1-2. Aha do kaitanni na ihatahon bani Parambilan 11:6 pakon horja parambilanonta?

BANI piga-piga nagori, bahat do halak na ra manjalo barita na madear. Tapi bani ianan na legan bahat do na lang marosuh. Sonaha halak i ianan ni nasiam? Lang soal bahat na manjalo atap lang, sihol do Jahowa ase nasiam totap ringgas marbarita ronsi ihatahon Ia salosei horja ai.

² Domma itontuhon Jahowa ‘sadihari do salosei horja parambilanon’ ai. (Mat. 24:14, 36) Tapi paima roh ari ai sonaha ma bahenonta ase “ulang mintor marsaran” tanganta? *​—Basa Parambilan 11:6.

3. Aha do na laho iulas hita bani artikel on?

³ Bani artikel na salpu domma iulas hita ompat cara na porlu bahenonta ase boi gabe “sijala jolma”. (Mat. 4:19) Bani artikel on, holi iulas hita ma sonaha ase hita boi totap ringgas marbarita lang soal sitaronon aha pe na masa hubanta. Holi iparlajari hita ma (1) mase maningon ibahen hita horja parambilanon ai na sipontingan ibagas goluhta, (2) mase maningon sabar hita, anjaha (3) mase maningon toguh haporsayaonta.

4. Mase maningon ringgas hita mangkorjahon tugas humbani Jahowa?

⁴ Ipatugah Jesus do hubani susianni sonaha parlahou ni halak bani panorang parpudi ampa aha na laho masa. Jadi ibotoh ia ma anggo ganupan ai boi mambahen susianni lang ringgas be marbarita. Halani ai ihatahon ia ma, “Jaga ma  hanima.” (Mat. 24:42) Na masa bani panorangta sonari on pe, sarupa do homa songon na masa bani panorang ni si Noak. Hinan bahat do halak na lang ra manangihon sipasingat humbani si Noak, sonai homa sonari on. (Mat. 24:37-39; 2 Ptr. 2:5) Hassi pe sonai, maningon totap ma hita ringgas mangkorjahon tugas humbani Jahowa.

5. Domu bani Lahoan 1:6-8, das huja do ambilan ai ibaritahon?

⁵ Sonari, mambaritahon pasal Harajaon do na sipontingan ibagas goluhta. Hinan domma ihatahon Jesus dobkonsi matei pe ia, torus do iambilankon susianni pasal Harajaon ai. (Joh. 14:12) Hape dob matei ia dong piga-piga susianni na laho mardengke use. Jadi dobkonsi ipapuho Jesus, laho ma ia manjumpahi sidea. Marhitei halongangan iurupi ia ma sidea ase mandapot buei dengke. Tapi dob ai ihatahon ia ma bani sidea, marbarita anjaha mangurupi halak gabe susianni do horja na sipontingan. (Joh. 21:15-17) Paima naik hu surga, ihatahon Jesus ma bani susianni lang pitah i Israel iambilankon sidea barita ai. (Basa Lahoan 1:6-8.) Anjaha martahun-tahun dobkonsi ai, marhitei panonggoran ipatugah ia ma hubani apostel Johannes aha na laho masa bani “ari ni Tuhan”. * Bahat do na ididah si Johannes bani panonggoran ai. Umpamani, ididah ia ma dong sada malekat anjaha dong “ambilan na madear sisadokah ni dokahni” na maningon ibaritahon bani “haganup bangsa, marga, hata pakon suku”. (Pangk. 1:10; 14:6) Jadi, tangkas ma sihol do Jahowa ase hita marbarita hu sab dunia on ronsi ihatahon Ia domma salosei horja ai.

6. Sonaha ase boi hita lambin ringgas marbarita?

⁶ Anggo irimangi hita sonaha carani  Jahowa mangurupi hita, gabe lambin ringgas ma hita marbarita. Umpamani, buei tumang do ipasirsir publikasi hubanta. Dong homa audio, video, ampa acara broadcasting. Situs webta pe domma ibahen lobih humbani 1.000 bahasa. (Mat. 24:45-47) Bahat do halak i sab dunia on na lang marsada halani ugama ampa politik. Tapi anggo Saksi Jahowa lang sonai. Hassi pe sidea dong lobih humbani ualuh juta halak, tapi marsada do ganupan. Umpamani, bani ari Jumat tanggal 19 April 2019 na salpu, ganup do sidea manonton video na mangulas ayat arian bani ari ai. Janah bani bornginni ai, dong 20.919.041 halak na dihut bani acara Pardingatan Hamatean ni Jesus. Anggo irimangi hita ganupan ai, tontu gabe tarojur ma hita ase lambin ringgas mambaritahon pasal Harajaon.

