1. Ontangan aha do na ibere Jesus hubani ompat halak sijala dengke, janah aha ma na ibahen sidea?

PARDENGKE hinan do si Petrus, si Andreas, si Jakobus, ampa si Johannes. Tontu tarsonggot ma sidea sanggah ihatahon Jesus sonon, “Eta, ihutkon nasiam ma ahu, hubahen pe nasiam gabe sijala jolma!” Aha ma na ibahen sidea? Bibel mangkatahon, “Mintor itadingkon sidea ma jala ni sidea, laho mangihutkonsi.” (Mat. 4:18-22) Dobkonsi ai gabe mubah do hagoluhan ni sidea. Lang be gabe sijala dengke sidea, tapi gabe “sijala jolma” do. (Luk. 5:10) Ronsi sonari pe, ibere Jesus do ontangan na sarupa hubani halak na toruh maruhur ampa na sihol mambotoh hasintongan. (Mat. 28:19, 20) Ai ra do nasiam manjalo ontangan ai?

2. Anggo ham sihol gabe parbarita, mase maningon anget ipingkiri ham lobei ai, anjaha aha do na mangurupi ham ase boi mandalankon ai?

² Ra, marlajar Bibel ope ham sonari janah domma mambahen hamajuan. Sihol do namin uhurmu gabe parbarita. Tapi, bungbang ope ham. Anggo sonai, ulang ma maretek ni uhur. Ra do bungbang ham halani pangahapmu tanggung jawab na ponting tumang do on. Tongon Bibel mangkatahon “mintor” itadingkon si Petrus ampa hasomanni do jala ni sidea. Tapi, sedo na tarolos sidea sanggah mambahen haputusan ai. Halani onom bulan paima ai, domma itanda sidea Jesus janah porsaya do sidea Mesias do ia. (Joh. 1:35-42) Sonai homa nasiam, ra do domma bahat na iparlajari nasiam pasal Jahowa ampa Jesus Kristus. Sihol do nasiam mandalankon na dob iparlajari. Hassi pe sonai, tontu lang ra nasiam tarolos mambahen haputusan laho gabe parbarita. Jadi aha do na mangurupi si Petrus, si Andreas, pakon na leganni ase ra manjalo ontangan ni Jesus ai?

3. Aha do na boi mangurupi nasiam ase ra manjalo ontangan ni Jesus?

 ³ Ipingkirhon sidea do alasan ni sidea ra gabe sijala jolma, anjaha ibotoh sidea do homa sonaha mangkorjahon ai. Dobkonsi ai, barani do homa sidea janah pongkut marhorja. Ai ma na mangurupi sidea ra mambahen haputusan ai. Jadi bani artikel on, iulas hita ma sonaha nasiam boi maniru sidea paima ibahen ham haputusan laho gabe parbarita.

4. Mase si Petrus ra gabe sijala dengke?

⁴ Ase boi mansarihon kaluargani, manjala dengke ma si Petrus. Tapi sedo pitah halani ai ia manjala dengke, hobini do homa ai. (Joh. 21:3, 9-15) Dob gabe sijala jolma pe ia, marusaha do ia mangkarosuhkon horja ai. Anjaha halani iurupi Jahowa, bahat do hasil na madear na dapotsi.​—Lah. 2:14, 41.

5. Domu hubani Lukas 5:8-11, mase mabiar si Petrus, anjaha anggo sonai homa pangahapmu aha ma na boi mangurupi ham?

⁵ Sasintongni halani holong hubani Jahowa do ase ra hita dihut marbarita, anjaha ai do alasan na sipontingan hita ra mangkorjahon ai. Anggo holong uhurta hubani Jahowa, gabe iurupi ma hita ase barani hassi pe lang pandei hita mangkorjahon ai. Sanggah iontang Jesus si Petrus gabe sijala jolma, ihatahon Jesus do hu bani, “Ulang ho mabiar!” (Basa Lukas 5:8-11.) Sasintongni sedo halani na mandapot ontangan ai si Petrus mabiar. Paima iontang Jesus ia, ididah ia do sonaha Jesus mambahen halongangan na mambahen ia pakon hasomanni boi mandapot buei dengke. Halani mangidah ai ma gabe iahap si Petrus lang talup ia rap marhorja pakon Jesus. Sonai ma homa ra do iahap ham lang talup ham gabe parbarita halani ibotoh nasiam aha do tanggung jawabni  anggo dihut bani horja ai. Anggo sonai marusaha ma patoguhkon holongmu hubani Jahowa, Jesus, ampa hasoman na legan. Ai do na boi mangurupi nasiam ase ra manjalo ontangan ni Jesus.​—Mat. 22:37, 39; Joh. 14:15.

