1-2. Pasal aha do na ipatugah Nabi Haggai na domma masa sonari on?

BANI tahun 2015, dong gempa na banggal i Nepal. Piga-piga halak na selamat humbani gempa ai mangkatahon, “Hutonggor ma podas tumang retak bangunan ijai.” Dong use na mangkatahon, “Marlintuni ma halak hujai hujon. Dong na mangkatahon dua menit dassa gempa ai. Tapi sai hudingat do lalab na masa ai.” Anggo masa na sisonai i iananmu, ra do ham pe lang urah manlupahon ai.

² Sasintongni, sonari pe dong sada gempa na legan na domma masa humbani marpuluh-puluh tahun na salpu ronsi panorangta sonari on. Janah gempa ai lang pitah sada nagori na idugur. Tapi dihut do sab tanoh on. Domma dokah ipatugah Nabi Haggai pasal ai. Ia mangkatahon, “Ai sonon do hata ni Jahowa Zebaot, ‘Sahali nari, seng sadiha dokahni be, duguron-Ku ma langit pakon tanoh pakon laut ampa darat.’”​—Hag. 2:6.

3. Mase boi ihatahon pitah gambaran dassa gempa na ipatugah si Haggai ai?

³ Sasintongni pitah gambaran dassa gempa na ipatugah si Haggai ai. Somalni anggo gempa bumi parohkon hasedaon do. Tapi anggo gempa na ipatugah si Haggai, mambahen na dear do. Jahowa mangkatahon, “Duguron-Ku ma ganup bangsa sipajuh begu-begu, gabe roh ma na maharga ni ganup bangsa sipajuh begu-begu, gabe gokan-Ku ma rumah on bani hamuliaon.” (Hag. 2:7) Sonaha do ayat ai saud bani masa ni si Haggai? Anjaha sonaha ai saud bani panorangta sonari on?  Iulas hita ma balosni ai bani artikel on. Anjaha iulas hita use mase boi ihatahon dihut do hita mandugur bangsa-bangsa ai.

4. Mase isuruh Jahowa si Haggai manjumpahi halak Israel?

⁴ Ibere Jahowa ma sada tugas na ponting bani si Haggai. Bani tahun 537 SM, mulak ma halak Israel hun Babilon hu Jerusalem. Janah ra do dihut si Haggai bani rombongan ai. Dob das sidea i Jerusalem, ipajongjong sidea ma fondasi ni rumah panumbahan. (Esr. 3:8, 10) Tapi lang piga dokah dobkonsi ai, dong piga-piga halak ijai na manlanglangi horja ni sidea. Gabe maretek ni uhur ma halak Israel halani ai janah lang itoruskon sidea be pajongjongkon rumah ai. (Esr. 4:4; Hag. 1:1, 2) Jadi, bani tahun 520 SM, isuruh Jahowa ma Nabi Haggai patoguhkon halak Israel ase isaloseihon sidea horja ai. *​—Esr. 6:14, 15.

5. Mase hata ni si Haggai boi patoguhkon halak Israel?

⁵ Ipatugah Nabi Haggai ma Hata ni Jahowa na mambahen toguh haporsayaon ni halak Israel. Nini ma, “‘Tenger ma homa uhurmu, ale bangsa na i tanoh in,’ nini Jahowa, ‘nunut marhorja, ai Ahu do hasomannima,’ nini Jahowa Zebaot.” (Hag. 2:4) Hata “Jahowa Zebaot” patuduhkon bahat tumang do tentara ni Jahowa i surga, ai ma malekat-malekat-Ni. Jadi maningon marpangunsandeian do halak Israel bani Jahowa ase boi marhasil horja ni sidea.

6. Aha do hasilni halani idugur Naibata bangsa-bangsa i tanoh on?

⁶ Marhitei si Haggai, ipatugah Jahowa ma na laho duguron-Ni do bangsa-bangsa i tanoh on. Pitah gambaran do ai. Artini laho duguron ni Naibata ma halak Persia na gabe kuasa dunia sanggah ai. Tontu gambaran on boi patoguhkon uhur ni halak Israel na maretek ni uhur. Aha ma na masa dobkonsi idugur Naibata bangsa i tanoh on? Na parlobei, gabe boi ma isaloseihon halak Jahudi rumah panumbahan ai. Anjaha dong holi halak na lang Jahudi na roh hu rumah panumbahan ai laho manombah Jahowa. Tontu gabe toguh tumang ma uhur ni halak Israel manangar ai.​—Sak. 8:9.

