ARTIKEL PARLAJARAN 38
‘Roh ma Nasiam hu Bangku, Ase Hupasonang Nasiam’
“Roh ma nasiam hu bangku, nasiam na loja anjaha na boratan, ase hupasonang nasiam.”—MAT. 11:28.
DODING 17 “Ra do Ahu”
NA LAHO IULAS *
1. Domu bani Mateus 11:28-30, aha do na ijanjihon Jesus bani susianni?
IBERE Jesus do sada janji na jenges hubani halak na manangar ambilanni. Nini do, “Roh ma nasiam hu bangku, . . . ase hupasonang nasiam.” (Basa Mateus 11:28-30.) On sedo pitah sahap tumang. Pardiateihon ma aha na ibahen Jesus bani sada naboru na domma dokah boritan.
2. Aha ma na ibahen Jesus hubani sada naboru na boritan?
2 Porlu tumang do iurupi naboru ai. Domma laho ia martambar ase malum. Tapi dobkonsi 12 tahun pe, tong do lang malum ia. Bani Titah ihatahon halak na butak do ia. (3 Mus. 15:25) Bani sada ari itangar ma anggo Jesus boi pamalumkon sagala naborit. Jadi laho ma ia manjumpahi Jesus. Dob jumpah pakonsi, ijamah ia ma ujung ni hiouni lanjar malum ma ia. Ijon Jesus lang pitah pamalumkon naboru ai. Tapi ibahen Jesus do homa ase naboru ai ulang lalab maretek ni uhur. Umpamani sanggah ihatahon Jesus bani naboru ai “inang”, tontu gabe sonang anjaha toguh ma pangahap ni naboru ai dob manangar ai.—Luk. 8:43-48.
3. Sungkun-sungkun aha do na laho iulas hita bani artikel on?
3 Pardiateihon ma nongkan ihatahon laho do naboru ai manjumpahi Jesus. Lang pitah soh ia. Sonai homa sonari on, iontang Jesus do homa hita, “Roh ma nasiam hu bangku, . . . ase hupasonang nasiam.” Songon naboru ai, maningon “roh” do hita hu bani. Tapi sedo na laho ipamalum Jesus halak na ‘roh hu’ bani. Bani artikel on dong lima sungkun-sungkun na laho iulas hita: Sonaha hita boi roh hu bani Jesus? Sanggah Jesus mangkatahon, ‘Jalo ma pasanganku,’ aha do artini ai? Aha do na boi itiru hita hun bani? Mase sonang uhurta mangkorjahon tugas na ibere ia? Anjaha aha do na porlu ibahen hita ase totap sonang uhurta manjalo pasangan ai?
“ROH MA NASIAM HU BANGKU”
4-5. Aha do piga-piga cara na boi ibahen hita ase boi ‘roh hubani’ Jesus?
4 Sada cara hita boi ‘roh hubani’ Jesus marhitei mamparlajari aha na iajarhon ampa na ibahen ia. (Luk. 1:1-4) Maningon marusaha do hita mamparlajari aha na iajarhon Bibel pasal Jesus. Leganni ai, hita pe ‘roh hubani’ Jesus anggo ra hita ididi janah mandalankon ajaranni.
5 Cara na legan hita boi ‘roh hubani’ Jesus marhitei manjumpahi sintua laho mangurupi hita. “Sibere-bere bani jolma” do sidea ai na igunahon Jesus laho mansarihon susianni. (Ep. 4:7, 8, 11; Joh. 21:16; 1 Ptr. 5:1-3) Halani lang ibotoh sidea na ibagas uhurta ampa na ihaporluhon hita, jadi maningon ijumpahi hita do sidea laho mangindo pangurupionni. Pardiateihon ma contoh humbani si Julian. Nini do, “Halani hurang sehat ai ahu, huahap lang sanggup be ahu mangidangi i Betel. Tapi iojur hasomanku ma ahu ase manjumpahi sintua laho mangojur ahu. Mungkahni huahap lang porlu ai. Tapi ujungni hupangindo ma sintua ase roh manjumpahi ahu. Dobkonsi roh sidea, huahap songon sibere-bere do parroh ni sidea ai hubangku.” Songon si Julian na irohi dua sintua ai, hita pe boi do iurupi sintua laho mangarusi ‘pingkiran ni Jesus’ anjaha mangusihi aha na ibahen ia. (1 Kor. 2:16; 1 Ptr. 2:21) Songon sibere-bere do na ibahen sidea ai.
