1. Sonaha Jahowa pasaudkon harosuh ni uhur-Ni?

JAHOWA boi gabe aha pe laho pasaudkon harosuh ni uhur-Ni. Umpamani, boi do ia gabe Guru, gabe Bapa na mambere apoh-apoh, ampa Parbarita ambilan na madear. Anjaha bahat nari ope na boi ibahen Ia. (Jes. 48:17; 2 Kor. 7:6; Gal. 3:8) Tapi gati do igunahon Ia jolma laho pasaudkon harosuh-Ni. (Mat. 24:14; 28:19, 20; 2 Kor. 1:3, 4) Ibere Jahowa do homa hapentaran ampa hagogohon bani sidea laho pasaudkon aha pe domu bani harosuh-Ni. Jadi sosok do ganupan ai pakon artini goran-Ni, anjaha ai do homa na iarusi piga-piga pakar Alkitab.

2. (a) Mase sipata dong na mangahap anggo sidea lang boi mangkorjahon harosuh ni Jahowa? (b) Aha ma na laho iulas hita bani artikel on?

² Sasintongni ganup hita boi igunahon Jahowa laho pasaudkon harosuh-Ni. Hassi pe sonai dong ope na bumbang pasal ai. Mase? Ra do halani domma matua, atap lang sosok situasini. Leganni ai, dong na mangahap anggo sidea lang pandei. Dong homa na marpingkir domma sungkup na ibahen ia sadokah on. Bani artikel on iulas hita ma sonaha Jahowa manggunahon hita laho pasaudkon harosuh-Ni. Ulas hita homa piga-piga contoh hun Bibel, dalahi pakon na boru, na iurupi Jahowa ase sihol anjaha margogoh mangkorjahon harosuh-Ni. Dob ai, iulas hita homa aha na porlu ibahen hita ase boi igunahon Jahowa.

3. Songon na isurat bani Pilippi 2:13, sonaha Jahowa mangurupi hita ase sihol mangkorjahon harosuh-Ni?

³ Basa Pilippi 2:13. * Jahowa boi mangurupi hita ase sihol mangkorjahon harosuh-Ni. Tapi lang ipaksa Ia hita laho mangkorjahon ai. Jadi sonaha ia mangurupi hita? Ra do ididah hita dong na porlu iurupi i kuria. Atap dong sintua na mambasahon surat hun kantor cabang na patugahkon dong kuria na legan na porlu iurupi. Dob itangar hita ai, ra do ninuhurta, ‘Sonaha ahu boi mangurupi hujai?’ Atap ra do ibere ontangan hubanta laho mangkorjahon sada tugas tapi iahap hita lang sanggup hita mangkorjahon tugas ai. Atap dob mambasa Bibel, ra do gabe tarpingkir hita, ‘Sonaha mandalankon ayat ai laho mangurupi na legan?’ Sanggah ididah Jahowa dong pingkiran sisonai ibagas uhurta, ijai ma iurupi Ia hita ase sihol mangkorjahon ai.

4. Sonaha Jahowa mambere hagogohon hubanta?

⁴ Ibere Jahowa do homa hagogohon hu banta ase boi manghorjahon tugas hun Bani. (Jes. 40:29) Marhitei tonduy na pansing iurupi Ia do hita ase pandei mangkorjahon sada tugas. (2 Mus. 35:30-35) Martonggo ma bani Jahowa porini pangahapmu lang pandei ham manghorjahon tugas ai. Pindo ma ase ibere Ia bamu “hagogohon na sumurung” in. (2 Kor. 4:7; Luk. 11:13) Bani Bibel bahat do contoh dalahi ampa naboru na iurupi Jahowa ase sidea sihol janah margogoh laho manghorjahon harosuh-Ni. Sanggah iulas hita contoh ai, rimangi ma sonaha Jahowa boi mangurupi hita manghorjahon songon na ibahen sidea.

