1. Aha do na mambahen bahat halak ragu pasal ugama?

BAHAT tumang halak i dunia on na mangaku anggo sidea halak Kristen, janah ihatahon sidea domma ihorjahon sidea harosuh ni Naibata. Age pe sonai bahat do halak na ragu janah sungkun-sungkun ibagas uhurni, “Ai haganup do ugama iharosuhkon Naibata? Atap pitah sada dassa ugama na sintong?” Sonaha anggo hita, ai porsaya do hita pitah Saksi Jahowa dassa na mangajarhon hasintongan janah mangkorjahon harosuh ni Naibata? Aha do na boi mambahen hita porsaya? Ulas hita ma alasanni.

2. Mase porsaya tumang si Paulus bani hasintongan na iparlajari ia? (1 Tessalonika 1:5)

² Porsaya tumang do apostel Paulus hubani hasintongan na dob iparlajari ia. (Basa 1 Tessalonika 1:5.) Sedo asal na porsaya ia, tapi domma ibotoh ia bukti-buktini. Ringgas tumang do ia marlajar Hata ni Naibata. Porsaya do ia “sagala surat in sinahapkon ni Naibata do”. (2 Tim. 3:16) Halani ai gabe ibotoh si Paulus ma humbani na Tarsurat in, Jesus do Mesias na ijanjihon. Hape pemimpin ugama Jahudi lang porsaya bani Jesus. Ihatahon sidea do domma iajarhon sidea hasintongan pasal Naibata tapi na ihagigihon-Ni do na ihorjahon sidea. (Tit. 1:16) Tapi anggo si Paulus lang sonai. Lang ipilih-pilih ia na ija do na ihaporsayai ia humbani na Tarsurat in. Sai tongtong do iajarhon ia na sintong janah ihorjahon ia ganup “rosuh ni Naibata”.​—Lah. 20:27.

3. Ai maningon boi do ugama na sintong mambalosi ganup sungkun-sungkunta? (Tonggor ma kotak “‘ Seng Targorani ibahen Bueini’ Horja ampa Pingkiran ni Jahowa”.)

 ³ Dong na marpangahap anggo ugama na sintong maningon boi do mambalosi ganup sungkun-sungkun ni sidea humbani Bibel. Ai tongon do ai? Pardiateihon hita ma aha na iajarhon si Paulus. Ihatahon ia do hubani halak i kuria, “Uji nasiam ma haganup.” Tapi iakui si Paulus do homa bahat nari ope na lape iarusi ia humbani na tarsurat in. (1 Tes. 5:21) Halani ai ma ia mangkatahon, “Ai mardeba-deba do habotohonta . . . Anggo sonari, mangkawah do hita songon bani sormin, samak hansa.” (1 Kor. 13:9, 12) Songon si Paulus, hita pe lape iarusi hita haganup isi ni Bibel. Tapi si Paulus domma ibotoh ia hasintongan pasal Naibata. Halani ai ma ia porsaya sintong do ganup na Tarsurat in.

4. Aha do na porlu bahenonta ase porsaya hita domma dapotta hasintongan ai, anjaha aha do na laho iulas hita pasal halak Kristen na sintong?

⁴ Domma iajarhon Jesus cara na sintong laho manombah Naibata. Anggo ibandingkon hita aha na ihorjahon Saksi Jahowa pakon na iajarhon Jesus, gabe lambin porsaya ma hita domma dapot hita hasintongan ai. Bani artikel on, iulas hita ma anggo halak Kristen na sintong ai (1) lang ra manombah gana-gana, (2) ipasangap do goran ni Jahowa, (3) manghaholongi hasintongan, anjaha (4) marsihaholongan do sidea.

