1. Sonaha 2 Korint 3:1-3 patuduhkon ponting tumang do mangurupi halak marlajar Bibel ronsi ididi? (Tonggor ma gambar sampul.)

SONAHA pangahapmu anggo dong halak i kuriamu na ididi? Tontu malas tumang ma uhurmu. (Mat. 28:19) Anjaha lambin malas ma uhurmu anggo na ididi ai parlajar Bibelmu. (1 Tes. 2:19, 20) Sidea na baru ididi ai dos songon “surat hasaksian” na patuduhkon anggo na mangajarisi ampa ganup halak i kuria domma marusaha mangurupi ia.​—Basa 2 Korint 3:1-3.

2. (a) Sungkun-sungkun aha do na porlu irimangi hita, janah mase? (b) Ise do na boi ihatahon parlajar Bibel? (Tonggor ma surat partoruh.)

² Sadokah ompat tahun na parpudi on, dong hira-hira 10.000.000 halak i sab dunia on na marlajar Bibel * pakon hita. Sadokah ai, dong hira-hira 280.000 halak na ididi tiap tahun. Sonaha hita boi mangurupi marjuta halak nari ase mambahen hamajuon janah ididi? Sabar do Jahowa paimahon sidea gabe Saksi-Ni. Halani ai, maningon itiru hita ma homa Jahowa. Halani pondok mando panorangni, marusaha ma hita mangurupi sidea ase boi gabe susian ni Jesus.​—1 Kor. 7:29a; 1 Ptr. 4:7.

3. Aha do na laho iulas hita bani artikel on?

³ Halani ponting tumang mangurupi halak gabe susian ni Jesus, isungkun Pangurus Pusat ma hubani ganup  kantor cabang sonaha dearni mangkorjahon ai. Bani artikel on pakon artikel na mangihut, iulas hita ma holi sonaha hita boi marlajar humbani pangalaman ni misionaris, sintua kaliling, ampa perintis. * (Pod. 11:14; 15:22) Ipatorang sidea do holi aha na porlu ibahen parbarita ampa parlajar Bibelni ase marguna parlajaran ai hu bani. Bani artikel on, iulas hita ma dong lima na porlu ibahen parlajar Bibel ase boi mambahen hamajuon janah ididi.

4. Sonaha do hasilni anggo tongkin dassa hita mangulas isi ni Bibel pakon sasahalak?

⁴ Bahat do sanina botou na mangulas isi ni Bibel pakon simada rumah i lobei ni pintuni. Tapi somalni pitah tongkin dassa parlajaran sisonai boi ibahen anjaha lang boi homa tiap minggu. Halani ai, dong ma piga-piga parbarita na mangindo nomor talepon ni simada rumah ase boi tongkin iulas sidea isi ni Bibel marhitei talepon atap SMS. Anjaha ra do sadokah marbulan-bulan ibahen sidea sonai. Tapi, ai boi do parlajar Bibel ai mambahen hamajuon janah ididi anggo lang marusaha ia mambere bahat panorang laho marlajar Bibel? Ra do lang boi.

5. Aha do na ihatahon Jesus bani Lukas 14:27-33, na boi igunahon hita laho mangurupi parlajar Bibelta?

⁵ Igunahon Jesus do limbaga laho patuduhkon aha na porlu ibahen halak na sihol gabe susianni. Isaritahon ia ma pasal sasahalak na sihol pajongjongkon manara ampa raja na sihol marporang. Na sihol pajongjongkon manara ai maningon “hundul lobei mangetong na porlu hujai” laho mandobkon horjani. Janah raja na sihol marporang ai pe maningon “parlobei hundul marpingkir-pingkir” laho mangidah ai boi do ilawan tentarani munsuhni atap lang. (Basa Lukas 14:27-33.) Sonai ma homa na porlu ibahen halak na sihol gabe susian ni Jesus. Maningon ipingkirhon sidea ma aha na porlu ibahen laho mangirikkon Jesus. Halani ai, porlu do iojur hita parlajar Bibelta ase ra ia marlajar tiap minggu. Sonaha carani?

6. Sonaha hita mangurupi parlajar Bibelta mambahen hamajuon?

⁶ Ase boi lambin dokah nasiam mangulas Bibel pakon simada rumah i lobei pintuni, ulas ma piga-piga ayat, ulang  pitah sada ayat. Anggo domma piga-piga hali ibahen nasiam sonai, sungkun ma ia atap na dong do pangahapni ianan na sosok ase boi nasiam lambin dokah mangulas Bibel. Humbani balosni taridah ma ponting do atap lang parlajaran Bibel ai bani. Dob ai, ase podas ia mambahen hamajuon, sungkun ma atap na ra do ia marlajar Bibel dua hali saminggu. Leganni ai, dong ope na porlu ibahen ia.

