1. Sonaha do pangahap ni Jahowa mangidah halak na toruh maruhur?

HOLONG do Jahowa mangidah halak na toruh maruhur. Pitah halak sisonai do na boi dohor hu Bani. Tapi, “iimbang Naibata do sigijang uhur”. (1 Ptr. 5:5) Tontu sihol do hita pamalaskon uhur-Ni ase dohor Ia hubanta. Jadi ponting tumang do hita patuduhkon toruh ni uhur.

2. Bani artikel on, aha do na laho iulas hita?

² Bani artikel on, iulas hita ma holi tolu sungkun-sungkun na mangihut: (1) Halak na sonaha do na toruh maruhur? (2) Mase hita maningon martoruh ni uhur? (3) Bani situasi na sonaha do lang urah hita patuduhkon toruh ni uhur? Songon na laho iulas hita, malas uhur ni Jahowa mangidah anggo hita patuduhkon toruh ni uhur, janah marguna tumang do ai banta.​—Pod. 27:11; Jes. 48:17.

3. Halak na sonaha do na ihatahon toruh maruhur?

³ Halak na ihatahon toruh maruhur ai ma halak na lang mangahap pontingan dirini marimbangkon halak na legan. Lang homa gijang uhurni. Bibel mangkatahon anggo halak na toruh maruhur ai mambotoh daoh do timbulan Jahowa marimbangkon dirini. Janah lang iapasi ia halak na legan. Ibotoh ia lobihan do halak marimbangkon dirini.​—Pil. 2:3, 4.

4-5. Mase dong halak na toruh maruhur idahon hape sasintongni lang sonai?

⁴ Dong do halak na pitah hun darat taridah toruh maruhur.  Ra do taridah halak na parmaila janah parsip ia. Atap ra do ia hormat bani na legan anjaha sopan, halani sonai do na iajarhon namatorasni. Hape sasintongni gijang do uhurni. Dokah-dokah taridah ma halak na sonaha do ia.​—Luk. 6:45.

⁵ Anjaha dong do halak na pangkar patugahkon na ibagas uhurni, tapi lape tontu halak na margijang ni uhur ia. (Joh. 1:46, 47) Hassi pe sonai, maningon jaga ma ia ase ulang marpangunsandeian bani hapentaranni. Jadi lang soal halak na pangkar atap parmaila hita, maningon marusaha do hita patuduhkon toruh ni uhur.

6. Songon na ipatugah bani 1 Korint 15:10, aha na boi iparlajari hita humbani si Paulus?

⁶ Pardiateihon ma siusihan na ibahen apostel Paulus. Igunahon Jahowa do ia pajongjongkon kuria i piga-piga huta. Ra do bueinan na ihorjahon ia ibagas pangidangion marimbangkon apostel na legan. Hassi pe sonai, lang ongga ia pajuntul-juntulhon dirini. Humbani toruh ni uhurni do ia mangkatahon, “Ai ahu do sietekan humbani apostel in, na seng talup namin goranon apostel, halani na dob huparburu kuria ni Naibata.” (1 Kor. 15:9) Ibotoh si Paulus do homa halani idop ni uhur ni Jahowa do ase boi ia marhasoman pakon-Si, sedo halani na ihorjahon ia. (Basa 1 Korint 15:10.) Dob ai, sanggah manulis surat ia hu kuria Korint, seng ra ia mamuji-muji dirini, hassi pe dong sanina ijai na manrisai ia. Tangkas ma halak na toruh maruhur do si Paulus ai.​—2 Kor. 10:10.

7. Sonaha sada sanina patuduhkon anggo ia halak na toruh maruhur?

⁷ Bahat do hita gabe tarojur dob mambasa pangalaman ni Sanina Karl F. Klein na ongga mangidangi gabe anggota pangurus pusat. Ibagas pangalamanni, jujur do ia mangakui  hagalekonni ampa parsoalanni. Umpamani, marusaha do ia marbarita hun rumah hu rumah bani tahun 1922. Tapi halani sunsah pangahapni mangkorjahon ai, lang be ia marbarita sadokah dua tahun. Dob ai sanggah mangidangi i Betel, dong ma sanina na mamodahi ia. Sompat do borit uhurni. Ongga do homa ia depresi. Hassi pe sonai, bahat do tugas-tugas na ponting na idalankon sanina on. Tangkas ma halak na toruh maruhur do sanina on halani ra do ia mangakui hahuranganni hassi pe bahat sanina botou na mananda ia. Jadi ai ma na idingat sanina botou humbani Sanina Klein. *

