1. Mase hita maningon unduk bani Jahowa?

HALANI Jahowa do na manompa hita, dong do hak-Ni mambahen aturan bani ganup na tinompa-Ni. Jadi maningon unduk * ma hita hu Bani. (Pangk. 4:11) Tapi alasan na legan mase hita manangihon-Si ai ma halani dearan do cara-Ni mamarentah. Humbani na basaia ronsi sonari bahat do jolma na mamarentah hasomanni jolma. Tapi anggo ibandingkon hita carani sidea mamarentah pakon cara ni Jahowa, ibotoh hita ma Jahowa do Raja na sipentaran, parholong, ampa paridop ni uhur.​—2 Mus. 34:6; Rom 16:27; 1 Joh. 4:8.

2. Domu bani Heber 12:9-11 mase hita unduk bani Jahowa?

² Jahowa sihol ase hita unduk hu Bani sedo pitah halani hormat. Tapi halani Ia do Bapanta na parholong. Bani suratni bani halak Heber, apostel Paulus mangkatahon “marunduk ni uhur hita bani Bapa” in, halani Ia mangajarhon na “marguna banta”.​—Basa Heber 12:9-11.

3. (a) Sonaha carani hita unduk bani Jahowa? (b) Sungkun-sungkun aha na laho iulas hita?

³ Hita unduk bani Jahowa anggo marusaha hita humbani tuk ni gogohta mangkorjahon harosuh-Ni, janah lang marpangunsandeian bani pingkiran sandiri. (Pod. 3:5) Gabe lambin urah ma hita unduk hu Bani anggo itanda hita ganup biak-Ni na jenges in. Mase? Halani ganup na ihorjahon-Si romban do bani biak-Ni. (Ps. 145:9) Lambin itanda hita Jahowa, lambin  ihaholongi hita ma Ia. Halani ai, lang pala bahat ipatugah banta pasal aha na boi ampa na lang boi ihorjahon. Anggo marusaha hita mangarusi pingkiran ampa pangahap ni Jahowa, iurupi ma hita mangkorjahon na dear ampa padaohkon diri humbani na sambor. (Ps. 97:10) Tapi sipata lang urah unduk bani Jahowa. Janah aha ma na boi iparlajari sintua, bapa, inang humbani Gubernur Nehemia, Raja Daud, ampa si Maria, inang ni Jesus? Bani artikel on iulas hita ma balosni ai.

4-5. Domu bani Rom 7:21-23, mase lang urah unduk bani Jahowa?

⁴ Sada alasan mase lang urah unduk bani Jahowa ai ma halani mardousa do ganupan hita janah lang gokan dear. On ma na mambahen sipata lang ra hita manangihon Naibata. Sanggah si Adam pakon si Hawa mangankon buah na ilarang ai, sidea manontuhon sandiri pasal na dear ampa na sambor. (1 Mus. 3:22) Sonari pe bahat do halak na lang manangihon Naibata. Songon si Adam pakon si Hawa, rosuhan do sidea manontuhon sandiri pasal na dear ampa na sambor.

⁵ Hassi pe domma itanda hita Jahowa, tapi sipata lang urah iahap hita mangkorjahon harosuh-Ni. Ongga do sonai pangahap ni si Paulus. (Basa Rom 7:21-23.) Songon si Paulus sihol do namin hita mangkorjahon harosuh ni Jahowa. Tapi gati do adong hisap-hisap na maningon ilawan ase boi hita unduk hu Bani.

6-7. Aha ope alasan na legan lang urah unduk bani Jahowa? Bere ma contoh.

⁶ Alasan na legan na mambahen hita lang urah unduk bani Jahowa ai ma halani hasomalan ni halak na tading i iananta. Bahat do sidea na mangajarhon na lang domu bani harosuh ni Jahowa. Halani ai maningon marusaha ma hita ase ulang mangihutkon ajaran ni sidea. Pardiateihon ma sada contoh.