7. Mase boi ihatahon anggo sonari dihut do hita mandugur bangsa-bangsa i tanoh on?

⁷ Sonaha ma hata ni si Haggai saud bani panorangta sonari on? Sonari on, idugur Naibata do bangsa-bangsa i tanoh on. Janah dihut do homa hita bani horja ai. Sonaha carani? Halani hita mambaritahon ambilan na madear pasal Harajaon, gabe songon na idugur ma bangsa-bangsa manangar barita ai. Rimangi hita ma on: Bani tahun 1914, ilantik Jahowa ma Jesus Kristus gabe Raja bani Harajaon-Ni. (Ps. 2:6) Anggo Harajaon ni Naibata domma mamarentah hu tanoh on, iripaskon ma ganup pamarentahan i dunia on. (Luk. 21:24) Gabe sogam ma uhur ni pamarentah i dunia on manangar barita ai. Humbani tahun 1919, sai tongtong do Saksi Jahowa mambaritahon pitah Harajaon ni Naibata dassa na boi pasaloseihon parsoalan i dunia on.​—Mat. 24:14.

8. Domu bani Psalmen 2:1-3, sonaha ma pangahap ni bangsa-bangsa manangar barita Harajaon?

⁸ Sonaha ma pangahap ni bangsa-bangsa manangar barita ai? Bahat do sidea na gabe manggila. (Basa Psalmen 2:1-3.) Lang marosuh sidea manjalo Raja na ipilih Jahowa. Anjaha barita Harajaon ai, lang gabe barita  na madear ai bani sidea. Dong do homa na manlarang hita marbarita. Age pe ihatahon sidea porsaya sidea bani Naibata, tapi lang ijalo sidea Harajaon-Ni. Songon na masa bani masa ni Jesus hinan, ianiaya pamarentah do hita halani lang marosuh sidea bani Jesus.​—Lah. 4:25-28.

9. Kesempatan aha ope na ibere Naibata bani halak na lape ra manjalo barita Harajaon?

⁹ Aha ma na laho ibahen Naibata bani bangsa-bangsa ai? Psalmen 2:10-12 mangkatahon, “Ai pe, nasiam sagala raja, paruhurhon nasiam ma ai, sai ra ma nasiam paingaton, nasiam sagala panguhum ni tanoh on. Balosi nasiam ma Jahowa marhasoman biar, anjaha summah nasiam ma nahei-Ni marhasoman hitir, ase ulang roh ringis-Ni gabe magou nasiam i tongah dalan, ai urah do gajag ringis-Ni. Martuah do sagala na marhatengeran Bani.” Ronsi sonari ibere Jahowa ope panorang bani halak i dunia on ase mambahen hamubahon janah manjalo Harajaon-Ni. Tapi lang bahat nari be panorangni. Halani sonari on hita manggoluh “bani panorang parpudi”. (2 Tim. 3:1; Jes. 61:2) Jadi ponting tumang do sonari ase ibotoh halak hasintongan janah mambahen pilihan na sintong.

10. Halani bangsa-bangsa i tanoh on domma idugur, hasil na dear aha do na ipatugah bani Haggai 2:7-9?

¹⁰ Halani domma idugur bangsa-bangsa ai, parohkon hasil na dear ma ai. Si Haggai mangkatahon, “Gabe roh ma na maharga ni ganup bangsa [halak na bujur]” laho manombah Jahowa. * (Basa Haggai 2:7-9.) Isuratkon Nabi Jesaya pakon Nabi Mika do homa pasal ai. Anjaha masa ma ai bani “ari parpudi”.​—Jes. 2:2-4; Mi. 4:1, 2.

11. Aha do na ibahen sada hasomanta dobkonsi itangar ia barita pasal Harajaon?

¹¹ Pardiateihon ma aha do pengaruh ni barita Harajaon ai hubani Sanina Ken na mangidangi i kantor pusat. Idingat ia ope sonaha do mungkahni ia manangar barita pasal Harajaon  hira-hira 40 tahun na salpu. Ihatahon ia ma, “Sanggah parlobei sahali ahu mambotoh hasintongan, malas tumang uhurhu halani sonari hita manggoluh bani panorang parpudi. Artini salpu mando dunia na jahat on. Huarusi homa ase malas uhur ni Jahowa hubangku janah boi ahu manggoluh sadokah ni dokahni, lang boi ahu mangihutkon halak i dunia on. Pitah Jahowa do na maningon husombah. Jadi martonggo ma ahu ase boi huhorjahon ai. Ujungni, lang be huihutkon halak i dunia on. Janah porsaya do ahu pitah Harajaon ni Naibata na tongtong mamarentah i dunia on.”

