1. Halak na sonaha do halak na maridop ni uhur ai, janah sarita aha ma na mintor idingat hita pasal halak na maridop ni uhur?

ANGGO iahap ham halak na sonaha do halak na maridop ni uhur ai? Tontu bujur do halakni, basar, janah rosuh mangurupi halak na legan. Ra do mintor idingat hita sarita ni Jesus pasal halak Samaria na bujur. Sanggah ididah halak Samaria ai dong halak Jahudi na irampok, mintor “idop ma uhurni” mangidahsi. Gabe itambari ia ma lukani janah iurus ia ma ganup haporluanni. (Luk. 10:29-37) Sonai ma halak na maridop ni uhur. Jahowa pe halani holong-Ni, ipatuduh Ia do idop ni uhur-Ni hubanta bai ganup ari.

2. Aha ope na ibahen halak na maridop ni uhur?

² Dong homa na ibahen halak na maridop ni uhur ai. Sasada halak na maridop ni uhur, sipata lang iuhum ia halak na marsalah. Sonai ma homa na ibahen Jahowa hubanta. “Seng ibahen hu banta [domu] hubani dousanta, anjaha seng ibalaskon banta [domu] hubani hajahatonta.” (Ps. 103:10) Tapi ipinsang Jahowa do homa halak na mangkorjahon dousa na banggal.

3. Sungkun-sungkun aha do na laho iulas hita bani artikel on?

³ Bani artikel on, dong tolu sungkun-sungkun na laho iulas hita, Mase ra Jahowa patuduhkon idop ni uhur-Ni banta? Mase boi ihatahon halani holong ni Jahowa do ase dong pengaturan pemecatan? Anjaha sonaha hita boi patuduhkon idop ni uhur? Ulas hita ma aha na ihatahon Bibel pasal ai.

4. Mase ra Jahowa patuduhkon idop ni uhur bani jolma?

⁴ Halani holong do ipatuduh Jahowa idop ni uhur-Ni. Apostel Paulus mangkatahon anggo Jahowa ai ‘gok bani idop ni uhur’.  Bani ayat ai ihatahon si Paulus do anggo Jahowa ai paridop ni uhur, halani ibere Ia pangarapan bani halak na iminaki ase boi manggoluh i surga. (Ep. 2:4-7) Tapi lang pitah bani sidea Jahowa bujur. Si Daud mangkatahon, “Pardear layak do Jahowa bani haganup anjaha holong do atei-Ni bani ganup jadi-jadian-Ni.” (Ps. 145:9) Halani holong-Ni, ipatuduh Ia do idop ni uhur-Ni bani panorang na sosok.

5. Mase boi ibotoh Jesus sonaha banggalni idop ni uhur ni Jahowa?

⁵ Humbani ganup halak na ongga manggoluh i tanoh on, pitah Jesus do na mambotoh sonaha banggalni idop ni uhur ni Jahowa. Mase boi ibotoh Jesus ai? Halani domma marribu tahun ia rup marhorja pakon Bapani ai i surga. (Pod. 8:30, 31) Janah domma gati ididah Jesus sonaha Jahowa patuduhkon idop ni uhur-Ni bani jolma na mardousa. (Ps. 78:37-42) Sanggah i tanoh on gati tumang do iajarhon ia pasal idop ni uhur ni Naibata.

6. Sonaha Jesus patorangkon pasal banggalni idop ni uhur ni Jahowa?

⁶ Bani artikel na salpu domma iulas hita sarita ni Jesus pasal anak na magou. Humbani sarita ai ibotoh hita do homa sonaha banggalni idop ni uhur ni Jahowa hubanta. Bani sarita ai ipatugah, laho do anak ai manadingkon bapani, janah “iparbois-boi do artani” laho marsonang-sonang. (Luk. 15:13) Ujungni sadar ma ia domma salah pambahenanni ai janah tongon-tongon do ia manosal. Dobkonsi ai mulak ma ia hu rumah laho manjumpahi bapani. Aha ma na ibahen bapani? Jesus mangkatahon, “Daoh ope ia, domma itatap bapani ai ia, gabe maidop ma uhurni; marlintun ma ia manjumpahkonsi, irohop ma ia anjaha isummah.” Lang igilai bapani ai ia. Tapi ijalo do ia mulak use hu rumah. Age pe banggal tumang hasalahan ni anakni ai, tapi isalpuhon bapani ai do ai halani itonggor ia domma manosal tumang anakni ai. Jesus mangajarhon songon bapa na parholong ai ma Jahowa. Anggo dong na mangkorjahon dousa na banggal, ra do Jahowa manalpuhon dousani anggo tongon-tongon ia manosal.​—Luk. 15:17-24.