7. Sonaha hita boi mambahen persiapan laho mambahen parlajaran Bibel?

⁷ Halani hita guru, maningon dear ma hita mambahen persiapan bani tiap parlajaran na laho iulas hita. Jadi, basa ma lobei bahanni anjaha pareksa ma ganup ayatni. Pingkirhon ma aha do kaitanni judul parlajaran ai pakon sub judul, sungkun-sungkun, ayat “basa”, ampa gambarni. Anjaha pingkirhon ma video na ija do na boi mangurupi nasiam laho patorangkon parlajaran ai. Sanggah mambahen persiapan, pingkirhon ma homa parlajar Bibelmu anjaha rimangi ma sonaha do holi ham boi patorangkon parlajaran ai ase urah iarusi anjaha idalankon ia ai.​—Neh. 8:9; Pod. 15:28a.

8. Domu bani Kolosse 1:9, 10, aha do na porlu itonggohon hita pasal parlajar Bibelta?

⁸ Sanggah mambahen persiapan, tonggohon ma homa parlajar Bibelmu. Pindo ma bani Jahowa ase iurupi ham patorangkon parlajaran ai ase hona hubagas uhurni. (Basa Kolosse 1:9, 10.) Pingkirhon ma homa ai adong do ajaran na sunsah iarusi atap ijalo ia. Dingat ma tujuanmu mangajarisi ai ma mangurupi ia mambahen hamajuon janah ididi.

9. Sonaha hita boi mangurupi parlajar Bibelta mambahen persiapan?

⁹ Dobkonsi taratur ibahen ham parlajaran Bibel pakonsi, tontu sihol do ham ase ia lambin mangkargai pambahenan ni Jahowa ampa Jesus. On ma na mangojur ia laho mambotoh roh bahatni. (Mat. 5:3, 6) Tapi ase lambin marguna parlajaran ai hu bani, ia sandiri pe maningon mambahen persiapan paima marlajar. Halani ai, patorang ma ponting tumang do iparlajari ia bahan ai, anjaha ibasa ia lobei ganup ayatni paima iulas nasiam ai. Patugah ma homa ase ipingkirhon ia sonaha ia boi mandalankon  aha na iparlajarisi. Jadi sonaha ham boi mangurupisi laho mambahen persiapan? Patuduh ma hu bani sonaha ia boi mambahen persiapan na dear. * Urupi ma ia sonaha mangindahi balosni sungkun-sungkun paragrap ai. Sanggah igarisi ia balosni, patorang ma dearan do pitah kata kunci dassa na igarisi ase urah ia mardingat aha na laho ibalosi. Sanggah mambalosi, pindo ma ase ia mamakei kata-kata sandiri marimbangkon mambasa humbani paragrap. Anggo sonai ibahen ia, gabe ibotoh ham ma iarusi ia do parlajaran ai atap lape. Sobali ai, dong ope na porlu ibahen ia.

10. Mase ponting tumang mambasa Bibel bani ganup ari, anjaha aha do na porlu ibahen sanggah mambasa Bibel?

¹⁰ Sobali marlajar Bibel tiap minggu, porlu do homa ia manangihon Jahowa. Sonaha carani? Ia boi manangihon Jahowa marhitei mambasa Bibel bai ganup ari. (Jos. 1:8; Ps. 1:1-3) Patuduh ma sonaha ia boi manggunahon “Jadwal Pembacaan Alkitab” na dong i jw.org. * Ase lambin bahat guna na idapot ia sanggah mambasa Bibel, ojur ma ase irimangi ia aha na boi iparlajari ia pasal Jahowa anjaha sonaha ia mandalankon podah-Ni ibagas goluhni.​—Lah. 17:11; Jak. 1:25.

11. Sonaha parlajar Bibel boi mangarusi cara ni martonggo humbani gok ni uhur, anjaha mase maningon gati ia martonggo?

¹¹ Ojur ma parlajar Bibelmu martonggo bai ganup ari. Paima ipungkah parlajaran ai, martonggo ma nasiam humbani gok ni uhur janah tonggohon ma ia. Martonggo ma homa dob salosei marlajar. Anggo itangihon ia tonggomu, gabe iarusi ia ma sonaha martonggo humbani gok ni uhur, janah ibotoh ia ma maningon hubani Jahowa do ia martonggo marhiteihon goran ni Jesus. (Mat. 6:9; Joh. 15:16) Jadi, maningon ibasa ia do Bibel tiap ari (manangihon Jahowa) anjaha martonggo (marsahap hubani Jahowa) ase lambin orot parhasomananni pakon Jahowa. (Jak. 4:8) Ai do na boi mangurupi ia mambahen hamajuon janah ididi. Tapi aha ope na porlu ibahen ia?

