1. Anggo domma ididi hita, aha ma na maningon ibahen hita?

AI DOMMA ididi ham? Sanggah ididi ham, ai patuduhkon hubani buei halak anggo ham porsaya bani Jahowa janah sihol mangidangi-Si rap pakon organisasi-Ni. * Tontu lambin toguh do haporsayaonmu sonari on. Tapi maningon marusaha do ham ase lambin porsaya anggo Jahowa manggunahon organisasi-Ni laho pasaudkon harosuh-Ni.

2-3. Humbani cara ni Jahowa manogu-nogu organisasi-Ni, aha ma na ibotoh hita pasal paruhuran-Ni? Bere ma contoh.

² Cara ni Jahowa manogu-nogu organisasi-Ni patuduhkon Naibata na sonaha Ia, aha harosuh ampa aturan-Ni. Eta ulas hita ma ganupan ai bani artikel on.

³ Na parlobei, ‘Naibata na so sididah bohi’ do Ia. (Lah. 10:34) Halani holong-Ni ibere Ia ma Anak-Ni gabe tobusan “mangkopkop haganup”. (1 Tim. 2:6; Joh. 3:16) Igunahon Ia do juakjuak-Ni laho mambaritahon ambilan na madear hubani ganup halak. Anggo ra sidea manangihon, boi ma sidea mandapot haluahon. Na paduahon, Jahowa lang marosuh bani na geor. (1 Kor. 14:33, 40) Halani ai, tontu marosuh do Ia anggo ganup juakjuak-Ni rap marhorja ibagas damei. Na patoluhon, “Guru” atap Pangajar na Sidearan do Jahowa ai. (Jes. 30:20, 21) Halani ai marusaha do organisasi-Ni mangajarhon Bibel hubani juakjuak-Ni ampa halak na legan. Sonaha halak Kristen bani abad na parlobei maniru tolu sifat ni Jahowa ai? Sonaha hita mambahen na sarupa sonari on?

4. Domu bani Lahoan 1:8, parentah aha do na ibere Jesus hubani susianni, janah aha ma na mangurupi sidea laho mangkorjahon ai?

⁴ Bani abad na parlobei. Barita na ipadas Jesus hinan mambere pangarapan hubani ganup jolma. (Luk. 4:43) Halani ai iparentahkon ia ma ase susianni totap mambaritahon ai, “das hu ujung ni tanoh on”. (Basa Lahoan 1:8.) Tapi, lang boi ihorjahon sidea ai marhitei gogohni sandiri. Porlu do sidea iurupi tonduy na pansing songon na dob ihatahon Jesus.​—Joh. 14:26; Sak. 4:6.

5-6. Sonaha tonduy na pansing mangurupi susian ni Jesus?

⁵ Bani ari Pentakosta tahun 33 M, ijalo susian ni Jesus ma tonduy na pansing. Marhitei pangurupion tonduy na pansing mintor laho ma sidea marbarita. Lang piga dokah hunjai dong marribu halak na manjalo barita na madear. (Lah. 2:41; 4:4) Lang mabiar sidea sanggah iparburu. Tapi martonggo do sidea mangindo pangurupion ni Jahowa. Nini sidea ma, “Bere Ham ma bani jabolon-Mu hinsah ni uhur [atap, habaranion] laho mangkatahon hata-Mu!” Mintor igoki tonduy na pansing ma sidea, anjaha gabe “marhinsah ni uhur ma sidea mangkatahon hata ni Naibata”.​—Lah. 4:18-20, 29, 31.

⁶ Sobali iparburu, dong ope tantangan na legan. Umpamani, ijia lape bahat gulungan Surat na Pansing janah lape adong buku na patorangkon isi ni gulungan ai. Leganni ai, maningon marbarita do sidea bani buei halak na manggunahon bahasa na legan. Hassi pe sonai, hira-hira 30 tahun dobkonsi ai, ambilan na madear domma ibaritahon “bani haganup na tinompa, na i toruh ni langit”. Tontu lang boi ihorjahon sidea ai anggo marhitei gogohni sandiri.​—Kol. 1:6, 23.

