1-2. (a) Mase halak na baru marhajabuan maningon marpangunsandeian bani Jahowa? (Psalmen 37:3, 4) (b) Aha do na laho iulas hita bani artikel on?

ADONG do rencanamu sihol marhajabuan? Atap ai baru marhajabuan do nasiam? Tontu malas tumang ma uhurmu anggo domma saud nasiam marhajabuan. Age pe sonai, sai dong do parsoalan ibagas rumah tangga. Anjaha dong do homa keputusan na ponting na maningon ibahen halak na baru marhajabuan. Keputusan na ibahen nasiam dong do pengaruhni ai i pudian ni ari ibagas kaluargamu. Tapi anggo totap nasiam marpangunsandeian bani Jahowa, ai ma na mangurupi nasiam boi mambahen keputusan na dear. Janah hasilni gabe martuah ma holi parhajabuanmu. Tapi anggo lang iihutkon nasiam prinsip ni Bibel, ai ma na mambahen lambin bahat masalah ibagas kaluarga. Anjaha gabe lang marmalas ni uhur be nasiam halani ai.​—Basa Psalmen 37:3, 4.

² Age pe bani artikel on bahatan na iulas pasal halak na baru marhajabuan, tapi tantangan na laho iulas hita sarupa do pakon tantangan ni ganup halak na dob marhajabuan. Iulas hita ma holi parlajaran na boi idapot hita humbani juakjuak ni Naibata na dong ibagas Bibel. Hassi pe parlajaranni ibahen bani sidea na dob marjabu, tapi marguna do homa ai banta ganup. Dob ai iulas do homa pangalaman ni sanina botou na dob marhajabuan.

3-4. Tantangan aha do somalni na iahapkon sidea na baru marhajabuan?

³ Ra do adong piga-piga hasoman atap pe kaluarga na mangojur sidea na baru marhajabuan ase podas dong niombahni. Iojur do homa sidea mamboli rumah atap pe barang-barang na legan. Ibahen sidea sonai halani iahap sidea maningon sonai do halak na baru marhajabuan.

⁴ Anggo lang jaga sidea na baru marhajabuan ai, boi do sidea gabe mambahen keputusan na salah. Ujungni, gabe bahat ma utang. Halani ai, maningon gogoh ma sidea marhorja laho manggalari utang ai. Ai ma na mambahen lang bahat be panorang ni sidea marlajar Bibel, mambahen parlajaran Bibel kaluarga, ampa marbarita. Ra do homa dong na gati lembur ase mandapot bahat duit. Halani ai ma gabe lang boi sidea mambere bahat panorang ibagas pangidangion.

5. Aha do na boi iparlajari nasiam humbani pangalaman ni si Karlos pakon si Marisa?

⁵ Domma bahat pangalaman na patuduhkon lang martuah parhajabuan anggo arta dassa na ipindahi sidea. Pardiateihon ma pangalaman ni si Karlos pakon si Marisa. * Sanggah baru marhajabuan sidea, gogoh ma sidea haduasi marhorja. Tapi dobkonsi lambin dokah, lang marmalas ni uhur be sidea. Si Karlos mangkatahon, “Tongon, bahat tumang do artanami. Tapi lang ongga tarpingkir hanami laho mambere bahat panorang ibagas pangidangion. Sasintongni lang marmalas ni uhur hanami. Gabe stres do hanami ujungni.” Ra do, sarupa homa pangalamanmu pakon sidea. Age pe sonai, ulang maretek ni uhur nasiam. Dong do contoh na dear na boi mangurupi nasiam mambahen parubahan. Parlobei ulas hita ma aha do na boi iparlajari suami humbani Raja Josapat.