12. Sonaha hita boi mangurupi parlajar Bibelta ase lambin orot parhasomananni pakon Jahowa?

¹² Sihol do hita ase lambin bahat na ibotoh parlajar Bibelta pasal Jahowa. Tapi ase tarojur ia mandalankon na iparlajarini ai, maningon hona do parlajaran ai hubagas uhurni. Ai do homa na ibahen Jesus. Bahat do na iajarhon ia hubani halak na legan anjaha marosuh do sidea manangar ajaranni. Tapi gabe ra sidea mangirikkon Jesus halani hona pangajaran ai hubagas uhur ni sidea. Sonai ma homa parlajar Bibelta. (Luk. 24:15, 27, 32) Maningon iahapkon sidea ma anggo Jahowa boi gabe Bapa, Naibata, ampa hasomanni. (Ps. 25:4, 5) Sanggah marlajar, urupi ma ia ase boi marlajar lambin bahat pasal paruhuran ni Jahowa. (2 Mus. 34:5, 6; 1 Ptr. 5:6, 7) Sanggah nasiam mangulas sada topik, urupi ma ia ase mangarusi anggo Jahowa ai parholong, bujur, anjaha paridop ni uhur. Jesus mangkatahon maningon “haholonganmu do [Jahowa] Naibatamu” halani ai do “titah sibanggalan anjaha na parlobei”. (Mat. 22:37, 38) Jadi, marusaha ma ham mangurupisi ase lambin bagas holongni hubani Jahowa.

13. Bere ma contoh sonaha ham mangurupi parlajar Bibelmu mangarusi paruhuran ni Jahowa.

¹³ Sanggah marbuali nasiam, patugah ma bani mase holong uhurmu bani Jahowa. Ra do halani saritamu ai gabe tarojur ma ia paorotkon parhasomananni pakon Naibata. (Ps. 73:28) Umpamani, ai dong do artikel parlajaran atap ayat na mangurupi ham mangarusi pasal holong ni Jahowa, hapentaran, hapintoran, ampa hagogohon-Ni? Patugah ma ai hu bani, ase iarusi ia mase holong uhurmu bani Jahowa. Leganni ai, dong ope na porlu ibahen ia ase boi mambahen hamajuon janah ididi.

14. Sonaha hita manggunahon Heber 10:24, 25 laho mangojur parlajar Bibel roh hu partumpuan?

¹⁴ Tontu marosuh do hita anggo parlajar Bibelta mambahen hamajuon janah ididi. Halani ai, ontang ma ia hu partumpuan. Dong hasomanta na mangkatahon anggo parlajar Bibelni gabe podas mambahen hamajuon dobkonsi martumpu. (Ps. 111:1) Dong homa na mangkatahon hubani parlajar Bibelni lambin bahat do holi na iparlajari ia i partumpuan. Basahon ma Heber 10:24, 25 hu bani, janah patorang ma aha do gunani anggo roh ia  hu partumpuan. Putar ma video Aha do na Masa i Balei Harajaon? * Urupi ma ia ase mangarusi marguna tumang do partumpuan ai hu bani.

15. Sonaha hita mangojur parlajar Bibelta ase taratur ia martumpu?

¹⁵ Sonaha anggo parlajar Bibelmu lape ongga martumpu, atap pitah sali-sali dassa ia roh? Saritahon ma hu bani aha do na iparlajari ham baru-baru on i partumpuan. Anggo ididah ia malas uhurmu mansaritahon ai, ra do gabe sihol ia roh hu partumpuanta. Bere ma hu bani majallah Ambilan na Madear atap Jadwal Partumpuan Hagoluhan pakon Pangidangion Kristen na laho iulas. Patuduh ma na ija do na laho iulas bani partumpuan na mangihut. Anjaha sungkun ma ia bagian na ija do na iharosuhkon ia holi. Sanggah parlobei sahali ia roh hu partumpuanta boi ma iahapkon ia ai ma pangalaman na sijengesan marimbangkon sanggah roh ia hu partumpuan ugama na legan. (1 Kor. 14:24, 25) Bahat do holi sanina botou na gabe siusihan na ijumpahi ia, na boi mangurupisi mambahen hamajuon janah ididi.

16. Sonaha hita boi mangurupi parlajar Bibelta mambahen hamajuon janah ididi, anjaha aha ma na laho iulas hita bani artikel na mangihut?

¹⁶ Sonaha hita boi mangurupi parlajar Bibelta mambahen hamajuon janah ididi? Ojur ma ia ase taratur marlajar tiap minggu, janah mambahen persiapan paima marlajar. Ojur ma homa ase martonggo ia bai ganup ari anjaha marusaha paorotkon parhasomananni pakon Jahowa. Dob ai, ojur ma ase roh ia hu partumpuanta. (Tonggor ma kotak “ Na Porlu Ibahen Parlajar Bibel Ase Mambahen Hamajuon janah Ididi”) Bani artikel na mangihut dong lima nari na porlu ibahen hita laho mangurupi parlajar Bibelta mambahen hamajuon janah ididi.