5. Aha do na iparlajari hita humbani si Musa na ipilih Jahowa laho mambobahon juakjuak-Ni?

⁵ Ibahen Jahowa do si Musa gabe pambobai ni halak Israel. Tapi, nantigan do ia ipilih gabe pambobai? Sedo sanggah ia marlajar ‘hapentaran ni halak Masir’. (Lah. 7:22-25) Tapi iurupi Jahowa do lobei ia ase martoruh ni uhur janah lamlam. (Lah. 7:30, 34-36) Dobkonsi ai ma ia ipilih gabe pambobai. Leganni ai, iurupi Jahowa do homa si Musa ase barani sanggah manjumpahi Parao. (2 Mus. 9:13-19) Jadi, aha ma na iparlajari hita hunjai? Pitah halak na ra mangusihi sifat ni Jahowa ampa ra marpangunsandeian hu Bani do na igunahon Ia manghorjahon rosuh-Ni.​—Pil. 4:13.

6. Aha do na boi iparlajari hita humbani si Barsilai na mangurupi Raja Daud?

⁶ Igunahon Jahowa do homa si Barsilai laho mangurupi Raja Daud. Sanggah ai “loheian, latih anjaha horahan” do si Daud pakon hasomanni, halani sidea maningon marponop humbani si Absalom anak ni si Daud. Tapi bani panorang ai, roh ma si Barsilai na dob matua pakon hasoman-hasoman na legan mambere aha na ihaporluhon sidea. Barani do ia mambahen sonai hassi pe ra do on parohkon mara hu bani. Jadi, lang ongga si Barsilai marpingkir halani ia domma matua lang boi igunahon Jahowa. Tapi totap do ia ringgas mangurupi juakjuak ni Naibata. (2 Sam. 17:27-29) Jadi, aha ma parlajaranni hubanta? Lang soal sadia umurta, ganup hita boi do igunahon Jahowa laho mangurupi hasomanta i iananta atap i nagori na legan. (Pod. 3:27, 28; 19:17) Porini  lang boi hita roh mangurupi sidea boi do hita mambere sumbangan. Halani sumbangan ai boi ipakei laho mangurupi sanina botou ija pe sidea marianan.​—2 Kor. 8:14, 15; 9:11.

7. Sonaha Jahowa manggunahon si Simeon, anjaha mase sarita ai boi patoguhkon uhurta?

⁷ Marjanji do Jahowa hubani si Simeon na setia janah dob matua, idahonni ma holi mesias paima matei ia. Tontu gabe toguh do uhurni manangar ai, halani domma dokah ia paimahon parroh ni Mesias. Halani sabar do ia paimahon janah toguh haporsayaonni ipasu-pasu Jahowa ma ia. Marhitei panogu-noguon tonduy na pansing roh ma ia hu rumah panombahan. Ijai ididah ia ma Jesus na etek ope. Anjaha igunahon Jahowa ma si Simeon laho patugahkon aha do na laho masa bani Jesus na gabe Mesias. (Luk. 2:25-35) Ra do domma matei si Simeon paima Jesus mangidangi. Hassi pe sonai, tontu malas do uhurni domma mandapot hasangapon humbani Jahowa. Anjaha bahat nari ope pasu-pasu na laho jaloonni i ari simagira. Holi i dunia na baru boi do ididah si Simeon sonaha pamarentahan ni Jesus mambere pasu-pasu hubani sagala bangsa na i tanoh on. (1 Mus. 22:18) Sonari pe malas do uhurta halani boi manghorjahon tugas aha pe domu bani rosuh ni Jahowa.

8. Sonaha Jahowa manggunahon hita songon si Barnabas?

⁸ Bani abad na parlobei, dong homa sanina na margoran si Josep. Gati do ia mangapoh halak na legan. Halani ai, igoran apostel-apostel ma ia si Barnabas artini “Anak ni Pangapohon”. (Lah. 4:36, 37) Umpamani, dobkonsi si Paulus gabe halak Kristen bahat do sanina botou na mabiar bani si Paulus halani ongga iparburu ia sidea. Jadi roh ma si Barnabas laho mangapoh janah mangurupi si Paulus. Tontu gabe tarapoh ma ia. (Lah. 9:21, 26-28) Na leganni, bani sada panorang ibotoh sintua na i Jerusalem ma anggo sanina botou na i Antiokia Siria porlu ipatoguh. Halani ai ise ma na isuruh sidea laho hujai? Si Barnabas. Bibel patugahkon, roh ma si Barnabas “iojur ma sidea haganup, ase poltik uhur ni sidea marsijoloman bani Tuhan in”. (Lah. 11:22-24) Jadi sonari on pe Jahowa boi do manggunahon hita laho mangapoh sanina botou. Umpamani, ra do hita igunahon Ia laho mangapoh halak na marpusok ni uhur. Ra do ibahen Ia ase tubuh ibagas uhurta laho manjumpahi atap pe manalepon hasomanta na boritan atap na sunsah. Ai ra do ham igunahon Jahowa laho mangapoh na legan?​—1 Tes. 5:14.