⁷ Bani piga-piga ianan, somal do na maposo iojur mangindahi habayakon. On ma na iahapkon hasomanta si Meri. * Paima marlajar pasal Jahowa, ia marsikolah i sada sikolah na jago i nagorini. Ipaksa kaluargani do ia mangindahi horja na beteng na parohkon bahat duit ase hormat holi halak hu bani. Janah ai do homa harosuhni. Tapi dob itanda ia Jahowa, gabe holong ma uhurni hu Bani, janah mubah ma sura-surani ai. Hassi pe sonai, totap do ai lang urah bani si Meri. Ia mangkatahon, “Sipata dong do dalan ase mandapot bahat duit. Tapi mintor hubotoh ma on boi manlanglangi ahu mangidangi Jahowa. Halani pengaruhni keluarga, tongtong do sunsah huahap manulak ai. Jadi hupindo ma ase iurupi Jahowa ahu manulak horja na boi mambahen ahu daoh hun Bani.”​—Mat. 6:24.

8. Aha ma na laho iulas hita?

⁸ Songon na dob iulas hita, bahat do gunani anggo unduk hita bani Jahowa. Tapi dong do homa tanggung jawab na ibere Jahowa bani sintua, bapa, pakon inang. Anggo iihutkon sidea panogu-noguan ni Naibata, marguna do ai bani na legan. Ulas hita ma piga-piga contoh hun Bibel na mangajarhon sonaha halak na ibere tanggung jawab boi pamalaskon uhur ni Jahowa.

9. Tantangan aha do na iahapkon si Nehemia?

⁹ Ibere Jahowa do tanggung jawab bani sintua laho marmahani atap mansarihon juakjuak-Ni. (1 Ptr. 5:2) Ganupan sidea  boi marlajar humbani siusihan na ibahen si Nehemia sanggah ia marurusan pakon juakjuak ni Naibata. Gubernur Juda do si Nehemia janah bahat do tanggung jawabni. (Neh. 1:11; 2:7, 8; 5:14) Tapi sai adong do tantangan sanggah ia mandalankon tanggung jawabni ai. Ididah ia do horja na sambor na ibahen halak Jahudi i rumah panumbahan. Lang homa ibere sidea parbagianan ni halak Levi songon na dob ititahkon Jahowa. Lang idalankon sidea ari Sabat, anjaha piga-piga dalahi domma marhajabuan pakon naboru hun bangsa na legan. Tontu maningon isaloseihon si Nehemia ma parsoalan ai.​—Neh. 13:4-30.

10. Sanggah dong tantangan, aha ma na ibahen si Nehemia?

¹⁰ Lang isalahgunahon si Nehemia kuasani laho mamaksa halak Israel ase manangihon hatani. Tapi martonggo do ia bani Jahowa laho mangindo panogu-noguan, janah iajarhon do Titah ni Naibata bani bangsa ai. (Neh. 1:4-10; 13:1-3) Toruh maruhur do homa ia mangurupi bangsa ai pajongjongkon use tembok Jerusalem.​—Neh. 4:15.

11. Domu bani 1 Tessalonika 2:7, 8, sonaha ma namin pambahenan ni sintua bani halak na i kuria?

¹¹ Hassi pe lang dos tantangan ni si Nehemia pakon tantangan ni sintua sonari on, tapi itiru sidea do si Nehemia. Umpamani sirsir do sidea mangurupi sanina botou i kuria. Anjaha lang iahap sidea gijangan sidea marimbangkon sanina botou na legan halani tanggung jawab na ibere bani sidea. Lamlam janah bujur do sidea bani sanina botou. (Basa 1 Tessalonika 2:7, 8.) Humbani parsahap ampa pambahenanni, taridah do anggo sintua toruh maruhur janah mangkaholongi sanina botou. Si Andre, sahalak sintua na marpangalaman mangkatahon, “Hupardiateihon, rosuh tumang do sanina botou anggo bujur janah lamlam sintua sanggah marsahap bani sidea. On mangurupi sidea mandalankon tugah-tugah na ibere sintua.” Sintua na legan ai ma si Tony mangkatahon, “Marusaha  do ahu mandalankon podah bani Pilippi 2:3. Huanggap do lobihan hasoman marimbangkon ahu. On ma na mangurupi ahu ase lang mamaksa sidea manangihon hatangku.”

