1. Sonaha do situasi ni apostel Johannes hira-hira tahun 95 M?

HIRA-HIRA tahun 95 M, sunsah tumang do situasi ni apostel Johannes. Domma matua ia, ibuang homa hu Pulou Patmos, janah ra do pitah ia mando apostel na manggoluh. (Pangk. 1:9) Ibotoh ia do homa dong na pararatkon ajaran palsu na mambahen kuria gabe marposah. Halani ai, ra do gabe lang dong holi halak Kristen na sintong.​—Jud. 4; Pangk. 2:15, 20; 3:1, 17.

2. Domu bani Pangungkabon 7:9-14, panonggoran aha ma na ididah si Johannes? (Tonggor ma gambar sampul.)

² Bani panorang sisonai ma si Johannes mandapot panonggoran pasal ari simagira. Ibagas panonggoran ai, ididah ia ma dong sada malekat na marsuruh ompat malekat na legan, ase manjolom logou hamarsikon banggal paima isap ganup hulanan na etek ai. (Pangk. 7:1-3) Dong 144.000 bilangan ni hulanan ai. Sidea holi mamarentah i surga rap pakon Jesus. (Luk. 12:32; Pangk. 7:4) Dob ai, ipatugah si Johannes ma dong kalompok na legan. Ia mangkatahon, “Huidah ma humpulan na banggal, na so boi bilangan ni atap ise, humbani ganup bangsa, suku, marga, ampa hata, jongjong i lobei ni paratas ai pakon i lobei ni Anak ni biribiri ai.” (Basa Pangungkabon 7:9-14.) Tontu malas tumang ma uhur ni si Johannes halani mambotoh bani ari simagira bahat do holi na manombah Jahowa mangihutkon aturan na ibahen Jahowa.

3. (a) Mase panonggoran ni si Johannes boi patoguhkon uhurta? (b) Aha ma na laho iulas hita bani artikel on?

³ Gabe toguh ma haporsayaon ni si Johannes dob mangidah ai. Tapi toguhan do haporsayaonta halani panonggoran ai saud bani panorangta. Sonari dong marjuta halak na manombah Jahowa. Marpangarapan do sidea boi maluah humbani  hamarsikon banggal janah manggoluh sadokah ni dokahni i tanoh on. Bani artikel on, iulas hita ma 80 tahun na salpu domma ipatalar Jahowa ise do humpulan na banggal ai. Dob ai, iulas hita ma homa anggo humpulan banggal ai: (1) bahat tumang bilanganni, ampa (2) roh humbani marbagei suku ampa bangsa. Ganupan on boi patoguhkon haporsayaon ni sidea na dihut bani humpulan ai.

4. Hasintongan aha do na lang iarusi gareja, tapi aha do na ihaporsayai Siswa-Siswa Alkitab?

⁴ Bibel mangajarhon holi ganup jolma na unduk bani Naibata boi manggoluh sadokah ni dokahni i tanoh on. Tapi legan do na iajarhon gareja. (2 Kor. 4:3, 4) Sonari on bahatan do gareja mangajarhon hu surga do laho halak na bujur dob matei sidea. Tapi legan do na ihaporsayai Siswa-Siswa Alkitab, sada kalompok na mansetak Watch Tower humbani tahun 1879. Ibotoh sidea do anggo Naibata holi mambahen tanoh on gabe Paradeiso. Janah marjuta halak na ra manangihon-Si manggoluh sadokah ni dokahni i tanoh on, sedo i surga. Hassi pe sonai, porlu do panorang ase boi tangkas ibotoh sidea ise do sasintongni halak na manggoluh i tanoh on.​—Mat. 6:10.

5. Aha do na ihaporsayai Siswa-Siswa Alkitab pasal na 144.000 halak ai?

⁵ Domu bani na iparlajari sidea hun Bibel, iarusi Siswa-Siswa Alkitab ma dong sakalompok halak “na tinobus hun tanoh” on, laho mamarentah rap pakon Jesus i surga. (Pangk. 14:3) Bilangan ni kalompok ai dong 144.000. Ganupan sidea halak Kristen na iminaki janah ringgas mangidangi Jahowa sadokah manggoluh i tanoh on. Tapi aha do na iarusi sidea pasal humpulan na banggal ai?

