SAHALAK peramal cuaca tongtong do mampardiateihon radar cuaca. Hunjai ibotoh ia ma laho roh mando haba-haba. Halani parduli bani buei halak, lang marnaloja ia pasingatkon sidea ase ulang hona bahaya holi.

Usih sonai ma na ibahen Jahowa. Parduli do homa ia bani “haba-haba” na siparahan humbani laporan cuaca na ija pe. Tapi sonaha Ia pasingatkon ganupan jolma? Hunja ibotoh hita anggo Ia domma mambere panorang na sungkup bani buei halak laho manangihon sipasingat ai? Ase ibotoh hita balosni, ulas hita ma lobei sipasingat na ongga ibere Jahowa hinan.

Bani na basaia, buei do ibere Jahowa sipasingat pasal “haba-haba” atap panguhuman na sihol parohon-Ni hubani halak na sangaja lang unduk Bani. (Pod. 10:25; Jer. 30:23) Sipata, ra do sipasingat ai domma dokah ibere paima masa ai. Janah ipatugah do homa aha na maningon ibahen halak domu bani harosuh-Ni. (2 Raj. 17:12-15; Neh. 9:29, 30) Gati do igunahon Jahowa juakjuak-Ni na setia laho patugahkon barita panguhuman-Ni, janah mangurupi halak laho mambotoh aha do na maningon bahenon ni sidea.​—Ams. 3:7.

Si Noak ma sada contohni. Sadokah martahun-tahun barani do ia pasingatkon halak parjahat ampa na mangkorjahon parriah-riahon pasal parroh ni Bah na Sumbang. (1 Mus. 6:9-13, 17) Ipatugah do homa na porlu bahenon ni halak ase maluah hun Bah na Sumbang ai. Halani ai, igoran ma ia “parambilan hapintoron”.​—2 Ptr. 2:5.

Hassi pe sonai lang ra halak manangihon sipasingat ai. Taridah do lang porsaya sidea bani barita panguhuman ni Naibata. Ujungni matei ma sidea haganup sanggah roh Bah na Sumbang ai. (Mat. 24:39; Heb. 11:7) Tapi paima roh ai, lang dong be halak na mangkatahon anggo Jahowa lape pasingatkon sidea.

Tapi sipata, otik do panorang na ibere Jahowa laho pasingatkon halak paima roh “haba-haba” atap panguhuman ai. Hassi pe sonai, sungkup do panorang na ibere Ia ase sompat halak mambahen hamubahon. Sada contoh, ibere do sungkup panorang bani halak Masir paima Naibata parohkon Sapuluh Tulah. Umpamani, isuruh Jahowa do si Musa pakon si Aron pasingatkon Parao ampa ganup juakjuakni pasal tulah na papituhon, ai ma udan sira-sira na doras tumang. Halani patarni pe ase roh udan sira-sira, ai sungkup do panorang ni sidea masuk hu rumah laho paluahkon dirini? Bibel mangkatahon, “Barang ise ididah juakjuak ni Parao na mangkabiari hata ni Jahowa, isuruh ma lintun jabolonni pakon pinahanni hu rumah. Tapi barang ise na so mardiateihon hata ni Jahowa, ipaturut ma jabolonni pakon pinahanni i sampalan.” (2 Mus. 9:18-21) Hunjon tangkas ma ibere Jahowa do sungkup panorang ase boi halak manangihon sipasingat ai janah lang ihonai tulah ai.

Sonai homa paima roh tulah na pasapuluhkon, ipasingat do homa Parao ampa ganup juakjuakni. Hape, totap do lang itangihon sidea sipasingat ai. (2 Mus. 4:22, 23) Ujungni matei ma ganup anak sikahanan ni sidea. Gabe marpusok ni uhur ma sidea. (2 Mus. 11:4-10; 12:29) Ai ibere do panorang bani sidea laho manangihon sipasingat ai? Eak, ibere. Dob ipasingat si Musa sidea, mintor laho ma homa ia pasingatkon halak Israel. Ipatugah do homa sonaha  sidea boi paluahkon kaluargani. (2 Mus. 12:21-28) Piga halak ma na manangihon si Musa? Dong hira-hira tolu juta halak, tarmasuk halak Israel, halak Masir, ampa bangsa na legan. Janah dihut do homa sidea manadingkon Masir.​—2 Mus. 12:38.

Haduasi contoh on patuduhkon tongtong do ibere Jahowa sungkup panorang bani halak laho manangihon sipasingat-Ni. (5 Mus. 32:4) Mase ma ra Ia pasingatkon halak? Apostel Petrus patorangkon anggo Jahowa, “ipangindo uhur-Ni ulang ma magou namin atap ise pe, tapi das ma haganup tene hu hamubahon ni uhur”. (2 Ptr. 3:9) Tangkas ma isarihon Naibata do manisia. Sihol do Ia ase sidea mubah janah manangihon sipasingat paima roh panguhuman-Ni.​—Jes. 48:17, 18; Rom 2:4.

Sonari pe dong do sipasingat na ponting na ibere bani ganup jolma i sab tanoh on. Sanggah i tanoh on ope Jesus, ibere ia do sipasingat pasal hamarsikon banggal na sihol masa. (Mat. 24:21) Ipatugah do homa panjahaion na patorangkon aha ma na ididah ampa na iahapkon susianni paima roh ai. Saud do homa na ihatahon Jesus ai bani panorangta sonari on.​—Mat. 24:3-12; Luk. 21:10-13.

Domu bani panjahaion ai, iojur Naibata ma ase ganup halak mamilih unduk hu Bani janah mangidangi-Si. Marosuh do Ia ase ganup halak na mangidangi-Si martuah goluhni sonari, janah mandapot pasu-pasu i dunia na baru bani ari simagira. (2 Ptr. 3:13) Sihol do Jahowa mangurupi halak ase porsaya bani janji-Ni. Halani ai ipasirsir Ia ma barita na boi paluahkon sidea, ai ma ‘ambilan na madear pasal Harajaon’. Jesus mangkatahon anggo barita ai maningon ‘iambilankon i sab dunia on, gabe hasaksian bani haganup bangsa’. (Mat. 24:14) Marhitei organisasi ni Jahowa, sonari juakjuak-Ni domma mambaritahon pasal ai i 240 nagori. Ipangindo uhur-Ni do ase buei halak ra manangihon  sipasingat ai janah boi maluah humbani “haba-haba” atap panguhuman-Ni na sihol roh.​—Sep. 1:14, 15; 2:2, 3.

Jadi lang porlu be isungkun hita dong do panorang ibere Jahowa ase halak boi manangihon sipasingat-Ni. Domma bahat bukti na patuduhkon pasal ai. Tapi sungkun-sungkun na sipontingan ai ma: Sanggah dong ope panorang, ai ra do halak manangihon sipasingat ni Naibata? Andohar ma ganupan hita tongtong padaskon sipasingat ai, janah mangurupi buei halak paima roh ujung ni dunia on.