1. Aha do ra na ongga isungkun hita ibagas uhurta?

ONGGA do mabiar nasiam sanggah mambayangkon imasabkon holi ganup ugama palsu, iserang Gog hun tanoh Magog hita, janah roh porang Harmagedon? Ra do sungkun-sungkun ham ibagas uhurmu, ‘Anggo masa holi ai, ai boi do ahu totap toguh haporsayaonku janah setia ahu bani Jahowa?’ Anggo sonai pangahapmu, hata ni Jesus na isurat bani ayat tema artikel on boi do patoguhkon haporsayaonta. Ihatahon Jesus do bani susianni, “Ulang ma [holsohan] uhurnima! Porsaya ma hanima bani Naibata.” (Joh. 14:1) Anggo totap toguh haporsayaonta, lang mabiar hita aha pe na masa bani ari na laho roh.

2. Sonaha hita boi patoguhkon haporsayaonta, anjaha aha do na laho iulas hita bani artikel on?

² Sanggah dong tantangan, ijai ma taridah ai domma toguh haporsayaonta atap lang. Anjaha hunjai ma homa boi ibotoh hita aha na porlu ibahen hita ase lambin toguh haporsayaonta. Sasintongni anggo totap hita martahan sanggah dong sitaronon, ai ma na mambahen lambin toguh haporsayaonta. Anjaha ai ma na mangurupi hita totap toguh sanggah dong tantangan na legan i pudian ni ari. Bani artikel on, iulas hita ma ompat situasi na boi manguji haporsayaon ni susian ni Jesus. Iulas hita homa sonaha do situasi ai sarupa pakon situasinta sonari on. Janah aha na porlu ibahen hita ase lambin toguh haporsayaonta.

3. Humbani hata ni Jesus bani Mateus 6:30, 33, aha do na porlu idingat hita ase toguh haporsayaonta?

³ Pasti ganup do kopala kaluarga sihol mambere aha na ihaporluhon kaluargani. Umpamani, dong sipanganon ni sidea,  pakeian, ampa rumah. Tapi ra do lang urah mambahen ai, tarlobih ma halani hita manggoluh bani panorang parpudi. Dong do hasomanta na hona PHK, anjaha domma itorihi ia horja na legan, tapi lalab lang dapot. Leganni ai, dong na manawarhon horja bani sidea, tapi horjani lang sosok pakon halak Kristen. Sanggah sonai situasini, maningon toguh ma haporsayaonta sai tongtong do isarihon Jahowa hita pakon kaluarganta. Ai do homa na iulas Jesus sanggah ia marambilan i dolog. (Basa Mateus 6:30, 33.) Anggo totap hita porsaya sai isarihon Jahowa hita, ai ma na mangurupi hita ase totap ringgas mangidangi Jahowa. Anjaha sanggah ididah hita sonaha Jahowa mambere ganup haporluanta, gabe lambin toguh ma haporsayaonta.

4-5. Aha do na mangurupi sada kaluarga sanggah susah parduiton ni sidea?

⁴ Pardiateihon ma sonaha Jahowa mangurupi kaluarga Miguel Castro na tading i Venezuela. Parjuma-juma do si Miguel janah dong jumani sandiri. Tapi roh ma piga-piga tentara mambuat arta ni sidea janah iusir ma sidea hunjai. Nini si Miguel ma, “Sonari, tanoh ni halak ma na isamot hanami. Ai pe otik do homa. Hupindo ma bani Jahowa tiap ari ase ibere Ia ganup haporluannami bani sadari ai.” Age pe susah tumang sidea, tapi porsaya do sidea sai tongtong do Jahowa mansarihon sidea. Totap do sidea sakaluarga ringgas roh hu partumpuan ampa dihut homa marbarita. Ipalobei sidea do Harajaon ni Naibata. Anjaha tongon, sai ibere Jahowa do ganup haporluan ni sidea.

⁵ Age pe susah situasi ni sidea, tapi sai totap do idingat si Miguel pakon istrini, ai ma si Yurai, sonaha Jahowa mansarihon kaluarga ni sidea. Sipata, igunahon Jahowa do sanina botou na legan laho mambere haporluan ni sidea. Iurupi sidea do homa si Miguel laho manorihi horja. Anjaha sipata ibere kantor cabang do homa na ihaporluhon sidea. Lang ongga itadingkon Jahowa sidea. Ai ma na mambahen lambin toguh haporsayaon ni si Miguel pakon kaluargani. Sonai do homa na iahapkon boruni sikahanan, ai ma si Yoselin. Nini do, “Malas tumang uhurhu halani huidah sonaha Jahowa mangurupi hanami. Ia do hasoman sidearan janah sai tongtong do iurupi Ia ahu.” Nini use, “Halani iurupi Jahowa hanami ibagas sitarononnami, gabe pos ma uhurnami boi do holi hanami totap martahan anggo roh use sitaronon na legan.”

