1. Sipata sanggah attigan do gabe lupa hita mangidangi Jahowa do na sipontingan?

SANGGAH attigan do ra gabe lupa hita mangidangi Jahowa do na sipontingan? Ai sanggah sunsah do goluhmu, atap sanggah sonang? Somalni, sanggah marsitaronon mintor marpangunsandeian bani Jahowa do hita. Tapi, aha ma bahenonmu sanggah sonang goluhmu? Ai ra do sipata lang idingat ham ponting tumang do na mangidangi Jahowa ai? Ibotoh Jahowa do anggo ai boi masa hubani juakjuak-Ni. Halani ai ma ase ipasingat Ia halak Israel.​—5 Mus. 6:10-12.

2. Sitiruon aha do na ipatuduh Raja Asa?

² Raja Asa do siusihan na madear na boi itiru hita. Tongtong do ia marpangunsandeian bani Jahowa, age sanggah sunsah situasini atap pe sanggah sonang goluhni. Humbani mungkahni, “sai tong do si Asa marsijoloman hubani Jahowa”. (1 Raj. 15:14) Ipatuduh ia do ai marhitei manripaskon ganup gana-gana na dong i Juda. Bibel mangkatahon, “Ipadaoh si Asa do anjapanjap panggalangan bani naibata na legan pakon panumbahan na bani buntu-buntu, ibolahi do gana-gana anjaha irobohi do tiang sisombahon.” (2 Kron. 14:3, 5) Gari si Maaka,  ompungni ai pe, ipaturun do hun pangkat harajaon. Mase? Halani ipararat ia panumbahan gana-gana i nagori ai.​—1 Raj. 15:11-13.

3. Aha ma na laho iulas hita bani artikel on?

³ Tapi lang pitah ai. Iurupi do homa halak Juda ase mulak use manombah Jahowa. Halani ai ipasu-pasu Jahowa ma sidea ganupan anjaha sonang * do goluhni bani panorang ai. Dobkonsi gabe raja si Asa, “seng masa hamunsuhon” i tanoh ai sadokah sapuluh tahun. (2 Kron. 14:1, 4, 6) Bani artikel on, holi iulas hita ma aha do na ibahen si Asa sanggah sonang situasini. Dob ai iulas hita homa, sonaha halak Kristen bani abad na parlobei mangusihi si Asa. Anjaha na parpudi, ibalosi hita ma sungkun-sungkun on, aha do na porlu bahenonmu sanggah bebas ope ham mangidangi Jahowa i nagorimu?

4. Domu bani 2 Kronika 14:2, 6, 7, aha do na ibahen si Asa sanggah damei situasini?

⁴ Basa 2 Kronika 14:2, 6, 7. Ihatahon si Asa ma hubani rayatni, “Ibere Jahowa do damei hu bani sidea.” Hassi pe sonai, sedo iahap ia ai panorang laho marsonang-sonang. Tapi ipungkah do pauli-ulihon tembok ni huta ai, ibahen manarani, horbangan, pakon pating-patingni. Janah ihatahon ia ma bani sidea, “Hita ope simada tanoh on.” Aha do artini ai? Lang adong munsuh na manlarang sidea mangkorjahon aha pe, janah huja pe sihol uhurni laho boi do. Halani ai iojur si Asa ma ase pangkei sidea manggunahon panorangni.

5. Mase ilatih si Asa tentarani?

 ⁵ Ipasirsir si Asa do homa tentarani bani panorang ai. (2 Kron. 14:8) Mase ibahen ia sonai? Ai na lang porsaya do ia hubani Jahowa? Lang sonai. Tapi ibotoh ia ra do lang martahan hadameion ai i nagorini. Jadi ipargogohi ia ma rayatni ase sirsir sidea bani aha na laho masa, janah sintong do pambahenanni ai.

6. Aha do na ibahen halak Kristen abad na parlobei sanggah damei situasini?

⁶ Hassi pe halak Kristen bani abad na parlobei iparburu, tapi lang lalap sonai situasini. Iahapkon sidea do panorang hadameion. Aha ma na ibahen sidea bani panorang sisonai? Ringgas do sidea ganupan marbarita, anjaha mangidangi Jahowa do na sipontingan ibahen sidea. Bani buku Lahoan ihatahon, “Marparlahou ibagas biar bani Jahowa do sidea.” Hasilni, “lambin roh bueini do sidea” bani panorang ai. Tangkas ma, ipasu-pasu Jahowa do pangidangion ni sidea sanggah ai.​—Lah. 9:26-31.

