Marhitei perjanjian ai, ibahen ma sada organisasi na igoran Liga Bangsa-Bangsa. Tujuan ni organisasi ai ibahen ai ma “ase bangsa-bangsa i sab dunia on marsada janah mambahen dunia on damei anjaha aman”. Bahat do gareja na marosuh bani organisasi ai. Majelis Nasional dari Gereja-Gereja Kristus i Amerika mangkatahon anggo organisasi ai sosok isobut “politik ni Harajaon ni Naibata i tanoh on”. Jadi isuruh sidea ma wakilni roh hu Konferensi Perdamaian Paris ai. Dong sada humbani sidea na roh ai mangkatahon anggo pertemuan ai “domma gabe sejarah na banggal i dunia on”.

Tapi dong homa sejarah na legan na lang dong kaitanni pakon perjanjian perdamaian nongkan ai. Bani tahun 1919, dong sejarah na baru bani horja parambilanonta. Ijia, ibere Jahowa do hagogohon hubani juakjuak-Ni ase lambin ringgas marbarita. Tapi paima masa ai, dong haputusan na maningon ibahen Siswa-Siswa Alkitab.

Laho ibahen ma pertemuan tahunan bani ari Sabtu, 4 Januari 1919. Ijia, laho ipilih ma ise do na gabe presiden Lembaga Alkitab ampa Risalah Menara Pengawal. Tapi sanggah ai, Sanina Joseph F. Rutherford, na mambobahon juakjuak ni Jahowa, ipenjarahon rap pakon pitu sanina na legan. Sidea ipenjarahon i Atlanta, Georgia, Amerika Serikat, hape lang dong salahni. Jadi maningon iputuskon ma ai totap do Sanina Rutherford na gabe presiden, atap maningon igantih pakon halak na legan.

Ibagas penjara, haru do uhur ni Sanina Rutherford mamingkirhon sonaha do holi organisasi on. Domma itangar ia dong sanina na sihol mamilih halak na legan gabe presiden. Jadi itulis ia ma surat hubani sidea. Bani surat ai ihatahon anggo boi si Evander J. Coward ma na ipilih gabe presiden halani halak na lamlam do ia, pentar janah setia. Tapi bahat do sanina na  lang setuju. Dong na mangkatahon ase onom bulan na roh ma iputuskon ai. Setuju do sanina-sanina na gabe pengacara ni hasomanta na ipenjarahon ai. Tapi dong do na manggila halani ai.

Songon na ipatugah si Richard H. Barber, ujungni salosei do masalah ai. Dong sada sanina na roh hu pertemuan ai, anjaha ihatahon ia ma, “Memang lang pengacara ahu. Tapi hubotoh do artini na setia. Sasintongni Naibata sihol ase ganupan hita setia. Jadi anggo ipilih hita Sanina Rutherford gabe presiden, taridah ma anggo hita setia bani Naibata.”​—Ps. 18:26.

Sanina H. Macmillan na dihut homa ipenjarahon mangkatahon patarni dob salosei pertemuan ai, mintor roh ma Sanina Rutherford hu sel-ni. Ipatuduh ia ma surat na marisi haputusan humbani pertemuan ai. Mintor iarusi si Macmillan ma isi ni surat ai. Ijai ipatugah anggo si Joseph Rutherford pakon si William Van Amburgh totap ipilih gabe pengurus. Janah Sanina Rutherford totap gabe presiden.

Sanggah ipenjarahon ope hasomanta na ualuh halak ai, ibahen Siswa-Siswa Alkitab ma petisi na mangindo ase sidea ibebaskon. Barani do sidea mangindo tanda tangan humbani halak na legan. Ujungni dapot sidea ma 700.000 lobih tanda tangan. Tapi sanggah lape ibere petisi ai hubani pamarentah, ibebaskon ma Sanina Rutherford pakon hasomanni bani ari Rabu, 26 Maret 1919.

Ihatahon Sanina Rutherford ma hubani sanina botou na mangalo-alo ia, “Hubotoh aha na iahapkon hita sonari on gabe pelatihan do ai laho pasirsirhon dirinta bani ari hasunsahan na laho roh. . . . Domma marusaha nasiam paluahkon hanami hun penjara. Tapi dong ope na lobih ponting marimbangkon ai. . . . Tujuanta na sasintongni ai ma ase hita mambaritahon Hasintongan hubani ganup halak. Janah dapot hita do holi pasu-pasu anggo ihorjahon hita ai.”