5. Aha do na iajarhon Jesus pasal manombah Naibata, anjaha sonaha hita boi mandalankon ajaranni ai?

⁵ Holong tumang do uhur ni Jesus hubani Jahowa. Halani ai ma pitah Jahowa dassa na isombah Jesus, age sanggah ia i nagori atas ampa sanggah ia i tanoh on. (Luk. 4:8) Iajarhon Jesus do susianni ase mangkorjahon sisonai. Lang ongga Jesus atap pe  halak Kristen bani abad na parlobei mamakei gana-gana laho manombah Naibata. Halani lang adong jolma na boi mangidah Naibata, lang adong atap aha pe na boi isarupahon atap ipados songon Jahowa. (Jes. 46:5) Tapi dong halak na mambahen patung ni jolma. Ihatahon sidea anggo ai patung ni halak na pansing janah martonggo sidea bani patung ai. Ai boi do sonai? Ibagas Titah na Sapuluh, ihatahon Jahowa do bani titah na paduahon sonon, “Lang malo bahenonmu bam gana-gana, barang suman-suman aha pe na i babou i nagori atas, age na i toruh ibagas tanoh . . . Lang malo sombahonmu in atap balosanmu.” (2 Mus. 20:4, 5) Tangkas ma lang marosuh Naibata anggo hita mambahen gana-gana laho manombah-Si.

6. Sonaha Saksi-Saksi Jahowa maniru halak Kristen bani abad na parlobei?

⁶ Piga-piga pakar sejarah mangkatahon anggo halak Kristen bani abad na parlobei pitah manombah Naibata dassa. Dong homa buku sejarah na mangkatahon pasti do lang ra halak Kristen bani abad na parlobei mambahen gana-gana laho manombah Naibata. Sonai do homa na ibahen Saksi-Saksi Jahowa sonari on. Lang adong hita na mambahen patung-patung ni halak na mapansing atap malekat atap pe martonggo hujai. Anjaha lang homa hita martonggo hubani Jesus. Hita pe lang ra salut bani bendera atap pe pamarentah. Tapi idalankon hita do parentah Jesus on, “Tuhan Naibatamu do sisombahonmu, sahalak-Si do sibalosanmu.”​—Mat. 4:10.

7. Aha do bedani Saksi Jahowa pakon ugama na legan?

⁷ Sonari on bahat do halak na mamuji-muji pamimpin ugama na tarsar. Gabe anggota gerejani ma sidea, iboli ma buku-bukuni, anjaha bahat do sumbangan na ibere sidea laho mangurupi organisasi na ibahen pamimpin ugama ai. Dong homa na mintor porsaya bani ganup ajaran ni sidea. Tapi lang sonai parlahou ni halak Kristen na sintong. Idalankon hita do tugah-tugah na ibere halak na mambobahon ibagas kuria. Tapi idingat hita do podah ni Jesus on, “Marsanina do nasiam ganup.” (Mat. 23:8-10) Jadi lang ra hita mamuji-muji pamimpin ugama atap pe politik. Anjaha lang homa iurupi hita organisasi ni sidea. Tapi totap do hita netral halani seng hun dunia on hita. Ai ma na mambahen hita legan pakon ganup halak na mangaku Kristen.​—Joh. 18:36.

8. Hunja ibotoh hita, anggo Jahowa sihol ase hita pasangapkon goran-Ni janah mambaritahon ai hu bani na legan?

⁸ Bani sada panorang ihatahon Jesus ma ibagas tonggoni, “Ham Bapa, pasangap Ham ma goran-Mu.” Mintor ibalosi Jahowa ma tonggoni ai janah ihatahon Jahowa ma hun surga sai tongtong do pasangapon-Ni goran-Ni. (Joh. 12:28) Sadokah Jesus mangidangi i tanoh on, sai tongtong do ipasangap ia goran ni Jahowa. (Joh. 17:26) Halani ai, halak Kristen na sintong maningon ipasangap sidea do homa goran ni Jahowa janah mambaritahon ai bani halak na legan.

