SAI totap do ipatuduh Jahowa holongni na manongtong in. (Hos. 6:6) Anjaha sihol do Ia ase juakjuak-Ni pe patuduhkon holong na sisonai. Marhitei nabi Mika, iojur Jahowa do ase juakjuak-Ni patuduhkon “holong na manongtong in.” (Mi. 6:8) Tapi ase boi ihorjahon hita ai, maningon ibotoh hita ma lobei aha do artini holong na manongtong ai.

² Istilah holong na manongtong in adong do hira-hira 200 hali isuratkon bani Bibel Kitab Suci Terjemahan Dunia Baru. Tapi dong piga-piga Bibel na menerjemahkon istilah ai gabe “idop ni uhur”, “pardear layak” atap “parholong ni atei”. Jadi anggo bani ayat na dong i artikel on ibahen kata “pardear layak” atap pe “idop ni uhur”, sasintongni ai mangartihon holong na manongtong. Tapi aha do artini holong na manontong in? Anggo sasada halak patuduhkon holong na manongtong, on artini holong tumang do ia hubani halak na hinaholonganni anjaha sai tongtong do ihasomani ia halak ai. Jahowa do contoh na sibanggalan na patuduhkon holong sisonai. Bani artikel on iulas hita ma, sonaha do Jahowa patuduhkon holong na sisonai hubani manisia. Anjaha bani artikel na mangihut iulas hita ma, sonaha hita boi maniru Jahowa laho patuduhkon holong na sisonai hubani halak na legan.

³ Lang piga dokah dobkonsi kaluar halak Israel humbani Masir, ipatugah Jahowa ma bani si Musa pasal goran-Ni ampa sifat-Ni.  Nini ma, “Jahowa, Jahowa do Naibata pardear layak anjaha paridop ni uhur, nanget marringis, anjaha gok holong ni uhur-Ni pakon habonaran-Ni, na pahotkon holong ni uhur-Ni hubani halak marribu-ribu, anjaha na manasap hajahaton, panlanggaron pakon dousa.” (2 Mus. 34:6, 7) Hunjai ibotoh hita ma, adong sada hatorangan na ponting na ipatugah Jahowa pasal holong-Ni. Aha ma ai?

4-5. (a) Sonaha do Jahowa patugahkon pasal diri-Ni? (b) Sungkun-sungkun aha do na laho iulas hita?

⁴ Ipatugah Jahowa do anggo Ia lang pitah parholong, tapi “paridop ni uhur banggal” atap pe “parholong atei banggal”. Istilah ai dong do hira-hira onom hali isuratkon ibagas Bibel. (4 Mus. 14:18; Neh. 9:17; Ps. 86:15; 103:8; Joel 2:13; Jon. 4:2) Anjaha pitah hu bani Jahowa do istilah ai ipakei, lang ongga hubani jolma. Halani ai ma, gatih tumang ihatahon Jahowa anggo Ia paridop ni uhur banggal. Anjaha ponting tumang do sifat ai bani Jahowa. * Halani ai ma ihatahon si Daud ma sonon, “Ham Jahowa, sundol do ronsi langit idop ni uhur-Mu . . . Mantin ni in idop ni uhur-Mu Ham Naibata, i linggom ni habong-Mu do marlingod anak ni jolma.” (Ps. 36:6, 8) Tontu malas tumang uhurta songon si Daud halani sonai do banggal ni idop ni uhur Jahowa ai.

⁵ Ase lambin iarusi hita pasal holong ni Jahowa na manongtong in, iulas hita ma dua sungkun-sungkun on, Hubani ise do ipatuduh Jahowa holong-Ni na manongtong in? Anjaha aha ma gunani na iahapkon hita halani ipatuduh Ia holong na sisonai?

⁶ Hubani ise do ipatuduh Jahowa holong-Ni na manongtong in? Hubani jolma do ipatuduh Ia ai. Tapi lang hubani ganup halak. Pitah hubani halak na orot marhasoman pakon-Si do ipatuduh Ia holong na manongtong in. Setia tumang do Naibata hubani hasoman-Ni janah ibere Ia do pangarapan na jenges bani sidea. Anjaha sai tongtong do holong uhur-Ni hubani sidea.

