1. Hunja ibotoh hita anggo sonari hita domma maggoluh bani “panorang parpudi”?

ANGGO nasiam tubuh dobkonsi tahun 1914, artini domma manggoluh nasiam sadokah “panorang parpudi”. (2 Tim. 3:1) Hinan domma ipatugah Jesus aha na laho masa bani panorang parpudi. Umpamani, dong porang, loheian, gempa, naborit, lambin bahat hajahaton, anjaha iparburu do juakjuak ni Jahowa. Tontu ganup hita ongga manangar domma saud ganupan ai sonari on. (Mat. 24:3, 7-9, 12; Luk. 21:10-12) Ididah hita do homa anggo parlahou ni halak sonari on sosok pakon na ihatahon apostel Paulus. (Tonggor ma kotak “ Parlahou ni Halak Sonari On”.) Tangkas ma porsaya do ganup hita anggo sonari hita domma manggoluh “bani ari parpudi”.​—Mi. 4:1.

2. Sungkun-sungkun aha do na laho iulas hita?

² Halani domma dokah salpu tahun 1914 ai, tontu domma i ujung ni “panorang parpudi” ai hita sonari. Halani ai, porlu ma ibotoh hita balos ni sungkun-sungkun na ponting on: Aha do na laho masa bani ujung ni “ari parpudi”? Janah aha do na iharosuhkon Jahowa ase ihorjahon juakjuak-Ni sonari?

3. Domu bani panjahaion na isurat bani 1 Tessalonika 5:1-3, tugah-tugah aha ma na laho ibahen bangsa-bangsa?

³ Basa 1 Tessalonika 5:1-3. Bani ayat on si Paulus patugahkon pasal “ari ni [Jahowa]”. Ijon ari ni Jahowa ai maksudni panorang sanggah imulai serangan bani “Babel na Banggal” atap ganup ugama palsu i dunia on. Dob ai roh ma Harmagedon. (Pangk. 16:14, 16; 17:5) Tapi paima “ari” ai, dong ma tugah-tugah na mangkatahon, ‘Damei anjaha sonang’. Sipata ihatahon pamarentah do  homa sonai sanggah sihol mambahen kerja sama pakon piga-piga nagori. * Tapi lang sarupa ai pakon tugah-tugah ‘damei anjaha sonang’ na isobut ibagas Bibel. Mase? Halani sanggah masa ai, iagan buei halak ma domma marhasil pamarentah parohkon hadameion i tanoh on. Hape, mulai ma hamarsikon banggal janah “sompong ma roh hamagouan”.​—Mat. 24:21.

4. (a) Aha ma na lape ibotoh hita pasal tugah-tugah ‘damei anjaha sonang’? (b) Aha do na domma ibotoh hita?

⁴ Hassi pe domma ibotoh hita dong holi tugah-tugah na mangkatahon ‘damei anjaha sonang’, tapi dong do na lape ibotoh hita pasal ai. Umpamani, lape ibotoh hita aha do na mambahen pamarentah padaskon tugah-tugah ai. Atap sonaha do holi sidea maningtingkon ai. Lang ibotoh hita pitah sahali do ai ipadas atap piga-piga hali. Tapi aha pe na masa domma ibotoh hita anggo pamarentah i dunia on lang boi parohkon hadameion. Tontu lang porsaya hita bani tugah-tugah ai. Sanggah itangar hita itingtingkon ai, ibotoh hita do anggo hita maningon marjaga-jaga halani dohor mando ari ni Jahowa ai.

5. Songon na ipatugah bani 1 Tessalonika 5:4-6, aha do na maningon ibahen hita ase sirsir sanggah roh ari ni Jahowa?

⁵ Basa 1 Tessalonika 5:4-6. Ipasingat si Paulus do hita pasal aha na maningon bahenonta ase sirsir hita sanggah roh ari ni Jahowa ai. “Ulang ma hita tarpodom”. Tapi maningon “puho ma hita” anjaha marjaga-jaga. Umpamani, totap ma hita netral janah lang dihut bani urusan politik ni dunia on. Anggo dihut hita marpolitik, holi gabe bagian “hun dunia on” ma hita. (Joh. 15:19) Hape domma ibotoh hita pitah Harajaon ni Naibata do na boi parohkon hadameion hu tanoh on.

