kapal iboan das hu tujuanni hassi pe dong haba-haba. Jadi hassi pe dong sitaronon, urupan ni tonduy na pansing do homa hita ase totap mangidangi Jahowa paima masuk hu dunia na baru.

⁸ Sijala dengke do hinan apostel Petrus. Halani ai bahat na ibotoh ia pasal na markapal. Jadi sosok ma ai igunahon ia laho patorangkon sonaha tonduy na pansing mangurupi hita. Ia mangkatahon. “Seng ongga humbani rosuh ni jolma harohan ni panjahaion; tapi binobahon ni tonduy na pansing do, ase marsora jolma in, isuruh Naibata.”​—2 Ptr. 1:21.

9. Aha do maksud ni si Petrus sanggah ia mangkatahon “binobahon ni tonduy na pansing”?

⁹ Aha do maksud ni si Petrus sanggah ia mangkatahon “binobahon ni tonduy na pansing”? Sanggah patorangkon pasal kapal na iboan logou bani buku Lahoan, igunahon si Lukas do homa hata Junani na sarupa. (Lah. 27:15) Sahalak pakar Alkitab mangkatahon sanggah si Petrus manuratkon anggo ganup panurat ni Bibel “binobahon tonduy na pansing”, igunahon ia do pasal halak na markapal. Jadi si Petrus patorangkon usih  songon logou na mangonjar kapal das hu tujuanni, sonai ma homa tonduy na pansing manogu-nogu panurat ni Bibel sanggah mandalankon tugasni. Ihatahon pakar Alkitab ai use, “Songon kapal na paherbangkon layarni do panurat ni Bibel ai.” Maningon sirsir do sidea mangkorjahon tugas na mambahen tonduy na pansing manogu-nogu sidea. Anjaha sirsir do Jahowa membere “logou” atap tonduy na pansing ai. Jadi sanggah panurat ni Bibel mangkorjahon tugas na ibere bani sidea, maningon iihutkon sidea do homa panogu-noguan humbani tonduy na pansing ai.

10-11. Dua cara aha ma na porlu bahenonta ase hita itogu tonduy na pansing?

¹⁰ Tontu sonari lang be igunahon Jahowa tonduy na pansing laho manogu-nogu halak manuratkon isi ni Bibel. Tapi totap ope igunahon Ia tonduy na pansing laho mangurupi juakjuak-Ni. Aha ma na porlu bahenonta ase hita itogu-togu tonduy na pansing. Maningon ipastihon hita ma anggo hita domma mandalankon tugasta. Sonaha carani?

¹¹ Pingkirhon ma contoh on. Ase mardalan kapalni, dong dua tugas na maningon ihorjahon supir ni kapal. Na parlobei, maningon iihutkon ia do arah ni logou halani lang boi maju kapalni anggo totap do ia i pelabuhan. Na paduahon, maningon bolag do ipaherbang ia layar ni kapal. Jadi hassi pe dong logou, maningon iombus logou do layar ai ase boi maju kapalni. Hita pe boi totap mangidangi Jahowa anggo iurupi tonduy na pansing. Tapi songon supir ni kapal ai, dong do homa dua tugas na maningon ihorjahon hita. Na parlobei, maningon ihorjahon hita do tugas na ibere hubanta ase boi tonduy na pansing manogu-nogu hita. Na paduahon, bolag ma paherbang hita layarta marhitei mangkorjahon tugas ai humbani tuk ni gogohta. (Ps. 119:32) Anggo sonai ibahen hita, ipargogohi tonduy na pansing ma hita ase totap setia ibagas  pangidangion ronsi masuk hu dunia na baru.

12. Aha use na laho iulas hita?

¹² Nongkan domma iulas hita dua cara sonaha tonduy na pansing mangurupi hita. Ipargogohi anjaha iurupi tonduy na pansing do hita ase totap setia hassi pe dong sitaronon. Dob ai, iurupi tonduy na pansing do homa hita ase totap maju janah totap i dalan hagoluhan sadokah ni dokahni. Sonari, ulas hita ma ompat cara na maningon ibahen hita ase mandapot lobih bahat tonduy na pansing.

13. Domu bani 2 Timoteus 3:16, 17, aha do gunani anggo ibasa hita Bibel, tapi aha do na maningon ibahen hita?

¹³ Na parlobei, parlajari ma Bibel. (Basa 2 Timoteus 3:16, 17.) Hata Junani na iterjemahkon gabe “sinahapkon ni Naibata” artini igunahon Naibata do tonduy-Ni laho patugahkon na ibagas uhur-Ni hubani sidea na manuratkon Bibel. Jadi sanggah hita mambasa ampa manrimangi isi ni Bibel, ipaturut hita do parentah ni Naibata masuk hubagas pingkiranta. Gabe tarojur ma hita mambahen parubahan domu bani harosuh ni Jahowa. (Heb. 4:12) Tapi ase boi mandapot lambin bahat tonduy na pansing, maningon ipasirsir hita do panorang bai ganup ari laho marlajar Bibel anjaha manrimangi isini. Hasilni, itogu-togu Hata ni Naibata ma hita ibagas parlahou ampa parsahap.