7. Lobih humbani 100 tahun na salpu, sonaha juakjuak ni Naibata mambotoh harosuh ni Jahowa hubani sidea, janah aha ma na ibahen sidea?

⁷ Sonari on. Sonari pe, itogu-togu anjaha ipargogohi Jahowa do juakjuak-Ni. Hinan, marhitei tonduy na pansing igunahon Jahowa do piga-piga jolma laho manuratkon isi ni Bibel. Igunahon Ia do Bibel laho manogu-nogu hita sonari on. Marhitei Bibel, ibotoh hita ma sonaha pangidangion ni Jesus ampa parentahni bani susianni. (Mat. 28:19, 20) Halani ai, bani majallah Juli 1881 ihatahon, “Ipilih Jahowa pe hita gabe halak na iminaki, sedo ase ipasangap jolma hita, atap pe sihol mandapot habayakon. Tapi ase igunahon hita do ganup na dong banta laho mambaritahon ambilan na madear.” Bani risalah To Whom the Work Is Entrusted na iluarhon tahun 1919 ihatahon, “Bahat tumang do na laho sihorjahonon. Tapi horja ni Tuhan do ai anjaha ipargogohi do hita laho mangkorjahon ai.” Songon halak Kristen bani abad na parlobei, barani do homa ganup hasomanta ai. Janah porsaya do sidea urupan ni tonduy na pansing do sidea ase boi marbarita hubani ganup jolma. Porsaya do homa hita urupan ni tonduy na pansing do hita sonari on.

8-9. Cara aha do na igunahon organisasi ni Jahowa laho pararatkon ambilan na madear?

⁸ Bahat do ugas-ugas na ipasirsir organisasi ni Jahowa laho pararatkon ambilan na madear. Dong publikasi na isetak, “Drama Photo Penciptaan”, alat pamutar rokaman, motor na i atasni dong speaker na banggal, ampa radio. Anjaha sonari igunahon do homa komputer ampa Internet. Leganni ai, iterjemahkon do publikasinta hubani buei bahasa. Mase? Ase ganup halak boi manangar ambilan na madear ibagas sahapni. Tangkas ma Naibata na so  sididah bohi do Jahowa ai. Domma ipatugah Ia anggo barita na madear maningon ipadas “bani haganup bangsa, marga, hata pakon suku”. (Pangk. 14:6, 7) Sihol do Ia ase barita pasal Harajaon sirsir hubani ganup halak.

⁹ Tapi, sonaha hita boi marbarita hubani halak na lang urah ijumpahi halani sidea tading i perumahan na ijaga satpam? Ibahen organisasi ma marragam sara ase barita ai boi ipadas i ianan na irohi buei halak. Umpamani, bani tahun 2001, ipindo Pangurus Pusat ma sanina botou i Prancis ase mambere hasaksian marhitei rak beroda ampa gerai. Dob ai, ibahen ma homa sonai i ianan na legan, anjaha dear tumang do hasilni. Bani tahun 2011 ibahen ma homa cara na baru laho mambere hasaksian i ianan bisnis, i New York City, AS. Sanggah ai dong 102.129 buku ampa 68.911 majallah na ibagihon. Janah dong 4.701 halak na mangindo parlajaran Bibel. Tangkas ma iurupi tonduy na pansing do hita laho mangkorjahon ai. Halani ai, isetujui Pangurus Pusat ma cara sisonai igunahon i sab dunia on.

10. Aha do na porlu ibahen ham ase lambin pandei ibagas pangidangion?

¹⁰ Na porlu ibahen ham. Marhitei partumpuan, ilatih Jahowa do hita ase boi marbarita. Jadi ihutkon ma ai. Anjaha ringgas ma ham marbarita pakon sanina botou i kalompok dinasmu. Tontu dong do na boi iparlajari ham humbani sidea ase lambin pandei ham marbarita ampa mangajari. Domu bani ayat tema artikel on, sedo halani gogohta hita boi mangkorjahon harosuh ni Jahowa, tapi halani iurupi tonduy-Ni do. (Sak. 4:6) Halani ai, pos ma uhurta tongtong do iurupi Ia hita.