7-8. Sanggah damei situasini, aha ma na ibahen si Paulus pakon sanina botou?

⁷ Humbani tuk ni gogohni do halak Kristen bani abad na parlobei marbarita. Umpamani, sanggah i Epesus apostel Paulus, ibotoh ia ma bahat do halak ijai na lape manangar ambilan na madear. Halani ai, soh ma ia ijai ase boi marbarita hubani sidea.​—1 Kor. 16:8, 9.

⁸ Bani tahun 49 M, dobkonsi ibahen ganup apostel ampa sintua i Jerusalem haputusan pasal sunat, lambin ringgas ma si Paulus pakon halak Kristen na legan marbarita. (Lah. 15:23-29) Dob ipadas si Paulus pakon sanina-sanina na legan haputusan ai hu kuria-kuria, lambin ringgas ma ganup sanina botou ‘mangambilankon hata ni Jahowa’. (Lah. 15:30-35) Sonaha hasilni? Bibel mangkatahon, “Lambin toguhni ma haporsayaon ni kuria ai, anjaha lambin tambah do bilangan ni sidea ganup ari.”​—Lah. 16:4, 5.

9. Sonari on, sonaha do situasi pangidangionta i buei nagori, anjaha aha ma na porlu irimangi hita?

⁹ Bani buei nagori, lape ilarang pamarentah horja parambilanonta. Ai sonai do homa i iananmu? Anggo sonai, rimangi ma sungkun-sungkun on, ‘Aha ma na boi hubahen sanggah damei situasini?’ Bani panorang parpudi on, sibuk tumang do hita marbarita anjaha bahat tumang do na laho sihorjahonon. (Mrk. 13:10) Lape ongga sonai sibukni hita ibagas parambilanon.

10. Aha do na iojur hubanta domu bani 2 Timoteus 4:2?

¹⁰ Aha ma na boi ibahen nasiam sanggah damei ope situasini? (Basa 2 Timoteus 4:2.) Boi do ipareksa nasiam situasi ibagas kaluarga. Ra do adong na boi merintis atap boi do nasiam lambin ringgas marbarita. Ulang ma marusaha hita patumpuhon arta sonari on, halani sedo ai na boi paluahkon hita humbani hamarsikon banggal.​—Pod. 11:4; Mat. 6:31-33; 1 Joh. 2:15-17.

11. Aha do na ibahen hasomanta ase boi sidea mangurupi buei halak marlajar pasal Jahowa?

¹¹ Bahat do homa parbarita na marlajar bahasa na legan ase boi sidea mangidangi anjaha mangajari buei halak pasal Jahowa. Ipasirsir organisasi do homa publikasi laho mangurupi sidea. Umpamani, bani tahun 2010, pitah ibagas 500  bahasa dassa publikasinta iterjemahkon. Tapi sonari, domma dong publikasinta ibagas lobih humbani 1.000 bahasa.

12. Sonaha ma pangahap ni halak sanggah itangar sidea barita na madear ibagas sahapni sandiri? Bere ma contoh.

¹² Sonaha ma pangahap ni halak anggo boi sidea manangar hasintongan ni Bibel ibagas sahap na boi iarusini? Pardiateihon ma pangalaman sada botou na dihut bani kebaktian i Amerika Serikat ibagas sahap Kinyarwanda. Bahasa ai ipakei bani piga-piga ianan i Afrika. Dob salosei kebaktian, nini botou ai ma, “On pe huarusi ganup acara kebaktian regional, hape domma 17 tahun ahu pindah hujon.” Tangkas ma, malas tumang do uhur ni botou ai halani boi itangar ia acara kebaktian ibagas sahapni. Ra do i iananmu marbarita dong halak na manggunahon bahasa na legan. Ai ra do ham marlajar bahasa ai ase boi holi ham marbarita hubani sidea? Parohkon malas ni uhur do anggo ibahen ham sonai.

13. Sanggah damei situasini, sonaha sanina botou i Rusia manggunahon panorangni?

¹³ Tapi bani piga-piga nagori ilarang do horja parambilanonta. Halani ai, lang bebas sanina botounta marbarita ijai. Ai ma na masa bani sanina botounta na tading i Rusia. Sadokah marpuluh tahun, iparburu do sidea ijai. Tapi bani bulan Maret tahun 1991 lang be iparburu sidea. Ijia dong 16.000 halak Saksi Jahowa ijai. Dua puluh tahun dobkonsi ai, tambah ma bilanganni gabe 160.000 halak. Tangkas ma sanggah dong hadameion ijai pangkei do sanina botounta manggunahon panorangni. Dobkonsi ai, ilarang ma use sidea marbarita. Hassi pe sonai, totap do sidea ringgas mangidangi Jahowa humbani tuk ni gogohni.