6. Aha do na maningon bahenonta laho mangurupi halak, janah mase?

⁶ Leganni ai, maningon marusaha ma hita mangurupi halak ase dihut sidea marjaga-jaga halani domma mambotoh aha na laho masa i tanoh on. Maningon sonari ma ihorjahon hita ai! Anggo domma imulai hamarsikon banggal, lang sompat be sidea mangidangi Jahowa. Halani ai ma mase humbani sonari maningon ringgas hita marbarita! *

7. Aha do na iharosuhkon Jahowa ase ibahen hita?

⁷ Lang piga dokah nari roh ma ari ni  Jahowa. Halani ai marosuh tumang do Ia anggo hita ringgas marbarita. Marusaha ma hita ase ‘lambin surung ibagas horja ni Tuhan in’. (1 Kor. 15:58) Ipatugah Jesus do homa aha na maningon bahenonta. Sanggah ia patugahkon pasal na laho masa bani ari parpudi, ihatahon ia do use, “Anjaha ambilankonon do lobei ambilan na madear in bani ganup bangsa.” (Mrk. 13:4, 8, 10; Mat. 24:14) Jadi, sanggah laho nasiam marbarita, domma dihut nasiam manggoki panjahaion ai.

8. Aha do hasilni horja parambilanonta?

⁸ Aha ma hasilni horja parambilanonta ai? Tiap tahun, lambin tambah do halak na ra manangar barita Harajaon. Umpamani, sadokah panorang parpudi on, lambin tambah do parbarita i sab dunia on. Bani tahun 1914 hinan, dong 5.155 parbarita i 43 nagori. Sonari dong hira-hira 8,5 juta lobih parbarita i 240 nagori. Hassi pe sonai, totap ope sibuk hita marbarita. Halani pitah Harajaon ni Naibata do na boi pasaloseihon parsoalan ni manisia, maningon tongtong ma ibaritahon hita ai.​—Ps. 145:11-13.

9. Mase hita maningon totap marbarita?

⁹ Ganup hita totap mambaritahon pasal Harajaon ronsi ihatahon Jahowa domma salosei. Tapi sadiha dokah nari ma panorang ibere ase halak mananda Jahowa ampa Jesus Kristus? (Joh. 17:3) Lang ibotoh hita ai. Tapi paima mulai hamarsikon banggal, ise pe na talup mandapot “hagoluhan sisadokah ni dokahni” boi mamilih manjalo barita na madear anjaha mangidangi Jahowa. (Lah. 13:48) Halani dong ope panorang, sonaha hita boi mangurupi sidea?

10. Aha ma na ipasirsir Jahowa laho mangurupi hita mangajarhon hasintongan?

¹⁰ Marhitei organisasi-Ni, ipasirsir Jahowa do alat laho mangajarhon hasintongan. Umpamani, bani partumpuan tengah pekan, iajari do hita tiap minggu. Ijai iurupi do hita sonaha cara marbarita, manrohi use, ampa mambobahon parlajaran Bibel. Dong homa Alat Laho Mangajarhon Bibel. Marhitei alat ai, iurupi ma hita . . .

• laho mamungkah parsahapan,

• sonaha padaskon barita ase rosuh halak manangar,

•   sonaha mangojur halak ase rosuh marlajar Bibel,

• mangajarhon hasintongan bani halak na ra marlajar Bibel, ampa

• mangontang halak roh hu Balei Harajaon atap mambuka situs webta.