6. Sanggah dong tantangan na banggal, sonaha ma si Josapat mandalankon podah na isurat bani Podah 3:5, 6?

⁶ Halani bahatni tanggung jawab ni suami, ra do songon na malojatu iahap ham mandalankon tanggung jawab ai. Anggo sonai, pardiateihon ma pangalaman ni Raja Josapat. Halani raja do ia, bahat tumang tanggung jawab na maningon idalankon ia. Maningon ilinggomi ia do rakyatni. Aha ma na ibahen si Josapat laho manlinggomi rakyatni? Ipajongjong ia ma bahat benteng-benteng i kota Juda. Anjaha ipatumpu ia ma ganup tentarani, jumlahni dong ma ai hira-hira 1.160.000 halak. (2 Kron. 17:12-19) Tapi dobkonsi ai, roh ma masalah na borat. Roh ma halak Ammon, halak Moab, pakon halak na tading i Dolog Seir mamorangi sidea. Gabe terancam ma si Josapat, kaluargani, pakon ganup rakyatni. (2 Kron. 20:1, 2) Halani ai, aha ma na ibahen si Josapat? Mintor idalankon ia ma na isurat bani Podah 3:5, 6. (Basa.) Martonggo  ma ia bani Jahowa mangindo pangurupion ampa hagogohon. Anggo ibasa hita tonggo ni si Josapat na isurat bani 2 Kronika 20:5-12, ibotoh hita ma martoruh ni uhur do si Josapat ai anjaha marpangunsandeian do ia bani Jahowa. Sonaha ma Jahowa mambalosi tonggoni ai?

7. Sonaha do Jahowa mambalosi tonggo ni si Josapat?

⁷ Marhitei halak Levi na margoran si Jahasiel, ibere Jahowa ma tugah-tugah bani si Josapat. Nini Jahowa ma, “Jongjong ma nasiam soh, anjaha idah nasiam ma hamonangan, na sihol bereon ni Naibata bani nasiam.” (2 Kron. 20:13-17) Ra do songon na lang masuk akal iahap hita tugah-tugah ai. Tapi dingat ma humbani Jahowa do tugah-tugah ai. Jadi idalankon si Josapat ma parentah ni Jahowa. Kaluar ma ia marbaris-baris pakon rakyatni laho manjumpahi munsuhni. Sedo tentara na ibahen ia i lobei. Tapi na ibahen ia, ai ma kalompok halak laho mandodingkon doding pujian bani Jahowa. Ujungni, ibahen Jahowa ma songon janji-Ni ai, janah monang ma sidea.​—2 Kron. 20:18-23.

8. Aha ma na boi iparlajari suami-suami humbani na ibahen si Josapat?

⁸ Bahat do na boi iparlajari suami-suami humbani sitiruon na ibahen si Josapat? Pasti domma pongkut ham marhorja laho mansarihon kaluargamu. Tapi, sanggah dong tantangan ra do sihol ham pasaloseihon masalah ai mangihutkon caramu sandiri. Tapi sedo cara na dear ai. Dearan do ham martonggo bani Jahowa. Boi do homa ham rup martonggo pakon istrimu. Pindahi ma homa panogu-noguon humbani Jahowa marhitei mamparlajari Bibel ampa publikasi na ipasirsir organisasi. Anjaha dalankon ma aha na iparlajari ham. Tapi, ra do adong na lang setuju bani keputusan na ibahen ham age pe ai domma mangihutkon prinsip ni Bibel. Iejek sidea do homa keputusan ai halani iahap sidea duit do na mambahen martuah kaluarga. Tapi dingat ma sitiruon na ibahen si Josapat. Porsaya tumang do ia bani Jahowa janah taridah do ai humbani pambahenanni. Halani ai, lang itadingkon Jahowa ia. Sonai homa ma, anggo totap setia ham bani Jahowa, lang itadingkon Ia ham. (Ps. 37:28; Heb. 13:5) Aha ope na boi ibahen sidea na marhajabuan ase martuah parhajabuanni?

9. Aha do na boi iparlajari hita humbani Nabi Jesaya pakon istrini?

⁹ Mangidangi Jahowa do na sipontingan bani nabi Jesaya pakon istrini anjaha istri ni si Jesaya ihatahon do homa “nabi naboru”. Artini, dong do homa tugas istrini laho padaskon tugah-tugah humbani Jahowa. (Jes. 8:1-4) Tontu ringgas tumang do si Jesaya pakon istrini mangidangi Jahowa. Jadi sitiruon na dear do sidea bani halak na marhajabuan.

10. Aha do gunani anggo sidea na dob marhajabuan mamparlajari panjahaion ni Bibel?

¹⁰ Sidea na dob marhajabuan boi do homa marusaha mambere na sidearan bani Jahowa. Ase lambin toguh haporsayaon ni nasiam bani Jahowa, dear do anggo iparlajari nasiam panjahaion atap pe nubuat na isurat ibagas Bibel, janah sonaha ai domma saud. * (Tit. 1:2) Anjaha boi irimangi nasiam aha do na boi ibahen nasiam laho manggoki panjahaion-panjahaion ai. Umpamani, boi nasiam manggoki panjahaion ni Jesus laho mambaritahon ambilan na madear hu sab dunia on  paima roh ujungni. (Mat. 24:14) Anggo lambin bahat na iparlajari nasiam pasal panjahaion na ibagas Bibel, lambin banggal ma holi sura-sura ni nasiam laho mambere na sidearan bani Jahowa.