7. Sonaha Jahowa patuduhkon hapentaran ampa idop ni uhurni?

⁷ Halani Naibata na pentar ai Jahowa ase ipatuduh Ia idop ni uhur-Ni. Songon na ihatahon bani Bibel, “Hauhuron [atap hapentaran, Terjemahan Dunia Baru] na hun babou”, ai ma “gok idop ni uhur ampa buah-buah ni hadearon”. (Jak. 3:17) Songon namatoras na parholong do Jahowa. Halani ai ma ase ipatuduh Ia idop ni uhur-Ni bani jolma i tanoh on. Halani  idop uhur-Ni, ra Ia manasap dousanta ase boi hita marpangarapan laho manggoluh sadokah ni dokahni. (Ps. 103:13; Jes. 49:15) Tapi lang pitah ai, ipatuduh Jahowa do homa idop ni uhur-Ni sadihari pe dong alasan na topat laho patuduhkon ai. Hunjai ma boi ididah hita hapentaran ni Jahowa. Tapi lang homa isalahgunahon Jahowa idop ni uhur-Ni ai. Umpamani, anggo adong halak na mangkorjahon dousa na banggal, ipinsang Jahowa do halak ai.

8. Anggo dong na mambahen dousa na banggal, aha do na maningon ibahen hu bani, janah mase?

⁸ Anggo dong halak i kuria na mangkorjahon dousa na banggal, aha do na maningon ibahen hita? Si Paulus mangkatahon “ulang ma saor” pakon halak sisonai. (1 Kor. 5:11) Jadi anggo dong na mangkorjahon dousa na banggal janah lang manosal ia, maningon ipecat do ia hun kuria. Tujuanni ibahen sonai, ai ma laho manlinggomi sanina botou i kuria ampa ase boi hita totap mangihutkon aturan ni Jahowa. Tapi sipata dong na mangahap kejam tumang do pengaturan pemecatan ai. Ai tongon do ai? Ulas hita ma ai.

9-10. Domu bani Heber 12:5, 6, mase boi ihatahon anggo pengaturan pemecatan ai patuduhkon holong ni Jahowa? Bere ma contohni.

⁹ Sanggah itangar hita dong kaluarga atap pe hasomanta na ipecat hun kuria, tontu pusok tumang do uhurta. Ra do homa nini uhurta mase pala maningon ipecat ia. Ai tongon do pengaturan pemecatan ai patuduhkon holong ni Jahowa? Eak. Sasada halak na mangkorjahon dousa na banggal maningon ipinsang do. Halani holong ni Jahowa do ase ibahen sonai. (Pod. 13:24) Ai boi do halak na mangkorjahon dousa na banggal gabe mubah dobkonsi ipecat? Boi. Bahat do halak dobkonsi ipecat, gabe sadar ma ia domma salah pambahenanni. Gabe ra ma sidea mambahen hamubahon janah mulak use hu kuria.​—Basa Heber 12:5, 6.

¹⁰ Pardiateihon hita ma contoh on. Anggo dong sada biribiri na boritan, tontu ipapulig parmahan ai do na boritan ai humbani biribirini na legan. Hape somalni anggo biribiri lang marosuh ia anggo ibahen pulig. Rosuhan do ia ibahen pakon biribiri na legan. Ai na kejam do parmahan ai halani ipapulig ia biribiri na boritan ai? Tontu lang. Maningon ipapulig do na boritan ai ase panahitni ulang menular bani biribiri na legan. Jadi, laho manjaga ganup biribiri ai do ase ibahen parmahan ai sonai.​—Bandingkon 3 Musa 13:3, 4.

11. (a) Mase halak na ipecat isarupahon songon biribiri na boritan? (b) Aha do na boi mangurupi sidea ase mulak use mangidangi Jahowa?

¹¹ Halak na ipecat hun kuria isarupahon do songon biribiri na boritan ai. Halani mandaoh sidea humbani Jahowa, songon na boritan do sidea. (Jak. 5:14) Anjaha panahitni ai boi do menular bani na legan. Halani ai ma ase sidea porlu ipecat. Pengaturan pemecatan ai patuduhkon holong ni Jahowa bani ganup halak i kuria. Anjaha ai pe boi mangurupi na ipecat ai ase sadar janah mambahen hamubahon. Age pe ipecat sidea, tapi totap do sidea boi roh hu partumpuan ase toguh use haporsayaon ni sidea. Anjaha boi ope sidea mandapot publikasi ampa manonton JW Broadcasting^®. Anggo ididah sintua dong parubahan na ibahen ia, iatur sintua do holi panorang laho mangurupi na ipecat ai ase toguh use parhasomananni pakon Jahowa janah boi mulak use hu kuria. *