6. Aha ma na ihaporsayai Siswa-Siswa Alkitab pasal humpulan na banggal ai?

⁶ Bani panonggoran ai, ididah si Johannes ma kalompok ai “jongjong i lobei ni paratas ai pakon i lobei ni Anak ni biribiri ai”. (Pangk. 7:9) Halani ai, iagan Siswa-Siswa Alkitab ma humpulan na banggal ai holi manggoluh i surga songon 144.000 halak ai. Tapi anggo tongon do ai, aha ma na mambahen dua kalompok on legan? Nini uhur ni sidea halak Kristen na lang tongtong unduk bani Naibata do humpulan na banggal. Hassi pe domma iihutkon sidea aturan ni Bibel, tapi dong ope sidea na gabe anggota ni gareja. Jadi iagan Siswa-Siswa Alkitab ma anggo kalompok on lang toguh parhasomananni pakon Jahowa. Halani ai lang talup sidea mamarentah pakon Jesus. Jadi sanggah i surga, “jongjong i lobei ni paratas ai” do sidea, sedo hundul i paratas.

7. (a) Domu bani na ihaporsayai Siswa-Siswa Alkitab, ise ma holi na manggoluh i tanoh on sadokah pamarentahan ni Kristus? (b) Aha do na masa bani dalahi na setia na matei paima Jesus matei?

⁷ Anggo sonai, ise ma na manggoluh sadokah ni dokahni i tanoh on? Porsaya do Siswa-Siswa Alkitab dob ipatumpu holi ganup na 144.000 pakon humpulan na banggal ai hu surga, dong ma marjuta halak na legan na manggoluh i tanoh on laho mandapot pasu-pasu humbani pamarentahan ni Kristus sadokah 1.000 tahun. Porsaya do Siswa-Siswa Alkitab paima mulai pamarentahan ni Kristus, na marjuta halak ai lape mangidangi Jahowa. Janah sadokah pamarentahan 1.000 tahun ai do sidea marlajar pasal aturan ni Jahowa. Dobkonsi ai, sidea na ra unduk bani Jahowa boi manggoluh sadokah ni dokahni i tanoh on. Tapi iripaskon ma ganup halak na lang ra unduk bani Jahowa. Holi dong do homa “panrajai” i tanoh on sadokah pamarentahan ni Kristus ai. Anjaha porsaya do  Siswa-Siswa Alkitab anggo piga-piga humbani sidea dong do na laho hu surga dob salosei pamarentahan na 1.000 tahun ai, tarmasuk ma homa piga-piga dalahi na setia na matei paima matei Jesus.​—Ps. 45:17

8. Ise do ra tolu kalompok na laho mandapot pasu-pasu bani ari simagira?

⁸ Jadi iahap Siswa-Siswa Alkitab dong do holi tolu kalompok: Na parlobei, 144.000 halak na mamarentah pakon Jesus i surga. Na paduahon, humpulan na banggal, ai ma halak Kristen na lang tongtong unduk bani Jahowa. Sidea jongjong i lobei ni paratas ni Jesus i surga. Na patoluhon, dong marjuta halak i tanoh on na laho iajari pasal aturan ni Jahowa sadokah pamarentahan ni Kristus. * Tapi ujungni iurupi Jahowa ma Siswa-Siswa Alkitab ai ase lambin mangarusi pasal ai.​—Pod. 4:18.

9. (a) Hassi pe humpulan na banggal ai i tanoh on, sonaha sidea boi “jongjong i lobei ni paratas ai pakon i lobei ni Anak ni biribiri ai”? (b) Mase masuk akal pangarusion na isurat bani Pangungkabon 7:9?

⁹ Humbani tahun 1935, tangkas ma iarusi Saksi-Saksi Jahowa ise do sasintongni humpulan na banggal bani panonggoran ni si Johannes ai. Gabe iarusi sidea ma lang maningon i surga humpulan na banggal ai ase boi “jongjong i lobei ni paratas ai pakon i lobei ni Anak ni biribiri ai”. Hassi pe holi sidea manggoluh i tanoh on, boi do sidea “jongjong i lobei ni paratas ai” marhitei unduk bani pamarentahan ni Jahowa janah manangihon-Si. (Jes. 66:1) Sidea boi jongjong “i lobei ni Anak ni biribiri ai” marhitei porsaya bani tobusan ni Jesus. Dong homa ayat na legan na mambahen hita lambin mangarusi anggo na isurat bani Pangungkabon 7:9 ai pitah gambaran dassa. Bani Mateus 25:31, 32 ipatugah pasal halak humbani “haganup bangsa” na ipatumpu hu lobei ni paratas ni Jesus, tarmasuk ma halak parjahat. Tontu i tanoh on do sidea ai, sedo i surga. Jadi masuk akal do pangarusion na idapot bani tahun 1935 ai. Halani ai ma lang ongga iajarhon bani Bibel anggo humpulan na banggal ai hu surga. Pitah 144.000 halak do na hu surga laho ‘manrajai tanoh on’ rap pakon Jesus.​—Pangk. 5:10.

