1-2. Aha ma bedani Raja Ahab pakon Raja Manasse, janah aha do na laho iulas hita bani artikel on?

DONG dua raja na laho iulas hita, ai ma raja na mamarentah sapuluh suku i Israel, anjaha na sada nari raja na mamarentah dua suku i Juda. Age pe lang sezaman sidea, tapi dong na sarupa na ibahen sidea. Manlawan do sidea dompak Jahowa janah ipengaruhi sidea do bangsani mambahen na jahat. Isombah sidea do homa gana-gana ampa pamunuh do homa sidea. Age pe sonai, dong do bedani haduasi raja ai. Sada humbani raja ai sai lalab do mangkorjahon na jahat ronsi matei ia. Tapi na sada nari manosal do ia janah ibahen ia do parubahan. Ise ma sidea?

² Goranni, ai ma si Ahab raja ni Isrel pakon si Manasse raja ni Juda. Humbani sarita ni sidea, boi ma ibotoh hita aha do artini sasada halak tongon-tongon manosali dousani. (Lah. 17:30; Rom 3:23) On porlu iulas hita ase boi ibotoh hita aha do na porlu bahenonta ase isasap Jahowa dousanta sanggah hita mambahen hasalahan na banggal. Halani ai, iulas hita ma pasal haduasi raja ai ampa parlajaran na boi dapot hita humbani sidea. Dob ai, iulas hita homa aha do na iajarhon Jesus pasal artini halak na tongon-tongon manosali dousani.

3. Hajahaton aha do na ibahen si Ahab?

³ Si Ahab ma raja na papituhon i harajaon Israel. Marhajabuan ma ia pakon si Isebel boru ni Raja Sidon. Halani ai boi ma halak Israel bekerja sama pakon halak i kota Sidon.  Tapi ujungni gabe bahat ma halak Israel na manadingkon Jahowa. Mase sonai? Halani panombah gana-gana do si Isebel, janah isuruh ia do si Ahab laho mangarahkon bangsani laho manombah gana-gana. Ipajongjong sidea do ianan laho manombah gana-gana, janah itutung sidea do homa anakni bahen galangan. Bahat tumang do nabi ni Jahowa na ibunuh si Isebel. (1 Raj. 18:13) Si Ahab pe bahat tumang do na ihorjahon ia na jahat marimbangkon “ganup jolma na i lobei ni”. (1 Raj. 16:30) Lang ipaturut Jahowa hajahaton ni si Ahab pakon si Isebel ai. Isuruh Ia do nabi Elias laho pasingatkon halak Israel ase mubah. Tapi lang ra si Ahab pakon si Isebel manangihon sipasingat ai.

4. Uhuman aha do na ipatugah Jahowa bani si Ahab janah aha do na ibahen si Ahab dob manangar ai?

⁴ Dobkonsi ai isuruh Jahowa ma nabi Elias manjumpahi si Ahab laho patugahkon na laho uhumon ni Jahowa do si Ahab pakon si Isebel. Ipatugah do homa ibunuh do holi ganup ginompar ni si Ahab. Dobkonsi manangar ai, pusok tumang ma uhur ni si Ahab. Lang isangka hita si Ahab na gijang maruhur ai ujungni ‘ipaunduk ia do dirini’.​—1 Raj. 21:19-29.

5-6. Hunja ibotoh hita anggo si Ahab lang tongon-tongon manosali dousani?

⁵ Age pe ipaunduk si Ahab dirini, tapi lang tongon-tongon ia manosali dousani. Lang dong parubahan na ibahen ia. Umpamani, ipaturut ia do lalab adong gana-gana i nagorini. Anjaha lang iojur ia rakyatni ase mulak use manombah Jahowa. Dong ope na lang dear na ibahen si Ahab.

⁶ Bani sada panorang, iarahkon si Ahab ma raja Juda, ai ma si Josafat laho mamorangi halak Siria. Nini si Josafat ma dearan do isungkun sidea lobei nabi ni Jahowa paima marporang. Tapi ihatahon si Ahab ma, “Adong do namin ijon sahalak, tarsungkun hita do namin Jahowa marhiteihonsi, ai ma si Mika, anak ni si Jimla; tapi sogam do uhurhu bani, ai seng ongga na madear panjahaionni pasal ahu, sai hamagouan do.” Age pe sonai, totap do isungkun sidea Nabi Mika. Anjaha tongon, barita na lang dear do na ipatugah Nabi Mika pasal si Ahab. Tapi totap do si Ahab lang ra mambahen hamubahon janah ipenjarahon ia do nabi ai. (1 Raj. 22:7-9, 23, 27) Age pe sonai, saud do na ihatahon nabi ai. Ujungni, matei ma si Ahab ibagas parporangan.​—1 Raj. 22:34-38.

