1. Aha do na boi ibahen sidea na dob matua?

HALANI domma lambin matua, bahat do na marpangahap lang marguna be sidea ibagas organisasi ni Jahowa. Tongon anggo domma matua hita, domma hurang gogohta. Tapi, pangalaman na idapot hita hinan, boi do igunahon hita ai laho mangajari na maposo mangkorjahon tugas i kuria. Sahalak sanina na domma dokah gabe sintua mangkatahon, “Halani domma matua ahu lang bahat be na boi huhorjahon. Tapi malas uhur halani bahat sanina na maposo na boi mangkorjahon tugas i kuria.”

2. Aha do na laho iulas hita bani artikel on?

² Bani artikel na salpu, domma iulas hita sonaha na maposo boi marlajar humbani na matua. Bani artikel on iulas hita ma, dong na porlu ibahen na matua laho mangurupi na maposo. Umpamani, porlu do sidea martoruh ni uhur janah ibotoh sadia bahat na boi tarhorjahon sidea. Dob ai porlu do homa sidea ra manjalo pangurupion anjaha rosuh marsibere-bere. Anggo sonai ibahen sidea, gabe marsada ma kuria.

3. Domu bani Pilippi 2:3, 4, halak na sonaha do na martoruh ni uhur janah sonaha hita patuduhkon ai?

³ Ase na matua boi mangurupi na maposo maningon martoruh ni uhur do sidea. Halak na martoruh ni uhur ihira do  hasomanni lobihan marimbangkon dirini. (Basa Pilippi 2:3, 4.) Jadi anggo marusaha sidea na dob matua totap martoruh ni uhur, lang ipaksa sidea na legan mangihutkon cara ni sidea. Tapi ibotoh sidea bahat do prinsip ni Bibel na boi igunahon laho mangkorjahon sada tugas janah dear homa hasilni. (Par. 7:10) Leganni ai, ra do homa sidea mansaritahon pangalaman ni sidea sanggah mangkorjahon tugasni hinan ibagas organisasi. Tapi, ibotoh sidea do “na laho salpu do dunia on”. Halani ai porlu do sidea marlajar manggunahon cara na terbaru.​—1 Kor. 7:31.

4. Sonaha sintua kaliling boi maniru halak Levi?

⁴ Halani martoruh ni uhur, ibotoh na matua do lang bahat be na boi ihorjahon sidea. Umpamani, sintua kaliling na dob marumur 70 tahun ibere do tugas na legan bani sidea. Ra do lang urah mangihutkon penyesuaian ai halani sadokah on domma marosuh tumang sidea mangidangi hu kuria-kuria na legan. Tapi ibotoh sidea sanina na maposo ma na dearan mangkorjahon tugas ai. Itiru sidea do halak Levi. Anggo dong halak Levi na marumur 50 tahun, lang be sidea mangidangi i tabernakel. Tapi marusaha do sidea mangkorjahon na boi tarbahen sidea laho mangurupi na maposo. (4 Mus. 8:25, 26) Sonai homa sonari on, bahat do homa sanina na marumur 70 tahun na lang be mangidangi gabe sintua kaliling. Age pe sonai totap do sidea mangurupi sanina botou i kuriani.

5. Aha do na boi iparlajari hita humbani pangalaman ni si Dan pakon si Katie?

 ⁵ Pardiateihon ma pangalaman ni si Dan. Domma 23 tahun ia gabe sintua kaliling. Tapi sanggah ia marumur 70 tahun, itugaskon ma ia pakon istrini, si Katie gabe perintis istimewa. Sonaha pangahap ni sidea manjalo tugas ai? Ihatahon si Dan ma lambin bahat do na boi ihorjahon ia ibagas tugasni na baru. Umpamani, bahat do na maningon iurus ia i kuria. Ilatih ia do homa bahat sanina ase boi gabe siparugas. Anjaha iurupi ia do sanina botou laho manjaga gerai ampa marbarita i penjara. Jadi nasiam na dob matua, age pe nasiam sonari on totap mangidangi sepenuh waktu atap pe lang, tapi boi do nasiam mangurupi sanina botou na legan. Sonaha carani? Marusaha ma nasiam mambahen penyesuaian i kuria na baru, janah pingkirhon ma aha do na boi tarhorjahon nasiam laho mangurupi sanina botou.

6. Mase maningon ibotoh hita sadia bahat na boi tarhorjahon? Bere ma contoh.

⁶ Halak na martoruh ni uhur ibotoh do sadia bahat na boi tarhorjahonsi. (Pod. 11:2) Ai ma na mambahen ia totap marmalas ni uhur ibagas pangidangion. Isarupahon do sidea ai songon halak na mamboan mobil i tanjakan. Maningon ganti gigi do ia ase boi naik age pe gabe lambin anget mobil ai mardalan. Sonai ma homa halak na martoruh ni uhur. Halani ibotoh ia dong na lang boi tarhorjahonsi, gabe ra ma ia mambahen penyesuaian ase boi totap mangidangi Naibata ampa mangurupi halak na legan.​—Pil. 4:5.

