1. Aha do na ihorjahon botounta ibagas organisasi, tapi aha ma tantangan ni sidea? (Tonggor ma gambar sampul.)

MALAS tumang uhurta halani bahat botou na ringgas i kuria! Ringgas do sidea i partumpuan, sonai homa sanggah marbarita. Dong na dihut mangurus Balei Harajaon janah parduli do sidea bani sanina botou. Tapi, bahat do homa tantangan ni sidea. Umpamani, dong na maningon mangurus namatoras na dob matua, anjaha dong na lang iharosuhkon kaluargani na lang Saksi. Dong homa na domma mabalu, jadi sahalaksi ma pagodangkon niombahni.

2. Mase maningon sirsir hita mangurupi haganup botou i kuria?

² Bani Bibel iojur do hita ase sirsir mangurupi hasomanta naboru na sonai situasini. Mase? Halani bahat do halak i dunia on na lang mangkargai naboru. Ai do na mambahen apostel Paulus mangojur kuria Rom ase manjalo si Poibe anjaha ‘mangurupisi bani sagala horja, anggo porlu urupan’. (Rom 16:1, 2) Hinan, sanggah gabe halak Parisei si Paulus, mapas do uhur ni mangidah naboru-naboru. Tapi, dobkonsi gabe halak Kristen ia, itiru ia do Jesus. Gabe bujur anjaha hormat do ia hubani naboru.​—1 Kor. 11:1.

3. Sonaha pangahap ni Jesus hubani naboru na mangkorjahon harosuh ni Bapani?

³ Anggo pambobai ugama ni Jahudi, mapas do sidea mangidah naboru. Tapi anggo Jesus lang sonai. Bujur do ia hubani ganup naboru. (Joh. 4:27) Sahalak pakar Alkitab mangkatahon, “Lang ongga kasar Jesus marsahap hubani naboru.” Tapi arga do bani ganup naboru na mangkorjahon harosuh ni Bapani. Ihira ia do sidea songon botouni.​—Mat. 12:50.

4. Aha ma na laho iulas hita bani artikel on?

⁴ Sirsir do Jesus mangurupi ganup naboru na mangidangi Naibata. Ipatuduh do anggo ia mangkargai sidea. Anjaha  ibela do homa sidea. Bani artikel on holi iulas hita ma sonaha hita maniru Jesus laho mambahen na sisonai.

5. Situasi aha do na mambahen piga-piga botou lang urah marsaor pakon na legan?

⁵ Sasintongni porlu do hasoman banta ganupan. Tapi dong do ra piga-piga botou na lang urah marhasoman pakon na legan. Mase? Pardiateihon ma na ihatahon piga-piga botounta. Si Jeni * mangkatahon, “Halani anak boru ope ahu, gati do huahap lang marguna ahu i kuria janah lang dong na parduli bangku.” Si Kristin sahalak perintis na pindah hu ianan na mamorluhon mangkatahon, “Sanggah pindah ham hu kuria na baru, ra do gati lungunan iahap ham.” Dong do homa sanina na sonai pangahapni. Anggo hita tading pakon kaluarga na lang Saksi, ra do lang be orot hita pakon sidea. Tapi ra do homa lang urah banta orot hubani sanina botou i kuria. Dong do homa botou na maningon tading i rumah halani boritan ia, atap maningon mangurus kaluarga na boritan. Jadi ra do lungunan pangahapni. Si Anita mangkatahon, “Gati do lang boi ahu marsaor pakon sanina botou i kuria halani maningon mangurus inang.”

6. Songon na ipatugah bani Lukas 10:38-42, sonaha Jesus mangurupi si Marta pakon si Maria?

⁶ Orot do homa parhasomanan ni Jesus pakon naboru-naboru na mangidangi Naibata, songon si Maria pakon si Marta. Anak boru ope sidea. (Basa Lukas 10:38-42.) Halani bujur Jesus bani sidea, gabe orot ma sidea pakon Jesus. Umpamani, lang malang uhur ni si Maria hundul i dohor ni nahei ni Jesus songon na ibahen susian na legan. * Anjaha si Marta pe mintor urah do patugahkon na ibagas uhurni sanggah lang iurupi si Maria ia marmasak. Sanggah sonai situasini, ibere Jesus do podah na dear hubani sidea. Janah ra do homa Jesus martandang hu rumah ni sidea laho manjumpahi sidea pakon si Lasarus botouni ai. Hunjon taridah ma parduli do Jesus hubani sidea. (Joh. 12:1-3) Halani ai, sanggah boritan si Lasarus, lang malang si Marta pakon si Maria mangindo pangurupion ni Jesus.​—Joh. 11:3, 5.