6. Sanggah susah hita ibagas parduiton, sonaha hita boi patoguhkon haporsayaonta?

⁶ Sonari on, ra do homa susah parduiton ni nasiam. Age pe sonai, patoguh ma haporsayaonmu bani Jahowa. Basa anjaha rimangi ma hata ni Jesus na isurat bani Mateus 6:25-34. Rimangi ma homa pangalaman ni sanina botounta na tongtong iurupi Jahowa halani totap sidea ringgas mangidangi. (1 Kor. 15:58) Anggo ibahen nasiam sonai, gabe porsaya ma ham sai tongtong do iurupi Jahowa ham songon sanina botou na legan. Ibotoh Jahowa  do aha na porlu bani nasiam janah ipasirsir Ia do holi ai. Iahapkon ham ma holi sai tongtong do isarihon Jahowa nasiam. Anjaha gabe lambin porsaya ma ham sai tongtong do holi iurupi Ia nasiam lang soal aha pe na masa i pudian ni ari.​—Hab. 3:17, 18.

7. Domu bani Mateus 8:23-26, sonaha do haporsayaon ni susian ni Jesus sanggah roh “haba-haba na doras”?

⁷ Sanggah Jesus pakon susianni ibagas parau, iurupi ia do sidea ase toguh haporsayaonni. (Basa Mateus 8:23-26.) Sanggah ai, roh ma haba-haba na doras tumang janah bahat bah na masuk hubagas parau ai. Tapi sanggah ai modom do Jesus. Gabe mabiar tumang ma susianni ai. Ipuhoi sidea ma Jesus ase iurupi sidea. Dob ai nini Jesus ma bani sidea, “Mase mabiar hanima? Otikni in haporsayaonnima!” Sasintongni lang porlu mabiar sidea. Halani ijai Jesus pasti ilinggomi Jahowa do sidea. Aha ma parlajaranni hubanta? Anggo toguh haporsayaonta, ai ma na mangurupi hita ase boi martahan age pe hita hona bencana alam atap pe bahat parsoalanta na songon “haba-haba na doras” ai.

8-9. Tantangan aha do na iahapkon si Anel, janah aha do na mangurupi ia?

⁸ Pardiateihon ma pangalaman ni Botou Anel na tading i Puerto Rico. Bani tahun 2017, masa ma Badai Maria i iananni. Halani ai, gabe maseda ma rumah ni botou ai janah lang dong be horjani. Ihatahon si Anel ma, “Sanggah ai, pusok tumang uhurhu. Tapi marusaha do ahu ase totap porsaya bani Jahowa. Sai tongtong do ahu martonggo. Lang hupaturut sitaronon ai mambahen soh ahu mangidangi Jahowa.”

⁹ Ihatahon si Anel use totap do unduk ia bani tugah-tugah humbani Jahowa. Ai ma na mangurupi ia totap martahan age pe dong sitarononni. Nini ma, “Halani huihutkon tugah-tugah na ibere organisasi ni Jahowa, gabe tenang ma ahu. Huidah ma sonaha Jahowa mangurupi ahu marhitei sanina botou na legan. Sai tongtong do ipatoguh sidea ahu janah ibere do homa aha na huhaporluhon.” Nini use, “Ibere Jahowa do hubangku lobih humbani na hupangindo. Gabe toguh ma haporsayaonku halani ai.”

10. Aha do na boi ibahen hita sanggah roh sitaronon na borat?

¹⁰ Ra, sonari on borat do sitaron ni nasiam “songon haba-haba na doras”. Ra do baru hona bencana alam nasiam atap hona naborit na parah. Sanggah sonai situasini, ra do lang ibotoh ham aha na laho bahenonmu. Janah bahat do na mambahen nasiam holsohan. Age pe sonai, ulang ma ipaturut hita sitaronon ai mambahen soh hita mangidangi Jahowa. Tapi totap ma ipadohor hita dirinta bani Jahowa. Tongtong ma hita martonggo janah dingat ma use sonaha Jahowa domma mangurupi nasiam sadokah on. (Ps. 77:12, 13) Anggo ibahen nasiam sonai, gabe lambin porsaya ma  nasiam lang ongga itadingkon Jahowa nasiam lang soal sonaha pe situasini.