6. Aha do alasan na legan mase ra hita marbarita?

⁶ Pardiateihon ma homa alasan na legan mase ra hita marbarita. Anggo ra hita marbarita, on patuduhkon unduk do hita hubani parentah ni Jesus na mangkatahon, “Laho ma . . . podahi ma sagala bangsa, ase gabe susianku.” (Mat. 28:19, 20) Leganni ai, hita pe ra marbarita halani itonggor hita do halak i dunia on “loja anjaha mambur merap”, janah porlu tumang do sidea mambotoh hasintongan pasal Harajaon ni Naibata. (Mat. 9:36) Sihol do Jahowa ase ganup halak mananda hasintongan anjaha ipaluah.​—1 Tim. 2:4.

7. Domu bani Rom 10:13-15, mase ponting tumang hita marbarita?

⁷ Lambin tarojur do hita gabe parbarita anggo irimangi hita aha do gunani horjanta ai. Anggo sijala dengke, ipangan atap ijual ia do dengke na dapotsi. Tapi anggo sijala jolma, ibotoh hita do anggo ra hita marbarita, marguna do ai bani halak na manangar halani boi “paluahon” sidea.​—Basa Rom 10:13-15; 1 Tim. 4:16.

8-9. Aha do na maningon ibotoh sijala dengke, anjaha mase?

⁸ Bani panorang ni Jesus, maningon ibotoh sijala dengke do dengke na sonaha na laho tangkaponni. (3 Mus. 11:9-12) Leganni ai, maningon ibotoh ia ija ianan na bahat dengke. Ai dong do homa panorang na sosok sadihari manjala dengke? Pardiateihon ma aha na ihatahon sahalak saninanta i Kepulauan Pasifik hubani sada misionaris. Sanggah iarahkon sanina ai misionaris ai laho mangkail, ibalosi misionaris ai ma hu bani, “Patar jam siah pagi ma hita laho da.” Tapi, nini sanina ai ma, “Lang sonai Sanina. Sadihari dengke ai kaluar, ijai ma panorang na sosok banta boi mangkail.”

⁹ Sonai ma na ibahen susian ni Jesus bani abad na parlobei. Laho do sidea hu ianan na bahat halakni, anjaha ipasosok sidea do panorangni hubani buei halak sadihari sidea boi ijumpahi. Umpamani, laho do susian ni Jesus marbarita hu rumah panumbahan, hu sinagoga, hu rumah-rumah, ampa hu tiga. (Lah. 5:42; 17:17; 18:4) Maningon sonai do homa na ibahen hita. Maningon ibotoh hita ma hasomalan ni halak i iananta anjaha sadihari do sidea boi ijumpahi. Dobkonsi ai, ipasosok hita ma panorangta ase boi hita manjumpahi sidea.​—1 Kor. 9:19-23.

10. Alat aha do na ipasirsir organisasi ni Jahowa hubanta?

¹⁰ Maningon adong do homa ugas-ugas ni sijala dengke laho manangkap dengke, anjaha maningon ibotoh ia do sonaha manggunahon ai. Hita pe, porlu do homa adong alat na boi igunahon hita laho marbarita, anjaha maningon ibotoh hita sonaha manggunahon ai. Domma ibere Jesus tugah-tugah hubani susianni sonaha sidea boi marbarita ampa mambahen halak gabe susianni. Ipatugah do aha na maningon iboan sidea, ija sidea boi marbarita, anjaha aha na laho sihatahon. (Mat. 10:5-7; Luk 10:1-11) Sonari pe, domma ipasirsir organisasi ni Jahowa hubanta Alat Laho Mangajarhon Bibel. * Ijai ipasirsir do publikasi na boi ipakei hita laho marbarita anjaha iajari do homa hita sonaha manggunahon alat ai. Anggo iihutkon hita pelatihan  ai, lambin pandei ma hita ibagas pangidangion.​—2 Tim. 2:15.