11. Aha ma na ibahen si Priskilla pakon si Akilla, anjaha mase?

¹¹ Sidea na baru marhajabuan pe boi do homa marlajar humbani si Priskilla pakon si Akilla. Halak Jahudi do sidea na tading i kota Rom. Dobkonsi itangar sidea barita na madear pasal Jesus, gabe halak Kristen ma sidea. Tontu malas tumang uhur ni sidea mangidangi ijai. Tapi lang piga dokah, isuruh Kaisar Klaudius ma ganup halak Jahudi ase kaluar hun kota Rom. Gabe mubah ma situasi ni si Priskilla pakon si Akilla halani ai. Maningon pindah ma sidea hu kota na legan, manorihi rumah na baru, ampa mamungkah bisnis tendani. Age pe sonai, totap do ringgas sidea mangidangi Jahowa. Umpamani sanggah sidea i Korint, ringgas do sidea mangidangi pakon sanina botou i kuriani. Iurupi sidea do homa si Paulus laho patoguhkon sanina botou na legan. Dob ai, pindah ma use sidea hu kota na legan na mamorluhon bahat parbarita. (Lah. 18:18-21; Rom 16:3-5) Gabe malas tumang ma uhur ni sidea halani ai.

12. Mase sidea na dob marhajabuan porlu mambahen cita-cita ibagas pangidangion?

¹² Pasangan na dob marhajabuan pe boi do maniru si Priskilla pakon si Akilla. Bahen nasiam ma Harajaon ni Naibata na sipontingan ibagas goluhmu. Halani ai, paima marhajabuan nasiam dear do anggo domma ibahen nasiam cita-cita ibagas pangidangion. Anggo ibahen nasiam sonai, tontu gabe marusaha ma nasiam pasaudkon cita-cita ai. Iahapkon nasiam ma holi sonaha Jahowa mangurupi nasiam pasaudkon cita-cita ai. (Par. 4:9, 12) Pardiateihon ma pangalaman ni si Russell pakon si Elisabet. Si Russell mangkatahon, “Sanggah marhallet ope, domma isahapkon hanami aha do cita-citanami ibagas pangidangion.” Dob ai, nini si Elisabet ma, “Halani domma isahapkon hanami pasal ai, ai ma na mangurupi hanami ase marusaha pasaudkon cita-cita ai age pe dong holi tantangan.”  Ujungni, boi ma si Russell pakon si Elisabet pindah hu Mikronesia laho mangurupi ianan na mamorluhon parbarita.

13. Domu bani Psalmen 28:7, pasu-pasu aha ma na idapot hita anggo porsaya hita bani Jahowa?

¹³ Songon si Russel pakon si Elisabet, bahat do homa halak na marhajabuan sonari on na menyederhanahon goluh ni sidea ase boi mambere bahat panorang ibagas pangidangion. Halani marusaha sidea mambere na sidearan bani Jahowa, bahat do pasu-pasu na idapot sidea. Iahapkon sidea ma sonaha Jahowa tongtong mangurupi sidea. Lambin toguh ma haporsayaon ni sidea anjaha iahapkon do homa malas ni uhur na banggal.​—Basa Psalmen 28:7.

14. Sonaha do si Petrus pakon istrini patuduhkon porsaya do sidea bani janji ni Jahowa na isurat bani Mateus 6:25, 31-34?

¹⁴ Sidea na dob marhajabuan boi do homa marlajar humbani apostel Petrus pakon istrini. Dobkonsi hira-hira onom bulan ronsi satahun si Petrus mangirikkon Jesus, dong sada keputusan na ponting na maningon ibahen ia. Iarahkon Jesus ma ia mambere gok panorangni laho mangirikkonsi. Tontu ipingkirhon si Petrus ma sonaha holi bisnisni manangkap ikan, janah sonaha holi ia mansarihon kaluargani. (Luk. 5:1-11) Tapi ujungni ipilih si Petrus ma mangihutkon Jesus. Anjaha boi si Petrus mambahen keputusan ai pasti halani setuju do homa istrini bani keputusan ai. Anggo ibasa hita bani Bibel, dobkonsi Jesus ipapuho ra do adong piga-piga hali dihut istri ni si Petrus mangkasomanisi ibagas pangidangion. (1 Kor. 9:5) Anjaha si Petrus boi mambere podah hubani halak na dob marhajabuan pasti halani dear do homa parlahou ni istrini. (1 Ptr. 3:1-7) Tangkas ma porsaya do si Petrus pakon istrini, sai tongtong do isarihon Jahowa sidea anggo ipalobei sidea Harajaon ni Naibata.​—Basa Mateus 6:25, 31-34.

