1-2. Domu bani 1 Timoteus 6:20, aha do na ibere hubani si Timoteus?

ANGGO adong barangta na maharga, sipata ra do isuruh hita halak na legan na manjaga ai. Tontu halani porsaya do hita ase ibere hita ai hu bani. Umpamani, isimpan hita do duitta hu bank halani porsaya hita aman do ijai janah lang boi itangko halak ai.

² Basa 1 Timoteus 6:20. Apostel Paulus mangkatahon domma ijalo si Timoteus arta na maharga humbani Jahowa. Domma ibotoh ia aha do harosuh ni Naibata hubani manisia. Dob ai, ibere do homa tugas na ponting hu bani, ai ma ‘mangambilankon Hata in’ ampa ‘mandalankon horja parambilanon’. (2 Tim. 4:2, 5) Tontu on mambuktihon porsaya do Jahowa hubani si Timoteus. Halani ai, iojur si Paulus ma ase ijaga si Timoteus arta ai. Songon si Timoteus, ibere do homa hubanta arta na maharga. Aha ma ai? Anjaha mase maningon ijaga hita arta na dob ibere Jahowa hubanta?

3-4. Aha do na mambahen hasintongan ni Bibel maharga?

³ Ibere Jahowa do hasintongan ni Bibel hubanta. Maharga do hasintongan ai halani gabe ibotoh hita ma sonaha hita boi marhasoman pakon-Si. Ipatugah do homa sonaha ase hita boi marmalas ni uhur. Anggo porsaya hita bani hasintongan ai, janah idalankon hita podahni, gabe borsih ma parlahounta. Dob ai, lang boi be hita ioto-otoi ajaran na palsu.​—1 Kor. 6:9-11.

⁴ Maharga do homa Hata ni Naibata halani ipatalar Jahowa do ai pitah hubani halak na toruh maruhur, na “marosuh manjalo hasintongan”. (Lah. 13:48, Terjemahan Dunia  Baru) Porsaya do sidea igunahon Jahowa do juakjuak na bujur anjaha na maruhur laho mangajarhon hasintongan hubanta. (Mat. 11:25; 24:45) Jadi maningon iurupi do hita ase boi mangarusi hasintongan, arta na siharganan ai.​—Pod. 3:13, 15.

5. Aha ope na ibere Jahowa hubanta?

⁵ Ibere Jahowa do homa tugas hubanta laho mangajarhon pasal-Si ampa harosuh-Ni hubani na legan. (Mat. 24:14) Maharga tumang do hasintongan na ipadas hita hubani halak halani ai boi mangurupi sidea gabe hasoman ni Naibata, ampa mandapot hagoluhan na sadokah ni dokahni. (1 Tim. 4:16) Lang soal bahat atap pe otik dassa na boi ibahen hita ibagas pangidangion, marsiurupan do hita sanggah mandalankon tugas ai. (1 Tim. 2:3, 4) Tontu sada hasangapon do boi gabe hasoman sahorja ni Naibata!​—1 Kor. 3:9.

6. Aha do na masa bani piga-piga halak Kristen hinan?

⁶ Tapi bani panorang ni si Timoteus, dong piga-piga halak Kristen na lang be mangkargai hasangapon ai. Umpamani, halani mangkaholongi dunia on, lang ra be si Demas rup mangidangi pakon si Paulus. (2 Tim. 4:10) Itadingkon si Pegelus pakon si Hermogenes do pangidangionni halani ra do mabiar sidea iparburu songon si Paulus. (2 Tim. 1:15) Gabe murtad do si Himeneus, si Aleksander, pakon si Piletus anjaha lang be manombah Jahowa. (1 Tim. 1:19, 20; 2 Tim. 2:16-18) Mungkahni, holong do uhur ni sidea bani Jahowa. Tapi ujungni lang be maharga iahap sidea arta na dob ibere Jahowa hubani sidea.

7. Aha do na ibahen Sibolis ase itadingkon hita hasintongan?

⁷ Aha ma na ibahen Sibolis ase lang be poltik ijolom hita hasintongan ai? Marhitei hiburan, acara TV, film, Internet, ampa sibasaon, marusaha do ia mambahen ase hita lang be manangihon Jahowa. Dokah-dokah, gabe itadingkon hita ma hasintongan ai. Igunahon ia do homa halak laho pabiar-biarhon hita ase maronti hita marbarita. Marusaha do homa ia mambahen ase itadingkon hita hasintongan marhitei ajaran ni halak na murtad.​—1 Tim. 6:20, 21.

