TIAP tahun bahat do halak na ipecat ujungni mulak use hu kuria. Tontu banggal tumang do “malas ni uhur i nagori atas” mangidah sidea. (Luk. 15:7, 10) Anggo ham domma mulak use mangidangi Jahowa, pos ma uhurmu malas tumang do uhur ni Jahowa, Jesus, ampa malekat mangidah ham. Tontu marusaha do ham patoguhkon parhasomananmu hubani Jahowa. Tapi sanggah mangkorjahon ai, ra do bahat tantangan na roh. Aha ma ai, janah aha do na boi mangurupi ham mangatasi ai?

Bahat do halak na domma mulak hu kuria gabe maretek ni uhur. Ra do sarupa pangahapmu pakon Raja Daud. Age pe domma isasap Jahowa salahni, tapi nini do, “Domma idorab salahku ahu.” (Ps. 40:13; 65:4) Dong do piga-piga halak na dob mulak hu kuria tapi lalab do ia manolsoli diri janah maila pangahapni. Sonai ma pangahap ni si Elisabet na domma 20 tahun ipecat. * Ia mangkatahon, “Susah tumang do ahu porsaya domma isasap Jahowa salahku.” Halani ai, ulang ma nasiam lalab maretek ni uhur. (Pod. 24:10) Anggo sonai lalab pangahapmu, gabe galek ma holi haporsayaonmu bani Jahowa.

Dong do homa na mabiar mangkorjahon na porlu ibahen ase sidea lambin dohor bani Jahowa. Songon si Antoni dobkonsi mulak use ia hu kuria, ihatahon ia do sonon, “Domma bahat ahu lupa na huparlajari hinan.” Jadi dong do piga-piga na domma mulak hu kuria na sarupa pangahapni songon si Antoni ai. Ai ma na mambahen sidea lang marusaha mambere na sidearan bani Jahowa.

Sasada halak na sihol patoguhkon parhasomananni pakon Jahowa isarupahon do ai songon halak na sihol padearhon rumahni na maseda halani halisungsung atap pe angin topan. Ra do ia sunsah mamingkiri halani bahat na sihol ipadear janah lang boi podas salosei. Sonai homa ma halak na sihol patoguhkon parhasomananni pakon  Jahowa, maningon bahat do homa na porlu ibahen ia. Hassi pe sonai dong do na boi mangurupisi.

Ihatahon Jahowa do hubamu, “Roh ma hanima, ase marturiak hita.” (Jes. 1:18) Sanggah mulak nasiam hu kuria, dos do ai domma “marturiak” ham pakon Jahowa. Domma isaloseihon ham parsoalanmu pakon-Si. Tontu holong tumang do Ia bamu halani ibahen ham sonai. Marhitei pambahenanmu ai, igunahon Jahowa ma ai laho mambuktihon anggo Sibolis ai parladung.​—Pod. 27:11.

Halani domma mulak ham mangidangi Jahowa dos do artini ai domma ipadohor ham dirimu hu Bani. Marjanji do Ia padohoron-Ni ma diri-Ni bani nasiam. (Jak. 4:8) Tontu malas tumang do uhur ni sanina botou mangidah ham mulak use hu kuria. Tapi dong ope na porlu ibahen ham. Maningon tongtong do ipatoguh ham holongmu hubani Jahowa na boi gabe Bapa ampa Hasomanmu. Sonaha carani?

Pingkirhon ma aha do na porlu ibahen ham. Ra do idingat ham ope aha na ongga iparlajari ham pasal Jahowa ampa janji-Ni bani ari simagira. Tapi dong ope na ponting na maningon ibahen ham. Umpamani maningon taratur do ham marbarita, martumpu, ampa marsaor pakon sanina botou. Leganni ai, dong homa na porlu ihorjahon ham ase lambin orot parhasomananmu pakon Naibata.

Gati ma martonggo bani Jahowa. Ibotoh Jahowa do sipata lang urah iahap ham martonggo halani sai lalab ham manolsoli diri. (Rom 8:26) Age pe sonai totap ma ham pongkut martonggo. Patugah ma bani Jahowa, sihol do ham ase orot use parhasomananmu pakon-Si. (Rom 12:12) Si Andre mangkatahon, “Hinan sai lalab do ahu manolsoli diri janah maila. Tapi dobkonsi martonggo gabe damei ma huahap.” Anggo lang ibotoh ham aha na sihol tonggohononmu, dear do anggo irimangi ham na ihatahon si Daud na isurat bani Psalmen 51 pakon 65.

Taratur ma marlajar Bibel. Anggo ibahen ham sonai ai do na mambahen gabe lambin toguh holong ampa haporsayaonmu bani Jahowa. (Ps. 19:8-12) Si Pilip mangkatahon, “Halani lang taratur ahu mambasa janah mamparlajari Bibel, gabe galek ma haporsayaonku. Gabe huhorjahon ma na lang iharosuhkon Jahowa. Tapi lang ra ahu lalab sonai, jadi taratur ma ahu mambahen parlajaran pribadi.” Ham pe boi do mangkorjahon na sisonai. Anggo lang ibotoh ham topik aha do na laho iparlajari, boi do isungkun ham bani hasoman i kuria na toguh haporsayaonni bani Jahowa.

Patoguh ma parhasomananmu pakon sanina botou. Dong do piga-piga halak na dob mulak hu kuria gabe haru uhurni mamingkiri sonaha do holi pandapot ni sanina botou pasal ia. Si Larissa mangkatahon, “Maila tumang do ahu, sai lalab do huahap domma borit uhur ni sanina botou hubahen.” Tapi pos ma uhurmu sihol tumang do sintua ampa sanina botou mangurupi nasiam ase mulak use marhasoman pakon Naibata. (Tonggor ma kotak “ Aha do na Boi Ibahen Sintua?”) Malas tumang do uhur ni sidea halani mulak use nasiam hu kuria janah sihol do sidea mangurupi nasiam.​—Pod. 17:17.

Aha do na boi ibahen ham ase boi lambin dohor pakon sanina botou i kuria? Taratur ma roh ham hu partumpuan janah marsaor pakon sanina botou. Leganni ai, rap ma homa marbarita pakon sidea. Aha ma gunani ai? Si Felix mangkatahon, “Dobkonsi mulak use ahu hu kuria basar tumang do sanina botou hu bangku. Huahapkon do holong do sidea bangku. Sai tongtong do iurupi sidea ahu ase pos uhurhu domma isalpuhon Jahowa salahku, anjaha ase totap ringgas ahu mangidangi.”—Tonggor ma kotak “ Aha do na Boi Ibahen Ham?”

Marusaha do Sibolis mambahen bahat tantangan songon “halisungsung”, ase seda use parhasomananmu pakon Jahowa. (Luk. 4:13) Halani ai, maningon tongtong ma patoguh ham haporsayaonmu bani Jahowa.

Marjanji do Jahowa bani juakjuak-Ni, “Pindahan-Ku do na magou in, paulakon-Ku ma na kahou in, anjaha balutan-Ku na ugahan; na galek pargogohan-Ku.” (Hes. 34:16) Domma bahat na iurupi Jahowa ase boi mulak use mangidangi-Si. Halani ai, pos ma uhurmu sai tongtong do urupan-Ni ham ase boi totap orot parhasomananmu pakon-Si.