Jadi marusaha ma hita mambotoh sonaha manggunahon ganup alat ai. * Umpamani, dobkonsi marbuali pakon halak na marosuh manangar baritanta, boi itadingkon hita risalah atap majallah. Jadi boi ma ibasa ia ai paima roh use hita. Bani ganup bulan, maningon totap  ma hita sibuk padaskon barita Harajaon.

11. Mase ipasirsir Parlajaran Bibel Online?

¹¹ Leganni ai, marhitei Parlajaran Bibel Online na dong i jw.org^®, iurupi Jahowa do homa halak ase boi marlajar hasintongan. Mase ipasirsir parlajaran online sisonai? Tiap bulan, bahat tumang do halak i sab dunia on na mangindahi parlajaran Bibel marhitei internet. Jadi parlajaran na dong bani situs web ai boi mangurupi halak mambotoh hasintongan humbani Bibel. Leganni ai, ra do adong halak na maila marlajar Bibel pakon halak na legan. Jadi boi ma ipatuduh nasiam fitur parlajaran ai hun situs webta ibagas sahap na boi iarusi sidea. *

12. Aha ma na boi iparlajari sasada halak humbani Parlajaran Bibel Online?

¹² Bani parlajaran online ai, dong iulas topik: “Alkitab dan Pengarangnya”, “Tokoh-Tokoh Utama dalam Alkitab”, pakon “Harapan yang Dijanjikan dalam Alkitab”. Bani parlajaran ai, ipatugah do:

• Sonaha Bibel boi mangurupi hita

• Ise do Jahowa, Jesus, ampa malekat-malekat

• Mase Naibata manompa jolma

• Mase dong sitaronon ampa hajahaton

Bani parlajaran ai, iulas do homa sonaha holi Jahowa . . .

• pasohkon sitaronon ampa hamatean,

• papuhohon halak na dob matei, ampa

• manggantih pamarentahon ni manisia pakon Harajaon ni Naibata.

13. Anggo sasada halak domma salosei marlajar Bibel online, ai porlu ope sahalak Saksi mangurupisi marlajar Bibel? Patorang.

¹³ Parlajaran online lang manggantihon parlajaran Bibel na domma iatur organisasi. Ibere Jesus do tugas hubanta ase hita mambahen halak na legan gabe susianni. Jadi parlajaran online ibahen ase halak sihol mambotoh roh bahatni halani ihargai ia aha na iparlajarisi. Halani ai, bani ujung ni tiap parlajaran, iojur do sidea ase mangindo sasahalak mangurupi sidea marlajar Bibel. Tiap ari, dong hira-hira 230 halak i sab dunia on na mangindo parlajaran Bibel marhitei situs web ai. Hunjon tangkas ma ibotoh hita ponting tumang do mangurupi halak marlajar Bibel!

14. Domu bani parentah ni Jesus na isurat bani Mateus 28:19, 20, aha do na maningon ibahen hita, janah mase?

¹⁴ Basa Mateus 28:19, 20. Sanggah hita mangurupi halak marlajar Bibel,  maningon marusaha ma hita mambahen halak gabe susian janah ‘mangajari sidea mangkorjahon sagala na dob ititahkon Jesus’. Porlu do iurupi hita sidea ase mambotoh ponting tumang do manombah Jahowa janah unduk bani pamarentahan-Ni. Halani ai maningon marusaha ma hita mangurupi sidea ase tarojur mandalankon aha na dob iparlajari, mangondoskon diri bani Naibata, anjaha ididi. Ai do na mambahen sidea boi maluah sanggah roh ari ni Jahowa.​—1 Ptr. 3:21.

15. Aha ma na maningon ibahen hita, janah mase?

¹⁵ Songon na dob iulas hita, domma dohor tumang ajal ni dunia on. Halani ai, anggo dong halak na lalab lang ra mambahen hamubahon laho manombah Jahowa, lang pala itoruskon hita mangurupi sidea marlajar Bibel. (1 Kor. 9:26) Otik mando panorangni janah bahat ope halak na porlu manangar barita Harajaon paima roh ari ai.