7. Anggo itiru hita Jesus, mase ai boi mambahen hita lambin ringgas marbarita?

⁷ Leganni ai, ase boi lambin ringgas hita marbarita, tiru ma Jesus. Lang soal aha na masa totap do ia manaksihon hasintongan in. (Joh. 18:37) Sanggah laho ibere Sibolis “haganup harajaon na i dunia on ampa hasangaponni” hu bani, lang ra ia. (Mat. 4:8, 9; Joh. 6:15) Sanggah bahat halak sihol mambahen ia gabe raja, lang ra homa ia. Lang homa sihol uhurni gabe halak na bayak. Dob ai sanggah iparburu halak ia, totap do ia marbarita. (Luk. 9:58; Joh. 8:59) Jadi sanggah adong tantangan na manguji haporsayaon ni nasiam, dingat ma podah ni apostel Paulus. Iojur ia do ganup halak Kristen ase maniru Jesus halani ai do na mangurupi sidea “ase ulang marnaloja anjaha mandolei”.​—Heb. 12:3.

8. Sonaha do halak na sabar ai, janah mase ponting tumang ai sonari?

⁸ Halak na sabar totap do ia tenang paimahon ronsi mubah situasini. Ra do nini uhurta podas ma namin salpu sitarononta on. Tapi maningon sabar do hita paimahon ai. Hinan mangarap do homa nabi Habakuk ase lang adong be hajahaton i Juda. (Hab. 1:2) Mangarap do homa susian ni Jesus ase ‘mintor ipatalar’ Harajaon ai, janah ipaluah sidea humbani pamarentahan ni Rom. (Luk. 19:11) Sonari, mangarap do homa hita ase isalpuhon Harajaon ni Naibata ganup hajahaton janah parohkon hadameion hu sab dunia on. (2 Ptr. 3:13) Tapi maningon sabar do hita paimahon roh panorangni ai halani domma itontuhon Jahowa sadihari do ai masa. Pardiateihon hita ma sonaha Jahowa mangajari hita ase sabar.

9. Sonaha Jahowa patuduhkon hasabaron?

⁹ Sabar tumang do Jahowa ai. Ibere do sungkup panorang hubani si Noak ase boi ia pajongjongkon parau anjaha mambaritahon pasal ai. (2 Ptr. 2:5; 1 Ptr. 3:20) Dob ai, sanggah Jahowa sihol manripaskon halak Sodom ampa Gumora, sabar do Ia manangihon sanggah marulak-ulak si Abraham manungkun pasal haputusan-Ni. (1 Mus. 18:20-33) Anjaha marratus tahun dobkonsi ai, totap do sabar Jahowa hubani halak Israel na lang setia. (Neh. 9:30, 31) Sonari pe ididah hita sabar do Jahowa hubani juakjuak-Ni. Ibere do sungkup panorang hubani sidea ase boi mambahen “hamubahon”. (2 Ptr. 3:9; Joh. 6:44; 1 Tim. 2:3, 4) Mardingat haganupan ai, maningon sabar do homa hita ase boi torus marbarita anjaha mangajari halak. Leganni ai, marhitei limbaga na dong bani Bibel iajari Jahowa do homa hita sonaha patuduhkon hasabaron.

10. Domu bani Jakobus 5:7, 8, aha do na boi iparlajari hita humbani parjuma?

¹⁰ Basa Jakobus 5:7, 8. Boi do hita  marlajar sonaha patuduhkon hasabaron humbani parjuma. Dong suan-suanon na podas pariama, tapi dong homa na dokah. Hinan dobkonsi manuan halak Israel, onom bulan ma sidea paimahon das panorang pariama. Jadi parlobei maningon sabar ma sidea paimahon udan ase boi sidea martidah. Dob ai, ipaima sidea ma ronsi onom bulan ase boi sidea pariama. (Mrk. 4:28) Jadi tiru hita ma hasabaron ni parjuma ai. Tapi sipata ra do lang urah patuduhkon ai.

