ARTIKEL PARLAJARAN 36
Marmalas ni Uhur Paimahon Harmagedon!
“Ipatumpu ma sidea bani sada ianan, na margoran Harmagedon.”—PANGK. 16:16.
DODING 150 Pindahi ma Naibata Ase Maluah
NA LAHO IULAS *
1-2. (a) Mase Harmagedon mambahen hita marmalas ni uhur? (b) Sungkun-sungkun aha na laho iulas hita bani artikel on?
ONGGA do nasiam manangar pasal “Harmagedon”? Bahat halak mangkatahon anggo ai porang nuklir atap bencana alam na laho pasedahon tanoh on. Tapi Bibel mangkatahon anggo porang Harmagedon ai parohkon malas ni uhur hubanta. (Pangk. 1:3) Porang ai sedo na laho manripaskon jolma tapi laho paluahkon do. Sonaha carani?
2 Porang Harmagedon paluahkon jolma marhitei pasohkon pamarentahan ni manisia. Bani porang ai, iripaskon ma ganup parjahat ase halak na pintor boi manggoluh sadokah ni dokahni. Porang ai paluahkon jolma marhitei manjaga tanoh on ase ulang maseda. (Pangk. 11:18) Ase lambin iarusi hita ai, ulas hita ma ompat sungkun-sungkun on: Aha do Harmagedon ai? Aha do na laho masa paima roh Harmagedon? Sonaha hita boi maluah sanggah roh Harmagedon? Sonaha hita boi totap setia paimahon Harmagedon ai?
AHA DO HARMAGEDON AI?
3. (a) Aha do “Harmagedon” ai? (b) Domu bani Pangungkabon 16:14, 16, mase ihatahon anggo Harmagedon ai sedo sada ianan i tanoh on?
3 Basa Pangungkabon 16:14, 16. Bani Bibel, pitah sahali do ipatugah hata “Harmagedon”. On ibuat humbani sahap Heber na mararti Dolog Megiddo. (Pangk. 16:16) Megiddo ai ma sada huta i Israel hinan. (Jos. 17:11) Tapi Harmagedon na isobut ijon sedo sada ianan na adong i tanoh on. Harmagedon ijon ai ma situasi na masa sanggah “raja-raja ni sab dunia on” tumpu laho manlawan Jahowa. (Pangk. 16:14) Isobut do homa ai porang na tarjadi dobkonsi tumpu raja-raja ai. Hunja ibotoh hita anggo Harmagedon ai sedo sada ianan? Na parlobei, lang dong dolog Megiddo. Na paduahon, lang siat ganup “raja-raja ni sab dunia on” ampa sinjatani tumpu i Megiddo. Na patoluhon, songon na laho iulas hita, Harmagedon imulai sanggah raja-raja ni dunia on mamorangi juakjuak ni Naibata na tading i bagei ni ianan i sab tanoh on.
4. Mase porang ni Jahowa ai dong kaitanni pakon Megiddo?
4 Mase porang ni Jahowa ai dong kaitanni pakon Megiddo? Halani bahat do parporangan na masa i Megiddo ampa i Lembah Jesreel na dohor hunjai. Sipata, iurupi Jahowa do juakjuak-Ni sanggah marporang ijai. Umpamani, i “dohorhon bah Megiddo”, iurupi Jahowa do tentara i Israel na ibobahon si Barak manaluhon halak Kanaan na ibobahon si Sisera. Martarima kasih do si Barak ampa si Debora bani Jahowa halani monang sidea. Mandoding ma sidea, “Hun langit marporang bintang-bintang . . . iporangi sidea si Sisera. Bah Kison mangayubkon sidea.”—Panguh. 5:19-21.
5. Aha do leganni porang ni si Barak pakon porang Harmagedon?
5 Bani ujung ni doding ai ihatahon sidea ma, “Sonin ma siap ganup munsuhmu, ale Jahowa. Tapi anggo na mangkaholongi Ham, songon mata ni ari na poltak bani hagogohonni do.” (Panguh. 5:31) Sonai ma homa Naibata manripaskon ganup munsuh-Ni i Harmagedon, janah ipaluah do halak na mangkaholongi-Si. Tapi dong do leganni holi sanggah i Harmagedon. Bani ari ai, lang dihut juakjuak-Ni marporang, janah lang homa marsinjata. Pitah “soh pakon marhatengeran” do sidea bani Jahowa ampa tentara-Ni na i surga.—Jes. 30:15; Pangk. 19:11-15.