7. Sonaha hita boi mangojur hasomanta naboru?

⁷ Bahatan do panorangni hasomanta marsaor pakon sanina botou sanggah i partumpuan. Jadi, ai ma panorang na sosok hita boi marbuali pakon sidea laho patoguhkonsi. Halani ai, gabe ibotoh sidea ma anggo hita parduli hu bani. Si Jeni na isaritahon nongkan ai mangkatahon, “Tarojur tumang do ahu sanggah dong na mamuji komentarku, mangarahkon ahu marbarita, ampa patuduhkon parduli do sidea hubangku.” Halani ai, maningon ipatuduh hita ma bani hasomanta naboru ponting do sidea hubanta. Si Kia mangkatahon, “Anggo lang martumpu ahu, mintor adong ma na mangirim SMS laho manungkun baritangku. Hunjai gabe hubotoh ma parduli tumang do sidea bangku.”

8. Sonaha hita boi mangusihi Jesus?

⁸ Songon Jesus, pasirsir ma panorang laho marsaor pakon sidea. Boi do iontang hita sidea mangan. Atap iarahkon hita ia mardalani. Sanggah marbuali pakon sidea, hatahon ma aha na boi mangojur sidea. (Rom 1:11, 12) Maningon itiru  sintua do homa Jesus sanggah mangojur hasoman naboru na lape marhajabuan. Jesus mambotoh sai adong do tantangan ni sidea. Hassi pe sonai, tangkas do ipatugah ia lang maningon marhajabuan atap marniombah sasahalak ase boi martuah. (Luk. 11:27, 28) Tapi, halak na mangidangi Naibata do na boi tongtong marmalas ni uhur.​—Mat. 19:12.

9. Sonaha sintua boi mangurupi botou i kuria?

⁹ Na sipontingan, maningon ibahen sintua ma ganup hasoman naboru songon inang atap botouni. (1 Tim. 5:1, 2) Dear do anggo sintua marbuali pakon sidea paima atap dob salosei partumpuan. Si Kristin mangkatahon, “Dong sada sintua na mamparuhurhon anggo ahu sibuk tumang, anjaha iarusi ia do ai. Martarima kasih tumang do ahu halani ibahen ia sonai.” Anggo ra sintua marbuali pakon botou i kuria, taridah ma anggo sintua parduli bani sidea. * Si Anita na ipatugah nongkan ai patorangkon aha do gunani anggo sintua ra mambahen na sisonai. Nini do, “Lambin dear ma ahu mananda sidea, sonai homa sidea hu bangku. Jadi, sanggah dong masalahku, lang malang ahu mangindo pangurupion bani sidea.”

10. Aha do na mambahen botounta marmalas ni uhur?

¹⁰ Tontu malas tumang uhurta sanggah dong na mamuji pambahenanta. Tapi sanggah lang dong mambahen na sisonai, tontu gabe maretek ni uhur ma hita. Sada perintis margoran si Abigail mangkatahon sipata songon na ihalupahon do ia. Nini do, “Lang pala tangkas itanda sanina botou ahu. Pitah ise saninangku, namatorasku, ampa hade-hadengku dassa na ibotoh sidea. Sipata huahap lang dong na mampardiateihon ahu.” Tapi legan do na iahapkon botounta na margoran si Pamela. Ronsi sonari lape marhajabuan ia. Tapi ongga do ia gabe misionaris sadokah martahun-tahun. Ujungni maningon mulak ma ia hu hutani laho mangurus namatorasni. Sonari domma marumur 70-an ia. Tapi totap ope ia merintis. Nini do, “Gabe tarojur do ahu halani dong na mangkargai pambahenanku. Ai do na mangurupi ahu boi martahan ronsi sonari.”

