1. Mase pitah Jahowa na talup isombah?

JAHOWA dassa na talup isombah halani Ia do Panompa anjaha na mambere hagoluhan hubanta. (Pangk. 4:11) Tapi sipata ra do adong na ibahen hita na gabe sipontingan marimbangkon Jahowa. On ma na mambahen hita lang be pitah manombah Jahowa. Holi ulas hita mase gabe sonai hita. Tapi paima ai, ulas hita ma aha do artini pitah manombah Jahowa.

2. Domu bani Mateus 4:10, aha ma na ibahen hita anggo hita pitah manombah Jahowa?

² Bani Bibel, na ihatahon mangkaholongi Jahowa artini pitah manombah Jahowa. Halani ai, tontu lang ra hita mambahen ise pe atap aha pe na gabe sipontingan ibagas goluhta sobali Jahowa.​—Basa Mateus 4:10.

3. Aha do alasanta mangkaholongi Jahowa?

³ Bahat do alasanta laho mangkaholongi Jahowa. Umpamani, bahat na iparlajari hita pasal-Si. Ibotoh hita do sonaha paruhuran ni Naibata. Iarusi hita do homa aha na iharosuhkon ampa na ihagigihon-Si anjaha marusaha do hita maniru Ia. Ibotoh hita do sura-sura ni Jahowa hubani manisia. Janah malas do uhurta boi gabe hasoman-Ni. (Ps. 25:14) Ganupan on mambahen hita lambin dohor hu Bani.​—Jak. 4:8.

4. (a) Aha ma na ibahen Sibolis ase hita lang pitah mangkaholongi Jahowa? (b) Aha do na laho iulas hita bani artikel on?

⁴ Sibolis do na manrajai dunia on. Halani ai, marusaha do ia ase hita mangkarosuhkon na dong i dunia on anjaha mangkorjahon hisap-hisap ni daging. (Ep. 2:1-3; 1 Joh. 5:19) Ibahen ia sonai ase hita mangkarosuhkon na legan, lang pitah mangkaholongi Jahowa. Ulas hita ma dua cara na igunahon ia laho padaohkon hita humbani Jahowa.  Na parlobei, marusaha do ia ase hita mangayak habayakon. Na paduahon, marusaha do ia ase hita marosuh bani hiburan na sambor.

5. Mase maningon jaga hita ase ulang gabe halak na mangkaholongi duit?

⁵ Ganup do hita mamorluhon sipanganon, pakeian, ampa rumah. Tapi maningon jaga do hita ase ulang duit na gabe sipontingan hubanta. Bahat halak i dunia on na “paruhur duit” janah marosuh bani barang-barang mewah. (2 Tim. 3:2) Ibotoh Jesus anggo susianni ra do gabe mangihutkon halak sisonai. Halani ai ihatahon Jesus ma, “Seng tarbalosi sada halak dua tuan. Sai sogam do uhurni bani na sada, haholonganni na sada nari, hombaranni do na sada, anjaha mapas uhurni bani na sada nari. Seng tarbalosi nasiam Naibata rap pakon Mammon!” (Mat. 6:24) Jadi anggo adong halak na manombah Jahowa, tapi lalab duit na ipingkirhon ia, dos do ai na mangidangi dua tuan. Lang be humbani gok ni uhurni ia mangidangi Jahowa.

6. Aha ma na iparlajari hita humbani podah na ibere Jesus bani kuria Laodikea?

⁶ Paima tahun 100 M, dong halak i Laodikea mangkatahon, “Na bayak do ahu anjaha marnah na dong, seng hurangan ahu.” Tapi sasintongni ‘na masombuh, na mapitung, anjaha na talanjang’ do sidea i lobei ni Jahowa pakon Jesus. Sedo halani na bayak sidea ipodahi Jesus, tapi halani domma holongan sidea bani duit. On ma na mambahen sidea gabe daoh humbani Jahowa. (Pangk. 3:14-17) Anggo domma mulai tubuh ibagas uhurta holong bani duit, mintor podas ma  mambahen hamubahon. (1 Tim. 6:7, 8) Anggo lang mubah hita, gabe mardua uhur ma holi hita. Ujungni lang ijalo Jahowa panombahanta. Dingat ma Jahowa sihol ase hita mangkaholongi-Si ‘humbani gok ni uhurta’. (Mrk. 12:30) Jadi aha do na mambahen gabe duit na sipontingan hubanta?

7-9. Aha ma na boi iparlajari hita humbani si David?

⁷ Dong sada sintua na margoran si David, tading i Amerika Serikat. Ringgas tumang do ia marhorja i sada perusahaan. Halani ai, ipanaik perusahaan ai ma jabatan ampa gajini. Pangahapni pasu-pasu humbani Jahowa do ai. Tapi tongon do ai?