11. Mase sijala dengke maningon barani?

¹¹ Maningon barani do homa sijala dengke halani i tongah laut ai boi do sompong roh haba-haba, tarlobih ma bani borngin ni ari. Sonai ma homa hita na gabe parbarita maningon barani do homa hita. Ra do sanggah hita marbarita atap sanggah ipatugah hita anggo hita Saksi Jahowa, gabe manggila ma kaluarganta. Ra do homa halani ai gabe lang marosuh hasomanta hubanta, atap dong ma na lang ra manjalo baritanta. Tapi lang tarsonggot hita halani domma ongga ipatugah Jesus maningon iparburu do susianni.​—Mat. 10:16.

12. Domu bani Josua 1:7-9, aha do na boi mangurupi hita ase lambin barani?

¹² Aha do na boi mangurupi ham ase lambin barani? Parlobei, pos ma uhurmu hassi pe sonari Jesus i surga, tapi itogu-togu ia do horja parambilanonta. (Joh. 16:33; Pangk. 14:14-16) Dob ai, pos ma uhurmu sai isarihon Jahowa do ham. (Mat. 6:32-34) Anggo lambin toguh haporsayaonmu hu Bani, lambin barani ma holi ham. Si Petrus pakon hasomanni pe toguh do haporsayaonni. On boi taridah halani itadingkon sidea do kaluargani laho mangirikkon Jesus. Sonai homa, taridah do homa na toguh haporsayaonmu sanggah barani ham patugahkon hubani hasoman atap pe kaluargamu anggo ham Saksi Jahowa, janah domma martumpu homa  ham. Anjaha domma ibahen ham hamubahon ibagas goluhmu laho mangihutkon aturan ni Jahowa. Taridah do toguh haporsayaonmu hubani Jahowa. Jadi anggo marusaha ham torus patoguhkon haporsayaonmu hubani Jahowa, pos ma uhurmu sai ‘hasomanan ni Jahowa do ham barang huja pe ham laho’.​—Basa Josua 1:7-9.

13. Aha ope na boi mangurupi hita ase lambin barani, janah sonaha carani?

¹³ Aha ope na boi mangurupi nasiam ase lambin barani? Martonggo ma mangindo habaranion hubani Jahowa. (Lah. 4:29, 31) Ibalosi Jahowa do holi tonggomu anjaha lang ongga tadingkonon-Ni ham. Sai tongtong do hasomanan-Ni ham. Rimangi ma sonaha Jahowa paluahkon juakjuak-Ni hinan. Rimangi ma use sonaha Ia domma mangurupi ham ase totap martahan janah mambere hagogohon bamu ase boi ham mambahen hamubahon ibagas goluhmu. Dingat ma Ia do na mambahen halak Israel hinan boi manlopusi Laut Sigerger. Tontu sai urupan-Ni do ham ase boi gabe parbarita. (2 Mus. 14:13) Tiru ma panurat ni Psalmen na mangkatahon, “Jahowa do mangkasomani ahu, seng mabiar ahu. Tor aha ma bahenon ni jolma bangku?”​—Ps. 118:6.

14. Aha do na boi iparlajari hita humbani pangalaman ni si Masae pakon si Tomoyo?

¹⁴ Cara na legan ase hita boi barani ai ma rimangi ma sonaha Jahowa mangurupi sanina botounta na parmaila hinan boi gabe barani. Pardiateihon hita ma pangalaman ni si Masae. Halak na parmaila tumang do ia. Sunsah tumang iahap ia laho marsahap hubani halak na lape itanda tarlobih ma hubani buei halak. Pangahapni songon na laho manangkih hu tembok na ganjang do ia tapi lang tarnangkihsi. Ujungni, marusaha ma ia laho patoguhkon holongni hubani Jahowa ampa hubani halak na legan. Irimangi ia ma anggo sonari domma pondok mando panorangni. Anjaha martonggo do ia hubani Jahowa ase ibahen ia gabe marosuh marbarita. Sonari domma barani ia anjaha domma mangidangi gabe perintis biasa. Tontu urupan ni Jahowa do homa hita ase “barani” marbarita. Pardiateihon ma use pangalaman ni si Tomoyo. Sanggah parlobei sahali ia marbarita hun rumah hu rumah, dong ma simada rumah na mangkatahon hubani, “Lang marosuh ahu marsahap hubani Saksi Jahowa!” Lanjar ibanting simada rumah ai ma pintuni. Tapi nini si Tomoyo ma hubani hasomanni marbarita, “Tonggor ma, lape dong huhatahon sangkababah pe, domma itanda ia ahu Saksi Jahowa. Malas tumang uhurhu.” Sonari si Tomoyo domma gabe perintis biasa.