11. Sonaha Jesus patuduhkon anggo ia mangkargai naboru-naboru na mangurupisi?

¹¹ Dong do homa naboru-naboru na setia mangidangi Naibata na mangurus haporluan ni Jesus. Igunahon sidea do aha “na dong bani”. (Luk. 8:1-3) Anjaha martarima kasih do Jesus halani ai. Tapi lang pitah ai. Iajarhon Jesus do homa hasintongan hubani sidea. Umpamani, ipatugah ma na laho matei do ia anjaha ipapuho. (Luk. 24:5-8) Songon na domma ipatugah ia bani ganup apostelni, ipatugah do homa bani sidea sitaronon aha do na laho masa hubani ganup susianni. (Mrk. 9:30-32; 10:32-34) Sanggah itangkap Jesus, lintun do ganup apostelni manadingkonsi. Tapi dong do piga-piga naboru na totap mangirikkonsi ronsi igantung ia bani sada hayu.​—Mat. 26:56; Mrk. 15:40, 41.

12. Aha do na iparentahkon Jesus hubani naboru-naboru?

¹² Naboru-naboru do homa na parlobei sahali mangidah Jesus sanggah ia ipapuho. Iparentahkon do ase ipatugah sidea bani apostelni anggo ia domma ipapuho. (Mat. 28:5, 9, 10) Anjaha bani ari Pentakosta tahun 33 M, ra do homa dong sidea na manjalo tonduy na pansing. Halani ai, boi do ra sidea marsahap na legan laho mansaritahon pasal “habanggalon ni Naibata”.​—Lah. 1:14; 2:2-4, 11.

13. Aha do na ihorjahon botounta ibagas pangidangion, janah sonaha ham mangkargai ai?

¹³ Bahat do na ihorjahon botounta ibagas pangidangion. Halani ai, talup do sidea ipuji. Dong do sidea na dihut pajongjongkon ampa mangurus bangunan ni organisasi, mangurupi kalompok na marbahasa na legan, atap mangurupi i Betel. Dong do homa na mangurupi sanina botou sanggah dong bencana, dong na gabe perintis atap misionaris, anjaha dong homa na menerjemahkon publikasinta. Dong do homa na dihut bani sikolah perintis, Sikolah bani Parbarita Harajaon, atap Sikolah Gilead. Bani na dob marhajabuan, iurupi do suamini ase boi mandalankon tanggung jawabni i kuria. Anggo lang iurupi istrini, tontu lang boi saninanta on mandalankon tugasni i kuria. (Ep. 4:8) Jadi, pingkirhon ma sonaha hita boi mangkargai pambahenan ni sidea ai.

14. Mardingat aha na ihatahon bani Psalmen 68:12, aha do na porlu ibahen sintua?

¹⁴ Dear do homa sidea sanggah marbarita. Doskon “bala na buei” do sidea. (Basa Psalmen 68:12.) Halani ai, marusaha do sintua marlajar humbani pangalaman ni  sidea. Si Abigail na ipatugah nongkan ai mangkatahon gabe tarojur do ia sanggah dong sanina na manungkun sonaha carani mamungkah parsahapan sanggah marbarita. Nini do, “Gabe hubotoh ma marguna do ahu i kuria.” Leganni ai, iakui sintua do anggo botou na marpangalaman boi mangurupi botou na posonan sanggah dong tantangan ni sidea. (Tit. 2:3-5) Tontu ihaholongi hita do sidea!

15. Bani panorang na sonaha do porlu ibela hita botou i kuria?

¹⁵ Sipata, sanggah dong tantangan ni botou i kuria, porlu do ibela anjaha iurupi hita sidea. (Jes. 1:17) Umpamani, porlu do ra iurupi hita botou na dob mabalu atap na dob marsirang, sanggah sidea mangkorjahon tugas na sadokah on ihorjahon suamini. Dong do ra botou na matua na porlu iurupi hita sanggah marsahap pakon dokter. Dong do homa botou na merintis hape lang boi gati mangidangi songon perintis na legan halani mangurupi horja i organisasi. Gabe dong ma na marungut-ungut hu bani. Halani ai porlu ma ibela hita sidea. Sonaha carani? Pardiateihon ma use siusihan na ibahen Jesus.