6. Sonaha do ra ibahen Jahowa laho manaluhon munsuh-Ni i Harmagedon?
6 Sonaha holi Jahowa manripaskon munsuh-Ni i Harmagedon? Ra, marragam do cara na igunahon Jahowa. Umpamani, marhitei gempa, udan sira-sira, ampa longgur. (Job 38:22, 23; Hes. 38:19-22) Boi do homa ibahen Ia marsibunuhan munsuh-Ni. (2 Kron. 20:17, 22, 23) Ra do homa marhitei malekat, ibunuh Ia ganup parjahat. (Jes. 37:36) Atap sonaha pe cara na ibahen Jahowa, tontu monang do Ia anjaha masab ganup munsuh-Ni. Dob ai maluah ma ganup halak na pintor.—Pod. 3:25, 26.
AHA DO NA LAHO MASA PAIMA ROH HARMAGEDON?
7-8. (a) Domu bani 1 Tessalonika 5:1-6, tugah-tugah aha holi na sompong ipatugah pamarentah i dunia on? (b) Mase sasintongni bahaya do tugah-tugah ai?
7 Paima “ari ni [Jahowa]”, dong tugah-tugah na mangkatahon ‘damei anjaha sonang’. (Basa 1 Tessalonika 5:1-6.) Ari ni Jahowa na isobut bani 1 Tessalonika 5:2 mangartihon “hamarsikon banggal”. (Pangk. 7:14) Sonaha hita mambotoh anggo hamarsikon banggal ai domma ipungkah? Bani Bibel ihatahon dong holi tugah-tugah na mangkatahon ‘damei anjaha sonang’. Tugah-tugah ai ma na gabe tanda anggo hamarsikon banggal domma ipungkah.
8 Mase raja-raja i dunia on mangkatahon ‘damei anjaha sonang’? Ai dihut do holi pambobai ugama mangkatahon ai? Ra do dihut. Tapi domma ibotoh hita sanggah pamarentah mangkatahon sonai, sasintongni ladung humbani Sibolis ampa malekatni do ai. Anjaha bahaya do ladung ai, halani iahap halak ma domma aman sidea. Hape mintor “sompong ma roh hamagouan ai bani sidea”, songon borit na iahapkon sahalak naboru na
laho manubuhkon anak. Ra, tarsonggot do homa juakjuak ni Naibata halani sompong do ai roh. Hassi pe sonai, domma sirsir sidea.9. Sonaha do holi Jahowa manripaskon Sibolis ampa duniani?
9 Bani panorang ni si Noak, mintor iboiskon Jahowa do ganup parjahat. Tapi bani ari ni Naibata, lang sonai ibahen. Na parlobei iripaskon ai ma Babel na Banggal atap ganup ugama palsu na dong i dunia on. Dob ai, sanggah Harmagedon, iripaskon ma bagian na legan humbani dunia ni Sibolis, ai ma politik, militer, ampa sistem perdagangan. Ulas hita ma haduasi na laho masa on.
10. Domu bani Pangungkabon 17:1, 6 ampa 18:24, mase iripaskon Jahowa holi Babel na Banggal ai?
10 “Uhum bani boru jalang na banggal ai.” (Basa Pangungkabon 17:1, 6; 18:24.) Halani Babel na Banggal domma mangajarhon na lepak pasal Naibata, gabe irisai ma goran ni Jahowa. Songon boru jalang, lang setia ia bani Jahowa halani marpihak ia bani raja-raja i dunia on. Halani banggal kuasani, isiksa ia ma anggotani janah ibuati duitni. Anjaha bahat do homa halak na ibunuh, tarmasuk ma juakjuak ni Naibata. (Pangk. 19:2) Jadi sonaha Naibata manripaskon Babel na Banggal ai?