12. Aha do na maningon ibahen sintua bani halak na lang tongon-tongon manosali dousani?

¹² Maningon idingat sintua do anggo halak  na ipecat ai, ai ma halak na lang tongon-tongon manosali dousani. Jadi keputusan na serius do laho memecat sasada halak. Halani ai maningon anget-anget do ipingkiri sidea keputusan ai. Ibotoh sidea do homa pinsang-pinsang na ibere Jahowa “domu hubani na patut”. (Jer. 30:11) Halani holong ampa idop ni uhur ni sintua bani sanina botou i kuria, sihol do sintua ase ulang galek haporsayaonni sidea. Jadi sedo halani kejam sintua ase dong pengaturan pemecatan.

13. Mase dong halak i kuria Korint na maningon ipecat?

¹³ Pardiateihon hita ma aha na ibahen si Paulus bani halak i Korint na mangkorjahon dousa na banggal. Bani kuria ai dong sada dalahi na berhubungan seks pakon istri ni bapani. Sasintongni bani Titah ni si Musa adong isurat, “Anggo adong halak na mangkasomani na binuat ni bapani modom, na manalangi bapani do ia ai; maningon bunuhon do sidea haduasi.” (3 Mus. 20:11) Tapi lang mungkin isuruh si Paulus ase halak i kuria ai mamunuh dalahi ai. Jadi isuruh si Paulus ma ase dalahi ai ipecat hun kuria halani dong piga-piga halak i kuria ai na terpengaruh hubani pambahenan ni dalahi ai. Iagan sidea ma lang salah pambahenanni ai.​—1 Kor. 5:1, 2, 13.

14. Sonaha si Paulus patuduhkon idop ni uhurni hubani dalahi na ipecat i Korint ai, janah mase? (2 Korint 2:5-8, 11)

¹⁴ Dob piga-piga dokah, itonggor si Paulus ma domma dong parubahan na ibahen dalahi ai. Domma tongon-tongon ia manosali pambahenanni. Jadi ihatahon si Paulus ma hubani sintua ijai, “Sungkup ma bani halak sisonai ai pinsang-pinsang humbani halak simbuei.” Anjaha nini use, “Dearan ma sasap nasiam salahni, anjaha apoh nasiam ma ia, ase ulang ibondut pusok ni uhur na tarlobih in ia.” Holong do uhur ni si Paulus bani dalahi ai, halani ia domma mambahen parubahan. Lang marosuh si Paulus anggo dalahi ai lalab marpusok ni uhur na mambahen ia gabe lang saud mulak use hu kuria.​—Basa 2 Korint 2:5-8, 11.

15. Sonaha sintua maningon tegas anjaha totap patuduhkon idop ni uhur?

¹⁵ Sintua porlu do maniru idop ni uhur ni Jahowa. Maningon tegas do sidea mambahen keputusan anggo dong na mangkorjahon dousa na banggal. Tapi porlu do homa sidea marusaha patuduhkon idop ni uhur anggo adong alasan na topat. Anggo lang ipinsang sidea halak na mangkorjahon dousa na banggal on patuduhkon lang maridop ni uhur sidea. Sobali sintua ise ope na porlu patuduhkon idop ni uhur?

16. Domu bani Podah 21:13, aha do na laho ibahen Jahowa hu bani halak na lang ra patuduhkon idop ni uhur?

¹⁶ Ganup do halak kristen maningon marusaha maniru idop ni uhur ni Jahowa. Mase sonai? Halani lang ra Jahowa manangihon tonggo ni halak na lang patuduhkon idop ni uhur. (Basa Podah 21:13.) Tontu ganup do hita marosuh ase itangihon Jahowa tonggonta. Halani ai marusaha ma hita patuduhkon idop ni uhur. Anggo dong hasomanta na susah, urupi hita ma sidea anjaha tangihon hita ma “doruh-doruh ni halak na masombuh”. Tongtong ma hita mandalankon podah on, “Ai uhum na so maridop ni uhur do bani na so mandalankon idop ni uhur, tapi monang do idop ni uhur marimbang uhum.” (Jak. 2:13) Sasintongni ganup do hita marosuh ase maridop ni uhur halak hubanta. Anggo idingat hita ai, gabe tarojur ma hita patuduhkon idop ni uhur bani na legan. Anjaha porlu tumang do hita patuduhkon idop ni uhur ai bani halak na baru mulak hu kuria.