“JALO NASIAM MA PASANGANKU”
6. Aha do maksud ni Jesus sanggah ia mangkatahon, “Jalo nasiam ma pasanganku”?
6 Sanggah ihatahon Jesus, “Jalo nasiam ma pasanganku,” ra do maksudni “Unduk ma hubangku.” Atap ra do homa maksudni, “Rap ma hita mamorsan pasangan on, anjaha rap ma hita marhorja bani Jahowa.” Jadi, pasangan ijon artini dong sada horja na maningon ihorjahon hita.
7. Domu bani Mateus 28:18-20, horja aha do na ibere hubanta, anjaha aha do na mambahen pos uhurta?
7 Anggo ra hita mangondoskon diri bani Jahowa anjaha ididi, dos do ai hita manjalo ontangan ni Jesus. Hubani ganup halak do ibere ontangan ai. Lang ongga itulak Jesus ise pe na sihol mangidangi Naibata. (Joh. 6:37, 38) Hubani ganup halak Kristen do ibere Jahowa do tugas na ponting, ai ma tugas na ibere Ia hinan hubani Jesus. Pos ma uhurta sai ihasomani anjaha urupan ni Jesus do hita ase boi mangkorjahon tugas ai.—Basa Mateus 28:18-20.
“MARGURU MA NASIAM HUN BANGKU”
Bahen ma sonang halak songon na ibahen Jesus (Tonggor ma paragrap 8-11) *
8-9. Mase halak na toruh maruhur sihol dohor hubani Jesus, anjaha sungkun-sungkun aha do na porlu irimangi ham?
8 Sihol do halak na toruh maruhur dohor hubani Jesus. (Mat. 19:13, 14; Luk. 7:37, 38) Mase? Halani Jesus lang songon halak Parisei. Halak Parisei ai lang parholong anjaha gijang uhurni. (Mat. 12:9-14) Tapi anggo Jesus, parholong do ia janah toruh maruhur. Halak Parisei sihol ase ipasangap halani iahap sidea halak na ponting do sidea ai. Tapi Jesus lang sonai. Iajari do susianni ase martoruh ni uhur janah ra mangidangi na legan. (Mat. 23:2, 6-11) Bahat do halak na mabiar anggo lang mangkorjahon harosuh ni halak Parisei. (Joh. 9:13, 22) Tapi anggo Jesus, bujur do parsahapni anjaha dear do pambahenanni bani na legan.
9 Aha ma na boi itiru hita humbani Jesus? Rimangi ma sungkun-sungkun on: ‘Ai halak na lamlam anjaha na toruh maruhur do ahu itanda halak? Ai ra do ahu songon jabolon laho mangurupi na legan? Ai bujur do ahu bani na legan?’
10. Sonaha ma pangahap ni halak na rap marhorja pakon Jesus?
10 Ibahen Jesus do ase susianni marmalas ni uhur sanggah rap marhorja pakonsi, janah ilatih do homa sidea. (Luk. 10:1, 19-21) Halani ai, lang mabiar sidea manungkun hu bani. Sihol do homa ia manangar pandapot ni susianni. (Mat. 16:13-16) Songon suan-suanan i tanoh na madear, sonai ma homa susian ni Jesus na torus mandapot pangajaran hun bani. Gabe marbuah ma sidea janah taridah do buah ni ai humbani horja na ibahen sidea.
11. Sungkun-sungkun aha ma na laho irimangi hita?
11 Ai pengawas do homa ham? Anggo sonai, rimangi ma sungkun-sungkun on: ‘Sonaha do pambahenanku bani halak sanggah marhorja ampa sanggah i rumah? Ai hubahen do sidea marmalas uhur? Ai hubahen do halak ase ulang mabiar manungkun hubangku? Ai ra do ahu manangar pandapot ni sidea?’ Tontu lang ra hita songon halak Parisei na mintor manggila bani halak na lang porsaya bani hata ni sidea. Kejam do homa sidea bani halak na lang setuju bani pandapotni.—Mrk. 3:1-6; Joh. 9:29-34.
Basar anjaha bujur marhasoman
Ringgas mangidangi
Toruh maruhur anjaha sirsir mangurupi *
‘DAPOTAN HASONANGAN MA NASIAM’
12-14. Mase tugas na ibere Jesus boi pasonangkon uhurta?
12 Mase gabe sonang uhurta anggo idalankon hita tugas na ibere Jesus? Bahat do alasanni. Tapi pardiateihon hita ma piga-piga.
