BANI Bibel, na ihatahon siramotkon rumah atap pe sijolom anakkunsi ai ma sasahalak na mangurus rumah atap pe arta ni tuanni. Ibagas sahap Heber ampa Junani, “siramotkon rumah” sipata boi do mangartihon sada halak na mangawasi horja i sada rumah.

Sanggah si Josep, anak ni si Jakob gabe jabolon i Masir, ibahen do ia gabe siramotkon rumah ni sada pejabat halak Masir. Sasintongni, “haganup na dong bani [tuanni], iondoskon do hu tangan ni si Josep”. (1 Mus. 39:2-6) Dob ai, sanggah si Josep gabe pejabat na markuasa i Masir, ipilih ia do homa sada halak laho manramotkon rumahni.​—1 Mus. 44:4.

Bani masa ni Jesus, somal do parjuma tading daoh hun jumani. Halani ai, ipilih ia ma sada halak ase adong tiap ari na mangawasi halak na marombou i jumani.

Ise do na sosok ibahen gabe siramotkon rumah? Bani abad na parlobei, dong sada panurat na margoran si Columella hun Rom. Ia mangkatahon, “Maningon halak na pandei marhorja do na ibahen gabe siramotkon rumah.” Maningon boi ma ia mamastihon anggo “ganup parhorja i rumah ai, domma dear mandalankon tugasni. Tapi lang boi ia kejam mangatur sidea”. Nini use, “Na sipontingan, lang boi pangahapni anggo ia domma mambotoh haganup. Tapi maningon ra ma ia marlajar mandalankon tugas na lape ongga ihorjahon ia.”

Ibagas Bibel, ibahen do sijolom anakkunsi gabe contoh laho manggambarhon tugas-tugas na ihorjahon i kuria Kristen. Umpamani, iojur apostel Petrus do ase halak Kristen manggunahon sibere-bere ni Naibata laho ‘marsipadear-dearan songon sijolom anakkunsi na bujur’.​—1 Ptr. 4:10.

Bani Lukas 16:1-8, ibahen Jesus do homa sada sarita pasal sijolom anakkunsi. Leganni ai, sanggah Jesus patugahkon tanda pasal parrohni bani ari simagira, ipatugah ia do bani susianni anggo ia laho mamilih “juakjuak na bujur anjaha na maruhur”, atap “sijolom anakkunsi”. Tugas ni sidea ai ma pasirsirhon sipanganon partonduyon marhitei publikasi hubani ganup susianni Jesus sadokah panorang parpudi. (Mat. 24:45-47; Luk. 12:42) Anjaha sirsir do publikasi ai bani ganup Saksi Jahowa i sab dunia on. Tontu malas uhurta halani boi ipatoguh marhitei publikasi sisonai.