12. Mase sintua maningon martoruh ni uhur?

¹² Maningon toruh maruhur do homa sintua songon Jahowa. Hassi pe Pargogoh Na So Tarimbang Jahowa ai, “manatap-natap dompak toruh” do Ia laho pajongjongkon “halak na [maetek] humbani orbuk”. (Ps. 18:36; 113:6, 7) Tapi ihagigihon do halak na gijang maruhur.​—Pod. 16:5.

13. Mase sintua maningon ‘manrantei dilahni’?

¹³ Sahalak sintua na unduk bani Jahowa maningon ‘manrantei dilahni’. Anggo lang ibahen sidea sonai, ra do holi gabe kasar parsahapni sanggah dong na lang mangkargai sidea. (Jak. 1:26; Gal. 5:14, 15) Si Andre na ipatugah nongkan ai mangkatahon, “Sipata ra do kasar parsahapku sanggah dong na lang mangkargai ahu. Tapi dob hurimangi contoh-contoh humbani halak na setia na dong ibagas Bibel, gabe huarusi ma ponting tumang do martoruh ni uhur.” Jadi ganup sintua patuduhkon sidea unduk bani Jahowa anggo basar janah lamlam sidea marsahap bani sanina botou i kuria, tarmasuk bani sintua na legan.​—Kol. 4:6.

14. Tanggung jawab aha do na ibere Jahowa bani ganup bapa, janah sonaha ma namin sidea mandalankon tanggung jawabni ai?

¹⁴ Ibere Jahowa do tanggung jawab bani ganup bapa gabe kopala kaluarga. Anjaha sihol do ia ase ganup bapa mangajar-ajari ampa maminsang niombahni. (1 Kor. 11:3; Ep. 6:4) Hassi pe sonai, lang boi uhur-uhur ni bapa bani kaluargani. Jahowa do na mambahen ase dong kaluarga. (Ep. 3:14, 15) Halani ai, martanggung jawab do ganup bapa sanggah sidea mansarihon kaluargani. Anggo idalankon sidea kuasani domu bani harosuh ni Jahowa, dos do ai sidea unduk hu Bani. Sidea boi marlajar humbani si Daud.

15. Mase Raja Daud gabe siusihan na madear bani ganup bapa?

¹⁵ Lang pitah bani kaluargani si Daud gabe kopala, tapi ilantik Jahowa do homa ia gabe kopala bani ganup halak Israel. Tontu markuasa do si Daud halani raja ia. Hassi pe sonai, ongga do isalahgunahon ia kuasani na mambahen ia mardousa. (2 Sam. 11:14, 15) Tapi unduk do ia bani Jahowa. Ra do ia manjalo pinsang-pinsang hun Bani. Sanggah martonggo, ipatugah ia do ganup na dong ibagas uhurni bani Jahowa. Janah marusaha do homa ia mandalankon podah-Ni. (Ps. 51:3-6)  Leganni ai, toruh maruhur do si Daud manjalo podah age humbani naboru. (1 Sam. 19:11, 12; 25:32, 33) Marlajar do ia humbani hasalahanni janah tongtong do ia mangidangi Jahowa sadokah goluhni.

16. Aha ma na boi iparlajari ganup bapa humbani si Daud?

¹⁶ Jadi aha ma na boi itiru ganup bapa humbani Raja Daud? Ulang ma isalahgunahon nasiam kuasa na ibere Jahowa bani nasiam. Akui ma hasalahanmu janah dalankon ma sipasingat hun Bibel na ibere hasoman bani nasiam. Anggo toruh maruhur nasiam mangkorjahon ai, gabe ihargai kaluargamu ma nasiam. Sanggah martonggo rap pakon kaluarga, patugah ma ganup na ibagas uhurmu bani Jahowa ase ibotoh sidea anggo ham marpangunsandeian bani Jahowa. Na sipontingan bahen ma pangidangion bani Jahowa na siporlunan ibagas goluhmu. (5 Mus. 6:6-9) Bahat do pasu-pasu na iahapkon kaluargamu anggo ipatuduh ham siusihan na madear bani sidea.