7. Age pe domma matei si Ahab, sonaha do pangahap ni Jahowa mangidahsi?

⁷ Dobkonsi matei si Ahab, ipatugah Jahowa do sonaha pangahap-Ni mangidah si Ahab ai. Dob das si Josafat i rumahni, isuruh Jahowa ma Nabi Jehu maminsang si Josafat halani iurupi ia si Ahab. Nini nabi ai ma, “Ai bulih do ninuhurmu urupan halak parjahat barang haholongan halak na marsogam ni uhur bani Jahowa?” (2 Kron. 19:1, 2) Jadi bayangkon hita ma age pe domma matei si Ahab, tapi halak parjahat do ia ihatahon ampa halak na marsogam ni uhur bani Jahowa. Hunjai taridah ma age pe sompat ipaunduk ia dirini, tapi lang tongon-tongon si Ahab manosali dousani.

8. Aha do na boi iparlajari hita humbani contoh ni si Ahab?

⁸ Aha ma na boi iparlajari hita humbani contoh ni si Ahab? Dobkonsi ipatugah nabi Elias uhuman ni Jahowa bani si Ahab pakon kaluargani, mintor ipaunduk si Ahab do dirini. Dear do na ibahen ia ai. Tapi lang ipatuduh ia panosalanni marhitei pambahenanni. Hunjai ibotoh hita ma anggo tongon-tongon hita manosali dousanta, lang sungkup pitah mangaku salah hita. Sonari ulas hita ma contoh na legan ase iarusi hita sonaha do halak na tongon-tongon manosali dousani.

9. Raja na sonaha do si Manasse ai?

⁹ Dua ratus tahun dobkonsi ai, gabe raja ma si Manasse i Juda. Jahatan do ia marimbangkon si Ahab. Bibel mangkatahon, “Buei tumang do ihorjahon sogam ni uhur ni Jahowa laho mamuhoi ringis-Ni.” (2 Kron. 33:1-9) Ibahen ia do homa gana-gana i rumah panumbahan bani Jahowa. Mardatu do ia janah ihorjahon do marmasam spiritisme. Ibunuh ia do homa bahat halak na lang marsalah. Anjaha “itutung do anakni bahen galangan” bani gana-gana.​—2 Raj. 21:6, 7, 10, 11, 16.

10. Uhuman aha do na ibere Jahowa bani si Manasse, janah sonaha ma pambahenan ni si Manasse dobkonsi ai?

¹⁰ Mungkahni, songon si Ahab do pambahenan ni si Manasse. Lang ra ia manangihon sipasingat humbani nabi ni Jahowa. Halani ai, “Iparoh jahowa ma dompak sidea kopala-kopala ni bala ni Raja Assur, ai ma na manangkap si Manasse marhitei hait-kait, irantei ma ia bani rantei tombaga, anjaha iboan sidea ma ia hu Babel.” Sanggah ipenjarahon ai ma gabe ipingkiri si Manasse hasalahanni. Ujungni, ‘ipaunduk ia ma uhurni i lobei ni Naibata ni ompungni’. Lang pitah ai na ibahenni. ‘Mangelek’ ma ia bani Jahowa anjaha “martonggo ma ia hu Bani”. Jadi tongon-tongon do si Manasse manosali dousani. Iakui ia ma Jahowa do “Naibatani” anjaha totap do ia martonggo hu Bani.​—2 Kron. 33:10-13.

11. Domu bani 2 Kronika 33:15, 16, hunja ibotoh hita anggo si Manasse tongon-tongon manosali dousani?

¹¹ Humbani tonggo ni si Manasse, ididah Jahowa ma domma manosal tumang ia. Halani ai ibalosi Jahowa ma tonggoni. Isalpuhon Ia do hasalahan ni si Manasse anjaha mulak ma use ia gabe raja. Dobkonsi ai ipatuduh si Manasse ma panosalanni ai marhitei pambahenanni. Lang songon si Ahab ia. Iambukkon si Manasse ma gana-gana i nagori ai anjaha iparentahkon ia do rakyatni ase mulak use manombah Jahowa. (Basa 2 Kronika 33:15, 16.) Maningon barani do si Manasse mangkorjahon ai janah maningon toguh haporsayaonni. Halani sadokah on, ia do na mangkorjahon na sambor. Gabe iihutkon rakyat ampa kaluargani ma pambahenanni ai. Tapi dob mubah si Manasse, marusaha do ia padearhon ganup na maseda halani pambahenanni. Anjaha gabe sitiruon na dear ma ia bani pahompuni, ai ma si Josia na gabe raja na bujur i pudian ni ari.​—2 Raj. 22:1, 2.

