Ai Ibotoh Nasiam do?
Aha do na masa bani kota Ninive dobkonsi matei si Jona?
BANI abad na papituhon SM, Assur ma na gabe penguasa dunia. The British Museum Blog mangkatahon, “Bolag do pamarentahan ni Assur, i sabolah barat ai ma Kiprus, sabolah timur ai ma Iran, janah sompat do homa das hu Masir.” Ninive ma ibu kota ni Assur. Lambin terkenal do kota ai halani dong monumen na banggal, taman na jenges tumang, istanani mewah, ampa perpustakaanni na banggal janah lengkap. Prasasti dingding Ninive patuduhkon, anggo Raja Asnapar ihatahon ia do dirini sahalak “raja ni dunia”. Bani panorang ai lang dong halak na boi manaluhon Assur ampa Ninive.
Pamarentahan ni Assur ma na gabe penguasa dunia bani panorang ai
Hassi pe sonai sanggah Assur gabe penguasa dunia, ihatahon Jahowa do marhitei Nabi Sepanya sonon, “Agouon [ni Jahowa] ma Assur, anjaha tarulang bahenon-Ni Ninive, horah songon halimisan.” Ihatahon Jahowa homa marhitei Nabi Nahum, “Buati ma pirak in, buati ma omas in! . . . Lumei! Halumeion ampa hasiapon! . . . Anjaha sagala na mangidah ho, maporus ma humbam. Anjaha nini ma, ‘Domma hansur Ninive, ise ma na manangisi?’” (Sep. 2:13; Nah. 2:10, 11; 3:7) Mambogei panjahaion ai bahat do halak marpingkir, ‘Ai mungkin do ai tarjadi? Ai mungkin do Assur na gogoh italuhon?’ Bahat do halak na lang porsaya bani panjahaion ai.
Tongon-tongon do hansur Ninive
Tongon masa do songon panjahaion ai, bani ujung ni abad papituhon SM, italuhon Babilon pakon Madai ma Assur. Ujungni lang dong be na mangiani kota ai janah lang dong be na mangingatsi. Piga-piga ratus tahun dobkonsi ai, majallah The Metropolitan Museum of Art in New York mangkatahon, “Lang dong na mardingat kota ai. Anjaha pitah bani Bibel noman dong isurat pasal Ninive.” Bani awal tahun 1800-an, Biblical Archaeology Society Online Archive mangkatahon, “Lang dong sada pe na mambotoh na tongon-tongon ongga dong kota Assur.” Tapi bani tahun 1845, arkeolog Austen Henry Layard mulai ma manggali kota Ninive janah dapotsi ma bukti na patuduhkon ongga do dong kota ai, janah bayak ampa jago do homa ai hinan.
Jadi tangkas ma ibotoh hita panjahaion pasal kota Ninive saud do. On boi do homa patoguhkon haporsayaonta anggo panjahaion pasal pamarentahan ni dunia on pasti do saud.—Dan. 2:44; Pangk. 19:15, 19-21.