⁸ Dob piga-piga dokah iahap si David ma anggo ia domma lambin mandaoh humbani Jahowa halani horjani ai. Nini ma, “Sanggah marbarita pe ahu, atap sanggah martumpu, sai lalab do hupingkiri horjangku. Tongon banggal do gajiku. Tapi gabe stres do ahu halani ai, anjaha gabe adong ma masalah ibagas kaluargangku.”

⁹ Ujungni irimangi si David ma aha do namin na sipontingan ibagas goluhni. Nini ma, “Hubahen ma parubahan.” Iatur ia ma use jadwalni marhorja, anjaha ipatugah ia ma pasal ai hubani bosni. Tapi sonaha ujungni? Ipecat do ia hun parhorjaanni. Aha ma na ibahen si David? Nini ma, “Patarni, mintor huisi ma formulir perintis ekstra.” Laho mansarihon hagoluhan siganup ari, marhorja ma ia pakon istrini paborsihkon sada gedung. Dob piga-piga dokah, gabe perintis biasa ma ia. Dob ai, dihut ma homa istrini merintis. Ra do sidea mamilih horja  na iapasi halak halani sedo ai na sipontingan bani sidea. Hassi pe daoh otikan gaji ni sidea sonari marimbangkon gajini hinan, tapi sungkup do ai manggoki haporluan ni sidea. Halani ibahen sidea Jahowa na sipontingan ibagas goluhni, iahapkon sidea sandiri ma tongtong do isarihon Jahowa ise pe na palobeihon Harajaon-Ni—Mat. 6:31-33.

10. Sonaha ibahen hita manjaga uhurta?

¹⁰ Otik atap pe bahat duitta, maningon jaga hita ma uhurta. Ulang ma gabe holongan hita bani habayakon. Ulang homa ibahen hita gabe horjanta na sipontingan marimbangkon mangidangi Jahowa. Hunja do ibotoh hita anggo domma holongan uhurta bani duit? Rimangi nasiam ma sungkun-sungkun on: ‘Sanggah martumpu atap mangidangi, gati do hupingkiri pasal horjangku? Sai lalab do haru uhurhu pasal duit? Ai gati do pasal duit na gabe paringoran ibagas rumah tanggaku? Ase bahat panorangku mangidangi Jahowa, ai ra do ahu mangkorjahon sada horja na otik gajini?’ (1 Tim. 6:9-12) Sanggah irimangi nasiam sungkun-sungkun ai, dingat ma holong tumang do uhur ni Jahowa hubanta. Marjanji do Ia, “Sabonar na so tadingkonon-Ku do ho, sabonar na so paturuton-Ku do ho!” Halani ai ma ipasingat apostel Paulus hita ase ulang gabe mata duiton.​—Heb. 13:5, 6.

11. Aha do pangaruh ni hiburan hubani sasada halak?

¹¹ Sasintongni lang salah anggo hita mangindahi hiburan halani Jahowa sihol ase hita marmalas ni uhur. Bibel mangkatahon, “Seng dong sidearan bani jolma humbani na mangan ampa na minum, anjaha ipasonang uhurni marhitei na madear ibagas halojaonni.” (Par. 2:24) Tapi, bahatan do hiburan sonari on sambor isini. Hiburan sisonai boi mambahen hita gabe mangkarosuhkon aha na ihagigihon Jahowa.

12. Domu bani 1 Korint 10:21, 22, mase maningon jaga hita sanggah mamilih hiburan?

¹² Halani pitah Jahowa dassa na isombah hita, tontu lang ra hita mangan i “meja ni [Jahowa]” tapi mangan homa hita i “meja ni [malekat] na jahat”. (Basa 1 Korint 10:21, 22.) Sanggah mangan hita pakon sasada halak, on patuduhkon anggo hita hasoman  ni halak ai. Jadi, anggo ipilih hita hiburan na marisi kekerasan, begu-begu, parriah-riahon, hisap-hisap ni daging, atap aha pe na sambor, dos do ai rap mangan hita pakon munsuh ni Naibata. Lang dear pangaruh ni hiburan sisonai hubanta. Ujungni gabe maseda ma homa parhasomananta pakon Jahowa.

13-14. (a) Sonaha hiburan boi ipados songon sipanganon? (b) Mangihutkon podah bani Jakobus 1:14, 15 mase boi sambor pangaruh ni hiburan na lang dear ai hubanta?

¹³ Hiburan boi ipados songon sipanganon. Sanggah mangan, boi do ipilih hita aha na laho ipangan hita. Tapi anggo domma ibondut hita sipanganon ai, lang hita na manontuhon sonaha pangaruhni ai bani dagingta. Anggo sipanganon na sehat do na ipangan hita, gabe sehat ma hita. Tapi anggo sipanganon na lang sehat do na ipangan hita, gabe boritan ma hita. Ra do lang mintor taridah pangaruhni ai. Tapi lambin dokah taridah do holi ai.