14. (a) Mase boi ihatahon dong tonduy na pansing sanggah hita martumpu? (b) Sonaha ase boi dapot hita lambin bahat tonduy na pansing?

¹⁴ Na paduahon, riap manombah Jahowa. (Ps. 22:23) Bahat do tonduy na pansing sanggah martumpu hita. (Pangk. 2:29) Mase boi ihatahon sonai? Halani sanggah martumpu hita pakon sanina botou, ipindo hita do tonduy na pansing. Idodingkon hita do doding Harajaon na maronjolan bani Hata ni Naibata. Itangar hita do ambilan na ipadas sanina-sanina na itogu-togu tonduy na pansing. Anjaha iurupi tonduy na pansing ai do homa hasomanta naboru laho padaskon bagianni. Ase boi mandapot lobih bahat tonduy na pansing, maningon ra homa hita mambere komentar sanggah martumpu. Anggo ibahen hita sonai, gabe gok ma tonduy na pansing dapot hita, songon kapal na ipaherbang layarni.

15. Sonaha ase tonduy na pansing boi mangurupi hita sanggah marbarita?

¹⁵ Na patoluhon, marbarita. Anggo igunahon hita Bibel sanggah marbarita ampa mangajar, ipaturut hita do tonduy na pansing manogu hita ibagas pangidangion. (Rom 15:18, 19) Ase boi mandapot lobih bahat tonduy na pansing, maningon tongtong ma hita marbarita. Marusaha ma mambasahon Bibel bani halak. Ase boi dear nasiam marbuali sanggah marbarita, ihutkon ma contoh parsahapan na dong bani Jadwal Partumpuan Hagoluhan pakon Pangidangion Kristen.

16. Sonaha carani ase hita boi mandapot tonduy na pansing?

¹⁶ Na paompathon, martonggo bani Jahowa. (Mat. 7:7-11; Luk. 11:13) Marhitei tonggo, pindo ma tonduy na pansing bani Jahowa. Lang dong na boi manlarang hita martonggo bani Jahowa, atap manlanglangi hita laho mandapot tonduy na pansing. Hassi pe ibagas penjara, totap do ai boi mangurupi hita. Anjaha lang dong na boi ibahen Sibolis laho manlanglangi hita laho mandapot tonduy na pansing. (Jak. 1:17) Tapi, sonaha carani ase boi dapot hita tonduy na pansing ai? Laho mambotoh balosni, ulas hita ma lobei sada limbaga na isurat pitah bani buku Lukas. *

17. Humbani limbaga ni Jesus na isurat bani Lukas 11:5-9, 13, parlajaran aha do na iajarhon Jesus pasal tonggo?

¹⁷ Basa Lukas 11:5-9, 13. Limbaga ni Jesus ijon patuduhkon sonaha carani hita martonggo ase mandapot tonduy na pansing. Bani limbaga on, dapot dalahi ai do haporluanni “halani hajungilonni mangindo”. Lang mabiar ia mangindo pangurupion bani hasomanni hassi pe domma tongah borngin. Jadi, parlajaran aha ma na sihol iajarhon Jesus ijon? Jesus mangkatahon, “Pangindo hanima ma, sai na bereon do bannima; pindahi hanima ma, sai na jumpahan do hanima, anjaha hartuki hanima ma, sai na ungkabon do bannima!” Aha ma parlajaranni hubanta? Ase iurupi tonduy na pansing hita, maningon jungil do homa hita martonggo.

18. Humbani limbaga ni Jesus ai, mase pos uhurta anggo Jahowa ra mambere tonduy na pansing hubanta?

¹⁸ Humbani limbaga ai gabe iarusi hita ma homa mase Jahowa ra mambere tonduy na pansing hubanta. Dalahi bani limbaga ai sihol mansarihon tamuni. Pangahapni, maningon ipasirsir ia do sipanganon hassi pe domma tongah borngin tamuni roh. Hape lang dong sipanganon bani. Jesus mangkatahon ujungni ibere sindohorni ai do roti hu bani halani torus ia mangindo. Aha ma na laho iajarhon Jesus banta? Anggo manisia na lang gokan dear ra mangurupi hasomanni na jungil ai, tontu Bapanta na i surga ai pe ra mambere tonduy na pansing anggo tongtong hita mangindo. Halani ai, pos ma uhurta ibalosi Jahowa do tonggonta sanggah hita mangindo tonduy na pansing hu Bani.​—Ps. 10:17; 66:19.

19. Mase pos uhurta anggo hita boi martahan?

¹⁹ Pos do uhurta anggo hita boi martahan hassi pe marusaha Sibolis mambahen hita marsitaronon. Mase? Halani ipargogohi tonduy na pansing do hita marhitei dua cara. Na parlobei, ibere do hagogohon ase hita martahan hassi pe dong sitaronon. Na paduahon, songon logou na mangonjar kapal, iurupi tonduy na pansing do hita ase totap mangidangi Jahowa ronsi masuk hu dunia na baru. Jadi marusaha ma tongtong ase hita mandapot tonduy na pansing.