10. Mase humpulan na banggal ai maningon marlajar pasal Jahowa paima imulai pamarentahan na 1.000 tahun ai?

¹⁰ Jadi humbani tahun 1935, domma iarusi Saksi-Saksi Jahowa ise do sasintongni humpulan na banggal na dong bani panonggoran ni si Johannes ai. Halak Kristen na setia do sidea na marpangarapan manggoluh sadokah ni dokahni i tanoh on. Ase boi maluah sidea hun hamarsikon na banggal, maningon iparlajari sidea do pasal Jahowa janah domma isombah sidea Ia paima imulai pamarentahan 1.000 tahun ai. Maningon toguh do haporsayaon ni sidea ase ‘margogoh manimbili sagala na sihol roh’ paima pamarentahan ni Kristus.​—Luk. 21:34-36.

11. Mase iagan Siswa-Siswa Alkitab dong halak na tarangkat hu surga dobkonsi pamarentahan 1.000 tahun ai?

¹¹ Sonaha ma pangarusion pasal halak na ipapuho laho manggoluh i surga dobkonsi pamarentahan 1.000 tahun? Ra, pangarusion ai iulas bani The Watch Tower 15 Februari 1913. Ra do sonai na iarusi sidea halani dong na marpingkir, ‘Bahat do juakjuak ni Jahowa na setia paima roh Jesus hu tanoh on. Jadi mase ma pitah hagoluhan na i tanoh on dassa na idapot sidea, hape halak na lang tongtong unduk bani Jahowa mandapot hagoluhan i surga?’ Tontu sonai pingkiran ni sidea halani ondi ai iagan sidea: (1) manggoluh i surga do  humpulan na banggal ai janah (2) humpulan na banggal ai halak Kristen na lang tongtong unduk bani Jahowa.

12-13. Aha do na iarusi halak na iminaki ampa humpulan na banggal pasal pangarapan ni sidea?

¹² Songon na dob iulas hita nongkan, humbani tahun 1935, domma iarusi Saksi-Saksi Jahowa anggo humpulan na banggal bani panonggoran ni si Johannes ai ma halak na maluah humbani Harmagedon. Sidea maluah humbani “hamarsikon banggal” anjaha manggoluh i tanoh on. “Maling do sora ni sidea mardilohon, ‘Bani Naibatanta, na hundul bani paratas in do haluahon, ampa bani Anak ni biribiri in!’” (Pangk. 7:10, 14) Leganni ai, Bibel mangajarhon pangarapan na “sidearan” do na idapot halak na ipapuho hu surga marimbangkon pangarapan na idapot juakjuak ni Naibata na basaia. (Heb. 11:40) Dob ipatalar pangarusion ai bani tahun 1935, gabe lambin ringgas ma sanina botounta mangontang halak ase dihut mangidangi Jahowa janah mandapot pangarapan manggoluh sadokah ni dokahni i tanoh on.

¹³ Malas tumang uhur ni humpulan na banggal mandapot pangarapan ai. Sidea mangarusi Jahowa do na manontuhon ija do holi juakjuak-Ni na setia mangidangi-Si, i surga atap i tanoh on. Halak na iminaki ampa humpulan na banggal mambotoh pangarapan ai boi dapot sidea sedo halani talup sidea manjalo ai. Tapi halani silayak-layak humbani Jahowa do ai na ipatuduh marhitei tobusan.​—Rom 3:24.

14. Dobkonsi tahun 1935, mase bahat ope na sungkun-sungkun sonaha panjahaion pasal humpulan na banggal ai boi saud?

¹⁴ Dobkonsi lambin tangkas iarusi juakjuak ni Naibata pasal ai, bahat ope na sungkun-sungkun sonaha humpulan ai boi gabe banggal. Songon na isaritahon hasomanta si Ronald Parkin, sanggah hasintongan pasal humpulan na banggal ai lambin iarusi, marumur 12 tahun ope ia. Ijia dong 56.000 halak parbarita i sab dunia on. Tapi bahatan do sidea ai halak na iminaki. Jadi lang sai bahat bilangan ni humpulan na banggal ai.