11. Sonaha pangurus pusat bani abad na parlobei manjaga hasadaon ampa hadameion i tongah-tongah ni kuria?

¹¹ Bani abad na parlobei. Rap marhorja do pangurus pusat i Jerusalem ase totap dong hadameion i tongah-tongah ni juakjuak ni Naibata. (Lah. 2:42) Umpamani, bani tahun 49 M sanggah dong parsalisihan pasal sunat, ipindahi sidea do panogu-noguan humbani tonduy na pansing laho pasaloseihon ai. Anggo lang marsada  sidea, tontu lang boi mardalan dear horja parambilanon. Hassi pe ganup apostel ampa pangintuai ai halak Jahudi, lang ra sidea mangihutkon hasomalan ni halak Jahudi laho pasaloseihon parsoalan ai. Tapi ipindahi sidea do Hata ni Naibata ampa panogu-noguan humbani tonduy-Ni. (Lah. 15:1, 2, 5-20, 28) Sonaha hasilni? Ipasu-pasu Jahowa do haputusan ni sidea. Gabe marsada anjaha damei ma sidea. Janah totap do sidea marbarita.​—Lah. 15:30, 31; 16:4, 5.

12. Aha do na patuduhkon anggo ibagas organisasi ni Jahowa sonari on dong hadameion ampa hasadaon?

¹² Sonari on. Taridah do anggo organisasi ni Jahowa marhorja ibagas hadameion ampa hasadaon. Bani majallah Zion’s Watch Tower and Herald of Christ’s Presence 15 November 1895, dong artikel na marjudul “Mardalan Dear anjaha Taratur” na ibuat humbani 1 Korint 14:40. Ijai ihatahon, “Hinan gati do ibere apostel podah hubani kuria Kristen ase sidea mambahen haganup taratur . . . Maningon marusaha do homa hita mandalankon ai, halani ‘sagala na tarsurat hinan bahen podah banta do ai.’” (Rom 15:4) Jadi, ai do homa na iihutkon organisasi ni Jahowa sonari on. Umpamani, anggo martumpu ham hu kuria na legan atap ija pe ai, tontu lang haru uhurmu halani domma ibotoh ham artikel parlajaran na ija do na iulas bani minggu ai. Jadi, halani panogu-noguan ni tonduy na pansing do ase boi sauhur ganup juakjuak ni Naibata.​—Sep. 3:9.

13. Mardingat aha na ihatahon bani Jakobus 3:17, sungkun-sungkun aha ma na porlu irimangi ham?

¹³ Na porlu ibahen ham. Sihol do Jahowa ase ganup juakjuak-Ni ‘manramotkon hasadaon marhitei panrahut ni damei’. (Ep. 4:1-3) Halani ai, sungkun ma dirimu: ‘Ai marusaha do ahu manjaga hasadaon i kuria? Ai ra do ahu unduk hubani sidea na mambobahon i kuria? Anggo sahalak parugas ahu i kuria, ai pos do uhur ni sanina botou mangindo pangurupion bangku? Ai gati do ahu tarlambat? Ai ringgas do ahu mangidangi?’ (Basa Jakobus 3:17.) Anggo ididah ham dong hahuranganmu, pindo ma ase iurupi Naibata ham mambahen  hamubahon. Anggo marusaha ham mambahen na sidearan, lambin holong ma hasoman i kuria bamu.