8. Aha ma na boi iparlajari hita humbani pangalaman ni hasomanta si Daniel?

⁸ Anggo lang jaga hita, dokah-dokah gabe lang poltik ijolom hita hasintongan ai. Pardiateihon ma pangalaman ni hasomanta si Daniel. * Marosuh tumang ia mar-game. Nini do, “Domma mar-game ahu  sanggah marumur sapuluh tahun. Mungkahni pitah na dear dassa na hupilih. Tapi dokah-dokah gabe marosuh ma ahu game na dong kekerasan ampa begu-beguni.” Ra do hira-hira 15 jam ia mar-game tiap ari. Nini si Daniel use, “Sasintongni hubotoh do pabois-boiskon panorangku dassa ai, janah mambahen ahu lambin daoh humbani Jahowa. Tapi ninuhur ma, ‘Lang maningon hudalankon ganup na ihatahon Bibel.’” Jadi anggo lang jaga hita, ujungni gabe itadingkon hita ma hasintongan halani hiburan na ipilih hita. Dob ai, lang be maharga iahap hita arta na dob ibere Jahowa hubanta.

9. Domu bani 1 Timoteus 1:18, 19, songon aha do isarupahon si Paulus si Timoteus?

⁹ Basa 1 Timoteus 1:18, 19. Isarupahon si Paulus do si Timoteus songon sada tentara na laho hu ‘parporangan na madear’. Sedo parporangan laho manlawan jolma na imaksud si Paulus ijon. Mase ma halak Kristen isarupahon songon tentara na laho marporang? Sifat aha do na porlu ipatuduh hita? Ulas hita ma lima parlajaran na boi dapot hita humbani limbaga ni si Paulus. Holi gabe ibotoh hita ma sonaha ase poltik ijolom hita hasintongan ai.

10. Mase maningon setia hita hubani Naibata?

¹⁰ Totap ma setia hubani Naibata. Maningon setia do sahalak tentara. Marusaha do ia manlinggomi na ihaholongisi. Halani ai, iojur si Paulus ma si Timoteus ase totap setia hubani Naibata. (1 Tim. 4:7) Anggo lambin banggal holongta hubani Jahowa janah setia hita hu Bani, tontu lambin marusaha ma hita manjolom poltik hasintongan ai.​—1 Tim. 4:8-10; 6:6.

11. Mase porlu ilatih hita dirinta laho mangkorjahon na madear?

¹¹ Latih ma dirimu laho mangkorjahon na madear. Maningon ilatih sada tentara do dirini ase sirsir ia laho hu parporangan. Halani ai, iojur si Paulus ma si Timoteus ase ilembangi ia hisap-hisap ni daging, iparayak sifat-sifat na madear, anjaha marsaor pakon sanina botou. Halani ra si Timoteus mandalankon ai, gabe boi ma ia manulak harosuh ni Sibolis. (2 Tim. 2:22) Tapi maningon torus do ilatih si Timoteus dirini laho mangkorjahon ai. Maningon sonai do homa ibahen hita ase boi hita manulak hisap-hisap ni dagingta. (Rom 7:21-25) Maningon tongtong ma ilatih hita dirinta laho mambahen hamubahon ampa patuduhkon sifat-sifat na madear. (Ep. 4:22, 24) Anjaha, ra do sipata loja pangahapta halani sibuk marhorja. Hassi pe sonai, maningon marusaha do hita ase boi totap roh hu partumpuan.​—Heb. 10:24, 25.

12. Sonaha ase boi lambin pandei hita manggunahon Bibel?

¹² Maningon pandei do sahalak tentara manggunahon sinjatani. Halani ai, maningon taratur ma ia marlatih manggunahon ai. Sonai homa hita, maningon pandei do hita manggunahon Bibel. (2 Tim. 2:15) Sanggah i partumpuan ilatih do hita sonaha manggunahon ai. Tapi hita sandiri pe porlu do homa mamparlajari ai. On artini lang sungkup pitah ibasa hita Bibel. Porlu do homa irimangi hita ai, mambahen riset, ase iarusi hita isini janah ibotoh hita sonaha mandalankon podahni ibagas goluhta. Hasilni, gabe toguh ma haporsayaonta. (1 Tim. 4:13-15) Dob ai, gabe ibotoh hita ma sonaha manggunahon ai laho mangurupi na legan ase porsaya sidea marguna do Bibel ai hubani goluhni. Tangkas ma,  maningon taratur do iparlajari hita Bibel ase lambin pandei hita mangajari na legan.​—2 Tim. 3:16, 17.

13. Domu bani Heber 5:14, aha do na maningon ibahen hita?

¹³ Mangarusi ija na lepak ampa na sintong. Maningon ibotoh sahalak tentara do sonaha ia padaohkon dirini humbani bahaya. Maningon ibotoh hita do homa situasi na ija do na mambahen hita mangkorjahon na lepak, ase ibotoh hita sonaha padaohkon diri hunjai. (Pod. 22:3; basa Heber 5:14.) Umpamani, maningon maruhur ma hita sanggah mamilih hiburan. Bahat do sonari on acara TV ampa film na patuduhkon parlahou na lang suman. Paboritkon uhur ni Naibata do parlahou na sisonai janah boi parohkon bahaya hubanta. Tontu lang ipilih hita hiburan na sisonai halani ai boi pasedahon parhasomananta pakon Jahowa.​—Ep. 5:5, 6.