9. Aha do na boi iparlajari hita humbani pangalaman ni Sanina Vasily?

⁹ Sonari on pe iurupi Jahowa do Sanina Vasily ase boi mandalankon tanggungjawabni gabe sintua. Ia ipilih gabe sintua sanggah marumur 26 tahun. Tapi mabiar do ia laho mandalankon tugasni ai. Pangahapni lang pandei ia laho mangapoh sanina botou, tarlobih ma sidea na sunsah. Tapi ilatih sintua-sintua na marpangalaman ma ia laho mandalankon tugasni ai. Janah ujungni dihut ma ia Sekolah Pelayanan Kerajaan. Otik-otik ibahen ia ma parubahan, ujungni lambin barani ma ia mandalankon tugasni. Nini ma, “Hinan mabiar do ahu sanggah ibere tugas on, tapi sonari malas tumang do uhurhu boi mangkorjahon on. Janah totap do iurupi Jahowa ahu ase mambotoh ayat na ija do na boi mangapoh sanina botou. Malas tumang do uhurhu boi mangkorjahon  ai.” Jadi nasiam sanina-sanina na i kuria, anggo ra nasiam igunahon Jahowa songon si Vasily, iurupi Ia do nasiam laho mandalankon tugas ai.

10. Aha do na ibahen si Abigail, anjaha aha na boi iparlajari hita hun bani?

¹⁰ Bani sada ari, si Daud ampa hasomanni maningon maporus humbani Raja Saul. Janah porlu tumang do sidea iurupi. Jadi ipindo sidea ma sipanganon humbani si Nabal. Barani pe sidea mangindo ai, halani sadokah on domma ijaga sidea biribiri ni si Nabal. Tapi lang ra si Nabal mambere. Gabe manggila ma si Daud. Halani ai sihol ibunuh si Daud ma si Nabal pakon ganup dalahi na dong i rumahni. (1 Sam. 25:3-13, 22) Jadi, roh ma istri ni si Nabal na margoran si Abigail, pentar, barani, janah jenges do ia. Manrogop ma ia i lobei ni si Daud, ase ulang ibalaskon si Daud na jahat pakon na jahat. Iojur ia do homa si Daud ase mangondoskon parsoalan ai bani Jahowa. Hunjon taridah ma na martoruh ni uhur do si Abigail ai. Gabe iarusi si Daud ma homa Jahowa do na mansuruh si Abigail laho manjumpahisi. (1 Sam. 25:23-28, 32-34) Halani dear paruhuran ni si Abigail gabe igunahon Jahowa do ia laho mangkorjahon harosuh-Ni. Jadi sonari on pe bahat do botou na pentar janah maruhur na igunahon Jahowa laho patoguhkon kaluarga ni sidea ampa halak i kuria.​—Pod. 24:3; Tit. 2:3-5.

11. Aha do na ibahen boru ni si Salum, anjaha ise do sonari na mangusihi sidea?

¹¹ Marratus tahun dobkonsi ai, adong homa boru ni si Salum na ra igunahon Jahowa laho pajongjongkon tembok Jerusalem. (Neh. 2:20; 3:12) Hassi pe bapa ni sidea ai pejabat i nagori ai, tapi ra do sidea mangkorjahon tugas na borat. (Neh. 4:15-18) Legan do sidea pakon halak Tekoa na sangap na ‘seng ra mangkorjahon’ horja ai! (Neh. 3:5) Tontu malas tumang ma uhur ni boru ni si Salum ai, halani dobkonsi 52 ari salosei ma tembok ai ipajongjong. (Neh. 6:15) Jadi sonari on, bahat do homa naboru Kristen na marmalas ni uhur dihut pajongjongkon ampa mangurus bangunan na ibahen organisasi. Pandei do sidea marhorja, ringgas, janah seng marnaloja. On ma na mambahen horja ai dear salosei.