12. Parlajaran aha do na idapot hita humbani si Manasse?

¹² Aha ma na boi iparlajari hita humbani si Manasse? Manosal do ia mambahen na jahat. Tapi lang pitah ai. Martonggo do ia bani Jahowa ase isalpuhon Jahowa dousani. Ibahen ia do homa hamubahon. Marusaha do ia padearhon ganup na maseda. Mulak do use ia manombah Jahowa janah iurupi ia do halak na legan mangkorjahon na sonai. Humbani si  Manasse ibotoh hita do sonaha pe banggalni dousa ni sasada halak, anggo tongon-tongon ia manosal janah mambahen hamubahon, isalpuhon Jahowa do dousani ai. ‘Pardear layak do Jahowa janah marpangulaki do uhur-Ni.’​—Ps. 86:5

13. Patugah ma sada contoh na mangurupi hita ase lambin mangarusi aha do artini halak na tongon-tongon manosali dousani.

¹³ Si Manasse lang pitah mangakui salahni. Tapi dong na ponting na ibahen ia. Ase lambin iarusi hita pasal ai, pardiateihon hita ma contoh on. Bayangkon ma laho hita mamboli kue i sada toko. Tapi ibere panjual ai ma topung hubanta. Ai ra do hita manjalo ai? Tontu lang. Tapi ihatahon panjual ai ma topung do bahan utama laho mambahen kue. Ai gabe ra do hita manjalo topung ai? Pasti lang. Sonai ma pangahap ni Jahowa bani halak na mangkorjahon dousa. Sihol do Jahowa ase sidea tongon-tongon manosali dousani. Tongon, dear do anggo sasada halak ra mangakui dousani. Tapi dong ope na porlu ibahen ia. Aha ma ai? Iparlajari hita ma ai humbani contoh na iajarhon Jesus.

14. Humbani sarita ni Jesus pasal anak na magou, aha do tandani anggo ia manosali pambahenanni?

¹⁴ Bani Lukas 15:11-32, isaritahon Jesus ma sarita pasal anak na magou. Manlawan do anak ai bani bapani janah itadingkon ma bapani. Laho ma ia hu “nagori na daoh”. Ijai, ihorjahon ia ma na sambor janah marsonang-sonang ma ia mamboiskon duitni. Tapi dobkonsi susah goluhni, gabe ipingkiri ia ma use pambahenanni ai. Isaritahon Jesus use, gabe sadar ma dalahi ai dearan do goluhni sanggah i rumah ni bapani. Jadi iputuskon ia ma mulak hu rumah ni bapani janah mangakui salahni. Dear tumang do halani domma isadari ia hasalahanni. Tapi lang sungkup pitah ai. Maningon ibahen ia do homa hamubahon.

15. Hunja ibotoh hita anggo anak na magou ai tongon-tongon manosali dousani?

¹⁵ Humbani pambahenan ni anak na magou ai, taridah do anggo ia tongon-tongon manosali dousani. Age pe domma daoh ia hun rumah, tapi totap do mulak ia. Ihatahon ia ma bani bapani, “Domma mardousa ahu hu nagori atas ampa hu bamu, seng talup be goranon ahu anakmu.” (Luk. 15:21) Jadi isadari ia do domma mardousa ia dompak Naibata janah ibahen ia do pusok uhur ni bapani. Halani ai, lang mahua pangahapni gabe jabolon ni bapani ase boi ia tading rap pakon bapani. (Luk. 15:19) Tontu sarita on boi mangurupi sintua laho mangidah sonaha do halak na tongon-tongon manosali dousani.

16. Aha do na mambahen lang urah sintua mangidah ai tongon-tongon do sasada halak manosal atap lang?

¹⁶ Halani sintua lang boi mangidah na ibagas uhur ni sasada halak, tontu lang urah sidea mangidah ai tongon-tongon do sasada halak  manosal atap lang. Jadi maningon ipindahi sintua do bukti-bukti, ai domma magigi halak ai bani pambahenanni na jahat atap lang. Leganni ai, ra do adong halak i kuria na mangkorjahon dousa na parah tumang. Halani ai, ra do lang pos uhur ni sintua, ai tongon-tongon do halak ai manosali dousani atap lang.