14. Dob iarusi si Daniel masalahni, aha ma na ibahen ia?

¹⁴ Ai ma homa na iahapkon si Daniel na ipatugah nongkan ai. Ujungni ibotoh ia ma gabe sunsah do ia halani mamilih game na sambor ai. Jadi ipindahi ia ma hatorangan hun Watchtower Library na boi mangurupisi. Aha ma hasilni? Lang be ipilih ia game na sisonai janah lang homa ihasomani ia halak na mar-game sisonai. Ia mangkatahon, “Marimbangkon mar-game, rahanan ma ahu marsaor pakon sanina botou i kuria.” Sonari domma gabe sahalak perintis ampa sintua si Daniel.

15. Aha do bahayani sarita na ipararat halak na murtad?

¹⁵ Songon si Timoteus, maningon ibotoh hita ma homa aha do bahayani anggo ra hita manangar hatorangan humbani halak na murtad. (1 Tim. 4:1, 7; 2 Tim. 2:16) Umpamani, ipasambor-sambor sidea do sanina botounta ampa organisasi ni Jahowa. Hatorangan sisonai boi mambahen galek haporsayaonta. Halani ai, ulang ra hita manangar atap pe mambasa hatorangan ni sidea. Mase? Halani hatorangan sisonai roh humbani “halak na dob seda uhurni, na dob magouan hasintongan in”. Sihol do sidea ‘marsual-sual ampa martongkar’. (1 Tim. 6:4, 5) Marusaha do sidea mambahen ase lang porsaya hita hubani sanina botounta.

16. Aha ma na mambahen hita lang be palobeihon Harajaon ni Naibata?

 ¹⁶ Palobei ma Harajaon ni Naibata. Songon “tentara ni Kristus Jesus na bujur”, totap do ipingkirhon si Timoteus pangidangionni marimbangkon patumpuhon arta. (2 Tim. 2:3, 4) Sonai homa hita, ulang ma ibahen hita mangindahi habayakon na sipontingan ibagas goluhta. Boi do gabe magou holongta halani “habayakon sipanipu in”. Dob ai, gabe lang be iahap hita maharga Hata ni Naibata in, janah lang be marosuh hita mambaritahon ai hubani na legan. (Mat. 13:22) Halani ai, totap ma igunahon hita gogoh ampa panorangta laho ‘palobeihon Harajaon ni Naibata’ ibagas goluhta.​—Mat. 6:22-25, 33.

17-18. Sonaha hita boi manjaga parhasomananta pakon Jahowa?

¹⁷ Pingkirhon ma aha na laho bahenonmu sanggah dong bahaya. Maningon ipingkirhon tentara do aha na laho bahenonni laho manjaga dirini. Sonai homa hita, ase boi hita manjaga arta na ibere Jahowa hubanta, maningon podas ma hita padaohkon diri humbani bahaya. Sonaha carani? Maningon ipingkirhon hita ma aha do na laho bahenonta sanggah dong bahaya.

¹⁸ Contohni, paima ipungkah sada acara, somal do isuruh ketua ase ididah hadirin ija do pintu kaluar na sidohoran humbani hundulan ni sidea. Mase? Halani anggo sompong adong bencana, mintor boi ma sidea podas kaluar hun pintu ai. Sonai homa hita, maningon ilatih hita do homa dirinta. Pingkirhon ma aha do na laho bahenonta anggo sompong ididah hita aha na lang suman sanggah manggunahon internet atap pe sanggah manonton TV. Anggo ibahen hita sonai, mintor podas ma hita padaohkon diri humbani aha pe na boi pasedahon parhasomananta pakon Jahowa. Hasilni, gabe borsih ma parlahounta i lobei ni Jahowa.​—Ps. 101:3; 1 Tim. 4:12.

19. Pasu-pasu aha ma na dapot hita anggo ijaga hita arta na dob ibere Jahowa hubanta?

¹⁹ Domma ibere Jahowa hubanta hasintongan ni Bibel ampa hasangapon laho mangajarhon ai hubani halak na legan. On patuduhkon porsaya do Ia hubanta. Marhitei pangurupion-Ni boi do ijaga hita arta na maharga ai. Anggo ibahen hita sonai, gabe borsih ma panggora ni uhurta, martuah ma goluhta, janah gabe marmalas ni uhur ma hita halani mangurupi halak mananda Jahowa.​—1 Tim. 6:12, 19.