11. Ise do “binatang sigerger” ai, janah sonaha Jahowa manggunahon ai laho manripaskon Babel na Banggal?
11 Igunahon Jahowa do “sapuluh tanduk” ni “binatang sigerger” laho manripaskon “boru jalang na banggal ai”. Binatang ai manggambarhon Perserikatan Bangsa-Bangsa. Janah sapuluh tanduk manggambarhon ganup pamarentahan na dihut bani organisasi ai. Bani panorang na itontuhon Naibata, iserang Perserikatan Bangsa-Bangsa ma Babel na Banggal ai. Gabe ‘lungunan ma ibahen sidea ia anjaha talanjang’. Irampas ma habayakonni janah ipatalar ma hajahatonni. (Pangk. 17:3, 16) Sompong do masa parboisni ai songon ibagas “sadari”. Halani ai, gabe tarsonggot ma ganup na mangihutkonsi, tarlobih halani gati ia mangkatahon, “Marparatas do ahu songon raja naboru, sedo na mabalu ahu, seng anjai idahonku pusok ni uhur.”—Pangk. 18:7, 8.
12. Mase lang ipaturut Jahowa bangsa-bangsa mamboiskon juakjuak-Ni?
12 Lang ipaturut Naibata bangsa-bangsa manripaskon juakjuak-Ni halani megah do pangahap ni sidea itanda gabe Saksi Jahowa. Itangihon sidea do parentah ase kaluar hun Babel na Banggal. Janah marusaha do homa sidea mangurupi halak na legan ase kaluar hunjai. (Lah. 15:16, 17; Pangk. 18:4) Halani ai lang dihut juakjuak ni Naibata ihonai sitaronon ni Babel na Banggal ai. Hassi pe sonai maningon do tongtong ipatoguh sidea haporsayaonni ase boi sidea martahan ibagas hasunsahan na laho roh.
Ija pe hita tading, totap do hita porsaya bani Jahowa sanggah iparburu (Tonggor ma paragrap 13) *
13. (a) Ise do na isobut Gog? (b) Domu bani Hesekiel 38:2, 8, 9, aha do na mambahen Gog mamorangi juakjuak ni Jahowa?
13 Serangan humbani Gog. (Basa Hesekiel 38:2, 8, 9.) Dob masab ganup ugama palsu, pitah sada mando ugama i tanoh on. Pitah juakjuak ni Jahowa dassa na dong. Gabe marah ma Sibolis. Marhitei “tonduy na mabutak”, ibahen ia ma ase tumpu ganup bangsa laho mamorangi juakjuak ni Jahowa. (Pangk. 16:13, 14) Ganup bangsa na marsada ai isobut “Gog na i tanoh Magog”. Jadi sanggah iserang sidea juakjuak ni Naibata, ipungkah ma porang Harmagedon.—Pangk. 16:16.
14. Aha ma na ibotoh Gog bani ujungni?
14 Porsaya do Gog bani tentarani. (2 Kron. 32:8) Songon halak na oto ma hita ididah bangsa-bangsa halani porsaya bani Jahowa. Mase? Halani domma ididah sidea hassi pe markuasa Babel na Banggal ai, tapi lang markuasa naibatani laho paluahkon ia humbani ‘binatang ai’ ampa ‘sapuluh tandukni’. (Pangk. 17:16) Jadi iagan sidea ma urah do mamboiskon hita. Songon hombun na manrungkub tanoh, sonai ma sidea mamorangi juakjuak ni Naibata. (Hes. 38:16) Tapi ujungni ibotoh sidea ma lang boi monang sidea. Songon raja ni Masir i Laut Sigerger, gabe ibotoh Gog ma Jahowa do hape na ilawan sidea.—2 Mus. 14:1-4; Hes. 38:3, 4, 18, 21-23.
15. Aha ma na laho bahenon ni Jesus i Harmagedon?
15 Ipaluah Jesus ampa tentarani na i surga ma juakjuak ni Naibata, janah iripaskon ma ganup pangihut ni Sibolis. (Pangk. 19:11, 14, 15)Tapi aha ma na laho masa bani Sibolis na domma mambahen bangsa-bangsa mamorangi juakjuak ni Naibata i Harmagedon? Isampakkon Jesus ma ia pakon ganup malekatni hu jurang na bagas, janah igari ma sidea ijai sadokah saribu tahun.—Pangk. 20:1-3.
SONAHA HITA BOI MALUAH SANGGAH ROH HARMAGEDON?
16. (a) Sonaha hita patuduhkon anggo hita “mananda Naibata”? (b) Sanggah porang Harmagedon, pasu-pasu aha ma na idapot ganup halak na mananda Naibata?
