1-2. (a) Tugah-tugah aha ma na laho ipadas bangsa-bangsa? (b) Sungkun-sungkun aha ma na laho iulas hita?

BAYANGKON ma domma ipadas bangsa-bangsa tugah-tugah na mangkatahon ‘damei anjaha sonang’. Pangahap ni sidea domma aman tumang dunia on. Sihol do sidea ase porsaya hita anggo sidea domma marhasil pasaloseihon ganup parsoalan. Hape lang tarbahen sidea manlanglangi aha na masa dobkonsi ai. Mase? Songon na ipatugah bani Bibel, “sompong ma roh hamagouan ai bani sidea, . . . anjaha seng dong haporusan”.​—1 Tes. 5:3.

² Dong sungkun-sungkun na porlu ibotoh hita balosni: Aha do na laho masa sadokah hamarsikon banggal? Aha do na iharosuhkon Jahowa ase ihorjahon hita bani panorang ai? Sonaha hita boi pasirsirhon diri ase boi totap setia bani panorang ai?​—Mat. 24:21.

3. Domu bani Pangungkabon 17:5, 15-18, sonaha ma holi Naibata manripaskon “Babel na Banggal”?

³ Basa Pangungkabon 17:5, 15-18. Iripaskon ma holi “Babel na Banggal”. Songon na ipatugah nongkan ai, lang tarbahen bangsa-bangsa manlanglangi aha na laho masa. Mase? Halani “ipuhoi Naibata do [holi] uhur ni sidea, laho pasaudkon sura-sura ni uhur-Ni”. Aha ma sura-sura ni Naibata? Laho manripaskon ganup ugama palsu, tarmasuk ma gareja-gareja. * Ibahen Naibata ma ase “sapuluh tanduk” ni “binatang sigerger” ai pasaudkon sura-sura-Ni. Sapuluh tanduk manggambarhon ganup pamarentah i dunia on na mangurupi “binatang”, ai ma Perserikatan Bangsa-Bangsa. (Pangk. 17:3, 11-13;  18:8) Sanggah iserang sidea ugama palsu, on ma na gabe tanda anggo hamarsikon banggal ai domma imulai. Sompong do masa ai janah gabe sunsah ma ganup halak halani ai.

4. (a) Aha do ra na mambahen bangsa-bangsa manripaskon ugama palsu? (b) Aha ma na laho ibahen ganup anggota ni ugama ai?

⁴ Lang ibotoh hita mase bangsa-bangsa sihol manripaskon ganup ugama. Ra do iahap sidea anggo ugama ai lalab mansampuri urusan politik na mambahen lang damei dunia on. Atap ra do ihatahon sidea domma bahattu arta ampa habayakon ni ugama. (Pangk. 18:3, 7) Sanggah bangsa-bangsa manripaskon ugama palsu, sedo artini anggota ni ugama ai dihut iripaskon. Tapi pitah organisasi ni ugama do na iripaskon. Sanggah lang dong be organisasi ugama, gabe ibotoh anggotani ma anggo pambobai ugama ai domma mangoto-otoi sidea. Halani ai, ihatahon sidea ma holi anggo sidea lang marugama.

5. Aha do janji ni Naibata tarsingat hamarsikon banggal, janah mase?

⁵ Bani Bibel, lang ipatugah sadiha dokah do parbois ni Babel na Banggal atap ugama palsu ai. Tapi ibotoh hita tongkin dassa ai. (Pangk. 18:10, 21) Anjaha marjanji do Jahowa “iorui” do panorang ni hamarsikon banggal ase boi maluah ganup juakjuak-Ni. (Mrk. 13:19, 20) Tapi sanggah masa hamarsikon banggal ronsi roh porang Harmagedon, aha ma na iharosuhkon Jahowa ase ibahen hita?

