1-2. (a) Domu bani Podah 16:31, sonaha ma namin pangahapta mangidah sidea na dob matua? (b) Sungkun-sungkun aha do na laho iulas hita bani artikel on?

SADA berlian anggo lape iolah, lang jenges idahon janah lang marhilong homa. Anggo dong halak na mandapot berlian sisonai, ra do lang ibuat ia ai halani lang ibotoh ia berlian na maharga do ai.

² Usih songon berlian ai ma ganup sanina botou na dob matua. Harga tumang do sidea. Bani Bibel, isarupahon do uban songon sortali atap pe mahkota. (Basa Podah 16:31; 20:29) Tapi sipata ra do hurang ipardiateihon hita sanina botou na dob matua. Sasintongni anggo ra hita lambin mananda sidea bahat tumang do na boi iparlajari hita humbani sidea. Bani artikel on, iulas hita ma tolu sungkun-sungkun on: Mase harga tumang ganup sanina botou na dob matua i lobei ni Jahowa? Sonaha sidea mangurupi organisasi ni Jahowa? Anjaha aha do na boi ibahen hita ase mandapot parlajaran humbani pangalaman ni sidea?

3. Domu bani Psalmen 92:13-16, mase harga tumang sidea na dob matua i lobei ni Jahowa?

³ Harga tumang do ganup sanina botou na matua i lobei ni Jahowa. Ibotoh Ia do sonaha paruhuran ampa sifat-sifat ni sidea na dear. Malas do uhur-Ni anggo dong na matua na ra mangajari na legan anjaha mansaritahon pangalamanni. (Job 12:12; Pod. 1:1-4) Sai tongtong do idingat Jahowa pambahenan  ni sidea laho mangidangi-Si. (Mal. 3:16) Age pe bahat tantangan, tapi totap do setia sidea bani Naibata. Lambin toguh do homa haporsayaonni bani janji ni Naibata. Age pe “dob matua” sidea, sai totap do sidea mambaritahon pasal goran ni Naibata. Ai ma na mambahen holong tumang uhur ni Jahowa bani sidea.​—Basa Psalmen 92:13-16.

4. Aha do na porlu idingat sidea na dob matua na boi patoguhkon uhur ni sidea?

⁴ Nasiam na dob matua, pos ma uhurmu idingat Jahowa do ganup pambahenan ni nasiam laho mangidangi-Si. (Heb. 6:10) Malas uhur-Ni halani totap ringgas nasiam marbarita. Age pe bahat sitaronon ni nasiam, tapi totap do idalankon nasiam parentah ni Naibata. Ihorjahon nasiam do homa ganup tugas na ibere organisasi. Iojur nasiam do homa na legan ase mangidangi ibagas dinas sepenuh waktu. Holong tumang do uhur ni Jahowa bani nasiam. Marjanji do Ia ‘seng itadingkon Ia halak niidopan-Ni’. (Ps. 37:28) Anjaha ihatahon Ia do use, “Ronsi na ubanon hanima, Ahu do tong mangombah hanima.” (Jes. 46:4) Jadi, ulang ma iahap ham lang marguna be ham halani domma matua. Sasintongni harga tumang do nasiam ibagas organisasi ni Naibata.

5. Aha do na maningon tongtong idingat sanina botou na matua?

⁵ Sasintongni bahat do na ihorjahon sanina botou na dob matua ibagas organisasi ni Jahowa. Age pe domma hurang gogoh ni sidea, tapi bahat tumang do pangalaman ni sidea ibagas pangidangion. Sai totap do igunahon Jahowa sidea laho mangkorjahon marmasam tugas. Pardiateihon hita ma contoh humbani Bibel ampa humbani pangalaman ni sanina botou sonari on.

6-7. Bere ma contoh humbani Bibel pasal halak na matua na mandapot pasu-pasu humbani Jahowa.

⁶ Humbani Bibel, ibotoh hita ma piga-piga juakjuak ni Naibata na totap mangidangi-Si age pe domma matua. Umpamani, si Musa sanggah ia marumur 80 tahun, ipilih Naibata do ia gabe nabi ampa pemimpin bani halak Israel. Sonai homa si Daniel age pe domma 90 tahun lobih umurni, tapi totap do igunahon Naibata ia gabe nabi. Leganni ai  apostel Johannes, ra do domma 90 tahun lobih umurni sanggah ia manuratkon buku Pangungkabon.