11. Aha do gunani hasabaron ai ibagas pangidangion?

¹¹ Somalni, sihol do hita ase podas taridah hasilni horjanta. Jadi ase martumbor boras ni suan-suanonta, maningon dear ma iurus hita ai. Maningon isamoti hita do lobei tanohni, dob ai itidahkon ma bonihni anjaha isiram. Sonai ma homa na porlu ibahen hita sanggah mangurupi halak gabe susian ni Jesus. Ra do adong parlajar Bibelta na sunsah ope ase ulang manonggor jumbak. Jadi porlu do hita sabar mangurupi sidea. Anjaha anggo sabar hita, tontu lang gabe maretek ni uhur hita sanggah lang adong halak na ra manangihon baritanta. Anggo dong halak na ra marlajar Bibel, maningon sabar do hita bani sidea. Ulang ipaksa hita sidea ase podas mambahen hamajuon. Gari susian ni Jesus pe lang mintor iarusi sidea aha na iajarhon Jesus. (Joh. 14:9) Dingat ma, hita pitah manuan ampa mangarbahi, tapi Naibata do na mambahen tubuh haporsayaonni.​—1 Kor. 3:6.

12. Sonaha hita patuduhkon hasabaron sanggah marbarita hubani kaluarganta?

¹² Ra do lang urah patuduhkon hasabaron sanggah hita marbarita hubani kaluarganta. Tapi adong do prinsip na dear na boi mangurupi hita bani Parambilan 3:7. Ijai ihatahon, “Adong panorang sipsip, anjaha dong panorang marsahapi.”  Tongon ra do adong kaluarganta na ra manangihon baritanta halani mangidah parlahounta na dear. Tapi maningon sirsir do homa hita sadihari pe adong panorang laho mansaritahon pasal Jahowa hubani sidea. (1 Ptr. 3:1, 2) Jadi maningon sabar do hita sanggah marbarita ampa mangajari halak. Sabar ma homa hita hubani kaluarganta.

13-14. Patugah ma ise do juakjuak ni Naibata na patuduhkon hasabaron?

¹³ Bahat do homa juakjuak ni Naibata na basaia ampa na sonari on na patuduhkon hasabaron. Anjaha boi do hita marlajar humbani sidea. Umpamani, sihol do si Habakuk ase salpu hajahaton i nagorini. Tapi sabar do ia paimahon ai. Halani ai ihatahon ia ma sonon, “Bani manara parjagaanku do ahu sihol jongjong.” (Hab. 2:1) Sonai homa si Paulus, sihol do ia ase salosei horja pangidangionni. Hassi pe sonai, totap do sabar ia “manaksihon ambilan na madear” hubani haganup halak.​—Lah. 20:24.

¹⁴ Pardiateihon ma siusihan humbani suami istri na wisuda hun Sikolah Gilead. Itugaskon ma sidea hu sada nagori, anjaha i nagori ai bahat do halakni lang marugama Kristen. Halani ai, sunsah ma dapot sidea halak na ra marlajar Bibel. Hape isaritahon hasoman sakalasni ma bahat do halak na ijumpahi sidea na ra marlajar Bibel. Tapi totap do sidea ringgas marbarita hassi pe i iananni bahat halak lang ra manangihon, janah sabar do homa sidea. Dobkonsi ualuh tahun, ujungni adong ma parlajar Bibel ni sidea na ididi. Malas tumang do uhur ni sidea halani ai. Aha ma na boi iparlajari hita humbani juakjuak ni Naibata ai? Lang gabe marayoh sidea, atap pe mintor marsaran tanganni. Gabe ipasu-pasu Jahowa do sidea halani ai. Andohar ma ‘itiru hita sidea, sitean bagah-bagah ai, marhitei na marhaporsayaon ampa marsabar ni uhur’.​—Heb. 6:10-12.