11. Mase hita porlu unduk humbani gok ni uhurta bani tugah-tugah na ibere organisasi?

¹¹ Aha ope na boi mangurupi hita sanggah dong sitaronon? Songon si Anel ai, marusaha ma hita unduk bani tugah-tugah na ibere sanina na ipilih Jahowa pakon Jesus laho mambobahon hita. Tongon, sipata ra do lang iarusi hita tugah-tugah na ibere sidea. Tapi, anggo totap hita unduk humbani gok ni uhurta, ipasu-pasu Jahowa ma hita. Songon pangalaman na isurat bani Bibel pakon pangalaman ni hasomanta, anggo unduk hita bani tugah-tugah, ai do na mambahen hita selamat. (2 Mus. 14:1-4; 2 Kron. 20:17) Rimangi ma contoh-contoh sisonai. Ai ma na mangurupi nasiam ase ra mangihutkon tugah-tugah na ibere organisasi sonari on sonai homa bani ari na laho roh. (Heb. 13:17) Halani ai, gabe lang pala mabiar be nasiam sanggah roh holi hamarsikon banggal.​—Pod. 3:25.

12. Domu bani Lukas 18:1-8, mase hita maningon totap porsaya bani Jahowa sanggah dong na mambahen na lang adil hubanta?

¹² Ibotoh Jesus do boi do mintor galek haporsayaon ni susianni anggo dong na mambahen na lang adil bani sidea. Halani ai, ibahen Jesus ma sada sarita laho mangurupi sidea na isurat bani buku Lukas. Ijai isaritahon dong sada naboru na mabalu, sai inunut ia mangindo keadilan bani sada hakim na lang pintor. Ujungni ibere hakim ai ma pangindoanni. Aha do na boi iparlajari hita? Anggo Jahowa sedo songon hakim na lang pintor ai. Halani ai, Jesus mangkatahon, “Ia Naibata, mintor lang ma pintoran-Ni na pinilih-Ni, na mandilo-Si arian pakon borngin?” (Basa Lukas 18:1-8.) Dob ai nini Jesus use, “Anggo roh Anak ni Jolma in, adong do nani jumpahon-Ni haporsayaon [songon naboru ai] i atas tanoh on?” Halani ai, porini dong na mambahen na lang adil hubanta, totap ma hita sabar. Songon naboru na mabalu ai, totap ma hita porsaya sai iurupi Jahowa do hita bani panorang na topat. Tongtong ma hita martonggo. Ra do cara ni Jahowa mambalosi tonggonta lobih humbani na ipingkirhon hita.

13. Sonaha tonggo mangurupi sada kaluarga sanggah dong mambahen na jahat bani sidea?

¹³ Dong pangalaman ni Botou Vero na tading i Republik Demokratik Kongo. Bani sada ari, roh piga-piga tentara menyerang huta ni sidea. Jadi maningon lintun ma si Vero, suamini na lang Saksi, pakon boruni na marumur 15 tahun. Sanggah i tongah dalan, itangkap piga-piga tentara ma sidea janah laho ibunuh ma sidea. Mintor tangis ma si Vero halani ai. Ase tenang inangni ai, ipagogoh boruni ai ma sorani martonggo janah marulak-ulak ia mandilo goran ni Jahowa. Dob salosei ia martonggo, isungkun komandan ni tentara ai ma ia, “Ee anak boru, ise do na mangajari ho martonggo?” Ibalosi ia ma,  “Inangku do na mangajari ahu tonggo Ham Bapanami na isurat bani Mateus 6:9-13.” Jadi nini komandan ai ma use, “Anggo sonai laho ma nasiam. Andohar ma ilinggomi Jahowa Naibatamu ai nasiam!”

14. Tantangan aha do ra na manguji haporsayaonta, anjaha aha do na boi mangurupi hita?

¹⁴ Humbani pangalaman ai, ibotoh hita ma ponting tumang do ase totap martonggo. Tapi sonaha anggo lang mintor ibalosi tonggonta? Dingat ma use naboru na mabalu bani sarita ni Jesus ai. Sai totap ma hita mangindo bani Naibata. Pos ma uhurta lang ongga itadingkon Jahowa hita. Ibalosi Ia do holi tonggonta bani panorang na topat. Pindo ma homa ase ibere Ia tonduy na pansing bani nasiam. (Pil. 4:13) Dingat ma bahat tumang pasu-pasu na laho ibere Naibata bani nasiam. Anggo domma saud ai, lang idingat-dingat nasiam be holi hasusahan na iahapkon nasiam. Sanggah ididah nasiam pangurupion ni Naibata ibagas goluhmu, lambin toguh ma haporsayaonmu.​—1 Ptr. 1:6, 7.