12. Mase boi ihatahon gabe gok do hamuliaon i rumah ni Jahowa bani panorang parpudi?

¹² Tangkas ma ipasu-pasu Jahowa do juakjuak-Ni sonari on. Sadokah panorang parpudi on lambin bahat do halak na ra manjalo barita Harajaon. Hinan bani tahun 1914, pitah marribu dassa Saksi Jahowa. Tapi anggo sonari dong lobih ualuh juta halak na mangidangi Jahowa. Anjaha dong marjuta halak homa na dihut hu acara Pardingatan Hamatean ni Jesus. On patuduhkon lambin bahat do “na maharga” humbani bangsa-bangsa na roh hu rumah ni Jahowa laho manombah-Si. Anjaha gabe iparmulia ma goran ni Jahowa halani torus sidea mambahen parubahan ibagas goluhni.​—Ep. 4:22-24.

13. Songon na ipatugah si Jesaya, aha ope na masa bani panorang parpudi on? (Tonggor ma gambar sampul.)

¹³ Dob ai, masa do homa aha na isurat bani Jesaya 60:22. Ijai ihatahon, “Na etek ai gabe saribu, na otik ai gabe sada bangsa na gogoh. Ahu do Jahowa, na papodaskon roh bani panorangni.” Jadi haganup halak na roh manombah Jahowa, ganup do ai dong bei do keterampilanni. Janah igunahon sidea do ai laho mambaritahon ambilan na madear pasal Harajaon. Ipatugah si Jesaya do homa iinum juakjuak ni Naibata do holi ‘susu ni bangsa-bangsa’. (Jes. 60:5, 16) Tongon do ai. Sonari halani bahat sanina botou na ringgas marhorja ibagas organisasi ni Jahowa, gabe boi ma barita Harajaon on das hu 240 nagori, janah publikasinta boi iterjemahkon lobih humbani 1.000 bahasa.

14. Pilihan aha do na maningon ibahen ganup halak sonari on?

¹⁴ Sonari ma panorangni ganup bangsa-bangsa maningon mambahen pilihan. Ai ise do na ipilih sidea, Harajaon ni Naibata do atap pamarentahan i dunia on? Anjaha juakjuak ni Naibata pe maningon do mambahen pilihan. Tongon, idalankon hita do peraturan na ibahen pamarentah. Tapi maningon totap do homa hita netral bani politik. (Rom 13:1-7) Porsaya do hita pitah Harajaon ni Naibata dassa na boi pasaloseihon ganup masalah i dunia on. Anjaha Harajaon ai seng hun dunia on.​—Joh. 18:36, 37.

15. Songon na ipatugah bani buku Pangungkabon, aha do holi na manguji haporsayaonta?

¹⁵ Bani buku Pangungkabon ipatugah dong do holi na manguji haporsayaonta sadokah panorang parpudi. Marusaha do pamarentah i dunia on mambahen hita ase ra hita mangihutkon sidea anjaha manadingkon Jahowa. Anggo lang ra hita, ianiaya sidea ma hita. (Pangk. 13:12, 15) Ipaksa sidea do holi ganup “na etek ampa na magodang, na bayak ampa na musil [atap miskin], halak na mardeka pakon jabolon, mambahen tanda bani tanganni atap bani pardompakanni”. (Pangk. 13:16) Hinan, sahalak jabolon maningon ibahen do tanda bani angkulani laho patuduhkon ise do tuanni. Sonai homa sonari on. Marusaha do pamarentah i dunia on mambahen tanda bani ganup halak. Maksudni marusaha sidea mambahen ganup halak mangihutkon politik ni sidea.

