1921—Saratus Tahun na Salpu

PADALAN

BANI majallah Menara Pengawal 1 Januari 1921 dong sungkun-sungkun na ibahen hubani Siswa-Siswa Alkitab. Ijai ihatahon, “Aha do na laho sihorjahononta bani tahun on?” Dob ai ibahen ma balosni humbani Jesaya 61:1, 2, na mangkatahon “Ai domma iminaki Jahowa ahu, laho mangambilankon ambilan na madear bani halak na madoyuk . . . laho maningtingkon tahun idop ni uhur humbani Jahowa, ampa ari pambalason ni Naibatanta.” Marhitei ayat ai ipasingat do sidea ase totap mangambilankon ambilan na madear.

PARBARITA NA BARANI

Maningon barani do Siswa-Siswa Alkitab marbarita, halani na ibaritahon sidea lang pitah “ambilan na madear”. Tapi maningon ibaritahon sidea do homa “pambalason ni Naibata” bani halak parjahat.

Songon Sanina J. H. Hoskin, na tading di Kanada, totap do ia barani marbarita age pe bahat tantangan. Umpamani, bani tahun 1921 marbarita do ia hubani siparugas i gereja Metodis. Ihatahon Sanina Hoskin ma hu bani, “Malas uhur tene anggo marsahapi hita pasal Bibel. Holi anggo dong na iahap ham lang sosok, hatahon ma ulang pala berdebat hita.” Tapi lang sonai na ibahen siparugas ai. Ihatahon Sanina Hoskin ma, “Baru ope piga-piga menit hanami marsahapi ai, pintor ibanting ia pintuni. Halani gogoh ibanting ia huagan do domma posah kaca ni pintu ai.”

Manggila ma siparugas ai janah ihatahon ia ma, “Hubani halak na lang Kristen ai ma nasiam laho.” Tapi sip dassa Sanina Hoskin janah laho ma ia hunjai. Nini uhurni ma, ‘Huahap ia pe lang halak Kristen.’

Patarni, marambilan ma siparugas ai i gerejani. Sanina Hoskin mangkatahon, “Ipatugah siparugas ai bani anggota gerejani, panipu do ahu janah ihatahon ia dearan do ahu ipamatei.” Hassi pe sonai, totap do Sanina Hoskin barani marbarita. Nini use, “Malas tumang uhurhu marbarita i daerah ai. Dong piga-piga halak na mangkatahon hubangku, ‘Nasiam do na tongon-tongon mangkorjahon Hata ni Naibata.’ Janah anggo dong na huhaporluhon, ra do sidea mangurupi ahu.”

PARLAJARAN PRIBADI PAKON PARLAJARAN BIBEL KELUARGA

Hinan dong ibahen i majallahta sungkun-sungkun pasal isi ni Bibel janah dong homa jawabanni. Tujuanni ai ibahen, ase lambin iarusi halak pasal isi ni Bibel. Majallah ai isobut The Golden Age. * Dong do homa ibahen sungkun-sungkun pasal isi ni Bibel na boi iulas namatoras pakon anakni. Holi isungkun namatoras ai ma sungkun-sungkun ai hubani anakni janah rap ma sidea mangindahi balosni humbani Bibel. Umpamani, dong sungkun-sungkunni sonon, “Piga bahat do buku ibagas Bibel?” Na leganni, “Maningon ianiaya do halak Kristen?” Sanggah iulas sidea sungkun-sungkun ai, on boi mangurupi na maposo ase totap barani marbarita.

Dong do homa ibahen sungkun-sungkun ampa jawaban hubani halak na domma mambotoh bahat isi ni Bibel. Bahanni ibuat humbani buku Studies in the Scriptures jilid 1. Marhitei seri artikel ai bahat tumang do na boi iparlajari halak pasal isi ni Bibel. Tapi bani The Golden Age terbitan 21 Desember 1921, ipatugah ma ijai lang adong be ibahen seri artikel sisonai bani majallah na mangihut. Mase sonai?

SADA BUKU NA BARU

Buku The Harp of God

Kartu na marisi bagian ija na laho ibasa

Kartu na marisi sungkun-sungkun

Ididah sanina na mambobahon i organisasi ma, ase lambin dear halak mangarusi isi ni Bibel, porlu do adong sada buku na mangulas ajaran dasar ni Bibel topik per topik. Halani ai bani bulan November tahun 1921, iterbitkon ma buku The Harp of God (Harpa ni Naibata). Sidea na mandapot buku ai, boi do iparlajari ia sandiri buku ai. Hunjai gabe ibotoh ia ma sasintongni sihol do Naibata ase manisia manggoluh sadokah ni dokahni. Sonaha carani manggunahon buku ai?

Dobkonsi ijalo sasada halak buku ai, ikirim ma kartu na etek hu bani laho patugahkon bahan na ija do na porlu ibasa. Anjaha bani minggu na mangihut, ikirim ma use kartu na legan na marisi sungkun-sungkun na adong kaitanni pakon na baru ibasa ia. Bani panutup ni kartu ai, ipatugah ma ijai bagian ija use na porlu ibasa ia.

Sanina botou hun kuria i daerah ai do na mangirim kartu-kartu ai. Janah ibahen do ai sadokah 12 minggu. Somalni na mambahen kartu ai, ai ma sanina botou na matua atap pe sidea na lang sanggup marbarita hun rumah hu rumah. Botou Anna K. Gardner hun Millvale, Pennsylvania, AS mangkatahon, “Dobkonsi iterbitkon buku The Harp of God gabe bahat do na boi ibahen anggingku si Thayle laho marbarita. Age pe lumpuh ia tapi boi do ia mambahen kartu-kartu ai tiap minggu.” Jadi dobkonsi 12 minggu, irohi sada hasomanta ma na manjalo buku ai, laho mangurupisi ase lambin mangarusi isi ni Bibel.