15. Songon na isurat bani Mateus 17:19, 20, tantangan aha do na iahapkon susian ni Jesus?

¹⁵ Iajarhon Jesus do susianni anggo toguh haporsayaon ni sidea, boi ma sidea totap martahan lang soal aha pe tantangan na roh. (Basa Mateus 17:19, 20.) Bani sada ari, lang boi iusir susianni begu-begu hape ongga do marhasil sidea mambahen sisonai. Mase ma boi sonai? Ihatahon Jesus ma halani otik do haporsayaon ni sidea. Nini Jesus use anggo toguh haporsayaon ni sidea, boi do sidea totap martahan age pe borat tumang sitaronon ni sidea na songon gunung. Sonai homa ma hita sonari on. Age pe dong sitarononta na lang boi tarsaloseihon, tapi anggo toguh haporsayaonta, boi do hita totap martahan.

16. Sonaha do haporsayaon na toguh boi mangurupi Botou Geydi dobkonsi ibunuh suamini?

¹⁶ Pardiateihon ma pangalaman ni Botou Geydi hun Guatemala. Dobkonsi mulak sidea hun partumpuan, ibunuh halak ma suamini. Aha ma na mangurupi botou ai ase totap toguh haporsayaonni? Ia mangkatahon, “Huompaskon ma bani Jahowa ganup pusok ni uhurhu. Gabe damei ma huahap. Igunahon Jahowa do homa kaluargangku pakon hasoman na legan laho mangurupi ahu. Marusaha do homa ahu ase totap ringgas mangidangi Jahowa. Halani sonai hubahen, gabe tenang ma huahap janah lang sai holsohan. Porsaya do ahu sitaronon aha pe holi na roh hubangku, boi do ahu totap toguh halani sai tongtong do ahu iurupi Jahowa, Jesus, pakon organisasini.”

17. Aha ma na boi ibahen hita sanggah borat tumang sitarononta?

¹⁷ Ra do sonari on pusok ope uhurmu halani marujung goluh halak na hinaholonganmu. Dear do anggo ibasa ham sarita pasal halak na ipapuho na isuratkon ibagas Bibel. Anggo ibahen ham sonai, gabe lambin toguh ma haporsayaonmu  bani pangarapan parpuhoon. Atap ra do homa sonari on pusok uhurmu halani dong kaluargamu na ipecat hun kuria. Halani ai, rimangi ma mase pengaturan pemecatan ai patuduhkon holong ni Jahowa. Aha pe sitarononta sonari, ibahen hita ma ai gabe kesempatan laho patoguhkon haporsayaonta. Patugah ma ganup holsoh ni uhurmu bani Jahowa. Ulang ma mandaoh pakon hasoman na legan. (Pod. 18:1) Totap ma ringgas ibagas pangidangion age pe tariluh-iluh ope ham ronsi sonari sanggah idingat ham sitaronon ai. (Ps. 126:5, 6) Tongtong ma roh hu partumpuan, marbarita, ampa mambasa Bibel. Anjaha dingat ma pasu-pasu na laho ibere Jahowa bani ari simagira. Sanggah ididah ham sai tongtong iurupi Jahowa ham, gabe lambin toguh ma haporsayaonmu.

18. Anggo ibotoh ham galek ope haporsayaonmu, aha na boi ibahen ham?

¹⁸ Ra do ibotoh ham ma sonari galek ope haporsayaonmu sanggah dong tantangan. Tapi ulang ma maretek ni uhur ham. Pindo ma songon na ongga ihatahon apostel ni Jesus, “Tambahi ham ma haporsayaonnami.” (Luk. 17:5) Anjaha rimangi ma use contoh-contoh na dob iulas hita. Songon si Miguel pakon si Yurai, dingat hita ma ganup pangurupion na ibere Jahowa hubanta. Songon boru ni si Vero pakon si Anel, sai tongtong ma hita martonggo tarlobih ma sanggah hita ibagas sitaronon. Anjaha songon si Geydi, dingat hita ma boi do igunahon Jahowa kaluarga pakon hasomanta laho mangurupi hita. Anggo iahapkon ham tongtong iurupi Jahowa ham, lambin porsaya ma ham sai iurupi Ia do holi ham lang soal aha pe na masa.

19. Aha do na ibotoh Jesus pasal susianni, anjaha aha do na maningon idingat hita?

¹⁹ Tongon, ihatahon Jesus do nongkan ai boi do galek haporsayaon ni susianni sanggah dong tantangan. Age pe sonai, porsaya do Jesus boi do sidea martahan manaron ganup sitaronon ai halani pangurupion ni Naibata. (Joh. 14:1; 16:33) Porsaya do homa ia anggo humpulan na banggal boi do maluah humbani hamarsikon banggal. (Pangk. 7:9, 14) Halani ai, patoguh ma haporsayaonmu humbani sonari. Anggo sonai ibahen ham, iurupi Jahowa ma holi ham ase boi maluah humbani hamarsikon banggal.​—Heb. 10:39.