7. Aha do buktini ibotoh si Barsilai adong na lang boi tarbahensi?

⁷ Pardiateihon ma sitiruon na ibahen si Barsilai. Sanggah ia marumur 80 tahun, iarahkon Raja Daud ma ia hu istanani. Tapi lang ra ia manjalo ontangan ai halani ibotoh ia domma matua ia janah bahat na lang boi be tarhorjahonsi. Jadi isuruh ia ma sahalak garama na margoran si Kimham na manggantihkonsi. (2 Sam. 19:35-37) Jadi, dear do anggo na matua maniru si Barsilai ase membere tugas-tugas i kuria hubani na maposo.

8. Sonaha ma pangahap ni si Daud sanggah ibotoh ia lang ia na ipilih Naibata laho pajongjongkon rumah panombahan?

⁸ Pardiateihon ma homa sitiruan na ibahen si Daud. Sihol do uhurni mambahen rumah panumbahan bani Jahowa. Tapi ihatahon Jahowa si Salomo do holi na pajongjongkon rumah ai. Hassi pe sonai lang manggila ia. Isumbangkon ia do bahan-bahan laho pajongjongkon rumah ai. (1 Kron. 17:4; 22:5) Lang gabe iahap si Daud ia do na sosokan laho mangkorjahon tugas ai, halani “poso ope ia anjaha seng marpangalaman”. (1 Kron. 29:1) Tapi ibotoh si Daud do Jahowa do na mamasu-masu horja ai ase saud, sedo halani umur atap pe pangalamanni sasada halak. Sonari on bahat do namatua na maniru si Daud, age pe sidea mandapot perubahan tugas tapi totap do sidea mandalankon tugas humbani gok ni uhur. Ibotoh sidea do ipasu-pasu Jahowa do sanina na maposo na mangkorjahon tugasni sidea hinan.

9. Sonaha sahalak anggota Panitia Cabang patuduhkon toruh ni uhur?

⁹ Dong homa sitiruon bani sanina Shigeo. Bani tahun 1976 sanggah ia marumur 30 tahun, ilantik ma ia gabe anggota Panitia Cabang. Dob ai bani tahun 2004 ilantik homa ia gabe koordinator Panitia Cabang. Dobkonsi lambin matua ia, ibotoh ia ma domma hurang gogohni janah lang bahat be na boi tarbahensi. Halani ai itonggohon ia ma pasal ai,  janah iahap ia ma dearan do sanina na posonan na gabe koordinator. Hassi pe ia lang be gabe koordinator, tapi totap do ia bekerja sama pakon na leganni. Anggo irimangi hita contoh ni si Barsilai, si Daud, ampa si Shigeo, ibotoh hita ma halak na martoruh ni uhur, ihargai ia do na maposo. Anjaha ibotoh sidea bahatan do na boi ibahen na maposo age pe otik pengalamanni. Janah lang ianggap sidea na maposo ai sainganni tapi hasoman sahorja.​—Pod. 20:29.

10. Sonaha do pangahap ni sanina na dob matua mangidah sanina na posonan humbani sidea?

¹⁰ Tontu ianggap sanina na matua do anggo sanina na maposo ai sibere-bere humbani Jahowa. Martarima kasih do sidea halani ai. Age pe domma matua sidea janah hurang gogohni tapi malas do uhur ni sidea, halani ibotoh sidea bahat sanina na maposo na ra mangurupi horja i kuria.

11. Songon na isaritahon bani Rut 4:13-16, mase na matua porlu manjalo pangurupion humbani na legan?

¹¹ Bani Bibel dong do contoh pasal halak na ra manjalo pangurupion humbani na legan, ai ma si Naomi. Mungkahni isuruh si Naomi do si Rut, parumaenni ai mulak. Tapi, totap do lang ra si Rut halani sihol do ia manghasomani si Naomi hu Betlehem. Ujungni, malas do uhur ni si Naomi manjalo pangurupion humbani si Rut. (Rut 1:7, 8, 18) Dobkonsi ai ipasu-pasu Jahowa do sidea. (Basa Rut 4:13-16.) Jadi dear do anggo sanina botou na dob matua maniru si Naomi.

12. Hunja ibotoh hita anggo si Paulus ra manjalo pangurupion humbani halak na legan?

¹² Apostel Paulus pe ijalo ia do pangurupion humbani na legan. Umpamani, martarima kasih do ia hubani halak Pilippi halani  itongos sidea aha na iporluhonsi. (Pil. 4:16) Martarima kasih do homa ia hubani si Timoteus na sai tongtong mangurupisi. (Pil. 2:19-22) Anjaha martarima kasih do ia bani Naibata halani dong piga-piga sanina na mangidahsi sanggah ia ibagas pardalanan laho ipenjarahon hu Rom. (Lah. 28:15) Sasintongni toguh do haporsayaon ni si Paulus, halani domma daoh pardalananni laho marbarita ampa patoguhkon kuria-kuria. Hassi pe sonai, martoruh ni uhur do ia manjalo pangurupion humbani sanina botou.

