Bani ayat ai dong ihatahon, ‘Anggo ididah ho ibahen sunsah halak na masombuh, hasedaon ni uhum sonai hapintoron i nagori in, ulang pala longang uhurmu pasal ai, ai adong do na mardiateihon siparkuasa-siparkuasa ai.’​—Par. 5:7.

Iagan bahat halak pitah pamarentahan ni jolma do na imaksud bani ayat ai. Tapi anggo lambin bagas ipareksa hita, dong do homa ipatugah pasal Jahowa ijai. Tontu gabe tarapoh do uhurta mambotoh hasintongan ai.

Bani Parambilan 5:7 ihatahon, dong sada pejabat na mambahen sunsah halak na masombuh anjaha mambahen na lang adil hubani sidea. Namin idingat ia ma, dong do pejabat na gijangan marimbangkonsi. Sasintongni, dong do kopala na mangawasi tiap pejabat. Tapi bahatan do pejabat na korupsi. Halani ai, gabe marsitaronon ma ganup halak i tanoh on.

Hassi pe sonai situasini, tarapoh do uhurta halani mambotoh ipardiateihon Jahowa do siparkuasa-siparkuasa ai. Jadi marondos ma hita hubani Jahowa, janah pindo ma ase iurupi hita ibagas sitarononta. (Ps. 55:23; Pil. 4:6, 7) Bibel mangkatahon, “Manatap manonggor do mata ni Jahowa hu sab tanoh on, laho mambere gogoh hubani halak na paruhur na marsijoloman hu Bani.”​—2 Kron. 16:9.

Halani ai, bani Parambilan 5:7 ipaingat do hita sai adong do na mangawasi ganup pejabat i pamarentahan ni dunia on. Na sipontingan, ihatahon do use bani ayat ai, Jahowa “Na Tang Sitimbulan in do mangatasi sidea haganup”. Ia do Pargogoh Na So Tarimbang. Sonari, domma mamarentah Harajaon-Ni marhitei Jesus Kristus, Anak-Ni in. Jadi sanggah adong hagedukan na masa, ibotoh na Tang Sitimbulan in do ai, sonai homa Anak-Ni.