17. Tugas aha do na ibere Jahowa bani ganup inang?

¹⁷ Ibere Jahowa do homa tugas na ponting bani ganup inang ibagas kaluarga. Martanggung jawab do inang laho mangajar-ajari niombahni. (Pod. 6:20) Aha na ihorjahon ampa na ihatahon inang, banggal do pengaruhni ai bani niombahni. (Pod. 22:6) Pardiateihon ma siusihan na ipatuduh si Maria, inang ni Jesus.

18-19. Aha ma na boi iparlajari inang humbani si Maria?

¹⁸ Tangkas do iarusi si Maria Hata ni Naibata. Hormat do ia bani Jahowa janah orot parhasomananni dompak-Si. Sirsir do homa ia mandalankon Titah ni Naibata hassi pe halani ai bahat parubahan na masa ibagas goluhni.​—Luk. 1:35-38, 46-55.

¹⁹ Nasiam inang, sonaha nasiam boi maniru si Maria? Na parlobei, patoguh ma parhasomananmu pakon Jahowa marhitei mamparlajari Bibel anjaha martonggo. Na paduahon, sirsir ma mambahen parubahan laho pamalaskon uhur ni Jahowa. Ra do halani urah-urah namatorasmu hinan manggila janah kasar marsahap bani niombahni, gabe iahap ham ma lang pala mahua anggo ibahen ham sonai bani niombahmu. Leganni ai, hassi pe domma ibotoh ham prinsip ni Bibel, ra do iahap ham lang urah sabar janah lamlam bani niombah, tarlobih sanggah loja ham, gutul homa sidea. (Ep. 4:31) Sanggah sonai ma porlu tumang ham martonggo ase iurupi Jahowa ham. Hasomanta na margoran si Lidia mangkatahon, “Sipata dokah do ahu martonggo  ase ulang manggila ahu sanggah lang ra niombahku manangihon hatangku. Ra do sanggah marsahap, soh lobei ahu laho martonggo ibagas uhur. Dob martonggo, gabe damei ma pangahapku.”​—Ps. 37:5.

20. Tantangan aha do na iahapkon piga-piga inang, janah sonaha sidea boi mangatasi ai?

²⁰ Tantangan na legan na iahapkon inang ai ma ra do lang urah patuduhkon holong bani niombahni. (Tit. 2:3, 4) Ra do sonai halani hinan sidea pe lang orot bani namatorasni. Anggo sonai do homa pangalamanmu, ulang ma ibahen ham hasalahan na sarupa. Sahalak inang na unduk bani Jahowa, marosuh do ia marlajar sonaha carani patuduhkon holong bani niombahni. Ra do lang urah bani inang laho mangubah pingkiran, pangahap, ampa parlahouni. Tapi boi do ia marhasil mambahen hamubahon. Anggo marhasil ia, gabe martuah ma kaluargani.

21-22. Domu bani Jesaya 65:13, 14, aha do gunani anggo ra hita unduk bani Jahowa?

²¹ Ibotoh Raja Daud do gunani anggo unduk hubani Jahowa. Ia manuratkon, “Pintor do titah ni Jahowa, boi pamalas uhur; pitah do titah ni Jahowa, ipalihar do pangidah. Juakjuak-Mu pe dapotan sipasingat do marhitei ai; dapotan upah banggal do halak na mangkorjahon ai.” (Ps. 19:9, 12) Sonari on tangkas do ididah hita parleganan ni halak na unduk hubani Jahowa pakon halak na lang ra manangihon podah-Ni. Ganup halak na unduk bani Jahowa boi ‘marolob-olob halani malas ni uhurni’.​—Basa Jesaya 65:13, 14.

²² Anggo sintua, bapa, ampa inang ra unduk hubani Jahowa, lambin martuah do goluh ni sidea, marmalas ni uhur ma kaluarga, janah marsada ma kuria. Na sipontingan, gabe malas ma uhur ni Jahowa. (Pod. 27:11) On ma na mambahen hita marmalas ni uhur!