16. Humbani sonari, mase ponting ase ipatoguh hita haporsayaonta bani Jahowa?

¹⁶ Ai ra do hita manjalo tanda humbani politik ai? Halak na lang ra manjalo tanda ai, gabe bahat do holi tantangan na roh bani sidea. Bibel mangkatahon, “Lang boi atap ise mamboli atap manjual, anggo seng dong bani tanda ai.” (Pangk. 13:17) Tapi humbani Pangungkabon 14:9, 10, ipatugah do aha na laho masa bani halak na mamakei tanda ai. Halani ai, lang ra hita manjalo tanda humbani politik i dunia on. Tapi Jahowa do na ipilih hita. Usih ma ai hita songon na manuratkon bani tanganta, “Jahowa do simada ahu”. (Jes. 44:5) Halani ai, patoguh hita ma haporsayaonta humbani sonari. Anggo ibahen hita sonai, malas ma uhur ni Naibata mangkatahon hita do juakjuak na pinilih-Ni.

17. Aha do na porlu idingat hita pasal hasabaron ni Jahowa?

¹⁷ Lang marosuh Jahowa anggo dong age sada na magou. (2 Ptr. 3:9) Halani hasabaron-Ni, ibere Ia do kesempatan bani ganup halak ase boi mambahen hamubahon. Tapi dingat ma lang sadokah ni dokahni dong kesempatan ai. Anggo totap sidea lang ra mambahen hamubahon, masa ma holi bani sidea songon na masa bani Parao hinan. Ihatahon Jahowa do bani Parao, “Sonari pe boi do pagostongon-Ku tangan-Ku laho mangkonahon hubam pakon hubani bangsamu sampar ase bois ho hun tanoh on; tapi halani on do ase Hupajongjong ho, ase Hupataridahkon hubam gogoh-Ku, anjaha ase tarambilan goran-Ku hu sab tanoh on.” (2 Mus. 9:15, 16) Jadi, dong do holi panorangni maningon ibotoh ganup bangsa do pitah Jahowa dassa Naibata na sintong. (Hes. 38:23) Attigan ma ai masa?

18. (a) Aha do artini hata ‘mandugur’ ma isurat bani Haggai 2:6, 20-22? (b) Hunja ibotoh hita anggo ayat ai saud bani ari simagira?

¹⁸ Ibagas suratni bani halak Heber, ikutip si Paulus ma hata na isurat bani Haggai 2:6,  20-22, janah ipatorang ia bani ari simagira do ayat ai saud. (Basa.) Si Paulus mangkatahon, “‘Duguron [ni Naibata] do sahali nari, seng pitah tanoh on, dihut do nagori atas.’ Hata na mangkatahon ‘sahali nari’ patuduhkon na mubah ma na tardugur on, in ma na tinompa on, ase totap na so tardugur ai.” (Heb. 12:26, 27) Sanggah ihatahon Naibata “duguron-Ku do sahali nari”, on patuduhkon laho iripaskon Naibata ma ganup halak na lang ra manjalo pamarentahan-Ni songon Parao. Jadi, legan do artini hata ‘mandugur’ bani ayat ai pakon na isurat bani Haggai 2:7.

19. Aha do na so hona dugur, anjaha hunja ibotoh hita ai?

¹⁹ Aha do na so hona dugur? Si Paulus mangkatahon, “Ijalo hita do Harajaon na so tardugur, anjaha ibagas ai iidangi hita ma Naibata domu hubani rosuh-Ni, marhasoman hormat ampa biar.” (Heb. 12:28) Sanggah iripaskon Naibata pamarentahan i dunia on, pitah Harajaon-Ni dassa na so hona dugur. Totap do Harajaon ai ronsi sadokah ni dokahni.​—Ps. 110:5, 6; Dan. 2:44.

20. Pilihan aha do na maningon ibahen sasada halak, janah sonaha hita boi mangurupi sidea?

²⁰ Sonari on ganup do halak maningon mambahen pilihan. Anggo ipilih sidea pamarentahan i dunia on, iripaskon ma holi sidea. Tapi anggo ipilih sidea mangidangi Jahowa, dapot sidea ma hagoluhan sadokah ni dokahni. (Heb. 12:25) Sanggah hita marbarita, ijai ma hita boi mangurupi halak na legan laho mambahen pilihan na ponting ai. Halani ai, marusaha ma hita mangurupi buei halak ase mamilih Harajaon ni Naibata. Sai tongtong ma idingat hita hata ni Jesus on, “Ambilankononkon do ambilan na madear on pasal Harajaon in i sab dunia on, laho manaksihon bani haganup bangsa, dob ai pe ase roh ujungni.”​—Mat. 24:14.