⁷ Holong do uhur ni Jahowa hubani haganup jolma. Ihatahon Jesus do sonon hubani si Nikodemus, “Ai sonon do holong ni uhur ni Naibata bani dunia on, pala do Anak-Ni na sasada in iberehon, ase ulang magou ganup na  porsaya Bani, tapi ase hagoluhan na sadokah ni dokahni bani.”​—Joh. 3:1, 16; Mat. 5:44, 45.

8-9. (a) Mase ma ipatuduh Jahowa holong-Ni na manongtong in hubani juakjuak-Ni? (b) Aha do na laho iulas hita?

⁸ Songon na dob iulas hita nongkan ai, pitah hubani juakjuak-Ni do ipatuduh Jahowa holong-Ni na manongtong in. Ai ma homa na ihatahon si Daud pakon Nabi Daniel. Umpamani, ihatahon si Daud do, “Torus ma patuduhkon Ham idop ni uhur-Mu bani na mananda Ham.” “Tapi anggo idop ni uhur ni Jahowa totap do ronsi sadokah ni dokahni bani sagala na mangkabiari-Si.” Si Daniel pe mangkatahon, “Ham Tuhan, Naibata na timbul anjaha na majombut, siramotkon padan ampa idop ni uhur dompak halak na mangkaholongi Ham ampa na mandalankon parentah-Mu.” (Ps. 36:11; 103:17; Dan. 9:4) Hunjai tangkas ma ipatuduh Jahowa do holong-Ni hubani juakjuak-Ni, halani itanda sidea Ia, mabiar sidea hu Bani, holong uhur ni sidea hu Bani ampa idalankon sidea parentah-Ni. Jadi pitah hubani halak na manombah-Si do ipatuduh Jahowa holong sisonai.

⁹ Paima itanda hita Jahowa, domma iahapkon hita holong-Ni. (Ps. 104:14) Tapi dobkonsi isombah hita Ia, iahapkon hita ma holong ni Jahowa na manongtong in na ipatuduh Ia hubanta. Marjanji do Jahowa bani juakjuak-Ni, “Idop ni uhur-Hu seng anjai mosor humbam.” (Jes. 54:10) Si Daud pe mangkatahon, “Domma ipilih Jahowa sada haholongan-Ni Bani.” (Ps. 4:4) Halani domma ipatuduh Jahowa holong-Ni uhurni, aha ma na porlu ibahen hita? Bibel mangkatahon, “Barang ise na pantas maruhur, iparimbagaskon ma ai, anjaha iparuhurhon ma pangidopi ni Jahowa.” (Ps. 107:43) Jadi ulas hita ma sonari, tolu cara sonaha do Jahowa patuduhkon holong-Ni na manongtong in anjaha aha do gunani ai hubanta.

10. Halani ibotoh hita ronsi sadokah ni dokahni do holong ni Jahowa, sonaha do ai mangurupi hita? (Psalmen 31:8)

¹⁰ Ronsi sadokah ni dokahni do holong ni Jahowa na manongtong in. Bani Psalmen 136 adong hira-hira 26 hali isuratkon pasal ai.  Umpamani bani ayat 1 ihatahon, “Puji ma Jahowa, ai pardear layak do Ia, tongon, ronsi sadokah ni dokahni do idop ni uhur-Ni.” (Ps. 136:1) Anggo ibasa hita use ayat 2 ronsi 26, adong do marulak-ulak ihatahon “ronsi sadokah ni dokahni do idop ni uhur-Ni”. On artini lang ongga mubah holong ni Jahowa bani juakjuak-Ni. Anggo domma holong uhur ni Jahowa hubani juakjuak-Ni, seng ongga itadingkon Ia sidea. Anjaha age pe sidea ibagas sitaronon, sai totap do ihasomani Jahowa sidea. Tontu megah tumang do uhurta mambotoh banggal ni holong ni Jahowa ai. Aha do gunani ai banta? Age pe bahat sitarononta tapi anggo totap iihutkon hita parentah ni Naibata, pos ma uhurta sai tongtong do iurupi Jahowa hita ase boi totap margogoh anjaha marmalas ni uhur.​—Basa Psalmen 31:8.