13 Dong pengawas-pengawas na sidearan. Hassi pe Jahowa ai Naibata na Sitimbulan, tapi sedo pengawas na kejam Ia. Ihargai Ia do pambahenanta. (Heb. 6:10) Anjaha ibere do hagogohan hubanta ase boi mandalankon tugasta. (2 Kor. 4:7; Gal. 6:5) Dong homa Jesus, Raja na domma mambere siusihan sonaha hita marparlahou bani na legan. (Joh. 13:15) Leganni ai, dong homa sintua-sintua na marusaha maniru Jesus, “siparmahan bolon” in. (Heb. 13:20; 1 Ptr. 5:2) Bujur anjaha lamlam do sidea. Janah barani do sidea sanggah manlinggomi ampa mansarihon hita.
14 Dong hasoman-hasoman na sidearan. Lang dong halak na songon hita. Anggo hita, parholong do ganup hasomanta anjaha sarupa do homa tujuanta. Pingkirhon ma: Rap marhorja do hita pakon hasoman na dear marparlahou janah lang mamontingkon diri. Hassi pe pandei, toruh maruhur do sidea. Lang pitah rap marhorja dassa hita, tapi hasoman na orot do hita pakon sidea. Janah halani holong tumang hubanta, sirsir do sidea matei laho mangkopkop hita!
15. Sonaha ma pangahapta mangkorjahon tugasta?
15 Dong horja na sidearan. Iajarhon hita do hasintongan pasal Jahowa hubani halak janah ipatalar hita do ladung ni Sibolis. (Joh. 8:44) Marusaha do Sibolis mambahen halak porsaya bani ladungni ase mandolei sidea. Umpamani, sihol do ia ase ganup halak porsaya anggo Jahowa lang ra manasap dousanta anjaha lang talup hita manjalo holong-Ni. Sambor tumang do ladungni ai! Sasintongni, anggo hita ‘roh hubani’ Jesus, isasap do dousanta. Anjaha holong tumang do Jahowa hubanta. (Rom 8:32, 38, 39) Tontu malas tumang uhurta boi mangurupi halak marpangunsandeian bani Jahowa ase martuah sidea!
TOTAP MA SONANG UHURTA MANJALO PASANGAN NI JESUS
16. Aha do leganni tugas na ibere Jesus pakon tugasta na leganni?
16 Lang sarupa tugas na ibere Jesus pakon tugasta na leganni. Umpamani, bahat do halak na loja janah lang martuah sidea dob mulak hun parhorjaan. Tapi anggo hita, malas do uhurta halani sibuk mangidangi Jahowa. Hassi pe domma loja hita sanggah mulak hun parhorjaan, marpala-pala do hita ase boi roh hu partumpuan. Tapi dob mulak hunjai, ipatoguh anjaha sonang do uhurta. Leganni ai, ra do maningon ibahen hita pengorbanan laho marbarita ampa marlajar Bibel. Tapi banggalan do holi pasu-pasu na idapot hita marimbangkon pengorbananta ai.
17. Aha do na maningon ipingkiri hita?
17 Marbatas do gogohta. Halani ai maningon maruhur ma hita mamilih na laho sihorjahonon. Umpamani, boi do gabe palojatu hita halani patumpuhon buei arta. Pardiateihon ma sarita pasal sada dalahi na bayak bani panorang ni Jesus. Isungkun dalahi ai ma bani Jesus, “Aha do sibahenonku, ase dapot ahu hagoluhan sisadokah ni dokahni?” Domma ihorjahon dalahi ai na ihatahon bani Titah. Songon na ipatugah bani Injil Markus, gabe “holong ma uhur ni Jesus mangidahsi”. Jadi iontang ia ma dalahi ai, ‘Laho ma ham, jual ham ma haganup na dong bamu, dob ai, irikkon ham ma ahu!’ Sihol do namin dalahi ai mangirikkon Jesus, tapi lang ra ia halani ihatahon “pararta na buei do ia”. (Mrk. 10:17-22) Halani artani ai, lang ra ia manjalo pasangan ni Jesus. Pangahapni pontingan do habayakonni ai. (Mat. 6:24) Anggo nasiam, aha do na ipilih nasiam?