12. Songon si Tabita, sonaha Jahowa manggunahon hita domu harosuh-Ni?

¹² Ibahen Jahowa do homa si Tabita ase tarojur uhurni laho “mangkorjahon na madear ampa mambahen idop ni uhur” bani ganup sanina botou tarlobih ma bani na mabalu. (Lah. 9:36) Rosuh do ia marsibere-bere. Halani ai ma bahat do halak na marpusok ni uhur sanggah matei ia. Tapi gabe malas do uhur ni sidea halani ipapuho apostel Petrus si Tabita. (Lah. 9:39-41) Aha ma na boi iparlajari hita hun bani? Sasintongni age hita na maposo atap namatua, naboru atap dalahi boi do igunahon Jahowa hita laho mangurupi na legan.​—Heb. 13:16.

13. Sonaha do si Ruth igunahon Jahowa, janah aha ma na ujungni ibotoh ia?

¹³ Dong hasomanta na margoran si Ruth janah halak na parmaila do ia. Hassi pe sonai sihol do ia gabe misionaris. Sanggah poso ope, mabiar tumang do ia marbarita hun rumah hu rumah pasal Harajaon ni Naibata. Rosuhan do ia mambagihon risalah. Hassi pe sonai sanggah marumur 18 tahun gabe parintis biasa do ia. Anjaha bani tahun 1946 iontang do ia  Sikolah Gilead anjaha itugaskon ma ia hu Hawai ampa Jepang. Iurupi Jahowa do ia ase ringgas marbarita i nagori-nagori ai. anjaha dong do hira-hira 80 tahun ia mangidangi. Nini ma, “Tongtong do iurupi Jahowa ahu sadokah goluhku, janah iurupi Ia do homa ahu ase totap barani. Hunjon hubotoh ma ise pe boi do igunahon Jahowa anggo tongtong sidea marpangunsandeian hu Bani.”

14. Domu bani Kolosse 1:29, aha do na maningon bahenonta ase boi igunahon Jahowa?

¹⁴ Humbani hinan ronsi sonari, domma iurupi Jahowa juakjuak-Ni laho mangkorjahon marmasam tugas. Nasiam pe boi igunahon Jahowa anggo sirsir mambere diri. (Basa Kolosse 1:29.) Anggo ra ham igunahon Jahowa, boi do ibahen Ia ham lambin ringgas marbarita, pandei mangajar ampa marhorja, boi mangapoh na legan, anjaha boi gabe hasoman na bujur. Urupan ni Jahowa do holi ham ase boi mangkorjahon aha pe laho pasaudkon harosuh-Ni.

15. Domu bani 1 Timoteus 4:12, 15, aha ma namin na porlu ipangindo sanina na maposo bani Jahowa?

¹⁵ Nasiam sanina na maposo, bahat tumang do horja na maningon ihorjahon i kuria. Ai ra do nasiam gabe siparugas? Halani bahat do homa kuria na bahatan sintua marimbangkon siparugas, ai ra do nasiam manjalo tugas lambin bahat i kuria? Dong do piga-piga sanina na mangkatahon, “Sungkup ma pitah gabe parbarita, domma malas uhurhu.” Anggo sonai do homa pangahapmu, martonggo ma bani Jahowa ase ibahen ham sihol mangidangi gabe siparugas anjaha ibere bamu gogoh laho mandalankon tugas ai. (Par. 12:1) Sasintongni porlu tumang do hanami iurupi nasiam.​—Basa 1 Timoteus 4:12, 15.

16. Aha ma namin na ipangindo hita bani Jahowa, janah mase?

¹⁶ Jahowa boi mangurupi nasiam mangkorjahon aha pe laho pasaudkon harosuh-Ni. Jadi pindo ma hu Bani ase ibahen Ia ham gabe sihol janah margogoh mangkorjahon harosuh-Ni. Ganup hita age na matua atap na maposo, gunahon hita ma panorangta, gogohta, atap aha pe na adong banta laho pasangapkon goran ni Jahowa. (Par. 9:10) Porini ibere bamu sada tugas, ulang mintor iahap ham lang boi ai ihorjahon ham. Dingat ma sada hasangapon do boi mandapot tugas humbani Jahowa. Anggo ihorjahon hita tugas ai humbani tuk ni gogohta, parohkon hasangapon do ai bani Jahowa, Bapanta na parholong in.