11. Domu bani Psalmen 86:5, mase ra Jahowa manasap dousanta?

¹¹ Halani holong ni Jahowa na manongtong in, isasap Ia do dousanta. Anggo ididah Jahowa dong sahalak pardousa na manosali dousani anjaha ra mambahen perubahan, isasap ia do dousani ai. Songon na ihatahon si Daud, “Seng ibahen hu banta romban hubani dousanta, anjaha seng ibalaskon banta romban hubani hajahatonta.” (Ps. 103:8-11) Ongga do si Daud maretek ni uhur janah lalab manosali diri halani dousani. Tapi iahapkon si Daud ma “marpangulaki do uhur” ni Jahowa. Aha ma na mambahen ase ra Jahowa manasap dousanta? Balosni ai boi ibotoh hita humbani Psalmen 86:5. (Basa.) Songon na ihatahon si Daud ijai, halani holong-Ni na manongtong in bani juakjuak-Ni ma na mambahen Jahowa ra manasap dousa ni ganup halak na manombah-Si.

12-13. Anggo lalab hita manolsoli diri halani dousanta hinan, aha ma na boi mangurupi hita?

¹² Anggo ihorjahon hita dousa, somalni adong do panosalan ibagas uhurta. Dear do ai. Halani anggo hita manosal, gabe ra ma hita mambahen perubahan. Tapi dong do juakjuak ni Naibata, na lalab manosali dirini halani hasalahanni hinan. Sai lalab do sidea manguhumi dirini. Age pe domma ibahen sidea perubahan tapi lang pos uhur ni sidea domma isasap Jahowa dousani. Anggo sonai pangahap ni nasiam dear do anggo irimangi  nasiam, sonaha Jahowa patuduhkon holong-Ni na manongtong hubani juakjuak-Ni.

¹³ Aha do gunani ai hubanta? Age pe adong kelemahan atap pe hahuranganta, tapi boi do hita marmalas ni uhur mangidangi Jahowa, janah borsih homa panggora ni uhurta. Mase boi sonai? Halani “ipaborsih daroh ni Jesus, Anak-Ni in do hita humbani sagala dousa”. (1 Joh. 1:7) Jadi anggo lalab nasiam maretek ni uhur halani hasalahanmu, dingat ma sasintongni sirsir do Jahowa manasap dousa ni halak na ra mubah. Pardiateihon hita ma na ihatahon si Daud pasal holong ni Jahowa na manongtong in. Nini do sonon, “Songon gijang ni langit hun tanoh on, sonai do banggal ni idop ni uhur-Ni bani sagala na mangkabiari-Si. Songon daoh ni hapoltakan humbani hasundutan, sonai do ipadaoh panlanggaronta hun banta.” (Ps. 103:11, 12) Jadi “marpangulaki do uhur ni” Naibata hubani halak na ra mambahen perubahan.​—Jes. 55:7.

14. Sonaha si Daud patorangkon pasal holong ni Jahowa na manongtong in na boi manlinggomi hita?

¹⁴ Holong ni uhur ni Jahowa na manongtong in boi manlinggomi hita ase totap setia hu Bani. Martonggo do si Daud bani Jahowa sonon, “Ham do parlingodanku, iramotkon Ham do ahu humbani hasosakan, haluahon do iinggotkon Ham bangku . . . Barang ise na martenger ni uhur bani Jahowa, inggotkonon-Ni do bani idop ni uhur.” (Ps. 32:7, 10) Hinan ipajongjong halak do tembok i kaliling ni kota ni sidea laho manlinggomi sidea humbani munsuh. Sonai do homa holong ni Jahowa na manongtong in boi manlinggomi hita. Sai tongtong do ilinggomi Jahowa hita ase boi totap toguh parhasomananta pakon-Si age pe adong tantangan. Anjaha lang pitah ai, halani holong ni uhur do homa gabe totap Ia dohor banta.​—Jer. 31:3.