17. Sonaha si Daud patuduhkon idop ni uhur?

¹⁷ Bani Bibel dong contoh juakjuak ni Naibata na patuduhkon idop ni uhur. Umpamani Raja Daud, gati do ia maridop ni uhur hubani halak na legan. Age pe marusaha Raja Saul mamunuhsi, lang mardomdom si Daud. Tapi totap do ipatuduh ia idop ni uhurni hubani si Saul.​—1 Sam. 24:10-13, 19, 20.

18-19. Dong dua hali lang ipatuduh si Daud idop ni uhur, sanggah nantigan ma ai?

¹⁸ Hassi pe sonai, ongga do si Daud lang patuduhkon idop ni uhur bani na legan. Umpamani, sanggah ihina si Nabal si Daud janah lang ra si Nabal membere sipanganon bani hasomanni, mintor manggila ma si Daud janah sihol bunuhonni ma si Nabal ampa ganup dalahi i kaluargani. Tapi, roh istrini si Nabal ai ma si Abigail. Bujur janah sabar do halakni. Mintor podas do ipasirsir ia sipanganon hubani si Daud pakon hasomanni. Halani ai lang saud ibunuh si Daud si Nabal ampa ganup dalahi i rumah ai.​—1 Sam. 25:9-22, 32-35.

¹⁹ Bani sada panorang, isaritahon Nabi Natan bani si Daud dong sada dalahi na bayak na manangko biribiri ni sada dalahi na miskin. Gabe manggila ma si Daud dobkonsi manangar ai. Ihatahon ia ma, “Songon sintongni manggoluh Jahowa maningon [matei] do dalahi, na mangkorjahon na sonai ai!” (2 Sam. 12:1-6) Sasintongni ibotoh si Daud do namin aha na ihatahon Titah ni si Musa pasal perkara ai. Dalahi na manangko ai sasintongni sungkup do pitah mambere ompat biribiri bahen gantih rugini. (2 Mus. 22:1) Tapi ihatahon si Daud do anggo dalahi ai maningon ipamatei. Tontu kejam tumang do uhuman ai. Sasintongni sarita na ibahen si Natan ai na laho mangurupi si Daud do ase iarusi ia domma banggal tumang dousani. Age pe sonai, ipatuduh Jahowa do idop ni uhur-Ni hubani si Daud. Lang ibahen Jahowa songon uhuman na ibahen si Daud hubani dalahi na manangko biribiri ai.​—2 Sam. 12:7-13.

20. Aha do na boi iparlajari hita humbani pangalaman ni si Daud?

 ²⁰ Anggo idingat hita use, halani manggila do si Daud gabe sihol bunuhonni si Nabal pakon ganup dalahi i rumah ai. Anjaha bani dalahi na manangko biribiri ai, ihatahon si Daud do maningon ipamatei dalahi ai. Ra do nini uhurta sonon, bujur do si Daud ai tapi mase kejam tumang uhuman na ibere ia bani na manangko biribiri ai. Dingat hita ma situasini sanggah ai. Domma ihorjahon si Daud dousa na banggal janah lang borsih be panggora ni uhurni. Halani ai, anggo adong halak na urah-urah manguhumi, ai ma buktini lang orot be parhasomananni pakon Jahowa. Halani ai ma ipasingat Jesus susianni, “Ulang hanima manguhum-uhumi, ase ulang hona uhum hanima, ai panguhumonnima do uhumkononkon bennima.” (Mat. 7:1, 2) Jadi ulang ma hita urah-urah manguhumi, tapi marusaha ma hita maniru Jahowa na paridop ni uhur.

21-22. Sonaha hita boi patuduhkon anggo hita halak na paridop ni uhur?

²¹ Anggo idop uhurta bani halak na legan, lang pitah ipatuduh hita ai humbani parsahap tapi iurupi hita homa sidea. Jadi rimangi hita ma sonaha hita boi mangurupi kaluarganta, sanina botou, ampa halak na legan. Bahat tumang do na boi ibahen hita laho patuduhkon anggo hita halak paridop ni uhur. Umpamani, boi do hita mangapoh halak na marpusok ni uhur, mambere sipanganon, atap aha na iporluhon hasoman na legan. Boi do homa hita patoguhkon uhur ni halak na baru mulak use hu kuria. Anjaha tongtong ma hita mambaritahon ambilan na madear hubani haganup halak. Ai ma sada cara na sidearan laho patuduhkon idop ni uhur.​—Job 29:12, 13; Rom 10:14, 15; Jak. 1:27.

²² Anggo irimangi hita na iporluhon halak na legan, gabe ibotoh hita ma sonaha mangurupi sidea. Ai ma caranta patuduhkon idop ni uhur hubani sidea. Anjaha anggo ibahen hita sonai, gabe malas ma uhur ni Jahowa hubanta halani Naibata na paridop ni uhur do Ia.