⁷ Adong do homa halak na matua na lang bahat isaritahon pasal sidea ibagas Bibel. Halani ai, ra do gabe lang itanda hita sidea. Age pe sonai, totap do ipardiateihon Naibata sidea. Umpamani, si Simeon. “Halak na bonar anjaha na daulat” do ia. Ibere Naibata do hasangapon hu bani laho patugahkon aha na laho masa bani Jesus pakon si Maria. (Luk. 2:22, 25-35) Dong homa nabi naboru na mabalu na margoran si Hanna. Age pe domma marumur 84 tahun, tapi “seng meret ia hun rumah panumbahan”. Bahat do pasu-pasu na ibere Jahowa hu bani, anjaha boi do ia mangidah Jesus sanggah dakdanak. Harga tumang do si Simeon pakon si Hanna i lobei ni Jahowa.​—Luk. 2:36-38.

8-9. Sonaha sada botou totap ringgas mangidangi Jahowa age pe domma matua janah mabalu?

⁸ Sonari dong do homa sitiruon humbani sanina botou na matua na totap setia mangidangi Jahowa. Umpamani, Botou Lois Didur. Sanggah ia marumur 21 tahun, gabe perintis istimewa ma ia i Kanada. Dob ai, mangidangi ma ia pakon si John suamini ibagas horja kaliling. Dob ai, mangidangi do homa sidea i Betel Kanada sadokah 20 tahun. Tapi sanggah Botou Lois marumur 58 tahun, iontang ma sidea pindah hu Betel Ukraina. Ai dong do iahap sidea lang pala pindah sidea halani domma matua? Lang. Ijalo sidea do penugasan ai. Ilantik ma si John gabe anggota Panitia Cabang ijai. Tapi dob pitu tahun, marujung goluh ma si John. Age pe sonai, totap do Botou Lois ringgas mangkorjahon tugasni i Betel. Sonari marumur 81 tahun do ia, tapi totap do ia marhorja i Betel. Holong tumang do ganup anggota Betel Ukraina bani botou ai.

⁹ Sonari pe, dong do homa hasomanta na matua janah domma mabalu songon si Lois. Ra do hurang ipardiateihon hita sidea. Age pe sonai, maharga tumang do sidea i lobei ni Jahowa. Sai tongtong do idingat Jahowa na dob ibahen sidea laho mangurupi pasanganni ibagas pangidangion. Anjaha ronsi sonari pe totap do ringgas sidea mangidangi Naibata. (1 Tim. 5:3) Iojur sidea do homa na maposo i kuria ase totap semangat mangidangi Jahowa.

10. Aha do na boi itiru hita humbani Sanina Tony?

¹⁰ Sonari bahat do sanina botou na matua na tading i panti jompo. Pardiateihon ma pangalaman ni Sanina Tony na sonari tading i panti jompo. Bani bulan Agustus 1942, ididi ma ia i Pennsylvania, AS sanggah marumur 20 tahun. Lang piga dokah dobkonsi ai, iwajibkon pamarentah ma ia gabe tentara. Halani lang ra ia, ipenjarahon ma ia sadokah dua satongah tahun. Tongtong do  homa iajari ia istrini, ai ma si Hilda pakon dua anakni laho marlajar Bibel. Ongga do homa ia gabe pengawas umum (sonari koordinator badan penatua) bani tolu kuria sadokah dua tahun. Anjaha sompat do ia gabe pengawas distrik. Ongga do ia marbarita hu penjara janah mambahen acara partumpuan ijai. Dong do homa parlajar Bibelni ijai. Sonari domma marumur 98 tahun Sanina Tony. Tapi totap do marusaha ia mangkorjahon na boi tarbahensi laho mangidangi Jahowa rap pakon sanina botou i kuriani.

11. Sonaha hita boi patuduhkon holong bani sanina botounta na tading i panti jompo?

¹¹ Sonaha hita boi patuduhkon holong bani hasoman na tading i panti jompo? Anggo sosok situasini, sintua boi do mangurupi sidea roh hu partumpuan atap pe marbarita. Ganup do hita boi roh mangidah atap manalepon sidea. Anjaha ulang ma homa ihalupahon hita hasoman na tading i panti jompo na daoh hun kurianta. Sidea pe porlu do homa ipardiateihon. Sanggah hita marsahapi pakon sidea, ra do na gati isaritahon sidea pasal hagoluhan ni sidea. Tapi boi do homa isungkun hita pasu-pasu na ijalo sidea ibagas pangidangion. Anggo dear itangihon hita sarita ni sidea pasal ai, gabe ipatoguh do uhurta.