16. Domu bani Pangungkabon 18:2, 4, 5, 8, aha ma na maningon ibahen hita? (Tonggor ma surat partoruh.)

¹⁶ Basa Pangungkabon 18:2, 4, 5, 8. Humbani ayat on, ibotoh hita ma dong ope na ipindo Jahowa humbani juakjuak-Ni. Maningon ipastihon hita ma anggo hita lang dihut bani horja na ibahen ugama palsu. Paima mambotoh hasintongan, ra do adong parlajar Bibel na gabe anggota humbani ugama palsu. Ra, dihut ope ia bani horja-horja na ibahen organisasi ai, atap ra do mambere sumbangan ope ia hujai. Tapi paima ijalo ia gabe parbarita na lape ididi, maningon itadingkon ia do ganupan ai. Maningon ibahen ia ma surat hu gareja atap hu organisasi ugama palsu na ija pe na patugahkon anggo ia lang be anggota ni sidea. *

17. Horja na sonaha do na lang boi ihorjahon hita, janah mase?

¹⁷ Ganup halak Kristen maningon mamastihon anggo parhorjaan ni sidea lang markaitan bani Babel na Banggal. (2 Kor. 6:14-17) Umpamani lang ra ia gabe pegawai ni gareja. Lang homa ra ia marhorja i bangunan na ipakei bahen ianan panumbahan. Anggo pengusaha ia, tontu lang ra ia manjalo horja-horja na markaitan hubani ugama palsu. Mase sonai ibahen hita? Halani lang ra hita dihut  bani horja ampa dousa ni organisasi ugama na butak i lobei ni Naibata.​—Jes. 52:11. *

18. Sonaha sada sintua totap mangihutkon prinsip ni Bibel ibagas parhorjaan?

¹⁸ Dong hasomanta na horjani martukang. Sahalak sintua do homa ia. Domma ibotoh sada kontraktor anggo hasomanta ai lang ra martukang i gareja. Tapi martahun-tahun na salpu, dong ma na maningon itukangi i sada gareja i hutani. Halani lang dapot kontraktor ai tukang na legan, isungkun ma ia atap na ra do ia martukang i gareja ai. Tapi totap do lang ra hasomanta ai. Saminggu dobkonsi ai, ibahen ma i koran foto sahalak tukang mamasang salib i gareja ai. Porini ondi ai ijalo hasomanta horja ai, tontu fotoni ma na dong i koran ai. Gabe bahat ma sanina botou na tartolsu halani mangidah ai. Janah pusok ma uhur ni Jahowa halani ai.

19-20. (a) Aha ma na domma iulas hita? (b) Aha ope na laho iparlajari hita?

¹⁹ Domu bani panjahaion na dob ipatugah bani Bibel, lang piga dokah nari, dong ma tugah-tugah humbani bangsa-bangsa na mangkatahon ‘damei anjaha sonang’. Tapi martarima kasih do hita bani Jahowa halani domma ibotoh hita anggo bangsa-bangsa lang boi parohkon hadameion. Jadi, aha ma na maningon ibahen hita paima masa ai? Marosuh do Jahowa ase hita totap mambaritahon barita pasal Harajaon-Ni, janah mangurupi halak ase gabe susian ni Jesus. Leganni ai, maningon ipadaoh hita do dirinta humbani ugama palsu. Artini, lang be gabe anggota ni ugama palsu hita janah lang homa ijalo hita horja na markaitan pakon Babel na Banggal.

²⁰ Dong ope na laho masa bani ujung ni “ari parpudi”. Janah dong homa na iharosuhkon Jahowa ase ihorjahon juakjuak-Ni. Aha ma ai, janah sonaha hita pasirsirhon diri paima masa ganupan ai? Ulas hita ma balosni bani artikel na mangihut.