15. Sonaha hita boi mangusihi pardengke, janah mase ponting ai?

¹⁵ Maningon ringgas do sahalak pardengke ase boi marhasil horjani. Umpamani, maningon girah do ia puho janah maningon inunuti do marhorja hassi pe lang dear cuaca. Sonai homa hita maningon ringgas janah pongkut ma hita marhorja ase boi marhasil ibagas pangidangion.​—Mat. 10:22.

16. Aha do na boi mangurupi hita ase boi mangkorjahon tugas na ponting?

¹⁶ Somalni sanggah marhorja, rosuhan do hita manggunahon cara na urah. Tapi sipata dong do horja na ponting tumang hape lang urah mangkorjahon ai. Ijai ma porlu hita patuduhkon panrajaion diri. Tapi marhitei tonduy-Ni iurupi Jahowa do hita ase boi marhasil.​—Gal. 5:22, 23.

17. Domu bani 1 Korint 9:25-27, aha ma na ibahen si Paulus ase boi ia manrajai diri?

¹⁷ Sasintongni, sahalak na boi manrajai  diri do apostel Paulus. Hassi pe sonai ‘ipukpuki’ ia do angkulani ase boi mangkorjahon na sintong. (Basa 1 Korint 9:25-27.) Iojur ia do homa na legan ase patuduhkon panrajaion diri, jadi gabe boi ma “haganup mardalan dear anjaha maratur”. (1 Kor. 14:40) Sonai homa ma hita, maningon ringgas ma hita ibagas pangidangion. Sai inunuti hita ma marbarita anjaha mangajari halak ase boi gabe susian ni Jesus.​—Lah. 2:46.

18. Aha do maningon bahenonta ase marhasil hita i lobei ni Jahowa?

¹⁸ Anggo bahat dengke na dapot pardengke ihatahon ma ia marhasil. Tapi anggo pangidangionta lang sonai. Sedo halani bahatni halak na iurupi hita gabe Saksi Jahowa gabe ihatahon ma hita marhasil. (Luk. 8:11-15) Tapi, marhasil do hita i lobei ni Jahowa anggo torus hita marbarita anjaha mangurupi halak ase boi sidea gabe susian ni Jesus. Mase? Halani domma ihorjahon hita na iparentahkon Jahowa pakon Jesus.​—Mar. 13:10; Lah. 5:28, 29.

19-20. Mase maningon marbarita hita humbani sonari?

¹⁹ Bani piga-piga nagori itontuhon do bulan piga pardengke boi manjala dengke. Jadi anggo laho bois ma panorangni, lambin ringgas ma sidea manjala dengke. Sonai homa hita, sonari lambin dohor mando ujung ni dunia on anjaha lang bahat be panorang laho marbarita. Halani ai, ulang be ipadokah-dokah hita mangkorjahon ai. Ulang homa ipaima-ima hita ronsi adong panorang na sosok laho marbarita.​—Par. 11:4.

²⁰ Jadi, dingat ma mase maningon marbarita hita. Halani ai, torus ma marlajar Bibel, marusaha ma ase lambin barani anjaha manrajai diri. Dong ualuh juta lobih halak i sab dunia on na gabe sijala jolma. Rap marhorja ma ham pakon sidea ase dapotmu malas ni uhur na banggal humbani Jahowa. (Neh. 8:11) Totap ma ham marbarita humbani tuk ni gogohmu ronsi ihatahon Jahowa domma salosei horja on. Bani artikel na mangihut iulas hita ma aha do na boi ibahen hita ase totap hinsah uhurta laho marbarita.