15. Aha do na boi iparlajari nasiam humbani pangalaman ni si Tiago pakon si Ester?

¹⁵ Anggo domma piga-piga tahun nasiam marhajabuan, aha na boi mangurupi nasiam ase tarojur uhurmu mambere bahat panorang ibagas pangidangion? Sada carani, boi ipardiateihon nasiam pangalaman humbani hasoman na legan. Pangalaman sisonai boi do itonggor nasiam bani seri artikel “Mereka Merelakan Diri”. Ai ma na ibahen si Tiago pakon si Ester humbani Brasil. Halani ibahen sidea sonai, gabe marpingkir ma sidea laho pindah hu ianan na mamorluhon bahat parbarita. Si Tiago mangkatahon, “Sanggah ibasa hanami pangalaman sonaha Jahowa tongtong mangurupi sanina botou, gabe sihol ma hanami mangahapkon na sisonai.” Ujungni, pindah ma sidea hu Paraguay. Anjaha humbani tahun 2014 mangidangi ma sidea i kuria na marbahasa Portugis. Si Ester mangkatahon, “Marosuh tumang hanami bani hata na isuratkon i Epesus 3:20. Domma iahapkon hanami memang tongon do hata ai.” Bani ayat ai ihatahon si Paulus, marjanji do Jahowa laho mambere lobih humbani na ipindo hita anjaha sai tongtong do ibahen Jahowa sonai.

16. Ise do na boi mangurupi sidea na baru marhajabuan mambahen cita-cita ibagas pangidangion?

¹⁶ Nasiam na baru marhajabuan boi do marlajar humbani sanina botou na totap marpangunsandeian bani Jahowa. Bahat tumang do pasangan sonari on na mangidangi sepenuh waktu sadokah martahun-tahun. Dear do isaritahon nasiam bani sidea pasal cita-cita  ni nasiam ibagas pangidangion. Anggo ibahen nasiam sonai, on patuduhkon porsaya do nasiam bani Jahowa. (Pod. 22:17, 19) Sintua pe ra do homa mangurupi nasiam mambahen cita-cita ibagas pangidangion janah sonaha carani pasaudkon ai.

17. Aha do na masa bani si Karlos pakon si Marisa, anjaha parlajaran aha do na dapot hita hunjai?

¹⁷ Sipata ra do dokah saud cita-cita na ibahen nasiam ibagas pangidangion. Songon si Karlos pakon si Marisa, dobkonsi tolu tahun sidea marhajabuan laho ma sidea hu Finlandia mangurupi horja pembangunan kantor cabang ijai. Tapi pitah onom bulan dassa sidea boi tading ijai. Mungkahni, pusok tumang do uhur ni sidea. Tapi lang piga dokah dobkonsi ai, iontang ma sidea dihut kursus marbahasa Arab. Sonari malas tumang uhur ni sidea mangidangi i kuria na marbahasa Arab i sada nagori. Si Marisa mangkatahon, “Mungkahni songon na ragu do ahu bani keputusannami ai. Maningon torus ma hupapos uhurhu ase porsaya bani Jahowa. Sai tongtong do iurupi Jahowa hanami lobih humbani aha na ipindo hanami. Gabe lambin toguh ma haporsayaonnami.” Songon pangalaman ai, anggo totap porsaya nasiam bani Jahowa, sai tongtong do pasu-pasuon-Ni nasiam.

18. Sonaha sidea na dob marhajabuan boi patuduhkon anggo sidea totap porsaya bani Jahowa?

¹⁸ Sibere-bere humbani Jahowa do parhajabuan ai. (Mat. 19:5, 6) Sihol do Ia ase sidea na dob marjabu boi tongtong marmalas ni uhur. (Pod. 5:18) Halani ai, nasiam na baru marhajabuan rimangi ma use aha na boi ibahen nasiam ibagas parhajabuanmu. Patuduh ma anggo nasiam mangkargai sibere-bere ai. Martonggo ma bani Jahowa. Pindahi ma prinsip ni Bibel na boi mangurupi nasiam anjaha dalankon ma prinsip ai. Anggo marusaha nasiam mambere na sidearan bani Jahowa, gabe tongtong ma nasiam marmalas ni uhur.