6. Leganni kaluar hun ugama na palsu, aha ope na porlu ibahen hita?

⁶ Bani artikel na salpu, domma iulas hita Jahowa marosuh ase juakjuak-Ni lang be dihut bani horja-horja na ibahen ugama palsu. Tapi lang sungkup pitah ai. Maningon do homa iihutkon hita ugama na sintong. Pardiateihon hita ma dua cara na boi ibahen hita laho mangkorjahon ai.

7. (a) Sonaha carani hita mangihutkon aturan ni Jahowa? (b) Domu bani Heber 10:24, 25 mase humbani sonari maningon tongtong hita martumpu?

 ⁷ Na parlobei, totap ma hita marparlahou domu bani aturan ni Jahowa. Ulang ma hita mangihutkon parlahou na sambor. Umpamani, maningon magigi do hita mangidah parriah-riahon, tarmasuk ma naboru na marhajabuan pakon naboru, atap dalahi pakon dalahi. (Mat. 19:4, 5; Rom 1:26, 27) Na paduahon, tongtong ma hita manombah Jahowa rap pakon hasoman sahaporsayaon. Totap ma hita martumpu, age i Balei Harajaon, i rumah-rumah, atap pe sanggah maningon marponop hita laho martumpu. Sonaha pe holi situasinta, ulang ma tadingkon hita partumpuanta. Sasintongni maningon riap ma hita martumpu “halani na lambin dohor ma ari ai ididah [hita]”.​—Basa Heber 10:24, 25.

8. Barita aha do holi na laho ipadas hita?

⁸ Ra do holi mubah barita na laho ipadas hita. Sonari hita padaskon barita na madear pasal Harajaon, janah mangurupi halak ase gabe susian ni Jesus. Tapi sadokah hamarsikon banggal, ra do gabe barita panguhuman na ipadas hita. Bani Bibel, ipados do barita ai songon udan sira-sira. (Pangk. 16:21) Ra do maningon ipatugah hita laho iripaskon ma Sibolis pakon ganup na mangihutkonsi. Bani panorangni, tontu ibotoh hita do aha na maningon ibaritahon anjaha sonaha carani padaskon ai. Ra do sarupa carani songon na dob ibahen hita sadokah on. Atap ra do homa dong cara na baru. Lang ibotoh hita ai. Atap sonaha pe holi caranta marbarita, tontu sada hasangapon do boi dihut padaskon barita panguhuman humbani Jahowa.​—Hes. 2:3-5.

9. Aha do na laho ibahen bangsa-bangsa halani baritanta, tapi aha do na mambahen pos uhurta?

⁹ Halani barita ai, ra do gabe marusaha bangsa-bangsa parontihon hita ase ulang be marbarita. Anggo masa ai, totap ma porsaya bani Jahowa songon na dob ibahen hita sonari on. Pos ma uhurta sai ipargogohi Naibata do hita laho mangkorjahon harosuh ni uhur-Ni.​—Mi. 3:8.

10. Domu bani panjahaion Lukas 21:25-28, sonaha ma holi pangahap ni halak sanggah masa hamarsikon banggal ai?

¹⁰ Basa Lukas 21:25-28. Sadokah hamarsikon banggal, bahat ma holi halak na tarsonggot mangidah masab aha na dob ihaporsayai sidea sadokah on. Gabe sosak anjaha mabiar ma holi sidea tarbunuh. (Sep. 1:14, 15) Sanggah ai, lambin sunsah ma holi hagoluhan ni halak, tarmasuk juakjuak ni Jahowa. Halani seng mangihutkon dunia on, ra do marsik tumang hagoluhanta. Anjaha ra do lang boi dapot hita hagoluhan siganup ari.

11. (a) Mase marusaha bangsa-bangsa laho mamorangi hita? (b) Mase lang pala mabiar hita sanggah masa hamarsikon banggal?