9. Sonaha halak Kristen bani abad na parlobei pasangaphon goran ni Naibata?

⁹ Dobkonsi kuria-kuria halak Kristen ibahen bani abad na parlobei, ipilih Naibata ma “bani [goran-Ni] na gabe bangsa-Ni humbani halak sipajuh begu-begu”. (Lah. 15:14) Jadi halak Kristen bani abad na parlobei tongtong do manggunahon goran ni Jahowa janah mambaritahon ai, sanggah sidea marbarita. Ibahen do homa goran ni Naibata bani buku-buku ibagas Bibel na isurat apostel ni Jesus. *  On ma buktini pitah sidea dassa na manggunahon goran ni Naibata.​—Lah. 2:14, 21.

10. Aha do buktini pitah Saksi Jahowa dassa na pasangapkon goran ni Jahowa?

¹⁰ Ai pitah Saksi Jahowa dassa na pasangapkon goran ni Jahowa sonari on? Pardiateihon hita ma ugama na legan. Bahat do pemimpin ugama na lang mangajarhon pasal goran ni Jahowa hubani halak na legan. Isasap sidea do homa goran ni Naibata humbani Bibel. Anjaha dong do homa na manlarang anggotani manggunahon goran ai. * Tapi anggo Saksi Jahowa ibaritahon hita do goran ni Naibata hubani halak na legan. Ipasangap hita do homa goran ni Naibata marhitei parlahounta. (Jes. 43:10-12) Anjaha ibahen hita do homa Bibel Terjemahan Dunia Baru na marisi goran ni Naibata janah Bibel ai domma icetak hira-hira 240 juta buku. Iterjemahkon hita do homa publikasinta hubagas lobih humbani 1.000 bahasa anjaha dong homa goran ni Naibata isurat ijai. Hunjai tangkas ma, pitah Saksi Jahowa dassa na manggunahon ampa pasangapkon goran ni Naibata.

11. Sonaha do halak Kristen bani abad na parlobei patuduhkon anggo sidea manghaholongi hasintongan?

¹¹ Holong tumang do uhur ni Jesus bani hasintongan pasal Naibata ampa harosuh-Ni. Ipatuduh ia do ai marhitei pambahenanni anjaha tongtong do iajarhon ia hasintongan ai. (Joh. 18:37) Holong do uhur ni susian ni  Jesus bani hasintongan ai. (Joh. 4:23, 24) Ihatahon apostel Petrus do anggo halak Kristen bani abad na parlobei domma mandapot “pangajaran na sintong”. (2 Ptr. 2:2) Halani toguh haporsayaon ni sidea bani hasintongan ai, lang ra sidea mangihutkon ajaran atap pe adat na lang sosok pakon hasintongan ai. (Kol. 2:8) Sonai homa halak Kristen na sintong sonari on, “marparlahou [do sidea] ibagas hasintongan”. Artini, sai tongtong do sidea mangajarhon hasintongan janah mangkorjahon na tarsurat ibagas Bibel.​—3 Joh. 3, 4.

12. Sanggah ididah Pangurus Pusat dong pangarusionta na porlu isesuaihon, aha ma na ibahen sidea janah mase?

¹² Lang ongga ihatahon Saksi Jahowa iarusi sidea haganup hasintongan ibagas Bibel. Tongon sipata ongga do hurang pas pangarusion ni sidea pasal ajaran ni Bibel atap pe sanggah mambere tugah-tugah. Tapi wajar do ai halani Bibel mangkatahon adong do panorangni ase hasintongan ai lambin iarusi halak. (Kol. 1:9, 10) Jahowa pe anget-anget do iurupi Ia juakjuak-Ni ase lambin mangarusi hasintongan. Halani ai maningon sabar do hita ase boi mangarusi ganup hasintongan. (Pod. 4:18) Sanggah ididah Pangurus Pusat dong pangarusionta na porlu isesuaihon, mintor ibahen sidea do penyesuaian. Anggo pamimpin ugama i dunia on, iubah sidea do ajaranni ase lambin iharosuhkon buei halak. Tapi anggo tujuan ni Pangurus Pusat mambahen penyesuaian, ai ma ase lambin dohor hita bani Naibata anjaha ase sosok caranta manombah Naibata songon na iajarhon Jesus. (Jak. 4:4) Lang ongga hita mambahen penyesuaian ase iharosuhkon halak. Tapi halani lambin iarusi hita do isi ni Bibel. Ai ma buktini anggo hita mangkaholongi hasintongan.​—1 Tes. 2:3, 4.