12. Pangalaman aha do na boi idapot hita humbani hasoman na matua?

¹² Anggo ra hita manangar sarita ni hasoman na matua, bahat do pangalaman ni sidea na boi ibotoh hita. Umpamani songon pangalaman ni Botou Harriette. Tading i New Jersey, AS do ia hinan janah ijai do homa kuriani. Tapi dobkonsi ai, pindah ma ia hu rumah ni boruni. Halani ai, gabe pindah kuria do homa ia. Iarahkon sanina botou i kuria ai ma ia marsarita. Gabe bahat do ibotoh sidea pangalaman ni botou ai ibagas pangidangion. Umpamani ibotoh sidea ma tahun 1920 ma mungkahni botou ai marlajar hasintongan. Sanggah marbarita botou ai, tongtong do iboan ia sikat gigi halani boi do ia itangkap anggo tardapot marbarita. Bani tahun 1933, domma dua hali ia ipenjarahon sadokah saminggu. Age pe lang Saksi suamini, tapi bujur do suamini ai ra mangurus tolu niombah ni sidea sanggah ia i penjara. Tontu bahat nari ope hasoman na matua na totap setia songon botou ai. Harga tumang do sidea ibagas kuria.

13. Mase harga tumang ganup sanina botou na matua ibagas organisasi ni Jahowa?

¹³ Tangkas ma harga tumang do sidea na matua ibagas organisasi ni Naibata. Bahat do pasu-pasu na ijalo sidea anjaha itonggor sidea do homa sonaha Jahowa manogu-nogu organisasi-Ni. Ra do homa sidea marlajar humbani kesalahan ni sidea. Jadi bahat tumang do na boi iparlajari hita humbani sidea na dob matua. (Pod. 18:4) Anggo ra hita manangihon sarita ni sidea, gabe lambin toguh ma haporsayaonta!

14. Domu bani 5 Musa 32:7, aha ma na porlu ibahen na maposo hubani hasoman na matua?

¹⁴ Hita ma na parlobei manisei na matua. (Basa 5 Musa 32:7.) Ra do lang tangkas be pangidah ni sidea. Marsahap pe sidea domma anget-anget anjaha lang pala tangkas homa sorani. Age pe sonai, gogoh ope uhur ni sidea. Anjaha totap do setia sidea bani Jahowa. (Par. 7:1) Dingat hita ma, harga tumang do sidea bani Jahowa. Halani ai, totap ma ipardiateihon hita sidea. Tiru hita ma nabi Elisa. Age pe isuruh nabi Elias ia laho, tapi lang ra ia. Tolu hali ma ihatahon si  Elisa bani si Elias sonon “seng anjai tadingkononku ham”.​—2 Raj. 2:2, 4, 6.

15. Aha do na boi isungkun hita bani hasoman na matua?

¹⁵ Ase ibotoh hita pangalaman ni sidea, dear ma isungkun hita sidea. (Pod. 1:5; 20:5; 1 Tim. 5:1, 2) Umpamani, “Sanggah poso ope ham, aha do na mambahen pos uhurmu on do hasintongan ai?” “Aha do na mambahen ham lambin dohor bani Jahowa?” “Sonaha carani hita boi totap marmalas ni uhur mangidangi Jahowa?” (1 Tim. 6:6-8) Dear ma tangihon hita sanggah marsarita sidea.

16. Anggo ra na maposo marsarita pakon na matua, aha ma gunani ai bani sidea na dua?

¹⁶ Anggo ra na maposo marsarita pakon na matua, haduasi do na mandapot guna. (Rom 1:12) Na maposo gabe lambin porsaya ma sidea sai tongtong do Jahowa mansarihon juakjuak-Ni. Anjaha na matua gabe iahapkon sidea ma ihaholongi sanina botou do sidea. Malas do homa uhur ni sidea mansaritahon pasu-pasu na iahapkon sidea.

17. Mase boi ihatahon lambin jenges do halak na matua na totap setia bani Jahowa?

¹⁷ Anggo domma matua, lang be jenges rupani atap pe angkulani. Tapi anggo i lobei ni Jahowa, lambin jenges do sidea. (1 Tes. 1:2, 3) Mase sonai? Halani sadokah martahun-tahun marusaha do sidea mangihutkon panogu-noguan humbani tonduy na pansing. Halani ai, lambin jenges ma paruhuran ni sidea. Jadi marusaha ma hita ase lambin mananda sidea. Pardiateihon hita ma sidea janah ra ma hita marlajar humbani sidea. Anggo ibahen hita sonai, boi ma ididah hita harga tumang do sidea ai ibagas organisasi ni Jahowa.

18. Aha do na laho iulas hita bani artikel na mangihut?

¹⁸ Tangkas ma maningon ipasangap na maposo do sanina botou na dob matua. Tapi na matua pe porlu do homa patuduhkon anggo sidea mangkargai na maposo. Ai do na mambahen kuria totap marsada. Bani artikel na mangihut, iulas hita ma sonaha na matua boi mangkargai na maposo.