8. Sonaha 1 Petrus 5:6 patuduhkon halak na toruh maruhur ai boi pamalaskon uhur ni Jahowa?

⁸ Alasan na sipontingan mase hita toruh maruhur halani ai do na mambahen malas uhur ni Jahowa. Tangkas do on ipatugah apostel Petrus bani suratni. (Basa 1 Petrus 5:6.) Bani buku “Mari Jadilah Pengikutku” iulas do na ihatahon si Petrus ai. Bani buku ai ipatorang usih songon rasun do gijang ni uhur. Halak na pentar tumang anggo gijang uhurni, boi do gabe lang marguna ia i lobei ni Naibata. Tapi jolma na maetek boi do marguna bani Jahowa anggo toruh maruhur ia. Marosuh do Jahowa mamasu-masu halak na toruh maruhur. * Halani ai, na sidearan na porlu ibahen hita ai ma mambahen malas uhur ni Jahowa.​—Pod. 23:15.

9. Mase halak sihol dohor hubanta anggo toruh maruhur hita?

⁹ Leganni ai, anggo toruh maruhur hita, bahat do gunani ai hubanta. Umpamani, ai mambahen halak sihol dohor hubanta. Mase sonai? Pingkirhon ma bani ise do ham rosuh marhasoman. (Mat. 7:12) Somalni lang marosuh hita dohor bani halak na pitah mamingkirhon harosuh ni sandiri janah seng ra manangihon hata ni halak. Tapi marosuh do hita dohor bani sanina botou na ‘sauhur, sapangahapan, parholong ni uhur bani hasoman, paridop ni uhur, anjaha partoruh ni uhur’. (1 Ptr. 3:8) Jadi anggo marosuh hita bani halak sisonai, tontu marosuh do homa halak hubanta anggo toruh maruhur hita.

10. Mase halak na toruh maruhur boi martahan ibagas hasunsahan?

¹⁰ Anggo toruh maruhur hita, lambin urah ma hita martahan ibagas hasunsahan. Sipata,  bahat do na geduk ididah hita anjaha ra do homa masa ai hubanta. Raja Salomo mangkatahon, “Huidah jabolon mangajak huda, hape raja-raja mardalan nahei songon jabolon.” (Par. 10:7) Sipata dong halak na pentar tumang, tapi lang adong jolma na hormat hu bani. Hape dong do halak na lang pentar, tapi bahat do halak na mamujisi. Hassi pe sonai, si Salomo mangkatahon dearan do lang sai ipingkiri hita situasi na mambahen borit uhurta. (Par. 6:9) Anggo toruh maruhur hita, tontu ihasonangkon hita ma aha pe na masa hassi pe lang songon na iharosuhkon hita ai.

11. Aha do na maningon bahenonta anggo dong na mamodahi hita?

¹¹ Bai ganup panorang hita boi patuduhkon toruh ni uhur. Pardiateihon ma piga-piga situasi. Sanggah dong na mamodahi. Sanggah dong hasoman na marusaha mamodahi hita, ra do lang ibotoh hita domma banggal hasalahan na ibahen hita. Bani situasi sisonai, ra do lang marosuh hita manjalo podahni ai. Ra do gabe isalahkon hita halak na mamodahi ai, atap carani mambere podah. Tapi anggo toruh maruhur hita, tontu marusaha do hita ase lang borit uhurta.

12. Domu bani Podah 27:5, 6, mase maningon martarima kasih hita anggo dong na mamodahi hita? Bahen ma contoh.

¹² Tontu ihargai halak na toruh maruhur do anggo dong na mamodahisi. Contohni, bayangkon ma dob salosei partumpuan, marbuali ham pakon piga-piga sanina botou. Dob ai, dong ma sada hasoman sipsip patugahkon dong sipanganon longkot i iponmu. Tontu maila do ham halani ai. Tapi martarima kasih do ham halani ra ia patugahkon ai. Ra do nini uhurmu hurang podas ma namin ia mangkatahon ai. Jadi sonai ma hita, anggo dong sanina botou na barani mamodahi hita, maningon martarima kasih do hita hu bani. Anggap hita ma ia huan-kuan sedo imbangta.​—Basa Podah 27:5, 6; Gal. 4:16.