18. Aha do na maningon tongtong ibahen hita, janah mase?
18 Maningon tongtong do ipingkiri hita aha na sipontingan ibagas goluhta. Mase? Halani anggo lang jaga, boi do gabe bois gogohta mangkorjahon na lang ponting. Pardiateihon ma pangalaman ni si Markus. Nini do, “Sadokah martahun-tahun, huagan do ahu lang be mamingkiri pasal duit. Tongon merintis do ahu, tapi bahatan do panorangku hubahen laho mangindahi duit ase boi sonang goluhku. Lang huarusi mase sunsah goluhku. Ujungni hubotoh ma anggo ahu lang mambere na sidearan bani Jahowa. Bahatan do panorang ampa gogohku laho mangindahi harosuhku sandiri.” Jadi ibahen si Markus ma parubahan ase boi mambere na sidearan bani Jahowa. Nini si Markus use, “Sipata, holsohan do ahu pasal duit. Tapi, halani Jahowa pakon Jesus mangurupi ahu, gabe boi ma ahu palobeihon pangidangion.”
19. Sanggah mangkorjahon tugasta, mase maningon iihutkon hita harosuh ni Jahowa?
19 Ase boi tongtong sonang uhurta mangkorjahon tugas na ibere Jesus, dong tolu na maningon ihorjahon hita. Na parlobei, tongtong ma mangihutkon tugah-tugah. Halani humbani Jahowa do tugasta, maningon mangihutkon harosuh-Ni ma hita marhorja. Dingat ma jabolon do hita, janah Jahowa do Tuan. (Luk. 17:10) Songon horbo, sonaha pe gogohni anggo mardalan ia mangihutkon harosuhni sandiri, sedo harosuh ni parmahan, gabe loja ma ia. Hita pe anggo mangihutkon harosuhta sandiri, gabe sunsah ma holi hita. Tapi anggo marusaha hita mangihutkon tugah-tugah humbani Jahowa, aha pe masalahta boi do salosei ai. Dingat ma, lang adong na boi manlanglangi parsaud ni harosuh ni Jahowa!—Rom 8:31; 1 Joh. 4:4.
20. Aha do na mangojur hita ase ra manjalo pasangan na ibere Jesus?
20 Na paduahon, maningon sintong ma alasanta mangidangi Jahowa. Hita mangidangi Jahowa halani sihol pasangapkon goran-Ni. Bani abad na parlobei, dong do na mangihutkon Jesus halani mamontingkon diri. Tapi ujungni lang martuah sidea janah itadingkon sidea ma pasangan na ibere Jesus. (Joh. 6:25-27, 51, 60, 66; Pil. 3:18, 19) Tapi legan do halak na mangidangi halani holong uhurni bani Jahowa ampa hasoman. Martuah do sidea mandalankon tugas na ibere Jesus. Anjaha marpangarapan do sidea mamarentah pakon Jesus i surga. Songon sidea, hita pe boi marmalas ni uhur mangkorjahon tugasta anggo sintong alasanta manjalo pasangan na ibere Jesus.
21. Domu bani Mateus 6:31-33, aha na mambahen pos uhurta?
21 Na patoluhon, maningon pos ma uhurta. Bahat do horja ampa pengorbanan na maningon ibahen hita. Dob ai, iparburu do homa hita. Tapi pos ma uhurta ipargogohi Jahowa do hita ase totap martahan. Anggo martahan hita, lambin toguh ma hita. (Jak. 1:2-4) Porsaya ma isarihon Jahowa do hita, iparmahani Jesus homa hita, janah dong sanina botou na patoguhkon uhurta. (Basa Mateus 6:31-33; Joh. 10:14; 1 Tes. 5:11) Ganupan ai boi mangurupi hita ase totap martahan.
22. Mase maningon martarima kasih hita?
22 Sanggah ipamalum Jesus naboru na boritan nongkan ai, tontu sonang ma uhurni. Tapi ase totap sonai pangahapni, maningon totap ma ia mangirikkon Jesus. Bayangkon ma pasu-pasu aha na dapotsi porini ijalo ia pasangan na ibere Jesus. Gabe dihut ma ia mamarentah i surga. Banggalan do pasu-pasu na idapot ia marimbangkon pengorbananni. Jadi, lang soal marpangarapan hu surga hita atap i tanoh on, tontu martarima kasih do hita halani domma ijalo hita ontangan on, “Roh ma nasiam hu bangku!”
DODING 13 Kristus do Siusihanta
^ par. 5 Jesus mangontang hita ase roh hu bani. Aha do na porlu ibahen hita laho manjalo ontanganni ai? Bani artikel on ulas hita ma pasal ai. Anjaha iulas hita homa mase boi sonang uhurta anggo rap marhorja pakon Jesus.