13. Aha do tandani halak Kristen na sintong, anjaha sonaha Saksi Jahowa patuduhkon ai?

¹³ Itanda halak do anggo halak Kristen na parlobei ai ma halak na bujur. Tapi, na sipontingan itanda halak do sidea ai marsihaholongan. Jesus mangkatahon, “Hunjon ma botohon ni ganup halak susianku hanima, anggo marsihaholongan hanima.” (Joh. 13:34, 35) Jadi sonai ma homa Saksi Jahowa sonari on. Hita lang songon ugama na legan i dunia on. Hassi pe legan-legan suku atap pe negaranta tapi songon sada keluarga do hita. On boi ididah hita sanggah hita roh hu partumpuan atap pe kebaktian. Anggo irimangi hita ai, gabe lambin porsaya ma hita domma iihutkon hita cara na sintong manombah Naibata.

14. Domu bani Epesus 4:32, sonaha hita boi patuduhkon holong bani sanina botou?

¹⁴ Bibel mangkatahon, “Marsihaholongan botul ma nasiam.” (1 Ptr. 4:8) Sada carani hita patuduhkon holong, ai ma ra hita manalpuhon salah ni hasoman janah sabar hita bani sidea. Na leganni bujur anjaha ringgas ma hita mangurupi halak i kuria, age bani halak na ongga mambahen borit uhurta. (Basa Epesus 4:32.) Anggo ipatuduh hita holong sisonai, tangkas ma taridah hita do halak Kristen na sintong.

15. Sonaha cara na legan hita maniru halak Kristen bani abad na parlobei?

¹⁵ Songon na ibahen halak Kristen bani abad na parlobei, sonai do homa carani Saksi Jahowa iorganisasi sonari on. Dong do ilantik sintua kaliling, sintua, ampa siparugas. (Pil. 1:1; Tit. 1:5) Iihutkon hita do homa aturan ni Jahowa pasal parhajabuan, daroh, ampa seks. Iihutkon hita do homa pengaturan pemecatan na ibahen halak Kristen bani abad  na parlobei. Tujuanni laho manjaga halak i kuria ase ulang terpengaruh bani halak na mangkorjahon na masambor.​—Lah. 15:28, 29; 1 Kor. 5:11-13; 6:9, 10; Heb. 13:4.

16. Aha do na boi iparlajari hita humbani Epesus 4:4-6?

¹⁶ Jesus mangkatahon bahat do holi halak na mangaku Kristen tapi parlahouni lang domu pakon ajaran ni Jesus. (Mat. 7:21-23) Bibel pe mangkatahon bani panorang parpudi bahat do halak “songon-songon na daulat do” idahon. (2 Tim. 3:1, 5) Age pe sonai, Bibel mangkatahon pitah “sada haporsayaon” do na iharosuhkon Jahowa.​—Basa Epesus 4:4-6.

17. Ise do sonari on na sada haporsayaon janah na tongon-tongon mangihutkon ajaran ni Jesus?

¹⁷ Ise do na sada haporsayaonni i sab dunia on? Domma iulas hita aha na iajarhon Jesus pasal cara na sintong laho manombah Naibata. Anjaha ai do homa na iihutkon halak Kristen bani abad na parlobei. Dobkonsi ipindahi hita buktini, tangkas ma pitah Saksi Jahowa dassa halak Kristen na sintong. Tontu malas tumang do uhurta boi gabe juakjuak ni Jahowa. Ibotoh hita do homa hasintongan janah ipatugah hita do pasal Jahowa ampa harosuh-Ni bani halak na legan. Halani ai, sai totap ma ipatoguh hita haporsayaonta bani hasintongan.