13. Sonaha hita patuduhkon toruh ni uhur sanggah dong na mandapot tanggung jawab i kuria?

¹³ Sanggah dong na mandapot tanggung jawab i kuria. Sada sintua na margoran si Jason mangkatahon, “Anggo dong na ibere tanggung jawab i kuria, sipata ra do sungkun-sungkun ibagas uhurhu, ‘Mase lang ahu na ipilih?’” Ongga do sonai pangahapmu? Dear do namin anggo hita “sihol” mandapot lobih bahat tugas i kuria. (1 Tim. 3:1) Tapi maningon jaga ma hita halani boi do ai mambahen  hita gabe halak na gijang maruhur. Umpamani, ra do adong sanina na mangagan pitah ia na boi mambobahon sada tugas. Atap ra do adong istri na marpingkir, ‘Dearan do suamiku mandalankon tugas ai marimbangkon botou na legan.’ Tapi anggo toruh maruhur hita, tontu lang sonai pangahapta.

14. Aha do na iparlajari hita humbani pambahenan ni si Musa sanggah dong halak na mandapot tugas?

¹⁴ Pardiateihon ma sonaha pambahenan ni si Musa sanggah dong na ibere tanggung jawab. Marosuh tumang do ia mambobahon bangsa Israel. Tapi sanggah ibere Jahowa deba tugasni ai bani halak na legan, sonaha pangahapni? Lang simburu ia. (4 Mus. 11:24-29) Sonai homa sanggah manguhumi bangsa ai, ipaturut si Musa do halak na legan mangurupisi. Hunjon taridah ma anggo ia halak na toruh maruhur. (2 Mus. 18:13-24) Hasilni, lang pala dokah-dokah halak Israel paimahon sanggah dong parsoalan ni sidea. Jadi tangkas ma pontingan do bani si Musa mangurupi halak na legan, marimbangkon mandapot buei tanggung jawab. Tontu sada siusihan na madear do on. Jadi anggo sihol hita igunahon Jahowa, patuduh ma toruh ni uhur, halani harganan do ai marimbangkon hapentaran. Dingat ma, hassi pe timbul Jahowa, tapi “ibere do idop ni uhur bani na toruh maruhur”.​—1 Ptr. 5:5; Ps. 138:6.

15. Parubahan aha ma na iahapkon piga-piga sanina botou?

¹⁵ Sanggah dong parubahan situasi. Baru-baru on bahat do sanina botou na mandapot parubahan tugas. Umpamani, bani tahun 2014 na salpu, pengawas distrik pakon istrini ipindo ase mangkorjahon tugas na legan. Leganni ai, sanina na marumur 70 tahun lang boi be mangidangi gabe sintua kaliling. Anjaha sanina na marumur 80 tahun lang boi gabe koordinator badan penatua i kuria. Bahat do homa halak i Betel na itugaskon gabe  parintis. Dong do homa na lang boi be mandalankon tugasni halani boritan ia, atap halani mangurus kaluarga, atap halani alasan na legan.

16. Sonaha sanina botou patuduhkon toruh ni uhur sanggah dong parubahan tugas?

¹⁶ Bahat do sanina botou na lang urah manjalo parubahan ai. Halani domma martahun-tahun sidea mandalankon tanggung jawabni, tontu marosuh ma sidea bani tugasni ai. Jadi, ra do adong na pusok uhurni sanggah ipindo manadingkon tugasni. Hassi pe sonai, dokah-dokah, ujungni boi do sidea manjalo parubahan ai. Mase? Halani holong tumang sidea bani Jahowa. Janah iarusi do anggo sidea domma mangondoskon diri bani Naibata, sedo bani tugas atap tanggung jawab. (Kol. 3:23) Halani toruh maruhur, malas do uhur ni sidea mandalankon tugas aha pe. Janah halani mambotoh parduli do Jahowa bani sidea, ‘iompaskon sidea ma ganup holsoh ni uhurni’ hu Bani.​—1 Ptr. 5:6, 7.

17. Mase hita martarima kasih halani iojur patuduhkon toruh ni uhur?

¹⁷ Martarima kasih do hita halani Naibata mangojur hita ase patuduhkon toruh ni uhur. Anggo martoruh ni uhur hita, marguna do ai hubanta ampa bani halak na legan. Gabe boi ma hita martahan lang soal aha pe na masa. Na sipontingan, lambin dohor ma hita bani Jahowa. Hassi pe Ia Naibata ‘Na Tang Sitimbulan pakon Na Tang Marmulia’, tapi ihaholongi Ia do anjaha maharga do Bani juakjuak-Ni na martoruh ni uhur. Tontu malas uhurta mambotoh ai.​—Jes. 57:15.