14-15. Sonaha Jahowa manggunahon kuasa-Ni laho mangurupi si Asa?

¹⁴ Bani panorang ni si Asa, lang lalab martahan hadameion ai. Roh ma sajuta tentara hun Etiopia laho mandorab sidea, janah si Sera ma komandanni. Pos uhurni boi do italuhon sidea halak Juda. Tapi anggo si Asa marpangunsandeian bani Jahowa do ia. Martonggo ma ia janah nini do, “Sai urupi Ham ma hanami, Ham Jahowa, Naibatanami; ai marpangunsandeian Bamu do hanami, anjaha mangunsagahkon goran-Mu do hanami bingkat mangimbang halak na mabuei on.”​—2 Kron. 14:11.

¹⁵ Daoh do bahatan tentara ni Etiopia ai marimbangkon tentara ni si Asa. Hassi pe sonai, ibotoh si Asa daoh do gogohan Jahowa, anjaha sai urupan-Ni do juakjuak-Ni. Tongon, iurupi Jahowa do sidea janah talu do tentara ni Etiopia ai.​—2 Kron. 14:8-13.

16. Hunja ibotoh hita lang martahan hadameion na iahapkon hita sonari on?

¹⁶ Lang ibotoh hita aha na masa hubanta bani ari na laho roh. Tapi ibotoh hita do lang martahan hadameion na iahapkon hita sonari on. Domma ihatahon Jesus hinan “domdoman ni sagala bangsa do” ganup susianni. (Mat. 24:9) Ihatahon si Paulus do homa, “Sagala na sihol daulat marparlahou ibagas Kristus Jesus, hona parburu do.” (2 Tim. 3:12) Sonari domma “marah tumang” Sibolis. Jadi, ulang ma nini uhurta boi hita maluah humbani ringisni ai.​—Pangk. 12:12.

17. Aha do ra na manguji haporsayaonta?

¹⁷ Bani ari na laho roh, iuji do haporsayaonta ganupan. Tongkin nari, masa ma ‘hamarsikon banggal na so ongga masa humbani mungkahni itompa tanoh on ronsi sonari’. (Mat. 24:21) Sanggah ai, ra do idomdomi kaluarganta hita, janah ra do homa ilarang horja parambilanonta. (Mat. 10:35, 36) Ai ra do hita maniru si Asa na martonggo mangindo pangurupion bani Jahowa?

18. Domu bani Heber 10:38, 39, aha do na boi mangurupi hita sanggah lang be damei situasini?

¹⁸ Domma ipasirsir Jahowa aha pe na ihaporluhon hita ase toguh haporsayaonta.  Itogu-togu do “juakjuak na bujur anjaha na maruhur” laho ‘mambere mangan bani panorangni’. (Mat. 24:45) Hassi pe sonai, maningon marusaha do ganupan hita laho patoguhkon haporsayaonta bani Jahowa.​—Basa Heber 10:38, 39.

19-20. Dob mambasa 1 Kronika 28:9, sungkun-sungkun aha ma na porlu irimangi hita, janah mase?

¹⁹ Songon si Asa, pindahi hita ma homa Jahowa. (2 Kron. 14:4; 15:1, 2) Ibahen hita do ai sanggah marlajar hita pasal-Si janah ididi. Marusaha do homa hita ase boi lambin mangkaholongi-Si. Jadi sungkun hita ma dirinta, ‘Ai tongtong do ahu martumpu?’ Sanggah martumpu, ipargogohi do hita ase boi mangidangi Jahowa. Marsiojuran do homa hita ijai pakon sanina botou. (Mat. 11:28) Leganni ai, boi do homa isungkun hita dirinta, ‘Ai tongtong do ahu marlajar Bibel?’ Ai dong do tiap minggu parlajaran Bibel ibahen i kaluargamu? Ai ringgas do ham marbarita ampa mangajari halak ase boi gabe susian ni Jesus?

²⁰ Mase porlu isungkun hita ai? Bibel mangkatahon ipareksa Jahowa do pingkiran ampa uhurta. Jadi boi ma homa ibahen hita na sisonai. Anggo ibotoh hita dong na porlu iparubahi, pindo ma ase iurupi Jahowa hita mangkorjahon ai. (Basa 1 Kronika 28:9.) Jadi, sonari ma panorangni laho pasirsirhon diri bani ujian na laho roh. Halani ai, totap ma hita ringgas marbarita sanggah damei ope situasini.