15. Sonaha holong ni Jahowa na manongtong in boi gabe parlinggoman bani juakjuak-Ni?

¹⁵ Ipatorang si Daud use sonaha Jahowa boi manlinggomi juakjuak-Ni. Ihatahon ia do sonon, “Ham do Naibata batar-batar bangku, Naibatangku na maridop ni uhur bangku.” Nini use, “Hagogohon ampa batar-batar bangku, bentengku ampa Sipaluah ahu, gantarhu ampa hatengeran ni uhurhu.” (Ps. 59:18; 144:2) Mase ma ihatahon si Daud halani holong ni Jahowa na manongtong in gabe parlinggoman do Ia hubanta? Artini lang soal ija pe juakjuak ni Naibata marianan, sai tongtong do ilinggomi Jahowa sidea ase totap toguh parhasoman ni sidea pakon-Si. Ai do homa na ipatorang bani Psalmen 91. Ihatahon panurat ni Psalmen do sonon, “Haporusanku anjaha batar-batarhu, Naibatangku, anjaha hatengeran ni uhurhu.” (Ps. 91:1-3, 9, 14) Ongga do homa ipatorang si Musa pasal parlinggoman humbani Jahowa. (Ps. 90:1) Paima matei ia ihatahon ia do sonon, “Naibata sisadokah ni dokahni do haporusan bamu, anjaha i tongah-tongahmu do tangan-Ni na manongtong in.” (5 Mus. 33:27) Aha do artini i “tongah-tongahmu do tangan [Jahowa] na manongtong in”?

16. Halani ibotoh hita sai tongtong ipargogohi Jahowa hita, aha do gunani ai hubanta? (Psalmen 136:23)

¹⁶ Halani Jahowa boi gabe parlinggoman banta, tontu damei ma pangahapta. Tapi sipata sai adong do na mambahen hita lalab marpusok ni uhur atap pe maretek ni uhur. Anggo sonai situasini, sonaha do Jahowa boi mangurupi hita? (Basa Psalmen 136:23.) Ipargogohi Ia do hita ase ulang gabe mandolei. Usih songon niombah-Ni do hita. (Ps. 28:9; 94:18) Aha ma gunani ai hubanta? Na parlobei, lang soal ija hita marianan sai totap do ilinggomi Jahowa hita. Anjaha na paduahon, sai tongtong do isarihon Ia hita.

17. Mase holong ni Jahowa na manongtong in boi patoguhkon uhurta? (Psalmen 33:18-22)

¹⁷ Domma iulas hita, sai tongtong do ipargogohi Jahowa hita ase boi totap setia hassi pe dong sitaronon. (2 Kor. 4:7-9) Nabi Jeremia mangkatahon, “Idop ni uhur ni Jahowa do na so ra marpunsa, seng marnarotap holong ni atei-Ni.” (Tangis. 3:22) Pos ma uhurta sai totap do holong uhur ni Jahowa hubanta. Sosok do ai songon na ihatahon panurat ni psalmen, “Dompak na mangkabiari-Si do mata ni Jahowa, dompak halak na marpangarapan bani idop ni uhur-Ni.”​—Basa Psalmen 33:18-22.

18-19. (a) Aha ma na maningon idingat hita? (b) Aha ma na laho iulas hita bani artikel na mangihut?

¹⁸ Aha ma na maningon idingat hita? Tongon, paima itanda hita Jahowa domma iahapkon hita holong-Ni ai. Tapi pitah hu bani juakjuak-Ni do ipatuduh Ia holong-Ni na manongtong in. Halani holong-Ni na sonai ma, sai tongtong ilinggomi Ia hita. Lang ongga itadingkon Ia hita. Anjaha pasaudon-Ni do sura-sura-Ni hubanta. Sihol do Ia ase totap hita marhasoman pakonsi sadokah ni dokahni. (Ps. 46:2, 3, 8) Anjaha lang soal sitaronon aha pe na iahapkon hita, sai ipargogohi Ia do hita ase boi hita totap setia hu Bani.

¹⁹ Domma ibotoh hita sonaha Jahowa patuduhkon holong-Ni na manongtong hubanta. Halani ai sihol do hita maniru Ia laho patuduhkon holong na sisonai hubani halak na legan. Sonaha carani hita mangkorjahon ai? Iulas hita ma balosni bani artikel na mangihut.