¹⁴ Sonai homa sanggah mamilih hiburan, hita boi mamilih aha na laho ipamasuk hita hubagas pingkiranta. Tapi anggo domma ididah atap itangar hita hiburan ai, dong do pangaruhni ai hubagas pingkiranta. Anggo hiburan na dear do na ipilih hita, marguna do ai hubanta. Tapi anggo ipilih hita hiburan na lang dear, gabe sambor do holi pangaruhni ai hubanta. (Basa Jakobus 1:14, 15.) Tongon ra do lang mintor taridah pangaruhni ai. Tapi lambin dokah taridah do holi ai. Halani ai ma Bibel pasingatkon, “Ulang ma kahou nasiam, seng ra Naibata apasan! Ai ia in itidahkon halak, ai do sabionni. Na manidahkon bani dagingni, manabi do humbani dagingni hamagouan.” (Gal. 6:7, 8) Jadi ulang ma pilih hita hiburan aha pe na mambahen halak mangkarosuhkon aha na ihagigihon Jahowa!​—Ps. 97:10.

15. Sibere-bere aha ma na ipasirsir Jahowa hubanta?

¹⁵ Bahat do sanina botounta i sab dunia on na manonton JW Broadcasting^®, acara na ipasirsir organisasinta marhitei internet. Dong hasomanta na margoran si Marilyn mangkatahon, “Malas tumang uhurhu manonton acara JW Broadcasting. Dear do ganup isini. Sanggah lungunan atap maretek ni uhur ahu, gabe toguh ma uhurhu dob hutonton Ambilan ampa acara Ibadah Pagi. Huahap lambin dohor do ahu bani Jahowa ampa organisasi-Ni. Bahat do gunani na hudapot hunjai.” Ai dong do homa gunani sibere-bere humbani Jahowa on bani nasiam? Bani JW Broadcasting, dong acara na ibahen tiap bulan. Tapi lang pitah ai. Dong ope rokaman audio, video na legan, ampa doding na boi patoguhkon uhurta. Sadihari pe boi do itonton atap itangar hita ai.

16-17. Mase maningon iatur hita panorangta laho mangidah hiburan, janah sonaha carani?

¹⁶ Jadi maningon pangkei ma hita mamilih hiburan na sonaha do na laho ididah atap itangar hita. Sobali ai, maningon ipingkiri hita do homa sadiha bahatni panorang na igunahon hita hujai. Anggo lang jaga hita, boi do bahatan bois panorangta laho mangidah hiburan marimbangkon mangidangi Jahowa. Sipata dong na mangahap sunsah do mangatur sadiha bahat panorangni laho manonton hiburan. Songon si Abigail na marumur 18 tahun mangkatahon, “Dob loja sadari ai, sabas do huahap  manonton TV. Tapi anggo lang jaga, boi do bois marjam-jam panorangku hujai.” Sada garama na margoran si Samuel mangkatahon, “Marosuh do ahu mangidah bahat video na pondok i internet. Mungkahni pitah sada do na hutonton. Hape domma dong hira-hira tolu atap ompat jam ahu manonton video ai.”

¹⁷ Sonaha nasiam boi mangatur panorang laho mangidah hiburan? Sonaha anggo ietong nasiam lobei sadiha bahat do panorang ibagas saminggu on na ipakei nasiam laho mangidah hiburan? Umpamani suratkon ma i kalender sadiha dokah do ham manonton TV, manggunahon internet, atap mar-game. Anggo bahattu do panorangmu hujai, atur ma use jadwalmu. Palobei ma na sipontingan. Dob ai, baru ma boi ibahen ham jadwal laho mangidah hiburan. Martonggo ma bani Jahowa ase iurupi nasiam mangihutkon jadwal nongkan ai. Anggo sonai ibahen nasiam, gabe dong ma holi panorangmu laho marlajar Bibel, mambahen parlajaran Bibel kaluarga, martumpu, ampa marbarita. Gabe malas ma uhurmu sanggah mangidah hiburan halani domma ipalobei ham pangidangion bani Jahowa

18-19. Sonaha hita patuduhkon anggo hita pitah manombah Jahowa?

¹⁸ Dobkonsi ipatugah apostel Petrus na laho salpu ma dunia ni Sibolis, anjaha laho roh ma dunia na baru, nini ma use, “Nasiam na hinaholongan, halani ai do na pinaima-ima nasiam, porluhon nasiam ma, ase jumpah-Si nasiam seng martikas, lang dong sihataon, ibagas damei.” (2 Ptr. 3:14) Anggo idalankon hita podah ai janah iihutkon hita aturan ni Naibata ibagas goluhta, on patuduhkon pitah Jahowa do na isombah hita.

¹⁹ Totap do Sibolis ampa dunia on mambahen hita ase lang palobeihon Jahowa ibagas goluhta. (Luk. 4:13) Tapi lang soal tantangan aha na roh hubanta, ulang paturut aha pe atap ise pe mambahen hita gabe mandaoh humbani Jahowa. Totap ma hita manombah Jahowa halani Ia dassa na talup manjalo ai!