16 Aha ma na porlu bahenonta ase boi maluah hun Harmagedon? Lang soal domma dokah atap baru ope hita mambotoh hasintongan, maningon marusaha ma hita “mananda Naibata” janah “mambalosi ambilan na madear ni Tuhanta Jesus”. (2 Tes. 1:7-9) Hita mananda Naibata anggo ibotoh hita harosuh-Ni, aha na ihagigihon-Si, ampa aturan-Ni. Itanda hita do homa Ia anggo ihaholongi hita Ia, ibalosi hita titah-Ni, janah pitah Ia dassa na isombah hita. (1 Joh. 2:3-5; 5:3) Anggo ihorjahon hita ganupan ai, gabe halak na “tinanda ni Naibata” ma homa hita. (1 Kor. 8:3) Artini, marosuh do Ia banta. Hasilni, ilinggomi Ia ma hita sadokah porang Harmagedon.
17. Aha do artini “mambalosi ambilan na madear ni Tuhanta Jesus”?
17 Na imaksud “ambilan na madear ni Tuhanta Jesus” ai ma ganup hasintongan na iajarhon Jesus. On boi ibasa hita ibagas Bibel. Sanggah idalankon hita ajaranni ibagas hagoluhanta, dos do ai hita mambalosi ambilan na madear in. Ibalosi hita do homa ai marhitei palobeihon Harajaon ni Naibata, mangihutkon aturan-Ni ampa mambaritahon pasal Mat. 6:33; 24:14) Maningon do homa iurupi hita halak Kristen na iminaki mangkorjahon tugasni.—Mat. 25:31-40.
Harajaon ai. (18. Sonaha carani halak na iminaki mambalaskon habujuran na ipatuduh bani sidea?
18 Lang piga dokah nari, ibalaskon halak na iminaki ma habujuran na ipatuduh “biribiri na legan” hubani sidea. (Joh. 10:16) Sonaha carani? Paima ipungkah porang Harmagedon, domma i surga na 144.000 halak na iminaki ai, janah mandapot hagoluhan na so ra matei. Dihut do sidea gabe tentara laho manripaskon Gog janah manjaga “humpulan na banggal”, juakjuak ni Naibata. (Pangk. 2:26, 27; 7:9, 10) Tontu malas tumang ma uhur ni humpulan na banggal ai halani domma mangurupi halak na iminaki sanggah i tanoh on ope sidea.
SONAHA HITA BOI TOTAP SETIA PAIMAHON HARMAGEDON?
19-20. Hassi pe marsitaronon, sonaha hita boi totap setia paimahon Harmagedon?
19 Sadokah panorang parpudi, bahat do juakjuak ni Jahowa na marsitaronon. Hassi pe sonai, boi do hita martahan ibagas malas ni uhur. (Jak. 1:2-4) Sada cara na boi mangurupi hita, ai ma anggo totap hita martonggo. (Luk. 21:36) Sobali martonggo, maningon iparlajari hita do homa Bibel bani ganup ari, janah manrimangi isini ampa pasal panjahaion na laho masa. (Ps. 77:13) Anggo ihorjahon hita ai, janah ibahen hita na sidearan sanggah mangidangi, gabe toguh ma haporsayaon ampa pangarapanta.
20 Bayangkon ma malas n i uhur na iahapkon nasiam halani lang dong be holi Babel na Banggal janah domma salosei porang Harmagedon ai. Tapi na sipontingan na mambahen malas uhurmu ai ma sanggah ganup halak papansingkon goran ni Jahowa, janah unduk bani pamarentahan-Ni. (Hes. 38:23) On ma na mambahen ganup halak na mananda Naibata, na manangihon Anak-Ni, ampa na martahan das hu ujung totap paimahon Harmagedon ai.—Mat. 24:13.
DODING 143 Totap Marjaga janah Paimahon
^ par. 5 Tontu tarpaima-ima do hita bani parroh ni Harmagedon. Bani artikel on, iulas hita ma aha do Harmagedon ai, aha do na masa paima roh Harmagedon, anjaha sonaha hita boi totap setia halani domma dohor Harmagedon.
^ par. 71 HATORANGAN GAMBAR: Bahat do na laho masa banta bani ari na laho roh. Jadi (1) maningon marbarita ma hita humbani tuk ni gogohta, (2) totap marlajar Bibel, anjaha (3) porsaya ilinggomi Jahowa do hita.
^ par. 85 HATORANGAN GAMBAR: Polisi na mandorab rumah ni hasomanta laho manangkap sidea. Tapi porsaya do sidea ididah Jesus ampa malekatni do na masa ai.