¹¹ Sanggah ididah halak dong ope Saksi Jahowa, hape ganup ugama domma iripaskon, gabe manggila ma sidea. Ra do ipatugah-tugah sidea holi ai bai ganup halak marhitei internet. Gabe sogam ma uhur ni Sibolis ampa bangsa-bangsa halani pitah organisasi ni Jahowa do na lang iripaskon. Hape, domma marsura-sura sidea laho manripaskon ganup ugama i tanoh on. Jadi, marsada anjaha  marusaha ma bangsa-bangsa ai humbani tuk ni gogohni laho mamorangi juakjuak ni Jahowa. Sidea on ma na igoran ibagas Bibel Gog na i tanoh Magog. * (Hes. 38:2, 14-16) Ra do holi gabe holsohan hita halani lape tangkas ibotoh hita aha na laho masa. Hassi pe sonai ulang ma mabiar hita. (Ps. 34:20) Ibere Jahowa do holi tugah-tugah ase maluah hita. Bani panorang ai, porsaya do hita bani Jahowa halani mambotoh ‘dohor ma haluahonta’. *

12. Sonaha juakjuak na bujur ampa maruhur mangurupi hita ase sirsir sanggah roh hamarsikon na banggal?

¹² “Juakjuak na bujur anjaha na maruhur” tongtong do mangurupi hita ase totap setia sadokah hamarsikon banggal. (Mat. 24:45) Dong marmasam cara ni sidea mangurupi hita. Umpamani marhitei acara kebaktian regional humbani 2016-2018. Bani acara ai, iojur do hita ase patuduhkon biak na mangurupi hita ase totap martahan paimahon ari ni Jahowa. Jadi ulas hita ma otik pasal ai.

13. Aha do na maningon bahenonta ase boi totap setia bani Jahowa, janah mase humbani sonari maningon ihorjahon hita ai?

¹³ Setia: Tema kebaktian 2016 ai ma “Tetap Loyal kepada Yehuwa!” Bani kebaktian ai ipatorang do anggo orot parhasomananta dompak Jahowa, gabe iurupi ma hita ase totap setia hu Bani. Ipatugah do homa hita boi dohor bani Jahowa marhitei tonggo ampa marlajar Bibel. Anggo ihorjahon hita ai, gabe ipatoguh ma uhurta tarlobih sanggah dong sitaronon. Halani domma lambin dohor ajal ni dunia on, tontu lambin iuji ma haporsayaonta bani Naibata ampa Harajaon-Ni. Halani lang ra hita mangihutkon dunia on, gabe irisai halak ma hita. (2 Ptr. 3:3, 4) Jadi humbani sonari, marusaha ma hita totap setia ase boi martahan sanggah masa hamarsikon banggal.

14. (a) Parubahan aha ma na laho masa bani sanina na mambobahon i tanoh on? (b) Mase porlu hita totap setia bani panorang ai?

¹⁴ Sadokah hamarsikon banggal, dong parubahan tarsingat sanina na mambobahon organisasi. Sanggah ai, ganup halak na iminaki domma hu surga ase boi dihut bani porang Harmagedon. (Mat. 24:31; Pangk. 2:26, 27) Jadi lang dong be holi Pangurus Pusat laho mambobahon hita. Hassi pe sonai, totap do adong sanina-sanina humbani biribiri na legan na mambobahon juakjuak ni Naibata. Jadi, anggo hita ra mangurupi sanina-sanina on, janah mandalankon tugah-tugah humbani Jahowa marhitei sidea, taridah ma anggo hita setia bani Jahowa. On ma na mangurupi hita ase totap martahan!

15. Sonaha hita boi totap martahan, janah mase humbani sonari maningon ibahen hita sonai?

¹⁵ Martahan: Tema kebaktian 2017 ai ma “Jangan Menyerah!” Bani kebaktian ai, iurupi do hita sonaha carani  boi totap martahan sanggah dong hasunsahan. Iulas do anggo tongtong hita marpangunsandeian bani Jahowa, hita boi totap martahan bani ganup situasi. (Rom 12:12) Tongtong ma dingat hita janji ni Jesus on, “Barang ise na tahan das hu ujung, ai do na maluah.” (Mat. 24:13) Artini, totap ma hita martahan lang soal aha na masa. Anggo totap hita martahan humbani sonari, lambin toguh ma haporsayaonta paima roh hamarsikon banggal.