17. (a) Bere ma sada contoh sonaha do halak na lang tongon-tongon manosali dousani? (b) Domu bani 2 Korint 7:11, sonaha do halak na tongon-tongon manosali salahni?

¹⁷ Pardiateihon ma sada contoh on. Dong sada sanina na dob marhajabuan. Tapi selingkuh ma ia sadokah martahun-tahun. Ibotoh ia do namin salah pambahenanni ai. Tapi lang ra ia mangaku hubani istrini, hasomanni, ampa sintua. Ujungni, ibotoh sintua ma parlahouni ai. Dob ipatuduh sintua bukti-buktini, baru ma ia mangaku salah janah songon na pusok ma uhurni idahon. Tapi, ai tongon do ia domma manosali pambahenanni? Dong ope na porlu ipingkirhon sintua. Umpamani, dingat ma domma martahun-tahun ia selingkuh. Anjaha dobkonsi tardapot do lobei ia baru ra ia mangaku salah. Jadi, maningon ididah sintua do panosalanni ai humbani pingkiran, uhur, ampa parlahouni. (Basa 2 Korint 7:11.) Halani ai porlu do panorang ase ia boi mambahen hamubahon. On ma na mambahen halak ai boi ipecat hun kuria.​—1 Kor. 5:11-13; 6:9, 10.

18. Sonaha do halak na ipecat boi patuduhkon anggo ia tongon-tongon manosali dousani, janah aha ma hasilni anggo ibahen ia sonai?

¹⁸ Anggo halak na ipecat ai tongon-tongon manosali dousani, tontu totap do ia roh hu partumpuan. Janah idalankon ia do podah ni sintua ase tongtong ia martonggo ampa marlajar Bibel. Ipadaoh ia do dirini humbani haganup na boi mambahen ia mangulaki dousani na hinan. Anggo torus ia marusaha ase lambin orot use parhasomananni pakon Jahowa, boi ma ia porsaya ra do Jahowa manasap dousani. Iurupi sintua ma holi ia ase boi mulak use hu kuria. Jadi, sanggah sintua sihol mangidah ai tongon-tongon do halak ai manosali dousani atap lang, maningon ipareksa sidea do bukti-bukti na dong halani lang sarupa ganup kasus.

19. Aha do na ibahen sasada halak na tongon-tongon manosali dousani? (Hesekiel 33:14-16)

¹⁹ Domma iulas hita anggo sasada halak tongon-tongon manosali dousani, lang sungkup pitah mangaku salah. Tapi maningon ibahen ia do hamubahon ibagas uhur, pingkiran, ampa parlahouni. Maningon itadingkon ia do parlahouni na sambor janah mandalankon parentah ni Jahowa. (Basa Hesekiel 33:14-16.) Na sipontingan, tujuanni mambahen hamubahon, ai ma ase orot use parhasomananni pakon Jahowa.

20-21. Sonaha hita boi mangurupi halak na dob mangkorjahon dousa na banggal?

²⁰ Ipatorang Jesus do tujuanni roh hu tanoh on. Ia mangkatahon, ‘Roh ahu laho mandilo halak pardousa do, ase ipaubah uhurni.’ (Luk. 5:32) Maningon sonai do homa tujuanta. Jadi anggo ibotoh hita dong hasomanta na mangkorjahon dousa na banggal, aha do na porlu bahenonta?

²¹ Lang boi sip-sip hita, halani anggo sonai ibahen hita, hasomanta ai do holi na rugi. Dingat hita homa lang adong na boi ponop humbani Jahowa. (Pod. 5:21, 22; 28:13) Halani ai, dearan ma ipasingat ham hasomanmu ai ase ijumpahi ia sintua laho mangindo pangurupion bani sidea. Tapi anggo lang ra ia manjumpahi sintua, ham ma na patugahkon pasal ai bani sintua. Anggo ibahen ham sonai, on patuduhkon holong do uhurmu bani hasomanmu ai. Halani anggo lang iurupi sintua ia, gabe seda ma holi parhasomananni pakon Jahowa.

22. Aha do na laho iulas hita bani artikel na mangihut?

²² Anggo dong sasada halak na mangkorjahon dousa na banggal janah lang ra ia mambahen hamubahon, gabe ipecat ma ia hun kuria. Ai halani sogam do uhur ni sintua mangidahsi ase ipecat ia? Bani artikel na mangihut, iulas hita ma sasintongni halani holong ni uhur ni Jahowa do ase ipinsang Ia halak pardousa. Janah iparlajari hita holi sonaha hita boi maniru Ia.