Humbani na masa sanggah ai, ra do on patuduhkon anggo Jahowa mangurupi juakjuak-Ni. Tanggal 14 Mei 1919 ihatahon pengadilan ma, “Sasintongni domma lang . . . adil uhuman na ibere hubani halak na ituduh on. Halani ai, ibatalhon ma uhum na ibere bani sidea sadokah on.” Sada barita na dear do ai. Mase? Halani domma sompat sidea ituduh mangkorjahon hajahaton. Porini pe ibebaskon atap ihurangi uhuman ni sidea, tong do holi sidea isobut halak na ongga mangkorjahon na jahat. Tapi halani uhuman ai domma ibatalhon, gabe tarbukti ma anggo sidea lang ongga mangkorjahon hajahaton. Janah gabe borsih ma goran ni sidea. Halani haputusan ai, gabe boi ma Hakim Rutherford totap manggunahon jabatanni laho mambela juakjuak ni Naibata  i lobei ni Mahkamah Agung Amerika Serikat, songon na domma ibahen ia sadokah on.

Sanina Macmillan mangkatahon, “Lang mungkin marayoh hanami atap lang mangkorjahon aha pe paima iangkat Tuhan hanami hu surga. Ipingkirhon hanami ma aha do na iharosuhkon Tuhan laho ihorjahon hanami.”

Ondi ai sanina botou na i kantor pusat domma sompat lang be marbarita songon na somal ibahen sidea sadokah martahun-tahun. Mase? Halani sadokah hasomanta ipenjarahon, iparseda halak do masin setak na igunahon hita laho mansetak publikasinta. Gabe maretek ni uhur ma sidea. Janah dong do na mangagan anggo horja parambilanon ai domma salosei.

Tapi, ai dong ope halak na sihol manangar barita Harajaon na ipadas Siswa-Siswa Alkitab? Laho mambotoh balosni ai, ibahen Sanina Rutherford ma sada ambilan hubani buei halak. Iontang do ganup halak ase roh manangar. Nini Sanina Macmillan ma, “Anggo lang dong holi halak na roh, artini domma salosei horja parambilanonta.”

Jadi bani ari Minggu, tanggal 4 Mei 1919, hassi pe domma parah naborit ni Sanina Rutherford, totap do ipadas ia ambilan na marjudul “Pangarapan bani Jolma na Marsitaronon”. Ambilan ai ipadas i Los Angeles, Kalifornia. Dong hita-hira 3.500 halak na roh, janah dong marratus halak na mulak halani lang siat iananni. Tapi patarni ai, ibahen ma use ambilan ai, janah dong 1.500 halak na roh. Hunjon gabe ibotoh sanina botou ma bahat ope halak na sihol manangar!

Horja parambilanon na ibahen sanina botou ijia, ai do homa na iihutkon Saksi Jahowa ronsi sonari on.

Bani majallah The Watch Tower 1 Agustus 1919, ipatugah ma laho ibahen sada  kebaktian i Cedar Point, Ohio, bani awal bulan September. Sada Siswa Alkitab hun Missouri na margoran si Clarence B. Beaty mangkatahon, “Bahat do halak na sihol roh hu acara ai.” Dong lobih 6.000 halak na roh, janah lang isangka sidea sonai bahatni na roh ai. Na mambahen sidea lambin marmalas ni uhur ai ma dong 200 lobih na ididi dohorhon Danau Erie.

Bani ari palimahon kebaktian ai, tanggal 5 September 1919, ipadas Sanina Rutherford ambilan “Tugah-Tugah bani Hasoman-Hasoman Sahorja”. Sanggah ai ipatanda ia ma majallah na baru ai ma The Golden Age. * Majallah ai ibahen laho “patugahkon sonaha do barita-barita na masa sonari on markaitan pakon hatorangan na dong ibagas Bibel”.

Gabe tarojur ma Siswa-Siswa Alkitab ase lambin barani marbarita manggunahon majallah ai. Ibahen ma sada surat na patugahkon sonaha holi horja parambilanon iatur. Ijai ihatahon, “Ganup hita na dob tardidi, dingat ma sada hasangapon do banta boi mangidangi. Jadi marusaha ma hita humbani tuk ni gogohta laho marbarita hubani ganup halak.” Bahat do halak na manjalo ontangan ai! Bani bulan Desember, dong ma 50.000 lobih halak na sihol mandapot majallah na baru ai.

Bani ujungni tahun 1919, juakjuak ni Jahowa domma dear iatur. Leganni ai, piga-piga panjahaion tarmasuk panjahaion pasal ari parpudi domma saud. Saud do homa na ihatahon bani Maleaki 3:1-4. Sonari juakjuak ni Naibata domma ipapitah janah ipargogohi. Ipaluah Ia do sidea humbani “Babilon na Bolon”. Anjaha ilantik Jesus do homa “juakjuak na bujur anjaha na maruhur”. * (Pangk. 18:2, 4; Mat. 24:45) Jadi, sirsir ma Siswa-Siswa Alkitab laho mangkorjahon aha na iharosuhkon Jahowa bani sidea.