15. Sonaha hita boi patoguhkon haporsayaonta ase lambin ringgas marbarita?

¹⁵ Maningon porsaya do hita bani barita na iboan hita ase lambin marhinsah ni uhur hita padaskon ai bani buei halak. Porsaya do homa hita bani janji ni Naibata na isurat ibagas Bibel. (Ps. 119:42; Jes. 40:8) Domma ididah hita sonaha janji-Ni saud bani panorangta sonari on. Ididah hita do homa lambin dear hagoluhan ni halak halani ra mandalankon podah ni Bibel. Anggo irimangi hita ganupan ai, gabe porsaya ma hita bahat nari ope halak na porlu manangar ambilan pasal Harajaon.

16. Sonaha Psalmen 46:2-4 boi mangurupi hita ase lambin ringgas marbarita?

¹⁶ Porsaya do homa hita hubani Jahowa halani Ia do Harohan ni barita na iboan hita. Leganni ai, porsaya do homa hita hubani Jesus, Raja na dob pinilih-Ni. (Joh. 14:1) Lang soal aha pe na masa, sai tongtong do ipargogohi anjaha ilinggomi Jahowa hita. (Basa Psalmen 46:2-4.) Porsaya do homa hita Jesus do na manogu-nogu horja parambilanonta sonari on, marhitei kuasa na ibere Jahowa hu bani.​—Mat. 28:18-20.

17. Bere ma contoh na patuduhkon mase hita porlu totap marbarita.

¹⁷ Porsaya do homa hita ipasu-pasu Jahowa do horjanta, janah sipata pasu-pasu ai lobih humbani na ipingkirhon hita. (Par. 11:6) Umpamani, bai ganup ari dong marribu halak na mangidah hita manjaga gerai. Ai dong do hasilni cara sisonai? Bani Pelayanan Kerajaan Kita  November 2014, dong ipatugah sada pangalaman humbani anak boru na kuliah i sada universitas. Mungkahni, ia sihol manulis sada artikel pasal Saksi Jahowa. Hape lang ibotoh ia ija do Balei Harajaon ni Saksi Jahowa. Tapi ibotoh ia dong Saksi na manjaga gerai i kampusni. Ijai ma dapotsi hatorangan pasal Saksi Jahowa na ihaporluhon ia laho mangkorjahon tugasni ai. Sonari botou ai domma gabe Saksi Jahowa anjaha mangidangi gabe perintis biasa. Anggo irimangi hita pangalaman sisonai, tontu lambin tarojur ma hita laho marbarita halani ibotoh hita dong ope halak na porlu manangar ambilan pasal Harajaon.

18. Mase pos uhurta salosei do holi horja parambilanonta?

¹⁸ Pos ma uhurta salosei do holi horja parambilanonta domu bani panorang na dob itontuhon Jahowa. Dingat ma aha na masa bani panorang ni si Noak. Hunjai taridah ma topat bani panorangni do Jahowa pasaudkon harosuh-Ni. Domma itontuhon Ia parrohni Bah na Sumbang 120 tahun paima masa ai. Marpuluh tahun dobkonsi ai, iparentahkon Ia ma si Noak laho pajongjongkon sada parau. Hira-hira 40 atap 50 tahun paima masa Bah na Sumbang, totap do ringgas si Noak mangkorjahon tugasni. Anjaha hassi pe bahat halak lang ra manangihon hatani, totap do ia mambaritahon sipasingat humbani Jahowa, ronsi das panorangni laho pamasukkon binatang-binatang hubagas parau ai. Ujungni, itutup Jahowa ma labah ni parau ai.​—1 Mus. 6:3; 7:1, 2, 16.

19. Aha ma na boi ididah hita anggo lang ipaturut hita marsaran tanganta?

¹⁹ Tongkin nari, salosei ma horja parambilanonta janah iripaskon Jahowa ma Sibolis ampa parjahat. Bahenon-Ni ma tanoh on gabe paradeiso. Tapi paima masa ai, tiru hita ma si Habakuk, si Noak, ampa na leganni, na pongkut mangkorjahon tugas humbani Jahowa. Andohar ma hita totap ringgas marbarita, sabar, anjaha patoguh hita ma haporsayaonta hubani Jahowa ampa janji-Ni.