16. Songon na ihatahon bani Markus 14:3-9, sonaha Jesus mambela si Maria?

¹⁶ Umpamani, mintor podas do ibela Jesus si Maria sanggah lepak si Marta mangarusi pambahenan ni si Maria. (Luk. 10:38-42) Dob ai, ibela Jesus do homa si Maria sanggah adong na manrisai haputusanni. (Basa Markus 14:3-9.) Iarusi Jesus do mase si Maria mambahen na sisonai. Jadi nini ma, “Na dear do na binahenni in bangku! . . . Olat ni na tarbahensi do na binahenni in.” Ihatahon ia use isaritahon do holi habujuran ni si Maria ai ‘barang ija pe i sab dunia on iambilankon ambilan na madear’. Songon bani artikel on, itarsingati do homa pasal ai. Tontu gabe tarojur tumang ma si Maria sanggah ibela Jesus ia i lobei ni halak na marungut-ungut ai.

17. Bahen ma contoh sanggah attigan do hita boi mambela botounta.

¹⁷ Ai sonai do homa na ibahen nasiam bani botou na mamorluhon? Bayangkon ma situasi on. Dong sada botou suamini lang Saksi. Jadi dong ma parbarita na mangidah gati do ia tarlambat roh hu partumpuan, janah mintor mulak do ia dob salosei martumpu. Jarang do homa niombahni iboan hu partumpuan. Halani ai dong ma na mangkatahon bamu ai mase ma lang tarboan ia anakni martumpu. Jadi adong ma na mansalahkon ia. Hape sasintongni domma marusaha botou ai mambahen na sidearan. Tapi lang boi uhur-uhurni mamboan anakni halani suamini pe marhak do mambahen haputusan. Jadi, aha ma na boi bahenonmu? Puji ma ia janah hatahon ma bani sidea anggo botou ai domma marusaha mambahen na sidearan. Ra do dobkonsi ai lang be isalahkon sidea ia.

18. Aha ope na boi ibahen hita laho mangurupi botou i kuria?

¹⁸ Boi do homa iurupi hita sidea marhitei pambahenanta. (1 Joh. 3:18) Si Anita, na mangurus inangni mangkatahon, “Piga-piga sanina botou roh hu rumahku mamboan sipanganon, atap manggantihon ahu manjaga inang ase boi ahu mangurus na legan. Gabe huahapkon ma holong tumang do sidea bangku.” Sonai do homa na iahapkon si Jeni. Dong sada sanina na mangajari ia otik-otik sonaha padearhon motorni. Nini si Jeni, “Malas tumang uhurhu halani parduli sanina botou hubangku.”

19. Aha ope na boi ibahen sintua laho mangurupi botou i kuria?

 ¹⁹ Sintua pe, marusaha do mangurupi botou i kuria. Ibotoh sintua do anggo Jahowa sihol ase sidea bujur hubani ganup botou. (Jak. 1:27) Jadi marusaha do sidea maniru Jesus. Anggo sosok situasini, lang kaku sidea. Tapi marusaha do sidea patuduhkon habujuran. (Mat. 15:22-28) Anggo sonai ibahen sintua, gabe ibotoh hasomanta naboru ma ihaholongi do sidea. Sanggah ibotoh pengawas kalompok dinas si Kia pindah rumah, mintor iatur ma ase iurupi sanina botou ia. Si Kia mangkatahon, “Gabe hampung do huahap halani iojur anjaha iurupi sidea ahu. Gabe hubotoh ma parduli do sidea hubangku janah ponting do ahu i kuria. Anjaha hubotoh ma ihasomani do ahu sanggah sunsah situasingku.”

20-21. Sonaha hita patuduhkon anggo hita mangkargai ganup hasomanta naboru i kuria?

²⁰ Anggo ipardiateihon hita i kuria, bahat do hasomanta naboru na gabe siusihan porlu iurupi. Songon na ibahen Jesus, pasirsir ma panorang ase lambin itanda hita sidea. Patuduh ma anggo hita mangkargai pangidangion ni sidea. Anjaha bela ma sidea sanggah iporluhon.

²¹ Bani ujung ni suratni hu kuria Rom, dong siah botou na isobut si Paulus goranni. (Rom 16:1, 3, 6, 12, 13, 15) Tontu gabe tarojur ma ganup botou ai dob manangar ipadas si Paulus do tabini bani sidea anjaha ipuji do homa sidea. Jadi bahen hita ma na sisonai ibagas kurianta. On patuduhkon holong do uhurta bani sidea anjaha ibahen hita do sidea songon kaluarganta.