15. Sonaha humpulan na banggal ai torus ipatumpu?

¹⁵ Marpuluh tahun dobkonsi ai, isuruh ma misionaris marbarita hu marbagei nagori. Gabe lambin tambah ma bilangan ni Saksi Jahowa. Dob ai, humbani tahun 1968, igunahon ma buku Kebenaran yang Membimbing kepada Hidup yang Kekal laho mangajarhon pasal Bibel bani halak. Lambin tambah ma use halak na sihol dohor bani Jahowa halani urah do iarusi hasintongan marhitei buku ai. Ibagas ompat tahun, lobih humbani satongah juta halak na ididi. Leganni ai, lang be ilarang  horja parambilanonta i Eropa Timur ampa i Afrika. Anjaha lang markuasa be gareja Katolik i Amerika Latin ampa i nagori na legan. On mambahen tambah use marjuta halak na ididi. (Jes. 60:22) Baru-baru on, bahat homa ipasirsir organisasi ugas-ugas laho mangurupi halak marlajar Bibel. Tangkas ma humpulan na banggal ai domma ipatumpu Jahowa. Sonari, lobih humbani ualuh juta halak do bilangan ni sidea.

16. Hunja do rohni humpulan na banggal ai?

¹⁶ Sanggah isurat si Johannes panonggoran ai, ia mangkatahon anggo humpulan banggal ai roh humbani “ganup bangsa, suku, marga, ampa hata”. Nabi Sakaria pe ongga do patugahkon pasal panjahaion na sarupa. Ia mangkatahon, “Bani ari ai tangkapon ni sapuluh halak humbani bangsa na marbagei-bagei sahap ai ma sada halak Jahudi bani sisi ni hiouni anjaha ihatahon, ‘Rap ma hita laho, ai domma ibogei hanami, Naibata do hasoman nasiam.’”​—Sak. 8:23.

17. Aha do na dob ibahen laho mangurupi halak humbani marmasam bangsa ampa bahasa?

¹⁷ Ase boi ganup halak humbani marmasam bahasa ipatumpu, maningon ibagas buei sahap ma barita na madear ai ibaritahon. Domma 130 tahun lobih hita manerjemahkon publikasi na igunahon laho mangajarhon pasal  Bibel. Tapi sonari publikasi-publikasi ai domma dong ibagas marratus bahasa. Lape ongga sonai bahatni ibahen hinan. Tangkas ma sada halongangan na ibahen Jahowa do on laho patumpuhon buei halak humbani marmasam bangsa. Halani domma sirsir Bibel ampa publikasi ibagas buei sahap, gabe boi ma humpulan banggal ai marsada laho manombah Jahowa hassi pe sidea roh humbani marmasam bangsa. Anjaha itanda do Saksi-Saksi Jahowa ringgas marbarita ampa marsihaholongan. On mambahen lambin toguh haporsayaonta.​—Mat. 24:14; Joh. 13:35.

18. (a) Domu bani Jesaya 46:10, 11, mase lang tarsonggot hita halani Jahowa domma pasaudkon panjahaion pasal humpulan banggal? (b) Mase humpulan banggal ai lang pala maretek ni uhur?

¹⁸ Tontu malas tumang uhurta dob mangarusi panjahaion pasal humpulan banggal ai. Songon sada halongangan do cara ni Jahowa pasaudkon panjahaion ai. Janah lang tarsonggot hita mambotoh ai. (Basa Jesaya 46:10, 11.) Martarima kasih do humpulan banggal halani pangarapan na ibere Jahowa bani sidea. Hassi pe sidea sedo halak na iminaki janah lang dihut mamarentah pakon Jesus i surga, lang maretek ni uhur sidea. Bani Bibel, bahat do contoh dalahi ampa naboru na setia na itogu-togu tonduy na pansing, hape sedo bagian humbani 144.000 halak ai sidea. Umpamani songon si Johannes Pandidi pakon si Daud. (Mat. 11:11; Lah. 2:34) Ipapuho do holi sidea rap pakon marmiliar halak na legan laho manggoluh i tanoh on. Ganupan sidea ampa humpulan banggal holi boi patuduhkon anggo sidea setia bani Jahowa janah unduk bani pamarentahan-Ni.

19. Aha ma na laho bahenonta dobkonsi iarusi hita panonggoran pasal humpulan banggal ai?

¹⁹ On ma na parlobei sahali ipatumpu Jahowa marjuta halak humbani ganup bangsa ase rap manombah-Si. Age pe hita marpangarapan i tanoh on atap pe i surga, maningon marusaha ma hita mangurupi buei halak ase dihut gabe bagian humpulan banggal humbani ‘biri-biri na legan’. (Joh. 10:16) Lang piga dokah nari laho roh ma hamarsikon banggal songon na ipatugah Jahowa. Bani panorang ai, iripaskon Naibata ma ganup pamarentah ampa ugama na mambahen buei jolma marsitaronon. Tontu sada hasangapon do bani ganup halak na gabe humpulan banggal boi tongtong manombah Jahowa i tanoh on!​—Pangk. 7:14.