14. Domu bani Kolosse 1:9, 10, sonaha Jahowa mangajari halak Kristen bani abad na parlobei?

¹⁴ Bani abad na parlobei. Malas tumang do uhur ni Jahowa mangajari juakjuak-Ni. (Ps. 32:8) Sihol do uhur-Ni ase itanda sidea Ia, ase holong uhur ni sidea hu Bani, janah boi manggoluh sadokah ni dokahni. Tapi ganupan ai lang boi ibotoh juakjuak-Ni anggo lang iajari Ia sidea. (Joh. 17:3) Jadi igunahon Jahowa ma kuria Kristen ijia laho mangajari juakjuak-Ni. (Basa Kolosse 1:9, 10.) Iurupi tonduy na pansing do homa sidea. (Joh. 14:16) Gabe iarusi susian ni Jesus ma Hata ni Naibata. Idingat sidea aha na ihatahon ampa na ibahen Jesus ibagas pangidangion. Dob ai, isuratkon ma ai ibagas Injil. Halani ai, lambin toguh ma haporsayaon ampa holong ni sidea hubani Naibata ampa Anak-Ni. Janah lambin marsihaholongan do homa sidea.

15. Sonaha panjahaion bani Jesaya 2:2, 3 saud sonari on?

¹⁵ Sonari on. Domma ipatugah Jahowa anggo “bani panorang parpudi” marrohan ma buei halak humbani sagala bangsa hu dolog ni Jahowa. Sihol do sidea ase iajarhon Jahowa dalan-Ni hubani sidea. (Basa Jesaya 2:2, 3.) Saud do panjahaion ai sonari on. Boi ididah hita daoh do dearan ajaran ni Jahowa marimbangkon ajaran ni ugama palsu! Bahat do ipasirsir Jahowa habotohan pasal Bibel hubani juakjuak-Ni. (Jes. 25:6) Marhitei “juakjuak na bujur anjaha na maruhur”, ibere Ia do buei hatorangan na laho ibasa hita, dong rokaman ambilan, video, ampa kartun. (Mat. 24:45) Tontu dos do pangahapta songon si Elihu, hasomanni si Job na  mangkatahon, “Ise ma pangajari usih hubani [Naibata]?”​—Job 36:22.

16. Aha ma na porlu ibahen ham ase mandapot guna humbani pangajaran ni Jahowa?

¹⁶ Na porlu ibahen ham. Songon panurat ni Psalmen, sonon ma ham martonggo, “Sai ajarhon Ham ma dalan-Mu hu bangku, Ham Jahowa, ase mardalan ahu ibagas hasintongan-Mu; sai pabulat Ham ma uhurhu laho mangkabiari goran-Mu.” (Ps. 86:11) Anggo sonai tonggomu, tontu iurupi tonduy na pansing do ham laho mandalankon hasintongan na iparlajari ham. Halani ai, totap ma parlajari Bibel ampa publikasinta. Tujuanmu marlajar Bibel sedo ase bahat parbinotohanmu. Tapi ase lambin porsaya ham bani hasintongan ai janah boi idalankon ham ai ibagas goluhmu. Leganni ai, ojur ma homa sanina botou i kuria. (Heb. 10:24, 25) Mase? Halani kaluargamu do homa sidea. Martonggo ma ase iurupi tonduy na pansing ham mambere komentar na dear sanggah martumpu, anjaha mambahen na sidearan sanggah mandapot tugas. Anggo sonai ibahen ham, ibotoh Jahowa pakon Jesus ma holong do uhurmu bani ‘biribiri’ ni sidea.​—Joh. 21:15-17.

17. Sonaha ham patuduhkon anggo ham setia bani organisasi ni Jahowa?

¹⁷ Lang piga dokah nari, pitah organisasi ni Jahowa dassa na dong i tanoh on. Anjaha totap do itogu-togu Ia organisasi-Ni. Halani ai, ringgas ma ham marhorja pakon organisasi-Ni. Tiru ma Jahowa, Naibata na so sididah bohi. Sanggah marbarita, padas ma ambilan na madear hubani ganup halak. Tiru ma homa Jahowa na lang marosuh bani na geor. Tapi marosuh bani hasadaon ampa hadameion. Tangihon ma pangajaran ni Jahowa marhitei mambasa Bibel ampa mamparlajari publikasi na ipasirsir organisasi-Ni. Anggo sonai ibahen ham, lang mabiar ham sanggah iripaskon holi dunia na jahat on. Totap do barani ham janah setia mangidangi Jahowa rap pakon organisasi-Ni.