16. Aha do na mambahen hita barani, janah sonaha carani ase barani hita humbani sonari?

¹⁶ Barani: Tema kebaktian 2018 ai ma “Jadilah Berani”! Ambilan na ipadas bani kebaktian ai pasingatkon hita, sedo halani gogohta hita boi barani. Songon na dob iulas hita, ase boi martahan maningon marpangunsandeian do hita bani Jahowa. Jadi ase boi barani, maningon marpangunsandeian do homa hita hu Bani. Sonaha carani? Basa ma Bibel tiap ari, janah rimangi ma sonaha hinan Jahowa paluahkon juakjuak-Ni. (Ps. 68:21; 2 Ptr. 2:9) Sanggah bangsa-bangsa sihol mamorangi hita sadokah hamarsikon banggal, maningon barani ma hita anjaha martenger ni uhur bani Jahowa. (Ps. 112:7, 8; Heb. 13:6) Anggo humbani sonari marpangunsandeian hita hu Bani, gabe lambin barani ma hita sanggah roh serangan Gog na i tanoh Magog. *

17. Mase lang pala mabiar hita bani porang Harmagedon? (Tonggor ma gambar sampul.)

¹⁷ Songon na dob iulas bani artikel na salpu, bahat do hita na manggoluh sadokah panorang parpudi. Tapi mangarap do hita boi maluah humbani hamarsikon banggal. Sanggah Harmagedon, masab ma ganup pamarentahan ni dunia on. Hassi pe sonai, lang pala mabiar hita. Mase? Halani porang ni Jahowa do ai. (Pod. 1:33; Hes. 38:18-20; Sak. 14:3) Sanggah ibere Jahowa parentah, laho ma Jesus rap pakon malekat-malekat ampa halak na iminaki na dob ipapuho hu surga. Iporangi sidea ma Sibolis  ampa malekat-malekatni pakon jolma na mangihutkonsi.​—Dan. 12:1; Pangk. 6:2; 17:14.

18. (a) Aha do janji ni Jahowa? (b) Sonaha Pangungkabon 7:9, 13-17 boi paposkon uhurta pasal ari simagira?

¹⁸ Jahowa marjanji, ‘Seng anjai mangasi sinjata na tinopa mangimbang ho.’ (Jes. 54:17) Maluah ma holi ganup halak na setia “humbani hamarsikon banggal”, janah boi tongtong mangidangi Jahowa. (Basa Pangungkabon 7:9, 13-17.) Domma bahat bukti hun Bibel na paposkon uhurta anggo hita boi maluah bani ari simagira! Songon na dob ibotoh hita, “Jahowa do manramotkon sagala halak na bujur [“na setia”, Terjemahan Dunia Baru]”. (Ps. 31:24) Ujungni, marmalas ni uhur ma ganup halak na mangkaholongi anjaha na mamuji Jahowa halani domma ipapansing goran ni Naibata.​—Hes. 38:23.

19. Tongkin nari, aha ma na laho iahapkon hita?

¹⁹ Pingkirhon ma aha do ra na ihatahon bani 2 Timoteus 3:2-5 pasal parlahou ni halak i dunia na baru. Ijai, lang dong be na mangihutkon Sibolis. (Tonggor ma kotak “ Parlahou ni Halak i Dunia na Baru.”) Hasomanta si George Gangas, * na ongga mangidangi gabe Pangurus Pusat patorangkon pasal ai. Nini do, “Tontu sonang tumang goluhta holi anggo ganup halak manombah Jahowa. Tongkin nari dapot hita ma hagoluhan i dunia na baru. Songon Jahowa na tongtong adong, hita pe boi manggoluh sadokah ni dokahni.” Tontu sada pangarapan na dear tumang do on!