Si Thayle Gardner hundul i kursi roda

HORJA NA LEGAN

Bani ujungni tahun ai, ikirim Sanina J.F. Rutherford ma surat hubani ganup kuria. Ijai ihatahon ia ma, “Marimbangkon tahun-tahun na salpu, tahun on ma na sibahatan iurupi hita halak marlajar Bibel. Age pe sonai, bahat ope na porlu ihorjahon hita. Halani ai maningon iarahkon hita ma halak na legan ase dihut marbarita rap pakon hita.” Bahat do Siswa-Siswa Alkitab na mangihutkon ojuranni ai. Bani tahun 1922, lambin barani ma sidea mambaritahon pasal Harajaon ni Naibata.

Hasoman na Barani

Ijia ganup do Siswa-Siswa Alkitab marsihaholongan anjaha marsiurupan. Sidea gabe “sanina ibagas hasosakan” bani halak na legan. Pardiateihon hita ma contoh on.—Pod. 17:17.

Bani ari Selasa 31 Mei 1921, ipenjarahon ma sada dalahi na markulit hitam na tading i Tulsa, Oklahoma, AS, halani ituduh ia domma mambahen na jahat hubani sada naboru na markulit putih. Halani ai roh ma 1.000 dalahi na markulit putih menyerang piga-piga dalahi na markulit hitam. Iserang sidea do homa ianan ni halak na markulit hitam i Greenwood. Ijai dong lobih 1.400 rumah pakon toko na ijarah ampa itutung sidea. Anggo na ilaporhon dong 36 halak na matei. Tapi sasintongni dong do ai hira-hira 300 halak. Na masa ai gati do isobut halak Porang Suku i Tulsa.

Dong sahalak Siswa-Siswa Alkitab na markulit hitam na margoran si Richard J. Hill na tading i Greenwood. Ia mangkatahon, “Pas sanggah martumpu ma hanami dong kerusuhan ai. Dobkonsi salosei martumpu, itangar hanami ma sora ni tembakan hun kota. Sonai ma na masa ronsi tongah borngin.” Sogotni ari Rabu tanggal 1 Juni, lambin parah do situasini. Nini si Hill use, “Roh ma piga-piga polisi hu ianannami janah ihatahon sidea ma maningon mangungsi ma hanami hu gedung ni pamarentah i Tulsa.” Jadi laho ma Sanina Hill, istrini, pakon lima niombahni hujai. Anjaha domma adong hira-hira 3.000 halak na markulit hitam dalahi pakon naboru i gedung ai. Dong do homa tentara na manjaga gedung ai.

Dong sanina na markulit putih na margoran si Arthur Claus na manangar pasal ai. Ia mangkatahon, “Dobkonsi hubotoh dong na manjarah janah manutung rumah-rumah i Greenwood mintor laho ma ahu hujai laho mangidah Sanina Hill.”

Si Arthur Claus manggunahon buku The Harp of God laho mangajari 14 dakdanak

Dobkonsi das si Arthur i rumah ni si Hill, ididah ia ma tetanggani si Hill na markulit putih na manjolom senapan. Iagan tetanggani ai ma, anggo si Arthur roh laho manjarah rumah ni si Hill. Jadi isonggak dalahi ai ma si Arthur, “Mangaha ho roh hujon?”

Isaritahon Sanina Arthur use, “Anggo lang pas holi jawabanku mintor itembak ia ma ahu. Jadi huhatahon ma hu bani, hasoman ni si Hill do homa ahu janah domma gati ahu roh hujon.” Jadi ijaga si Arthur pakon tetanggani ai ma rumah ni si Hill ase ulang ijarah.

Dob ai, ibotoh si Arthur ma domma laho hape si Hill pakon kaluargani hu gedung ni pamarentah. Halak na markulit hitam i gedung ai lang boi kaluar anggo lang adong surat izin. Jadi ijumpahi si Arthur ma Jenderal Barret. Si Arthur mangkatahon, “Lang urah manjumpahi jenderal ai. Tapi dobkonsi jumpah ahu pakonsi, isungkun ia ma hubangku, ‘Ai boi holi ho manjaga sidea?’ Mintor huhatahon ma eak.”

Jadi dapot si Arthur ma surat izin hun jenderal ai janah laho ma ia hu gedung ni pamarentah. Ipatuduh si Arthur ma surat ai bani petugas ijai. Ihatahon petugas ai ma, “Bah, dapotmu tene surat izin hun jenderal. Ibotoh ho do, ho ma parlobei sadari on na mamboan halak mulak hun gedung on.” Jadi itorihi sidea ma si Hill pakon kaluargani. Dobkonsi pajumpah, iboan si Arthur ma sidea hu mobilni janah itaruhkon hu rumah ni si Hill.

Ipastihon si Arthur ma ase si Hill pakon kaluargani aman i rumah ai. Halani barani si Arthur manlinggomi hasomanni, gabe bahat ma halak na mamuji Siswa-Siswa Alkitab. Si Arthur mangkatahon, “Tetangga na manjaga rumah ni si Hill ai ujungni gabe bujur ma ia hubani Siswa Alkitab. Anjaha dong homa halak na marosuh marlajar Bibel halani mangidah lang adong hita na mangahap gijangan hita marimbangkon na legan. Tapi marsada do hita age pe lang sarupa warna kulitni.”

^ par. 9 Bani tahun 1937, majallah The Golden Age igantih ma goranni gabe Consolation janah bani tahun 1946 igantih use gabe Awake! (Sadarlah!).

AMBILAN NA MADEAR—EDISI PARLAJARAN