13. Sonaha sanina botou na dob matua boi manjalo pangurupion humbani halak na legan?

¹³ Nasiam na matua, boi do homa ijalo nasiam pangurupion humbani sanina botou na maposo i kuria. Umpamani, anggo adong sidea na ra manaruhkon ampa mangalop nasiam, mangurupi nasiam marbalanja, ampa membere na iporluhon nasiam jalo ma ai. Aha na ibahen sidea ai patuduhkon holong do uhur-Ni Jahowa bamu. Anjaha gabe lambin orot do holi ham pakon sidea anggo ra ham manjalo pambahenan ni sidea. Leganni ai, boi do nasiam totap mangurupi sidea ase lambin toguh haporsayaonni bani Jahowa. Boi do homa iojur ham na maposo ase ra mangkorjahon tugas-tugas i kuria. Anjaha dear do homa isaritahon ham pangalamanmu sanggah ham mangidangi. Anggo ibahen nasiam sonai, artini “martarima kasih” do ham halani domma itogu-togu Jahowa bahat na maposo hubagas organisasi-Ni.​—Kol. 3:15; Joh. 6:44; 1 Tes. 5:18.

14. Hunja ibotoh hita marosuh do si Daud marsibere-bere?

¹⁴ Dong homa na boi iparlajari hita humbani si Daud. Rosuh do ia marsibere-bere. Umpamani, ibere ia do duit ampa bahan-bahan na iporluhon laho pajongjongkon rumah panumbahan. (1 Kron. 22:11-16; 29:3, 4) Malas do uhurni mambere ai, age pe holi si Salomo do itanda halak na pajongjongkon rumah panombahan ai. Sonai homa sanina botou na dob matua, halani domma hurang gogohni ra do lang boi be sidea dihut mangurupi horja pembangunan ibagas organisasi. Hassi pe sonai boi nasiam mambere sumbangan. Boi do homa isaritahon nasiam pangalamanmu laho mangurupi na maposo ase dear mandalankon tugas ibagas organisasi.

15. Aha do na iajarhon si Paulus hubani si Timoteus?

¹⁵ Pardiateihon homa sitiruon na ibahen si Paulus, iarahkon ia si Timoteus mangkasomanisi marbarita hu kota-kota na legan. Iajari ia ma si Timoteus sonaha cara na dear laho marbarita ampa mangajar. (Lah. 16:1-3) Hasilni, gabe lambin pandei ma si Timoteus ibagas pangidangion. (1 Kor. 4:17) Dobkonsi ai, iajarhon si Timoteus do homa hubani halak na legan na idapot ia humbani si Paulus.

16. Mase si Shigeo ra manlatih halak na legan?

¹⁶ Sonari on, na matua ulang ma homa marpangahap anggo ilatih sidea na maposo gabe lang adong be holi horja ni sidea. Songon pangalaman ni si Shigeo na ipatugah nongkan ai, ilatih ia do anggota Panitia Cabang na legan. Tujuanni manlatih ai ma ase lambin dear horja parambilanon iatur i nagori ai. Hasilni, gabe adong ma sada sanina na boi manggantihkonsi gabe koordinator Panitia Cabang. Dobkonsi ai pe, totap do igunahon si Shigeo pangalamanni gabe anggota Panitia Cabang sadokah 45 tahun laho mangajari halak na legan. Anggo itiru nasiam si Shigeo, gabe bahat ma halak na boi iurupi nasiam.

17. Aha do na boi ibere sanina botou na dob matua hubani halak na legan? (Lukas 6:38)

¹⁷ Humbani sanina botou na matua, ibotoh  hita ma na mambahen malas uhurta, ai ma tongtong mangidangi Jahowa humbani gok ni uhur. Anjaha humbani sitiruon ni sidea, boi ma ididah hita sai dear do hasilni anggo idalankon hita prinsip ni Bibel. Age pe bahat parubahan ibagas organisasi, tapi marusaha do sanina botou na dob matua mambahen penyesuaian. Ra do dong na ididi dobkonsi matua, tapi totap do nasiam boi mangurupi na legan marhitei mansaritahon sonaha mungkahni nasiam mananda hasintongan. Boi do homa isaritahon nasiam pasu-pasu na idapot nasiam humbani Jahowa. Tontu malas do uhur ni na maposo boi marlajar humbani na matua. Anggo ra nasiam mansaritahon pangalamanmu, bahat ma pasu-pasu ibere Jahowa bamu.​—Basa Lukas 6:38.

18. Aha do hasilni anggo na matua pakon na maposo marsiurupan?

¹⁸ Jadi na matua pakon na maposo boi do marsipatoguhan. (Rom 1:12) Ganup hita dong bei do halobihanta. Na matua bahat do pangalamanni janah na maposo gogoh ope angkulani. Anggo ra na matua pakon na maposo marhasoman janah marsiurupan, parohkon pujian ma ai hubani Jahowa anjaha gabe marsada ma kuria.